UTOM MME APOSTLE 16

Timothy Etiene Paul Ye Silas

1NDIEN enye edi ke Derbe ye Lystra; ndien sese mbet kiet odu do emi ekerede Timothy; eka esie edi Jew emi onimde ke akpanikɔ, edi ete esie edi Greek. 2Nditɔ-ete emi edude ke Lystra ye Iconium ebuk eti mbuk ebaŋa owo emi. 3Paul oyom ete enye asaŋa ye imɔ aka mme ebiet; ntre ke ada enye onim mbobi kabaŋa mme Jew emi edude ke edem oro: koro kpukpru mmɔ efiɔkde ete ete esie edi Greek. 4Ndien nte mmɔ esaŋade ke usuŋ ebe ke mme obio, eyak mme ewuhɔ, emi mme apostle ye mbiowo emi eduŋde ke Jerusalem ekewukde, enɔ mmɔ ete enim. 5Ntre ke mme ufɔk Abasi esɔŋɔ ke mbuɔtidem, ibat mmɔ onyuŋ ɔtɔt ke usen ke usen.

6Ekem mmɔ esaŋa ke Phrygia ye Galatia ebe; edi Edisana Spirit ɔbiɔŋɔ mmɔ nditiŋ ikɔ ke Asia; 7edi ke adaŋemi mmɔ esimde edem eke asakde iso ese Mysia, mmɔ edomo ndiduk ke Bithynia; edi Spirit Jesus inyimeke mmɔ eduk. 8Ntre ke mmɔ esaŋa ebe Mysia esuhɔre edi ke Troas. 9Ndien Paul okut ŋkukut ke okoneyo; owo Macedonia kiet ke ada ebeŋe enye ete, Be di ke Macedonia, dinyaŋa nnyin. 10Ke adaŋemi enye okutde ŋkukut oro, kpa ke idaha oro nnyin iyom usuŋ nte ikade ke Macedonia, ibiere ite, Abasi okot nnyin ete ikwɔrɔ gospel inɔ mmɔ.

11Ntre ke nnyin isio ke Troas, ineŋere iwat ika Samothrace, ndien ke ndaŋ-nsiere isim Neapolis; inyuŋ ito do ikosim Philippi, 12emi edide obio Macedonia, ebe-iso obio ke edem oro, onyuŋ edide colony: nnyin inyuŋ idaŋ ke obio oro ndusuk usen. 13Ke sabbath nnyin iwɔrɔ ke inua-otop ikaka ke mben akpa, ɔtɔ nte nnyin isede ite enim itie-akam do: inyuŋ isuhɔre itetie itiŋ ikɔ inɔ iban emi edide edibono do ɔtɔ kiet. 14Ndien ŋwan kiet ekere Lydia, emi otode ke obio Thyatira, anyam ididuot ɔfɔŋ, emi okponode Abasi, okop se itiŋde: Ɔbɔŋ onyuŋ eberere enye esit, anam enye ɔbiɔŋ utɔŋ ɔnɔ ikɔ oro Paul etiŋde. 15Edi ke ini enimde enye ye ufɔk esie baptism, enye ekpe ye nnyin ete, Edieke mbufo ebatde ete ndi owo akpanikɔ nnɔ Ɔbɔŋ, edi ke ufɔk mi editie do. Enye onyuŋ eyire nnyin.

16Edikem, nte nnyin isaŋade ika itie-akam, eyen-aŋwan kiet, emi enyenede spirit idiɔŋ, osobo ye nnyin, emi adade idiɔŋ ebre ɔkɔ ediwak okuk ɔnɔ mme ete-ufɔk esie. 17Enye etiene Paul ye nnyin ke edem, ofiori ete, Mmɔ emi edi ikɔt Abasi Andikoŋ-ŋkan, emi ekwɔrɔde usuŋ erinyaŋa enɔ mbufo. 18Enye onyuŋ anam emi ediwak usen. Edi esit otimere Paul eti-eti, enye onyuŋ ɔwɔŋɔre ɔdɔhɔ spirit oro ete, Mmowuk fi ke enyiŋ Jesus Christ nte ɔwɔrɔ enye ke idem. Ndien spirit ɔwɔrɔ kpa ke ini oro.

19Ke ini mme ete-ufɔk esie ekutde ete idori-enyin udori mmimɔ amatak, mmɔ emum Paul ye Silas eduri mmɔ eka ke aŋwa-urua ke iso mme andikara; 20ndien ke adaŋemi edade mmɔ eka ke iso mme ebierikpe, ete, Mmɔ emi edi mbon Jew: mmɔ ke etimere obio nnyin ekaha, 21enyuŋ ekpep ido eke minenke nnyin ndinyime nnyuŋ nnim, sia nnyin idide mbon Rome. 22Ndien otu owo edaha ke enyɔŋ etiŋ ŋkpɔ edian mmɔ: mme ebierikpe enyuŋ ekpɔk ɔfɔŋidem mme apostle efep, enɔ uyo ete eda eto etim mmɔ. 23Edi ke ema ekemia mmɔ ediwak ubɔk, esin mmɔ ke ufɔk-ŋkpɔkɔbi, enyuŋ enɔ ekpeme-ufɔk-ŋkpɔkɔbi uyo ete otim ekpeme mmɔ. 24Sia enye ama ɔkɔbɔ oruk item emi, enye ada mmɔ esin ke ata esit-esit ufɔk-ŋkpɔkɔbi, onyuŋ afat mmɔ ukot ke ebuka. 25Edi ke ufɔt okoneyo Paul ye Silas ebɔŋ akam enyuŋ ekwɔ ikwɔ enɔ Abasi, mbon-ŋkpɔkɔbi enyuŋ ekop; 26ndien idaha oro akwa unyek-isɔŋ otibe, tutu enyeŋe ɔfuri ufɔk-ŋkpɔkɔbi; ndien idaha oro kpukpru usuŋ eberere; ŋkpɔkɔbi enyuŋ ekpɔhɔre kpukpru owo ke ubɔk. 27Edi ke ini ekpeme-ufɔk-ŋkpɔkɔbi obumerede ke idap, okut mme usuŋ ufɔk-ŋkpɔkɔi nte enade iŋwaŋ, enye osio ofut esie ndiwot idem, koro enye esede ete mbon-ŋkpɔkɔbi ema efeŋe. 28Edi Paul ofiori ke ɔkpɔsɔŋ uyo ete, Kunam idem fo idiɔk: koro nnyin kpukpru mi. 29Ntem ekpeme-ufɔk-ŋkpɔkɔbi ete eda utuenikaŋ edi, onyuŋ ɔfrɔ oduk ufɔk; idem aduai enye ɔnɔ ndik, enye onyuŋ ɔduɔ ke iso Paul ye Silas, 30ada mmɔ ɔwɔrɔ, ete mmɔ, Mme ete, nnyene ndinam nso man enyaŋa mi? 31Mmɔ ete enye, Buɔt idem ye Ɔbɔŋ Jesus, ndien eyenyaŋa fi ye ufɔk fo. 32Ndien mmɔ ekwɔrɔ ikɔ Ɔbɔŋ enɔ enye, ye kpukpru mmɔ emi edude ke ufɔk esie. 33Kpa ke hour oro ke okoneyo enye ada mmɔ aka ekeyet nde ufen mmɔ; idaha oro ŋko enye ana bpatism ye ofuri ufɔk esie. 34Ndien enye ada mmɔ oduk ufɔk onyuŋ ɔdiɔk udia ke iso mmɔ onyuŋ adat esit eti-eti ye ofuri ufɔk esie, sia mmɔ enimde Abasi ke akpanikɔ.

35Edi ke ini eyo esierede, mme ebierikpe edɔŋ mme isuŋutom ekedɔhɔ ete, Yak owo oro enyɔŋɔ. 36Ekpeme-ufɔk-ŋkpɔkɔbi emen ikɔ oro etiŋ ɔnɔ Paul ete, Mme ebierikpe ema enɔ uyo ete eyak mbufo enyɔŋɔ; ewɔrɔ edi ndien enyɔŋɔ ke ifure. 37Edi Paul ɔdɔhɔ mmɔ ete, Mmɔ ema emia nnyin emi idide nditɔ Rome ke aŋwa, ke ini ikpe mibiomke nnyin, enyuŋ esin nnyin ke ufɔk-ŋkpɔkɔbi; nte mmɔ eyom ke emi ndisio nnyin ke ndibe? Baba O! Yak mmɔ edi ke idem mmɔ edida nnyin ewɔrɔ. 38Mme isuŋutom emen ikɔ emi etiŋ enɔ mme ebierikpe; edi ndik anam mmɔ ke ini ekopde ete mmɔ oro edi nditɔ Rome; 39mmɔ enyuŋ edi edikpe mmɔ oro ubɔk, enyuŋ eda mmɔ ewɔrɔ, enyuŋ ekpe ye mmɔ ete ekpɔŋ obio. 40Ntem ke mmɔ ewɔrɔ ke ufɔk-ŋkpɔkɔbi ekeduk ke ufɔk Lydia: ndien ke mmɔ ema ekekut nditɔ-ete, enyuŋ edɔŋ mmɔ esit, mmɔ edaha enyɔŋɔ.

Currently Selected:

UTOM MME APOSTLE 16: ENA

Highlight

Copy