UTOM MME APOSTLE 25

Paul Etiŋ Ikɔ Akaŋ Idem Esie Ke Iso Edidem Festus

1KE ini Festus edide ke edem oro, enye oto ke Caesarea ɔdɔk aka ke Jerusalem ke usen ita ema ekebe. 2Ndien ikpɔ oku ye ikpɔ owo mme Jew etiŋ ŋkpɔ enɔ enye edian Paul: 3mmɔ enyuŋ ekpe ye enye ete ada mme imɔ, ɔdɔŋ ekeda enye oro edi ke Jerusalem; edi mmɔ eduak nditie ke usuŋ mbet, ete iwot enye. 4Edi Festus ɔbɔrɔ ete, Paul odu ke idak ukpeme ke ŋkpɔkɔbi ke Caesarea, imɔ ke idem imɔ imɔŋ inyuŋ idaha ika do. 5Enye onyuŋ ɔdɔhɔ mmɔ ete, Yak ikpɔ owo mbufo esaŋa ye ami esuhɔre eka ko, ndien edieke owo oro eduede ŋkpɔ, yak mmɔ etiŋ edian enye.

6Ndien ke enye ama eketie ye mmɔ usen ibehe itiaita mme duop, enye ɔsuhɔre aka Caesarea. Ke ndaŋ-nsiere enye etie ke itie-ikpe, onyuŋ ɔnɔ uyo ete, eda Paul edi. 7Ke ini Paul edide, mme Jew, emi ekotode ke Jerusalem esuhɔre edi. Eda ekanare enye ekuk, edori enye ediwak mkpɔsɔŋ ikɔ eke mmɔ mikemeke ndiwut ete edi akpanikɔ. 8Paul etiŋ ikɔ akaŋ idem esie ete, Nduehe mbet mme Jew, nduehe temple, nnyuŋ nduehe Caesar. 9Edi sia Festus oyomde mme Jew enen-iso ye enye, enye ɔbɔrɔ Paul ete, Nte omonyime ndidɔk ŋka Jerusalem man ekpe ikpe fo do ebaŋa mme ŋkpɔ emi ke iso mi? 10Edi Paul ɔbɔrɔ ete, Nda ke iso itie-ikpe Caesar, emi odotde ndikpe ikpe mi do; nnamke mme Jew baba idiɔk ŋkpɔ kiet, nte afo omotim ɔfiɔk. 11Edieke ndide anam-idiɔk, ŋkonyuŋ nnamde se idotde mkpa, nsuaha ndikpa: edi edieke mme ŋkpɔ emi edoride mi baba kiet midige akpanikɔ, owo idikemeke ndiyak mi ntre nnɔ mmɔ. 12Mmotomo ubɔk Caesar. Festus oduk odu ye esop, ndien ɔbɔrɔ Paul ete, Omotomo ubɔk Caesar: eyewɔrɔ ke iso Caesar.

13Ekem ke ini ndusuk usen ebede, edidem Agrippa ye Bernice edi ke Caesarea edikɔm Festus. 14Sia mmɔ edude do ebigi, Festus emen ikɔ Paul onim ke iso edidem, ete, Owo kiet mɔmi, emi Felix ɔkɔkpɔŋde ke ŋkpɔkɔbi. 15Ke ini ndude ke Jerusalem, ikpɔ oku ye mbiowo mme Jew etiŋ ŋkpɔ enɔ mi ebaŋa enye, enyuŋ ekpe ye ami, ete mbiom enye ikpe. 16Edi mbɔrɔ mmɔ nte, Idige ido mbon Rome ndiyak owo ekededi ntre nnɔ, tutu mme owo eke edoride enye ikɔ esobo ye enye oro iso ye iso, enye onyuŋ enyene ifet ndikaŋ se etiŋde edori enye. 17Ntem ke adaŋemi mmɔ esaŋade ntre edi mi, nnamke ubigi, edi nsuhɔre ntetie ke itie-ikpe ke ndaŋ-nsiere, nnyuŋ nnɔ uyo nte eda owo oro edi. 18Edi ke ini mmɔ eke edoride enye ikɔ edahade eda, mmɔ itiŋke se ŋkodoride enyin idian enye; 19edi eyetiŋ ŋkpɔ edian enye ebaŋa ido Abasi mmɔ, ye Jesus, owo kiet emi ama akakpa, emi Paul ɔsɔŋɔde ɔdɔhɔ ete, Enye ke odu uwem. 20Sia mmentimke mfiɔk ido nte ŋkpasaŋade nduŋɔre oruk ikɔ oro, mmobup Paul mme enye onyime ndika Jerusalem, man ekpe ikpe esie do ebaŋa ŋkpɔ emi. 21Edi Paul ebeŋe ete enim ikɔ imɔ enɔ Caesar ikpe; ntre ke nnɔ uyo nte, ekpeme enye, tutu nnɔ enye esɔk Caesar. 22Agrippa ete Festus, Mkpama ndikop ke idem mi se owo emi enyenede nditiŋ. Festus ete enye, Mkpɔŋ eyekop enye.

23Ntre ke ndaŋ-nsiere Agrippa ye Bernice esaŋa ubɔŋ-ubɔŋ eka ke ufɔk ikpe, ye etubom mbon-ekɔŋ ye ikpɔ owo obio. Festus onyuŋ ɔnɔ uyo ete eda Paul edi. 24Ndien Festus ɔdɔhɔ ete, Edidem Agrippa, ye kpukpru mbufo emi etienede edu mi, mbufo ese owo emi kpukpru mme Jew emi edude ke Jerusalem ye ke edem emi ŋko etɔtde enye enɔ mi. Mmɔ esɔŋɔ uyo edɔhɔ ete, enye idotke ndidu aba uwem. 25Edi ŋkut nte enye inamke baba ŋkpɔ kiet eke odotde mkpa: sia enye ke idem esie onyuŋ otomode ubɔk Caesar, nduak ndinɔ enye esɔk Caesar. 26Edi nnyeneke akpan ŋkpɔ ndiwet nnɔ ɔbɔŋ mi mbaŋa enye. Ntre ke nda enye nnim ke iso mbufo, akpan-akpan ke iso fo, edidem Agrippa, man ŋkpenyene se ŋwetde, ke afo ama odomo ikɔ esie. 27Koro etie mi nte ndisime-ndisime ke idem, ndinɔ owo-ŋkpɔkɔbi eka, ke ini mmensianke se etiŋde edori enye.

Currently Selected:

UTOM MME APOSTLE 25: ENA

Highlight

Copy