UTOM MME APOSTLE 17

Paul ye Silas Eka Obio Thessalonica

1EKEM ke mmɔ ema ekesaŋa ke Amphipolis ye Appolonia ebe, mmɔ edisim ke Thessalonica, emi synagogue mme Jew odude do. 2Ndien nte ido Paul edide, enye oduk etiene mmɔ; ndien ke ofuri sabbath ita enye osio ikɔ ke ŋwed Abasi ada ebuen ikɔ ye mmɔ, 3onyuŋ asian owut mmɔ, ete Christ enyene ndikpa nnyuŋ nset ke mkpa; onyuŋ ɔdɔhɔ mmɔ ete, Jesus, emi ŋkwɔrɔde nnɔ mbufo, edi Christ. 4Ndusuk owo enyime, enyuŋ edian idem ye Paul ye Silas; ekɔrɔ ye ediwak mme Greek emi ebakde Abasi ye ediwak ikpɔ iban. 5Edi mme Jew efibe mmɔ ufup, eda ndusuk mbukpo owo ke otu mbio-obio edian idem, enyuŋ ekɔ otu owo ebon, esin ndutime ke obio; mmɔ enyuŋ eyom ndibuŋ ufɔk Jason eŋwana ndida mmɔ oro ŋwɔrɔ nsɔk mbio-obio. 6Edi ke adaŋemi mmɔ mikwe mmɔ oro, mmɔ eduri Jason ye ndusuk nditɔ-ete edi ke iso mbɔŋ obio, efiori ete, Mme anditimere ererimbot emi edi mi ŋko-o; 7Jason amada mmɔ esin ke ufɔk; mmɔ kpukpru ebiat mme ewuhɔ Caesar, ete, Edidem eŋwen odu, emi ekerede Jesus. 8Ndien esit otimere ofuri otu owo ye mbɔŋ obio, ke ini mmɔ ekopde ikɔ emi. 9Edi ke mmɔ ema ekenam Jason ye mmɔ efen oro etie ubiɔŋ, ete ndutime ididuhe, esana mmɔ eyak.

10Edi idaha oro nditɔ-ete enam Paul ye Silas edaha ke okoneyo eka ke Beroea: ndien ke ini mmɔ esimde do, mmɔ eduk ke synagogue mme Jew. 11Mmɔ emi edi enyene-ido ekan mme andiduŋ Thessalonica; mmɔ ekop ikɔ ke erinyime esit, enyuŋ eduŋɔre ŋwed Abasi ke usen ke usen, ete ifiɔk mme mme ikɔ oro ekem ntre. 12Ntem ke ediwak mmɔ enim ke akpanikɔ, ediwak ikpɔ iban Greek ye irenowo ŋko. 13Edi ke ini mme Jew emi edude ke Thessalonica ekopde ete Paul ke ɔkwɔrɔ ikɔ Abasi ke Beroea ŋko, mmɔ enyuŋ edi do edinam mbio-obio ebumere esin ndutime. 14Edi kpa idaha oro nditɔ-ete enam Paul adaha aka ŋkaŋ inyaŋ-inyaŋ: edi Silas ye Timothy esuk edu do. 15Edi mmɔ emi edade Paul usuŋ eda enye esim ke Athens: ndien ke ini mmɔ ema ekebɔ etop emi Paul otobode, ete edɔhɔ Silas ye Timothy esɔp ebine imɔ, mmɔ efiak enyɔŋɔ.

16Ke adaŋemi Paul etiede ke Athens ebet mmɔ, esit ayat enye ndikut nte ndem eyɔhɔde ke obio. 17Ntre ke enye ebuen ikɔ ke synagogue ye mme Jew ye mme abak Abasi, onyuŋ eneme kpukpru usen ke aŋwa-urua ye mmɔ eke esobode ye enye. 18Ndusuk mme ɔfiɔkŋkpɔ owo, emi etienede ukpep-ŋkpɔ Epicurus ye ukpep-ŋkpɔ mme Stoic, eneni eneni ye enye. Ndusuk mmɔ ete, Nso ke owo emi oyom nditiŋ ye mbubek ifiɔk esie? Ndusuk eŋwen ete, Enye etie nte andikwɔrɔ isen Abasi: mmɔ etiŋ ntre koro enye ɔkwɔrɔde Jesus ye ediset ke mkpa. 19Ntre ke mmɔ eda enye edi ke Areopagus, ete enye, Nte eyesian nnyin obufa ukpep-ŋkpɔ fo emi? 20Afo amada ndusuk isen ŋkpɔ etiŋ esin nnyin ke utɔŋ: ntre ke nnyin iyom ndifiɔk se mmɔ ewɔrɔde. 21Koro kpukpru mbio Athens ye isen owo eke edaŋde do idaha ini mmɔ inam ŋkpɔ efen ibɔhɔke nditiŋ mbufa ŋkpɔ ndinyuŋ ŋkop mbufa ŋkpɔ. 22Ntre ke Paul ada ke ufɔt Areopagus, ɔdɔhɔ ete,

Mbufo mbio Athens, mmokut nte ke kpukpru usuŋ mbufo edi 23mme andibak mme abasi eti-eti. Koro nte nsaŋade mbe nse mme ŋkpɔ eke mbufo ekponode, ŋkut itie-uwa kiet ŋkɔrɔ do, emi ewetde ke esit ete, EMI ENYENE ABASI EMI OWO MIFIƆKKE. Mmɔdo se mbufo etuakde ibuot enɔ ke unana-ifɔk, kpa oro ke ami ŋkwɔrɔ nnɔ mbufo. 24Abasi, emi okobotde ererimbot ye kpukpru se idude ke esit, sia Enye edide Ɔbɔŋ enyɔŋ ye isɔŋ, iduŋke ke mme temple eke ubɔk owo enamde; 25owo inyuŋ idaha ubɔk inam ŋkpɔ inɔ Enye, nte emi Enye anande ŋkpɔ; koro edi Enye ɔnɔ kpukpru owo uwem, ye ibifik, ye kpukpru ŋkpɔ: 26Enye anam kpukpru mme idut eto ke ekpuk kiet ewɔrɔ ediduŋ ke ofuri iso isɔŋ: onyuŋ edi Enye onim iduɔk ini uwem mmɔ ye adaŋa ebiet iduŋ mmɔ; 27kpaŋ mmɔ eyom Abasi, ete ndusuk ifiɔŋɔ ubɔk iŋwana ndisim Enye, nnyuŋ ŋkut Enye; okposuk edi nte Enye miyomke usuŋ ye baba nnyin owo kiet. 28Koro nnyin idodu ke Enye, inyuŋ isaŋa ke Enye inyuŋ inyene uwem nnyin ke Enye; kpa nte ndusuk ke otu mme etiŋ-uto mbufo edɔhɔde ete,

Nnyin inyuŋ idi nditɔ Esie.

29Sia nnyin idide nditɔ Abasi ndien, nnyin ikpesehe ite Abasi ebiet gold, mme silver, mme itiat, eke edade usɔ ye ekikere owo esɔi. 30Abasi ofumi ini ndisime oro; edi ke emi Enye owuk kpukpru owo ke kpukpru ebiet, ete mmɔ ekabare esit: 31koro Enye omonim usen eke Enye edikpede ikpe ɔnɔ ererimbot ke edinen ido, ke ubɔk Owo emi Enye ekemekde; Enye onyuŋ ada erinam emi Enye anamde Owo oro eset ke mkpa ayarare owut kpukpru owo ete edidi ntem.

32Ke ini mmɔ ekopde ebaŋa ediset ke mkpa, ndusuk mmɔ esak enye; edi mmɔ eken ete, Nnyin iyekop se etiŋde abaŋa ŋkpɔ emi usen eŋwen. 33Ntem ke Paul ɔwɔrɔ ɔkpɔŋ mmɔ. 34Edi ndusuk mmɔ eyire enye enyuŋ enim ke akpanikɔ; Dionysius owo Areopagus ye ŋwan emi ekerede Damaris, ye mmɔ efen etiene edu ke otu mmɔ oro.

Currently Selected:

UTOM MME APOSTLE 17: ENA

Highlight

Copy