UTOM MME APOSTLE 18

Paul Odu ye Priscilla ye Aquila ke Obio Corinth

1KE ŋkpɔ emi ema ekebe, enye adaha ɔkpɔŋ Athens ebe edi ke Corinth. 2Ndien enye okut Jew kiet emi ekerede Aquila, owo Pontus, emi asaŋade ye Priscilla ŋwan esie oto ke Italy edi ke ekpri ini emi ebede, koro Claudius ama okowuk ete kpukpru mme Jew ewɔŋɔ ke Rome. 3Ntre ke enye etiene mmɔ; ndien sia enye anamde oruk ubɔk-utom kiet ye mmɔ, enye oduŋ ye mmɔ ntre anam utom; koro nte ubɔk-utom mmɔ asaŋade mmɔ edi mme anam ufɔk-ɔfɔŋ. 4Enye onyuŋ ebuen ikɔ ke synagogue kpukpru sabbath, aŋwana ndinam mme Jew ye mme Greek enim ke akpanikɔ.

5Edi ke ini Silas ye Timothy etode ke Macedonia edi, ukwɔrɔ-ikɔ Abasi efik Paul, enye onyuŋ otim asian mme Jew ete Jesus edi Christ. 6Edi ke mmɔ enenide ye enye ɔkpɔsɔŋ enyuŋ esuŋide, enye ekeŋ ɔfɔŋidem esie onyuŋ ɔdɔhɔ mmɔ ete, Iyip mbufo osuk ɔkɔbɔ mbufo; nsaŋake do; ɔtɔŋɔde ke emi mmetiene mme Gentile. 7Ndien enye adaha ɔkpɔŋ mmɔ ekekpep ŋkpɔ ke ufɔk owo kiet emi ekerede Titus Justus emi onyuŋ abakde Abasi, ufɔk esie onyuŋ ada adiana synagogue. 8Edi Crispus, etubom synagogue, onim Ɔbɔŋ ke akpanikɔ, ye ofuri ufɔk esie; ediwak mbio Corinth enyuŋ ekop, enim ke akpanikɔ, enyuŋ ena baptism. 9Edi Ɔbɔŋ ɔdɔhɔ Paul ke ŋkukut ke okoneyo ete, Kufehe ndik, edi tiŋ ikɔ Mi, kunyuŋ udop uyo: 10koro ami do ye afo, ndomo owo kiet idinyuŋ ibuatke fi ndinam fi idiɔk: koro mmenyene ediwak owo ke obio emi. 11Ntre ke Paul oduŋ do isua kiet ye ɔfiɔŋ itiokiet, ekpep mmɔ ikɔ Abasi.

12Edi ke ini Gallio edide andikara Achaia, mme Jew edaha ke enyɔŋ ye esit kiet enam ikɔ ye Paul, enyuŋ eda enye eka ke itie-ikpe, edɔhɔ ete, 13Da emi oyut mme owo eteme mmɔ etuak ibuot enɔ Abasi ke ido nte ibet mitemeke. 14Edi ke ini Paul oyomde nditat inua ntiŋ ikɔ, Gallio ɔdɔhɔ mme Jew ete, Ekpededi ikɔ ndudue mme ikɔ oburobut ido, O mbufo mme Jew, ekpenen nte mme ime ŋkop mbufo: 15edi sia edide eneni eke mbufo enenide ebaŋa ikɔ ye enyiŋ ye ibet mbufo ese ebaŋa oro ke idem mbufo, nyomke ndibiere oruk ikɔ oro. 16Ntre ke enye ebin mmɔ ke itie-ikpe efep. 17Edi kpukpru mmɔ (mme Greek) emum Sosthenes, etubom synagogue, emia enye ke iso itie-ikpe. Edi Gallio idɔŋke dɔŋ enyin do.

18Paul odu do ediwak usen, ndien enye ɔkpɔŋ nditɔ-ete, oto do osio aka Syria, asaŋa ntre ye Priscilla ye Aquila. Ndien enye okporo idet esie ke Cenchreae, koro enye akakaŋade akaŋa. 19Ekem mmɔ edisim ke Ephesus, ndien enye ɔkpɔŋ mmɔ oro do: edi enye ke idem esie oduk ke synagogue, ebuen ikɔ ye mme Jew. 20Mmɔ ebeŋe enye ete afiak etie kaŋa ye mme imɔ, edi enye inyimeke: edi enye adaha ɔkpɔŋ mmɔ, 21ete mmɔ, Nyefiak ndise mbufo ke Abasi amade: ntem ke enye osio ɔkpɔŋ Ephesus. 22Ndien ke ini enye ebehede ke Caesarea, enye ɔdɔk ɔkɔkɔm ufɔk Abasi, ndien ɔsuhɔre aka ke Antioch. 23Ekem ke enye ama okodu do ndusuk ini, enye adaha akasaŋa ke isɔŋ Galatia ye Phrygia ke itie ke itie, ɔsɔŋɔ kpukpru mbet esit.

24Ekem Jew kiet emi ekerede Apollos, emi otode ke Alenxandria, onyuŋ edide owo udɔnikɔ, edi ke Ephesus: enye onyuŋ ɔsɔŋɔ ɔfiɔk ŋwed Abasi eti-eti. 25Ema eteme owo emi usuŋ Ɔbɔŋ; ndien sia enye edide owo ifiop-esit, enye etiŋ onyuŋ otim ekpep mme owo ŋkpɔ abaŋa Jesus, okposuk edi nte enye ɔfiɔkde baptism John ikpɔŋ. 26Enye ɔtɔŋɔ nditiŋ ikɔ ntre ye uko ke synagogue. Edi ke ini Priscilla ye Aquila ekopde ikɔ esie, mmɔ eda enye enyɔŋ ufɔk, etim eyarare usuŋ Abasi enɔ enye. 27Edi ke ini enye oyomde ndibe ŋka ke Achaia, nditɔ-ete esɔŋɔ enye esit, enyuŋ ewet ŋwed enɔ esɔk mbet ke edem oro, ete edara enye. Ndien ke adaŋemi enye osimde do, enye ɔsɔŋɔ aŋwam mmɔ emi ekonimde ke akpanikɔ oto ke mfɔn Abasi. 28Koro enye akande mme Jew aŋwa-aŋwa ke eneni, osioŋo ikɔ ke ŋwed Abasi, owut ete Jesus edi Christ.

Currently Selected:

UTOM MME APOSTLE 18: ENA

Highlight

Copy