MATIU 21

I Jisas mo vano vaki Serusalem vae a tangaloi rusa ramo tabe hakeki na hinana

(Mak 11.1-11; Luk 19.28-40; Sione 12.12-19)

1Ramo garagarani mana gwatuivanua lakua Serusalem, vae rau maravuti ba lo gwatuivanua Betvas lo Vuti na Vikai* a Violev. Lo taro hi i Jisas mo hora na nona ngwalagelo kairua, 2mo viti lakwararua kwara, “Kuru vano vaki lo gwatuivanua kelekele hinea mo tu koro na nakomiru. Kuru ne hodilai na dogi, a natuki aia maia, rau saniki-bibirarua. Kuru mo teri na karo tirarua, kuru mo lavirarua vanamai vaki maiau. 3Diko te tangaloi mo viti na kinau tea, kuru mo viti lakwae kwara, ‘A Hugwe* u lengairarua,’ vae ne tirakirarua vakatukwale raru ne vanamai.”

4A kinau hi u mule luna hoki na leo hinea a tangaloi* duruduruki mo vitia tuai kwara,

5“Tulu viti lakwa na tangaloi na gwatuivanua lakua Saeon* kwara,

‘Hikani a nomiu Hugwe Lakua

u vanamai vaki maikamu.

Aia a tangaloi domi magemu

u kwalao lo dogi,

u kwalao lo dogi kelekele, a natuki.’ ” #a Aes 62.11; b Sek 9.9

6Hikani a ngwalagelo raru mo vano raru vai a havakinau hi i Jisas mo viti lakwararua kwara raru ne vai. 7Raru mo lavi na dogi mana natuki, raru mo teri na kakavugaru raru mo verakira hivoulu lo dogi kairua hi, vunu i Jisas mo hugu luna kairuaki. 8A vao u lakua haburu ramo vola kakavuga lo hala, tuaki rau tai a rangai-vikai ramo taura lo hala. 9A vao hinea ramo lakao tomuaki i Jisas mana vao hinea ramo hurihuri takuni ramo maraka ramo vingaraki ramo viti

“!Keu kaluhakinigo

a Gwaloana noi Devit!

Hugwe i God.

Ko vai tabetabeki na tangaloi

hinea u vanamai lo hinamu.

Aira vunu hinea lolo taetae

rau kaluhakinigo.” #a Sam 118.25-26; Mat 23.39; Luk 13.35; b Mat 21.15

10Lolona i Jisas mo soro vaki Serusalem, a tangaloi doluaki na vanua hi ramo vikwahaki haburu. Ramo uduhuri ramo viti kwara, “?Ihe hi?”

11A vao ramo daraki ramo viti kwara, “I Jisas, aia a tangaloi duruduruki tina gwatuivanua Nasaret lo vanua Galili*.”

I Jisas mo vano vaki lolo Vanua Kokona noi God

(Mak 11.15-19; Luk 19.45-48; Sione 2.13-22)

12I Jisas mo soro tilolo Vanua* Kokona noi God, mo livu letiuki savira hinea rau hokahokaki kinau rau volivoli lolona, mo hale bohiki na tevo na riririri mane* mana hagehagele na tangaloi na hokahokaki kwiba. 13Mo viti lakwara kwara, “U uliana lo Uliuli* Kokona kwara i God u viti ‘A Ingwagu ne kwareki a ingwa na tiutangaroa.’ Vae i kamu tulu mo bohikinia mo mulemai ki hilihili na tangaloi babalua.” #a Aes 56.7; 60.7; b Jer 7.11

14A tangaloi a mataga rau dodo mana tangaloi rau lukuluku ramo vanamai vaki mai Jisas lolo loloiara* na Vanua* Kokona noi God mo vakahikinira. 15A tangaloi* lingilingi lalakua mana tangaloi* kikikila na Uliuli Kokona ramo tagai na kinau karekarea hinea i Jisas mo vai. Vake ramo rongo na sakwarigi ramo kwaha karakara lolo Vanua Kokona noi God ramo viti kwara, “!Kaluhaki na Gwaloana noi Devit!” Vae a tangaloi aira vano hi ramo lologute. #Mat 21.9 16Hikani ramo kwaha lui Jisas ramo viti kwara, “?Ku rongo na havakinau hi ramo viti?”

I Jisas mo daraki mo viti kwara, “Io kareaki, nu rongo. ?Tulu he valu tea lo Uliuli Kokona hini mo viti kwara, ‘A sakwarigi maira hinea rau kanikani ti retahiga radu, ku vaira ramo kaluhakinigo lo hala bakoto’?” #Sam 8.3

17Vunu i Jisas mo tirakinira, mo ngwalua tina gwatuivanua lakua hi mo vano vaki lo gwatuivanua Betani mo hugu takwa-hi bongi.

A vikai a hinaki a vivik hinea he kwai tea

(Mak 11.12-14,20-24)

18Mavukona sirovobongi i Jisas mo mule taliku vaki lo gwatuivanua lakua, mo marakatia. 19Mo tagai na vikai* a hinaki a vivik u tu behi na hala, mo vano vaki garagarani vae he hagwe na kwaiki te luna, aia a rauki kehekeheki. Vae mo kwaha mana vikai hi mo viti kwara, “Konahe kwai te taliku vohoki.” Heheriki a vikai hi mo goru. #Luk 13.6

20A nona ngwalagelo ramo tagai na kinau hi ramo idila. Ramo uduhuri ramo viti “?A vikai hi u goru heheri kworohokinia?”

21I Jisas mo daraki mo viti kwara, “Kareaki na viti lakwakamu, diko tulu hauhuri, tulu he domi te kairua, vae tulu ne vai lai hokinia nomo vai lakwa na vikai hika. Hetea aia hika kehekeheki, vae tulu ne vai lai kwara tulu ne viti lakwa na vuti hika kwara, ‘Ko maraka ko rovo tilolo tahi sibomu,’ vae ne mule luna kwehini. #Mat 17.20; Luk 17.6; 1 Kor 13.2 22Diko tulu hauhuri, tulu ne lai a havakinau hi tulu mo uduhuri lo tiutangaroa.” #Mat 7.7-11; 18.19; Sione 14.13-14

A leo uhiuhi kwara ihe u rivuki i Jisas

(Mak 11.27-33; Luk 20.1-8)

23I Jisas mo mulemai taliku vaki lolo Vanua* Kokona noi God, mo huhui. Vae lolona hi a tangaloi* lingilingi lalakua mana ngwarasea* nona gwaloana noi Isrel* ramo vanamai vaki maia ramo uduhuri kinia ramo viti kwara, “?Ku hagwe na nomu bakotoana ave komo toko vai na kinau vano hi? ?Ihe u rivukiko kinia?”

24I Jisas mo daraki lakwara mo viti kwara, “I nau vake na uduhuri na leo katukwale kikamu. Diko tulu ne daraki lakweau vae i nau nari viti lakwakamu kwara nu hagwe na nogu bakotoana ave nomo toko vai na kinau vano hi. 25?Ihe u rivuki i Sione kwara ne bavtaes na tangaloi? ?I God diko a tangaloi?”

Hika ramo toko vikwahaki luna aira muleki ramo viti kwara, “?Tana viti kworoho? Diko tana daraki kwara, ‘I God u rivukia,’ ne viti lakwakita kwara, ‘?Kworohokinia tulu he va hauhuri te lui Sione?’ #a Sione 1.6,33; b Mat 21.32; Luk 7.30 26Vae diko tana viti kwara, ‘A tangaloi rau rivukia,’ vae tau mataku kina tangaloi, huri aira vunu rau hago lo leoki kwara i Sione aia a tangaloi* duruduruki kareaki.” #Mat 14.5; 21.46 27Hikani ramo daraki lakwai Jisas ramo viti kwara, “Kehe kikilai tea.”

Vunu i Jisas mo kwaha maira mo viti kwara, “I nau vake nahe viti te lakwakamu kwara nu hagwe na nogu bakotoana ave nomo vai na kinau vano hi.”

A tavaluileo huri na natu ngwera kairua

28Vunu i Jisas mo kwaha maira taliku mo viti kwara, “Tulu domidomi lo kinau hika. A tangaloi katukwale i natuna kairua. Mo vano vaki mana natu tomua mo kwaha maia mo viti kwara, ‘Mama, hika karagwa ko vano ko va boloki lolo bulada agoago*.’ #a Luk 15.11; b Mat 20.1 29A natu hi mo daraki mo viti ‘Nohe lengaia tea,’ vae vaki takuni mo bohi na domina mo vano vaki lolo agoago. 30Vunu i tamagaru mo vano vaki mana natu kairuaki mo kwaha maia mo viti hokinia mo viti lakwa na natu tomua. A natu hi mo daraki mo viti ‘Karea, Mama, na vano,’ vae he vano tea. 31?Vae makive tirarua u tabe na leo i tamagaru?”

Ramo daraki ramo viti “A natu tomua.”

Vunu i Jisas mo kwaha maira mo viti “Kareaki na viti lakwakamu, a tangaloi* na vilevile mane* a takis nona kavman mana ravavine tu huri hala rau vanamai vaki mai God u heheri siletikamu kwara aia ne hugwe korora. 32Nu viti kwehini, huri i Sione a tangaloi na bavtaes tangaloi u vanamai vaki maikamu u vosangikamu kina hala bakoto kwara tulu ne huria, vae tulu he hauhuri te luna. Vae a tangaloi na vilevile mane a takis nona kavman mana ravavine tu huri hala ramo hauhuri luna. Tulu mo tagai na kinau vano hi vae vaki takuni tulu he bohi na domimiu tea kwara tulu ne hauhuri luna.” #a Mat 21.25; Luk 7.30; b Luk 3.12; 7.29; d Luk 7.30

A tavaluileo huri na tangaloi hati rau tava tano

(Mak 12.1-12; Luk 20.9-19)

33Vunu i Jisas mo kwaha maira taliku mo viti “Tulu rongo na tavaluileo hika vake. A hugwe katukwale u rivuki na karo aira hi ramo toko vaivai waen lo kwaiga, a talu katukwale. Mo hau na ara dalia, mo keli na kwalu huri na kaigwole na waen, mo tabe na ingwa na kaitagahuri u tu aulu kwara ne tagataga mana talu hi. Vunu mo tirakinia lakwa na tangaloi kwara rana boloki luna rana tava lakwae, mo tiraki na tatana mo vano mo lagalaga lo vanua dolua vakahao. #Aes 5.1-2 34Lo taro na makuriana mo hora na nona tangaloi boloki vaki mana tangaloi tava tano vano hi kwara rana lai te kaitava tiura. 35A tangaloi na tava tano vano hi ramo hagobibi na nona tangaloi boloki maira. Katukwale rau takwilia, katukwale rau kwohi mateia, katukwale rau vohoia ki vatu. #Mat 22.6 36A hugwe hini mo hora na tangaloi boloki vake u rusa siletira hi tomua, vae a tangaloi na tava tano vano hi ramo vaira hokinira tomua. 37Vunu rovonaki mo hora i natuna vaki maira. Mo viti kwara, ‘Rana domi mavaki i natugu.’ 38Vae lolona a tangaloi na tava tano vano hi ramo tagai na natu hini, ramo kwahakwaha kinira siboga ramo viti kwara, ‘!Tagaia! !A natu na hugwe hi aia hi! Vae te taroki a vanua noi tamana ne kwareki a nona. !De! !Ta kwohi mateia! Vae i kita tana lavi na nona vanua.’ 39Hikani ramo kwalibibia ramo vohokinia tivarea tina talu hi ramo kwohi mateia.” #Hib 13.12 40I Jisas mo uduhuri kinira mo viti kwara, “?Vae lolona a hugwe na talu hi ne vanamai ne vai kworoho lakwa na tangaloi tava tano vano hini?”

41Ramo daraki ramo viti kwara, “Kareaki ne kwohi matei na tangaloi hati vano hini, ne tau na talu hi tilo kaba na tangaloi tava tano dolua, vae rana tava lakwae lo taro na makuriana bakotoki.”

42I Jisas mo kwaha maira mo viti “A leo eia lo Uliuli* Kokona hinea mo viti kwara,

‘A beru hinea a kaitabe na ingwa

ramo bega kinia

rau domi kwara u hati,

vae mo mulemai

mo kwareki a beruberu aulu.

Hika a Hugwe i God aia u vaia,

keu tagaia u karea haburu.’

?Tulu he valuki na leo te hi radu?” #Sam 118.22-23; Bol 4.11; 1 Pita 2.7

43“Vae huri hi, a nomiu Hugwe Lakua i God ne taukamu letiu vae nehe kwareki te nomiu Hugwe Lakua. Vunu ne takahi na hala lakwa na tangaloi dolua kwara rana mulemai ki bulana tangaloi hinea ne hugwe korora. Aira rana bohibohi ne taritarisa lo nakona. 44Vae ihe hinea ne sovi tilo beru hikani, a tarabehina ne mavurivuri. Vake, diko a beru hi ne sovi tilo tangaloi te katukwale, ne biha vurivuria ne mule ki gwia.” #21.44: Lo Buku Kokona tuaki hinea a tangaloi rau ulira tuai a leo aira vano hi lo ves 44 rau tikei luga. #Dan 2.34-35,44-45

45A tangaloi* lingilingi lalakua mana Varisi* maira ramo rongo na tavaluileo hinea i Jisas mo vitira, vae rau kikilai kwara i Jisas u tuku viti hurira. 46Hokinia ramo vai kwara rana kwiribibia, vae rau mataku kina vao, huri a vao rau hago lo leoki kwara i Jisas aia a tangaloi* duruduruki. #a Mat 14.5; 21.26; b Mat 16.14; 21.11; Luk 7.16; 24.19; Sione 4.19; 9.17

Currently Selected:

MATIU 21: HWT

Highlight

Copy