SIONE 1

A Leo na ahiana

1Lo tinatinakakiki, vunu a varamana mori tauana, a Leo u toka ba, u toka mai God, aia i God. #Rev 19.13 2A Leo aia mai God lo tinatinakakiki. #Sione 17.5; 1 Sione 1.1-2 3Lalahi na Leo hi i God mo tau savi na kinau. Vatavataha na kinau rau tauana, a Leo hi aia u taura. #Sione 1.10; 1 Kor 8.6; Kol 1.16-17; Hib 1.2 4A Leo hi a gwataki na mauriana luna. A maurianana aia a leleha lakwa na tangaloi rusa. #Sione 5.26 5A leleha hi u leleo tilo dodoki, vae a dodoki he gui lavia tea. #Sione 3.19

6I God u hora na nona kaihora katukwale a hinana i Sione. #Mat 3.1; Mak 1.4; Luk 1.13,17,76; 3.2 7Mo vanamai kwara ne hago leo huri na leleha lakwa na tangaloi. Mo vanamai kwara ne hago leo lakwara, kwara vae aira vunu rana rongo na leona rana hauhuri lo leleha hi. 8Aia hete leleha, vae aia u vanamai kwara ne hago leo huri na leleha. #Sione 1.20 9Hikani a leleha kareaki. U vanamai tilo varamana mo kwaka vakahaki na tangaloi vunuhia. #1 Sione 2.8

10A Leo hi aia lo varamana, i God u lalahia mo tau na varamana tuai, vae a tangaloi na varamana rahe taga kikilaki na Leo hi tea. #a Sione 1.14; b Sione 1.3; 1 Kor 8.6; Kol 1.16; Hib 1.2; d Sione 17.25 11Aia u vanamai vaki lo vanuana, vae a nona tangaloi rahe lai tabetabekinia tea. 12Vae ratuaki vake rau lai tabetabekinia, ramo hauhuri luna, hokinia mo hile a huirana lakwara kwara rana mulemai ki raranatu i God. #Gal 3.26 13Rau mulemai ki raranatu i God, hete hokinia hi a natu mo vora vanamai ti retahina, diko hete hokinia hi a tama mo lengaia. Vae rau mulemai ki raranatu i God huri i God u lengaia kwara ne kwareki i Tamaga. #Sione 3.3,5,6; Sem 1.18; 1 Pita 1.23; 1 Sione 3.9; 5.18

14A Leo hi u mulemai kina tangaloi u toka maikita. U vosangi haburuki na nona domi tabetabe lakua tivarea, vunu vake a bohianana u matangwasaraki i God kareaki lakwa na tangaloi. I kami keu tagai na nona huirana kwara u hahaburuka. A huirana hi a nona, huri aia a natu kwakehe, i Natu i God a Tamaki. #a Rom 1.3; Gal 4.4; Vil 2.7; 1 Tim 3.16; Hib 2.14; 1 Sione 4.2; b Aes 60.1-2; Luk 9.32; Sione 2.11

15I Sione u hago leo huria, mo matangwasaraki mo viti kwara, “Aia hika nomo toko vitiviti huria. Nomo viti kwara, ‘Aia ne vanamai takuni tiau, vae aia u lakua siletiau huri aia u toka tomua ba, vunu i nau nomori vora.’ ” #a Sione 1.30; b Mat 3.11; Mak 1.7; Sione 1.27

16Aia u vai tabetabekikita vunuhia kina nona domi tabetabe lakua, mo toko hokoraki na nona vaitabetabe lakwakita tigwaravu. #Kol 2.10 17I God u hilekikami kina Tangwata* lalahi Mosis, vae u vosangi na nona domi tabetabe lakua tivarea, vake mo matangwasaraki na vitikareaki huria sibona lakwakita lalahi Jisas Kraes*. #Eks 31.18; 34.28; Sione 7.19 18Hete tangaloi kwara u tagai God te lo taroki. Vae i Natu i God, aia a Natu kwakehe, aia u taritarisa mai God, u hugu beheri na Tamaki, aia kehekeheki mo matangwasaraki na Tamaki i God lakwakita. #a Eks 33.20; Sione 6.46; 1 Tim 6.16; 1 Sione 4.12; b Mat 11.27; Luk 10.22

I Sione a tangaloi na bavtaes tangaloi u hago leo huri Jisas

(Mat 3.1-12; Mak 1.1-8; Luk 3.1-18)

19Hikani a kaitomuaki nona gwaloana noi Isrel* lo vanua Serusalem ramo kware na tangaloi* lingilingi maira mana noga kaihago a gwaloana* noi Livae, ramo kwaha maira, ramo horara vaki mai Sione kwara rana uduhuri kinia kwara, “?I nigo a hava tangaloi?”

20I Sione he herevuniki tea, vae u viti matangwasaraki kwara, “I nau hete i Vurae*.” #Sione 3.28

21Ramo uduhuri kinia ramo viti kwara, “?Vae i nigo a hava tangaloi? ?I nigo i Elaesa?”

I Sione mo daraki mo viti “Hetea, i nau hete i Elaesa.”

Ramo uduhuri ramo viti kwara, “?I nigo a Tangaloi* Duruduruki hi kemo toko hugu tarae?”

Aia mo daraki mo viti “Hetea.” #a Mat 11.14; 17.11-13; Mak 9.13; b Dut 18.15,18; Sione 6.14; 7.40; Bol 3.22; 7.37

22Hikani ramo uduhuri kwara, “?I nigo a hava tangaloi? Ko viti lakwakami huri vae kena lai a kaiduvi na leo taliku lakwara hinea ramo horakami. ?I nigo ku viti kworoho huriko?”

23I Sione mo daraki mo viti kwara, “I nau a tangaloi hi a tangaloi duruduruki i Aesaea mo vitia ba tuai hinea mo viti kwara,

‘A tangaloi mo toko kwarekware lo vanua vuroki mo viti

“Tulu vai bakotoki na hala kwara a Hugwe* ne huria.” ’ ” #Aes 40.3; Mat 3.3; Mak 1.3; Luk 3.4

24A kailai na leo vano hi, hinea a Varisi* ramo horara, 25aira rau uduhuri ki Sione taliku ramo viti “?Diko i nigo hete i Vurae, diko hete i Elaesa, diko hete Tangaloi Duruduruki, kworoho komo toko bavtaes na tangaloi?”

26I Sione mo daraki mo viti kwara, “I nau nu tuku bavtaes ki kwai, vae a tangaloi katukwale u tu maikamu, i kamu tulu he kikilaia tea. #Mat 21.25; Mak 11.30; Luk 20.4; Sione 1.33 27Aia neri vanamai takuni tiau, vae i nau nahe taritarisa te vohoki kwara na teri na karo na kaikwokwori na garuna.” #a Sione 1.15; b Bol 13.25

28Vunuhi na kinau vano hi ramo vaiana lo vanua Betani, lo ngwarara na Kwai Sotan tavaluki, lo hala na mataniaho giri. I Sione mo toko bavtaes na tangaloi eia. #Mat 3.13; Sione 10.40

A Sivsivi Kelekele bulai God

29Mavukona i Sione mo tagai Jisas mo toko vanamai vovohia, mo viti kwara, “Tulu tagaia. Aia hini a Sivsivi* Kelekele bulai God hinea ne kwareki a noda kairoroi* ne lai leletiuki na hatiana nona tangaloi na varamana. #a Sione 1.36; b Aes 53.6-7; Bol 8.32; 1 Pita 1.18-19 30Aia hi nomo viti huria lolona nomo viti kwara, ‘A tangaloi neri vanamai takuni tiau, vae aia u lakua siletiau, huri aia u toka tomua ba, vunu i nau nomori vora.’ #Sione 1.15 31Tomuaki nahe kikilaia tea kwara aia makive, vae nu vanamai nomo toko bavtaes na tangaloi ki kwai kwara vae na matangwasarakinia lakwa na gwaloana noi Isrel*.”

32-33I Sione u hago leo taliku mo viti kwara, “I God u horeau kwara na bavtaes na tangaloi kina kwai, vae lo taro hi nomo vanamai, nahe kikilai tea kwara aia hi, a tangaloi hi. Vae i God mo kwaha maiau mo viti kwara, ‘Vae kona tagai na Tanungwe ne vanamai tegetano ne hugu lo tangaloi katukwale. Vae aia hi neri bavtaes na tangaloi kina Tanungwe Kokona.’ Vunu takuni tiua hi i nau nu tagai na Tanungwe u hivo vanamai tina taetae hoki na ngwaki, mo hugu luna. #Mat 3.16; Mak 1.10; Luk 3.22 34I nau nu tagaia, vae hika nu matangwasarakinia lakwakamu kwara a tangaloi hi aia i Natu i God.” #Mat 3.17; 17.5; 27.54; Mak 9.7; 15.39; Luk 9.35; Sione 20.31; Bol 9.20

A ngwalagelo noi Jisas tomua halaradu

35Lo rani kaitoluki i Sione u hugu takwa-hi, vae a nona ngwalagelo kairua tina nona ngwalagelo ratuaki raru hugu maia. 36Hikani i Sione mo tagai Jisas mo lakao rovo utu, mo viti kwara, “!Tulu tagaia! Aia hini a Sivsivi* Kelekele bulai God.” #Sione 1.29

37A ngwalagelo kairua hi raru mo rongoa mo viti hokinia hi, raru mo huri i Jisas. 38I Jisas mo halebohi mo tagairarua raru mo huria, mo uduhuri kirarua mo viti “?Kuru soro haro naha?”

Raru mo daraki raru mo viti kwara, “?Ravai, ku hugu ave?” (Ravai a domianaki kwara “Tisa”.)

39Aia mo daraki mo viti “Kuru vanamai kuru taga.” Raru mo huria raru mo tagai na vanua hi mo hugu eia, raru mo hugu maia a rani duviki, huri a mataniaho evina ba.

40I rarua hi raru mo rongo na leo noi Sione vunu raru mo huri i Jisas, kairuaki a hinana i Aduru, i tua i Saemon Pita. 41Bulu maia nga hini mo hagwe i tuana hi mo viti lakwae kwara, “Keu hagwe i Mesaea.” (A leo hi Mesaea a domianaki lo leo Gris kwara i Kraes*, hinea a domianaki kwara i Vurae*, a tangaloi hinea i God u tuliki ba kwara ne horae vanamai kwara ne vakahiki na tangaloi rusa.) #Sione 4.25

42Vunu aia mo lavi Saemon vaki mai Jisas. I Jisas mo tagataga huria, mo viti lakwae kwara “I nigo i Saemon, i natu i Sione. Vae a hinamu ne kwareki i Kevas.” (A hina hi aia hoki Pita nga, a domianaki kwara “a Vatu”.) #Mat 4.18-20; Mak 1.16-18 #Mat 10.2; 16.18; Mak 3.16; Luk 6.14

I Jisas mo kware i Viliv mai Nataniel

43Mavukona taliku i Jisas mo domi utu kwara ne vano vaki lo vanua Galili*. Mo hagwe i Viliv mo kwaha maia mo viti kwara, “Mai, ko huriau kona kwareki nogu ngwalagelo.” 44I Viliv aia a ngwera Betsaeta, lo vanua hi i Aduru mai Pita raru mo toka eia. #Sione 12.21 45Hikani i Viliv mo hagwe i Nataniel mo kwaha maia mo viti kwara, “Keu hagwe na tangaloi hinea i Mosis mo vitiviti huria mo ulibibia lo buku* na Tangwata*, aia hi a tangaloi* duruduruki rau ulibibia vake. Aia i Jisas i natu i Sosev a ngwera Nasaret.” #Dut 18.18; Aes 7.14; 9.6; Esik 34.23

46I Nataniel mo uduhuri mo viti kwara, “?A kinau karea ne vanamai kworohokinia tina vanua Nasaret?”

I Viliv mo daraki mo viti kwara, “Vanamai ko taga.”

47Lolona hini i Jisas mo tagai Nataniel mo toko lakao vovohia, mo viti huria mo viti “Tulu tagaia, aia a gwaloana noi Isrel* bakotoki, a kurakura tikei luna vohoki.”

48I Nataniel mo uduhuri kinia mo viti “?Ku kikilai kworohokiau?”

I Jisas mo daraki mo viti kwara, “I nau nu tagaiko ba lolona hinea komo hugu lo malumalu na vikai* u kwareki a vivik, vunu i Viliv mori kwareko.”

49I Nataniel mo daraki mo viti “!Tisa! !I nigo i Natu i God! !I nigo a Hugwe Lakua nona gwaloana noi Isrel!” #a Sam 2.7; Mat 3.17; 14.33; 16.16; Mak 1.11; 3.11; Luk 3.22; 4.41; Sione 11.27; Bol 13.33; b Sef 3.15; Mat 27.42; Mak 15.32; Sione 12.13

50I Jisas mo kwaha maia mo viti kwara, “?I nigo ku hauhuri luna hi, huri nomo viti lakwako kwara nu tagaiko tavuti na vikai u kwareki a vivik? Vae na viti lakwako, konari tagai na kinau lalakua siletia hika.” 51Vunu mo kwaha maira mo viti “Kareaki na viti lakwakamu, tulu neri tagai na taetae ne matakahi, a kaihora noi God tina taetae ramo galo hake, ramo duvule tegetano hivoulu tilugu, i nau a Natu* na Tangaloi.” #Jen 28.12

Currently Selected:

SIONE 1: HWT

Highlight

Copy