UTOM MME APOSTLE 24

Mme Owo Edori Paul Uyo

1EDI ke ini usen ition ebede, Ananias akwa oku ɔsuhɔre edi ye ndusuk mbiowo ye odori-owo-ikɔ kiet, emi ekerede Tertullus: ndien mmɔ etiŋ ikɔ edian Paul enɔ andikara. 2Ke ini ekotde Paul edi, Tertullus ɔtɔŋɔ ndidori enye ikɔ ntem, ete,

Sia otode fi ke nnyin ikut ata emem, afo onyuŋ adade eti ekikere fo eneŋere se idiɔkde ke edem emi, 3nnyin imada esit ekɔm ibɔ ufɔn emi ke kpukpru usuŋ ye ke kpukpru ebiet, ata eti Felix. 4Edi nyomke ndifek fi ŋka iso; ntre ke mmekpe fi ubɔk nte okop ekpri ikɔ nnyin ke mfɔn-ido fo. 5Koro nnyin imokut ite owo emi edi owo afanikɔŋ; enye edemere nsɔŋ-ibuot ke otu kpukpru mme Jew emi edude ke ofuri ererimbot, onyuŋ edi ebe-iso owo ke otu ŋka emi etienede Jesus eyen Nazareth. 6Enye okodomo ndisabare temple ŋko-ŋko; edi nnyin imum enye, inyuŋ iyom ndibiere ikpe esie nte ibet etemede. 7Edi Lysias asaŋa ye mbon ekɔŋ edibɔ enye ke odudu osio nnyin ke ubɔk. 8Ama obup enye ke idem fo, eyekeme ndifiɔk mbaŋa kpukpru ŋkpɔ eke itiŋde idian enye. 9Mme Jew enyuŋ edian uyo edori enye ikɔ, ete, se etiŋde edi ntre.

10Ndien ke ini andikara ofuŋde ubɔk ɔnɔ enye ete etiŋ ikɔ, Paul ɔbɔrɔ ete,

Sia mfiɔkde nte afo edi ebierikpe ɔnɔ mbon edem emi ke ediwak isua, enem mi esit ndikaŋ idem: 11koro ibehe usen duopeba nte ŋkɔdɔk ŋka Jerusalem ndituak ibuot nnɔ Abasi, nte afo ekemede ndibup mfiɔk. 12Mmɔ ikwe mi nte nnenide eneni ye owo ke temple, mme nte ndemerede otu owo ke mme synagogue me ke obio. 13Mmɔ ikemeke ndiwut fi, ete, se mme imɔ etiŋde idian mi edi akpanikɔ. 14Edi mmonyime ke iso fo, nte nsaŋa ke usuŋ emi mmɔ ekotde isio erikpep nnam ŋkpɔ nnɔ Abasi mme ete nnyin; edi mmonim kpukpru se ewetde ke ibet ye mme prophet ke akpanikɔ: 15Mmonyuŋ ndori enyin ke Abasi, kpa nte mmɔ nde edoride, nte, nti owo ye mme idiɔk owo eyeset ke mkpa. 16Ntem ke ŋwana kpukpru ini ndinyene esit eke minyeneke se eduede Abasi ye owo. 17Ke emi, ke ediwak isua ema ekebe, ndi edem emi ndida enɔ nsɔk mbio-obio nnyin nnyuŋ ŋwa uwa. 18Ke ufɔt utom oro mmɔ ekut mi ke temple, nte owo eke ama akanam idem asana; nsaŋake ye otu, nnyuŋ nsaŋake ke ndutime. Edi ndusuk mme Jew emi etode Asia etibi afanikɔŋ emi; 19ndien mmɔ ekpodu mi ke iso fo, nditiŋ ŋkpɔ ndian mi, edieke mmɔ enyenede se etiŋde ye ami. 20Minyuŋ idige ntre, yak mmɔ emi ke idem mmɔ etiŋ ndudue eke mmɔ ekutde mi ke idem, ke ini ndade ke iso esop, 21ke mibɔhɔke uyo kiet oro nsiorode, ke ini ndade ke ufɔt mmɔ, nte, Ekot mi ikpe ke iso mbufo mfin emi ebaŋa eriset mme akpa-mkpa.

22Edi sia Felix ɔfiɔkde abaŋa Usuŋ oro akan, enye ɔnɔ mmɔ uyo ete ebet; onyuŋ ɔdɔhɔ mmɔ ete, Lysia akwa etubom mbon-ekɔŋ ama ɔsuhɔre edi, nyebiere ikɔ mbufo. 23Enye onyuŋ ɔnɔ centurion uyo, ete ekpeme Paul nte owo-ŋkpɔkɔbi, edi ɔfɔn ido ye enye, okunyuŋ ɔbiɔŋɔ mme ufan esie ndise mbaŋa enye.

24Edi ke ndusuk usen ema ekebe, Felix asaŋa ye ŋwan esie Drusilla, emi edide Jew aŋwan edi. Enye ɔdɔŋ ekekot Paul edi, onyuŋ okop se Paul enyenede nditiŋ mbaŋa mbuɔtidem ye Christ Jesus. 25Edi ke adaŋemi Paul ebuende ikɔ abaŋa edinen ido, ye mfara idem, ye ikpe eke edidide, Felix edikhe, onyuŋ ɔdɔhɔ Paul ete, Ka okuo kaŋa; mma nnyene ifet, nyetɔŋɔ ntak ŋkot fi edi. 26Enye odori enyin ete Paul eyenɔ imɔ okuk: ntre ke enye awak ndidɔŋ ekekot Paul, ndinyuŋ nneme nneme ye enye. 27Edi ke adaŋemi isua iba ebede, Porcius Festus ada itie Felix: ndien sia Felix oyomde mme Jew enen-iso ye enye, enye ɔkpɔŋ Paul ke itie ŋkpɔkɔbi.

Currently Selected:

UTOM MME APOSTLE 24: ENA

Highlight

Copy