LUK 8

A ravavine hinea ramo huri i Jisas

1He tuai tea koroa i Jisas mo vano lalahi na gwatuivanua lalakua, vake a gwatugwatui-vanua kwaririgi mo toko heretuvaki na Roro Karea mo matangwasaraki kwara hika i God u tuku boloki, vae ne hugwe koro na bulana tangaloi. A nona ngwalagelo hangavulu dongwana kairua rau huria. #Luk 4.43 2A ravavine hinea tuai a tanungwe hati luga mana lengeana vae i Jisas mo vakahikinira, aira hi rau huria vake. A hinaga aira hika. I Meri hinea rau kwarekinia a vavine Maktala, aia hi i Jisas mo hora na tanungwe hati kaibitu tiua. 3I Soana i vavinehi i Susa, aia hi a kaitagahuri na boloki noi Herot. #8.3: I Herot. I Herot hi aia i Herot Antivas. Kona taga lo Deksenare lo buku hika takuni. Vake i Susana mana ravavine rusa ratuaki vake aira hinea ramo toko hago mai Jisas mana nona ngwalagelo ki noga vivilagoki siboga. #Mat 27.55-56; Mak 15.40-41; Luk 23.49

A tavaluileo huri na tangaloi na kaburaki biu

(Mat 13.1-9; Mak 4.1-9)

4A tangaloi ramo toko vanamai radu nga vaki mai Jisas rau vanamai tina gwatuivanua rusa. Vae a vao lakua ramo hugu tabulutaki, i Jisas mo viti na tavaluileo hika lakwara. 5Mo viti “A tangaloi u vano kwara ne kaburaki bulana biu. Vae hokinia mo vano mo kaburaki na biu lolo agoago*, tuaki rau sovi tilo hala, a tangaloi ramo bilebibira vae a manu ra va vanamai ra va kani savia. 6Tuaki rau sovi tilo guruguru vatu vae ramo mauri hake ra va goru, huri a tano he medumedu tea. 7A biu tuaki rau sovi tilo tano lolo livuka na karo a kasiki eia, hinea rau mauri hake harogoki mana rivurivu karea, vae ra va tali korokoro na rivurivu karea. 8A biu ratuaki rau sovi tilo tano karea. Vae a rivurivu hi ramo mauri hake ramo kwai, a kwaiga vidolua vatavatahakinira.”

Vunu i Jisas mo gweregwerei na nona leo mo viti kwara, “A gweromiu eia. Tulu rongohuri tabetabeki na leo vano hi.” #Mat 11.15; 13.43; Mak 4.23; Luk 14.35

?Kworoho i Jisas mo toko kwaha tavatavalui leo hokinia hi?

(Mat 13.10-17; Mak 4.10-12)

9A ngwalagelo noi Jisas ramo uduhuri kinia kwara a tavaluileo hika a domianaki kworohokinia. 10I Jisas mo daraki mo viti “I God u masinge kwara tulu ne kikilai na hala hinea rau eno tavuniki tuai kwara aia ne hugwe kworohokinia koro na bulana tangaloi. Vae a tangaloi tavalavarea rau rongo na tavaluileo kehekeheki kwara rana taga vae ranahe taga hoko tea, rana rongo vae ranahe rongo kikilakinia tea.” #Aes 6.9-10

I Jisas mo matangwasaraki na tavaluileo huri na tangaloi na kaburaki biu

(Mat 13.18-23; Mak 4.13-20)

11Vunu i Jisas mo hena nga mo viti kwara, “A tavaluileo hi a domianaki aia hika. A biu aia a leo i God. 12A biu hi ramo sovi tilo hala aira hoki na tangaloi hinea ramo rongo na leo i God. Vae i Setano* mo vanamai mo lavi na leo i God tina domiga kwara ne kwiribibira rana hatu hauhuri, vake rana hatu ahi. #1 Kor 1.21 13A biu hi ramo sovi tilo guruguru vatu, aira hoki na tangaloi hinea rau rongo na leo i God, rau lavia kina lagwalagwa, aia vae he hivo te kwara ne bua lolo domiga. Rau hauhuri he tuai tea, vae a rongoana hati mo vanamai, ra va sovi taliku. 14A biu hi ramo sovi tilolo karo a kasiki eia, aira hoki na tangaloi hinea rau rongo na leo i God, vae a rongoana hati, a vivilagoki na varamana, mana hahavutiana na tokaana hike lo varamana ramo vanamai tilo domiga, ramo gunu matei na leo i God lolo domiga. Vae a kwaiga rahe toko sea te vohoki. 15A biu hi ramo sovi tilo tano karea, aira hoki na tangaloi hinea rau rongo na leo i God, vae rau kwiribibia lo domi karea mana rongorongohuri. Vae rau tu madi tigwaravu tarisaki a leoki mo kwai luga.”

A laeti tavuti na bakete

(Mak 4.21-25)

16Vunu i Jisas mo viti kwara, “Hete kwara te tangaloi ne bulukaoki na laeti, ne gworovi koroa kina bakete, diko ne taua tavuti na here. Aia vae ne taua lo tutu na laeti kwara vae a tangaloi rana soro vanamai rana tagai na leleha. #Mat 5.15; Luk 11.33 17A havakinau hi u eno tavuniki vae i God ne lavia tivarea vaki na ngwasara. Vake a havakinau hi a tangaloi u gui koroa vae i God ne hagwea ne lavia tivarea vaki lo leleha. #Mat 10.26; Luk 12.2

18“A leo hinea tulu rongoa tulu domidomi luna ne karea, huri aia hi u rongo kikilaki na leo ba vae aia ne kikilai vakevake. Vae aia hi he rongo kikilaki na leo tea, venaha diko u tuku domi kwara u kikilai kelekele ba, vae i God ne lavia tiua.” #Mat 25.29; Luk 19.26

I ratua i Jisas mai retahina

(Mat 12.46-50; Mak 3.31-35)

19I ratua i Jisas mai retahina rau vanamai kwara rana taga haroa, vae rahe vai lai tea kwara rana tagaia huri na vao mo rusa. 20A tangaloi katukwale mo kwaha mai Jisas mo viti “Ei, i retahimu mai ratuamu ramo tu varea rau lengaia kwara rana tagaiko.” 21Vunu i Jisas mo kwaha maira aira vunu mo viti “I retahigu i ratuagu aira hinea ramo rongo na leo i God vae rau vai luna.”

I Jisas mo kwaha suri na navo mana langi

(Mat 8.23-27; Mak 4.35-41)

22Lo rani katukwale, i Jisas mo galo tilolo aga mana nona ngwalagelo, mo kwaha maira mo viti “De, ta vano utu vaki lo kwai tokatoka lakua tavaluki.” Vae ramo tinakaki ramo vano. 23Vae ramo toko kwalao, i Jisas u maturu. A langi lakua mo here tilolo kwai tokatoka lakua, vae a navo ramo tinakaki ramo rahu tilolo aga. Hikani ramo rongo hati haburu huri aira lo hala na mateana. 24A nona ngwalagelo ramo vano vaki maia ramo vakaradae, rau viti “!Hugwe*, Hugwe! !I kita hika tana sala!”

I Jisas mo maraka hake mo suri na langi mana navo, vae raru mo hivo mo tangwata medemedekinia. 25Vunu mo kwaha mana nona ngwalagelo mo viti “?Kworohokinia? ?A nomiu hauhuriana tikei?”

Vae aira rau idila haburu rau mataku ramo toko kwahakwaha mulekinira rau viti kwara, “!E! ?A hava tangaloi aia hika? Mo kwaha, a langi mana navo vake raru mo rongohuria.”

I Jisas mo vakahiki na tangaloi a tanungwe hati rau vaia

(Mat 8.28-34; Mak 5.1-20)

26Ramo kwalao rau hena nga, ramo maravuti lo tata na ngwera Gerasa, ramo galo hake tavalakwai tokatoka lakua tavaluki, hinea u tu vovohi na vanua Galili* lo duvi na kwai tokatoka lakua tavaluki. 27Hokinia i Jisas mo galo hake tina aga vaki auta, vae a tangaloi na gwatuivanua takwa-hi a tanungwe hati rau vaia, mo hagwe i Jisas. U lakao vuroki u tuai vohoki, he toko lugwalugwa tea, he toko hugu tea na vanua, aia u hugu tigwaravu lolo malanga rusa na tangaloi rau mate. 28-29Vakarusa a tanungwe hati ramo vai na tangaloi hi vae a tangaloi ramo gwaru kabana mana garuna tigwaravu kina seni kwara vae ne hatu vai hokotia sibona. Vae a tangaloi hi tigwaravu u havuti utuutuhi na seni, a tanungwe hati ra va toko lavia vaki lolo bubu vuroki.

Vae lolona mo tagai i Jisas mo kakaili. Vae huri i Jisas u hakavia, mo hora na tanungwe hati kwara rana vano tiua. Vunu a tangaloi hi mo sovi hivo koro na nako i Jisas, mo kwaha karakara mo viti “!Jisas, i nigo i Natu i God hinea Aulu Karakara! ?Kwara kona vai aha maiau? Na viti kareaki lakwako, ko hatu vaiau nomo rongo hati.” #Mat 8.29; Mak 1.23-24; 5.7; Luk 4.34

30Hikani i Jisas mo uduhuri kinia mo viti “?A hinamu ihe?”

Mo daraki mo viti “A hinagu i Vao.” U viti kwehi huri a tanungwe hati rusa rau vano tilolo gwatuna. 31Ramo kwaha mai Jisas ramo seseaka kwara ne hatu horara vaki lolo kwalu lakua u bua a kwotoki tikei.

32Hikani a dura rusa rau tuku kanikani garagarani lo ngwarasa na vuti. Vae a tanungwe hati vano hi ramo kwaha mai Jisas ramo seseaka kwara ne tirakinira rana soro tilolo dura vano hi, vae i Jisas mo masinge. 33Vunu a tanungwe hati ramo soro tivarea tina tangaloi hi ramo soro tilolo dura vano hi. A dura vano hi ramo kwalao tegetano ramo rovo lo baha tilolo kwai tokatoka lakua ramo dono.

34A tangaloi ramo tagahuri na dura vano hi, ramo tagai na kinau hi, ramo kwalao, ramo viti talahaki na roroki lo gwatuivanua vaki lo utaki vake. 35Vae a tangaloi ramo vano kwara rana tagai na kinau hi. Ramo vano vaki mai Jisas ramo hagwe na tangaloi hi a tanungwe hati ramo vaia, vae rau soro tivarea tiua ba. U hugu mana garu i Jisas u lugwa, a gwatuna u karea ba. Vae a tangaloi vano hi aira vunu rau mataku. 36Aira hi ramo tagaia, rau viti huri lakwa na tangaloi kwara a tangaloi hi u ahi kworohokinia. 37Vunu a tangaloi savia tina vanuaga Gerasa ramo kwaha mai Jisas kwara ne va vano, huri rau mataku haburu. Vae i Jisas mo galo tilo aga mo vano. 38A tangaloi hi a tanungwe hati ramo vano tiua mo kwaha mai Jisas mo seseaka mo viti kwara, “Diko ku masinge na huriko.”

Vae i Jisas mo horae 39mo viti “Ko mule taliku vaki na vanua komo viti a havakinau hi i God mo vai lakwako.”

A tangaloi hi mo vano laliki lo gwatuivanua doluaki mo toko viti huri a havakinau hi i Jisas mo vai lakwae.

I Jisas mo vakahiki a vavine vunu mo rakati na natu i Saeras tina mateana

(Mat 9.18-26; Mak 5.21-43)

40Lolona i Jisas mo mule taliku vaki lo kwai tokatoka lakua tavaluki a vao ramo hahavakinia, huri aira vunu rau tuku hugu tarae. 41Hikani a tangaloi katukwale a hinana i Saeras mo maravuti, aia a kaitomuaki katukwale lo vale* na tiutangaroa nona gwaloana noi Isrel* lo vanua takwa-hi. Mo sovi hivo vaki mana garu i Jisas mo kwaha maia mo seseaka huria kwara ne vano vaki tatana, 42huri i natuna a natu vavine, a natu katukwale vohoki, u garagarani kwara ne mate. A hukaona hangavulu dongwana kairua.

Lolona hi i Jisas mo lakao a tangaloi ramo visusuni dalidalia. #Luk 7.12 43Vae a vavine katukwale eia a daidai gwaravu u vaia a hukao hangavulu dongwana kairua. U mahuki savi na nona kinau lakwa na tokita, aia vae hete katukwale kwara ne vai lavi na kana lengeana. 44Mo vanamai u huri Jisas takuni mo kihi na gweregwere na lugwa i Jisas vae a dai hi mo tirakinia vakatukwale. 45I Jisas mo uduhuri mo viti “?Ihe mo kihiau?”

Aira vunu ramo viti kwara aira hetea, vunu i Pita mo kwaha mo viti “Hugwe*, a tangaloi rusa dalidaliko rau visusuni haburu diko rau vai hokotiko tea.”

46Vae i Jisas mo kwaha mo viti “Nu kikilai kwara a tangaloi katukwale u kihiau huri nu rongo a huirana u vano tiau u vakahikinia.” 47A vavine hi mo tagaia kwara i Jisas u kikilai, mo vanamai, a huina mo rururu, mo sovi vaki mana garu i Jisas. Mo viti lakwai Jisas lo nako na tangaloi savia takwa-hi kwara kworoho mo kihia, vake u viti lakwae kwara u rongo karea vakatukwale. 48I Jisas mo kwaha maia mo viti “Natugu, a nomu hauhuriana u vaiko komo rongo karea. Ko mule lo magemuana.” #Luk 7.50; 17.19; 18.42

49I Jisas mo toko kwaha hokinia hi, a kailai na leo katukwale mo vanamai mana leo tina tata i Saeras. Mo viti lakwai Saeras kwara, “I natumu u mate ba. Venaha ko hatu vai na Tisa mo rongo hati.”

50Vae i Jisas mo rongo na leo hi, mo kwaha mai Saeras mo viti kwara, “Ko hatu mataku, ko hauhuri kehekeheki vae i natumu ne rongo karea.”

51Lolona i Jisas mo maravuti na vanua, mo suri na tangaloi kwara rana hatu huria vaki lolo ingwa. Kehekeheki i Pita, i Sione mai Semis mana tama mana retahi na natu hi, ramo huria vaki lolo ingwa. 52A tangaloi savia takwahini rau rongo hati haburu ramo tangi huri na natu hi. Vae i Jisas mo kwaha maira mo viti “Tulu hatu ngara, a natu hi he mate tea. !U maturu vohoki!” #Luk 7.13

53A tangaloi savia takwa-hi ramo mana tiehia, huri rau kikilai kwara a natu hi u mate ba. 54Vae i Jisas mo hago lo kabana, mo kware karakara mo viti “!Natu, maraka!” #Luk 7.14 55Vae a mabuna mo mulemai taliku, mo maraka vakatukwale. Vunu i Jisas mo kwaha maira kwara rana bete te kinau lakwa na natu hi ne kani. 56I tamana mai retahina raru idila haburu, vae i Jisas mo surirarua kwara vae raru ne hatu viti na kinau hi lakwa na tangaloi. #Mak 7.36; Luk 5.14

Currently Selected:

LUK 8: HWT

Highlight

Copy