SIONE 2

A lakiana lo vanua Kena

1A rani kairua koroa vunu a lakiana mo kwaliana Galili* lo vanua Kena. I retahi i Jisas aia takwa-hi lo lakiana. #Sione 4.46 2A tangaloi rau kware i Jisas mana nona ngwalagelo vake vaki lo lakiana hi. 3Vae a waen mena tangaloi na lakiana u rovo, vunu i retahi i Jisas mo kwaha maia mo viti “A mega waen u rovo.”

4I Jisas mo kwaha maia mo viti “?Kworohokinia komo tau na kinau hi lugu? A tarogu he vanamai te radu nga.” #Sione 7.30; 8.20

5I retahi i Jisas mo kwaha mana tangaloi boloki mo viti “Tulu ne vai hokinia hi ne viti lakwakamu.” #Jen 41.55

6A gwaloana noi Isrel* a noga tangwata u rusa lo hala na kwasu vivilagoki mana sasavula kwara rana ngwasara koro na nako i God. Huri na kinau hi, a laha na kwai kaiono lalakua rau tu takwa-hi rau kihira kina vatu, katukwale kehe u taritarisa mana lita vidolua. #Mak 7.3-4; Sione 3.25 7I Jisas mo viti lakwa na tangaloi boloki vano hi kwara, “Tulu vakakukwere na laha vano hikani kina kwai.” Ramo vakakukwerera vae rau kukwere avuavu. 8Vunu mo kwaha maira mo viti kwara “U karea, hikani tulu utu te kwai hi, tulu mo lai tulu mo bete lakwa na tangaloi hi mo tagahuri na kanikani.”

Hikani ramo lai ramo bete lakwae. 9Mo damedame rongohia, u bohi ki waen ba. He kikilai tea kwara a waen hika u vanamai ave, vae a tangaloi aira hi ramo utuki na kwai hi rau kikilai. Hikani mo kware na ngwera na lakiana hi, 10mo kwaha maia mo viti kwara, “!Ai! Tigwaravu a doridori na tangaloi vunuhia rau hile a waen karea tomua lakwa na vao. Hokinia a vao ramo inu mo taritarisa mo rovo vunu vaki takuni ramori hile a waen haro lakwara. Vae a waen hi hinea u karea haburu, i nigo ku kwiribibia vaki na hika.”

11I Jisas mo vai na nona kaivosangi lakua tomua halaradu hi lo vanua Galili, lo gwatuivanua Kena, mo matangwasaraki na nona huirana takwahini, vae a nona ngwalagelo ramo hauhuri luna. #a Sione 4.54; 20.30; b Luk 9.32; Sione 1.14; 12.41

12Takuni tiua hini i Jisas mai retahina, i ratua i Jisas, mana nona ngwalagelo ramo vano vaki lo vanua Kavaneam, ramo hugu takwahini a raniki he rusa tea. #Mat 4.13

I Jisas mo vano vaki lolo Vanua Kokona noi God

(Mat 21.12-13; Mak 11.15-17; Luk 19.45-46)

13A taro u garagarani huri na vileki-tabulutakiana nona gwaloana noi Isrel* rau kwarekinia a Kanikani* na Tivekiana, vae huri hi i Jisas mo galo hake vaki maira lo gwatuivanua lakua Serusalem. #Sione 6.4; 11.55 14Lo Vanua* Kokona noi God u hagwe na tangaloi rau tuku hokahokaki buluki, a sivsivi, mana kwiba. Vake u hagwe a tangaloi aira a kairiri na mane* rau hugu mana noga tevo. 15Mo vai na nona kaitakwili kina tali kwaririgi, mo livulivuti na tangaloi vano hi mana buluki, a sivsivi, tivarea tina Vanua Kokona noi God. Mo hale bohiki na tevo na mane nona tangaloi kairiri na mane, vae a noga mane mo vano girigiriki. 16Vunu mo hora na tangaloi vano hi tivarea, aira hi rau tuku hokahokaki a kwiba, mo viti kwara, “Tulu lavira tina vanua hike. Tulu hatu vai na Ingwa noi Tamagu mo mule kina ingwa na bihubihu.” #Luk 2.49 17A nona ngwalagelo ramo domihagwe na Uliuli* Kokona hinea mo vitia kwara “God, nu lengaia haburu kwara savi na kinau lolo Ingwamu vae rana bakoto rana taritarisa. Tigwaravu a domidomi hi u kao lolo domigu hoki na kabu mo kao.” #Sam 69.9

18A kaitomuaki nona gwaloana noi Isrel ramo kwaha luna ramo viti kwara, “?A hava kaivosangi lakua hi kona vaia ne vosangi lakwakami kwara a nomu huirana eia ku bakoto kwara kona vai kwehi?”

19I Jisas mo daraki mo viti kwara, “Tulu reve suri na Ingwa Kokona noi God hikani, vunu a rani kaitolu na tabe huria taliku.” #Mat 26.61; 27.40; Mak 14.58; 15.29; Bol 6.14

20Aira ramo uduhuri kinia ramo viti kwara, “?Ku viti kwara kona tabe na ingwa hika taliku a rani kaitolu? A tangaloi ramo tabe na Ingwa Kokona hika u lavira u tuai haburu a hukao ngavu kaivati dongwaki kaiono.”

21Vae a Ingwa Kokona hi i Jisas mo kwahakwaha luna a domianaki kwara a tarabehina. #1 Kor 6.19 22Lolona hini mo maraka tina mateana, a nona ngwalagelo ramo domihagwe na leo hika mo vitia, vunu ramo hauhuri lo Uliuli Kokona mana leo hi i Jisas mo vitira. #Luk 24.6-8; Sione 12.16; 14.26

I Jisas u kikilai na tangaloi savia

23Lolona hini i Jisas u hugu lo vanua Serusalem lo taro na Kanikani* na Tivekiana, a tangaloi rusa lengalenga rau tagai na nona kaivosangi lalakua mo toko vaira, vunu ramo hauhuri luna. #Sione 7.31; 11.47-48 24Vae i Jisas he matangwasarakinia te lakwara kwara rana kikilaia ne karea, huri aia u kikilai vunuhi na domi na tangaloi. 25I Jisas he lengaia tea kwara te tangaloi ne viti huri a domi na tangaloi lakwae, huri u kikilai savi na domi na tangaloi vunuhira.

Currently Selected:

SIONE 2: HWT

Highlight

Copy