A Bolokiana 8

1I Sol u masinge kwehini vake kwara rana kwohi mateia.

I Sol u vai bulakiki na kwarelua noi Jisas

Lo rani aia hi a tangaloi ramo maraka ramo vai bulakiki na kwarelua* noi Jisas lo gwatuivanua lakua Serusalem. A tangaloi hauhuri savira, ramo kwalao girigiri lo vanua Sutia mana vanua Sameria*, vae a kaihora* kokona kehekeheki ramo hugu Serusalem. #a Bol 7.58; 22.20; b Bol 8.4; 11.19 2A tangaloi bakoto aira hi rau vai mavaki God ramo tau i Steven tilo gwaru-malanga*, ramo rongo hati haburu ramo ulo huria. #Mat 14.12; Mak 6.29

3Vae i Sol u vai kwara ne magaraki na kwarelua noi Jisas, mo lakao vatavataha na ingwa, mo revei na tangaloi hauhuri tivarea, a ngwera mana ravavine, mo taura tilolo ingwa na gwarugwaru. #Bol 9.1,13; 22.4; 26.9-11

I Viliv mo heretuvaki na Roro Karea lo vanua Sameria

4Vae hika a tangaloi hauhuri vano hi ramo kwalao girigiri, ramo vano vataha na mahagweki ramo talahaki na Roro Karea. #Bol 8.1; 11.19 5I Viliv u vano tegetano vaki lo gwatuivanua lakua katukwale Sameria* mo matangwasaraki i Vurae* lakwa na tangaloi takwa-hi. 6A vao rau rongohuri tabetabeki na leo hi i Viliv mo viti lakwara, huri rau rongoa, rau tagai na vaisea hinea i God mo vai lakwara lalahia. 7A tanungwe hati ramo ngara karakara kina dilao huira ramo ngwalua tina tangaloi rusa. U rusa hinea a tarabehiga rau mate, vake hinea rau hau tikoki ramo rongo karea taliku. #Mat 10.1; Mak 6.7; 16.17 8A tangaloi lo gwatuivanua lakua hi u havutira haburu.

A tangaloi na novo hi i Saemon

9A tangaloi katukwale a hinana i Saemon u toka lo vanua hi. A ngwera Sameria* rau idila haburu kina nona novo. U viti kwara aia a tangaloi lakua. 10Vae savisavi na tangaloi lo gwatuivanua hika, a tangaloi vuroki mana tangaloi lalakua, ramo rongohuri tabetabekinia. Ramo toko viti kwara, “A tangaloi hika a huirana noi God u eno luna, aia hi u kwareki ‘A Huirana Lakua’.” 11Rau rongohuri tabetabekinia, huri tuai sea ba mo toko vaira ramo toko idila kina nona novo. 12Vae i Viliv mo heretuva lakwara, mo viti huri na Roro Karea kwara i God u hugwe koro na tangaloi lalahi i Jisas, i Vurae*, hinea mo horae vanamai kwara ne vakahiki na tangaloi, hokinia mo tulikinia tuai. Vae a ngwera mana ravavine ramo hauhuri lo nona leo, vunu ramo lai bavtaes. 13I Saemon sibona u hauhuri vake. Mo lai bavtaes mo rovo mo hugu garagarani mai Viliv. U idila haburu mo tagai na kaivosangi mana vaisea hi i Viliv mo toko vaira.

14Hikani a kaihora* kokona Serusalem ramo rongo hokinia kwara a ngwera Sameria rau lavi na leo noi God, hokinia ramo hora i Pita mai Sione raru mo vanamai vaki maira. 15Lolona raru mo maravuti maira, raru mo tiutangaroa maira kwara vae rana lavi na Tanungwe Kokona, 16huri a Tanungwe Kokona he hivo tea tilo tangaloi kwara te katukwale tiura radu nga, aira rau lai bavtaes kehekeheki lo hina na Hugwe* i Jisas. 17Vunu i Pita mai Sione raru mo tatagao lo gwatuga, ramo lavi na Tanungwe Kokona. #Bol 19.6

18I Saemon mo tagai na kaihora kokona kairua hi raru mo tatagao lo gwatuga, i God mo bete na Tanungwe Kokona lakwara. Vae mo vai rongo kwara ne bete mane* lakwararua, 19mo viti kwara, “Kuru bete na huirana hika lakweau vake, hokinia vae ihe hi na tatagao lo gwatuna ne lavi na Tanungwe Kokona.”

20Vae i Pita mo daraki lakwae mo viti “?Ku domi kwara kona voli na hilehile noi God kina mane? I nigo kona sala mana nomu mane. 21Kohe taritarisa tea lo nomai boloki. I nigo a nomu tikei eia, huri a domimu he bakoto tea lo nako i God. #Sam 78.37 22Kona halebohi tina nomu domidomi hi rau hati, vunu kona tiutangaroa karakara lakwa na Hugwe i God kwara ne domidomi koro lakwako a havakinau hi komo domidomi luga. 23Nu taga kwara i nigo a kinau u kadikadiko vohoki, vae a nomu doridori hati rau gwaruko.” #a Dut 29.18; Krae 3.15; b Aes 58.6

24I Saemon mo kwaha mo viti kwara, “Kuru tiutangaroa karakara lakwa na Hugwe i God huriau, kwara vae a kinau hika kuru mo vitira rana hatu vai hokinia hi lakweau.” #Eks 8.4,24; 9.28

25Raru mo matangwasaraki na kinau i Jisas mo vaira, raru mo heretuvaki na leo nona Hugwe i God, vunu raru mo mule taliku vaki Serusalem. Lo halagaru mule raru mo toko kwalahaki na Roro Karea lolo gwatugwatui-vanua Sameria.

I Viliv mana ngwera Itiovia

26A kaihora nona Hugwe i God tina taetae mo kwaha mai Viliv mo viti “Ko maraka ko vano lokibeo, ko maravuti lo hala hi u kwalao vanamai Serusalem mo vano vaki Gasa.” A hala hi u kwalao lo vanua vuroki. 27Hikani i Viliv mo maraka mo vano, mo hagwe na ngwera Itiovia, a hivota*, lo halana mule. Aia a tangaloi lakua u tuku tagahuri na mane* nona vavine hugwe lo vanua hi Itiovia. U vano vaki Serusalem u kaluhaki God, 28vae hikani mo mule taliku lo bulana kat. Lolona mo kwalao, u tuku valuki na buku* nona tangaloi* duruduruki i Aesaea. 29A Tanungwe Kokona mo kwaha mai Viliv mo viti “Ko vano vaki garagarani mana kat hi.” 30I Viliv mo kwalao vaki maia mo rongoa mo toko valuki na buku hi a nona tangaloi duruduruki i Aesaea, mo uduhuri kinia mo viti kwara, “?Ku kikilai na leo hi komo toko valukia?”

31A tangaloi lakua hi mo viti kwara, “?Na kikilai kworohokinia? Kwara diko te tangaloi ne matangwasarakinia lakweau.” Mo kware i Viliv mo galo vaki maia lo bulana kat. #Sione 16.13 32A leo hi lo Uliuli* Kokona mo toko valukia aia hika. Mo viti kwara,

“Aia hoki na sivsivi hinea ramo lavia

kwara rana kwohi mateia.

Aia hoki na natu na sivsivi

hinea ramo bala vuluna

he ngara tea.

Aia he malamalangaki na leo te vohoki.

33Rau vai na maemaeana lakwae,

rau areki balatakinia.

A matamatana tikei,

huri u mate utu gwatuna lo varamana.” #Aes 53.7-8

34A tangaloi hi mo viti lakwai Viliv kwara, “?Ko viti lakweau, ihe hini a tangaloi duruduruki mo viti huria? ?U vitia sibona diko u viti na tangaloi te dolua?” 35I Viliv mo kwaha, mo tinakaki lo leo na Uliuli Kokona hikani, mo viti na Roro Karea lakwae huri i Jisas. 36Lolona raru mo kwalao lo hala raru mo maravuti lo vanua hi a kwai eia, a tangaloi hi mo kwaha mai Viliv mo viti kwara, “A kwai hika. Kwara na lai bavtaes. ?Diko te havakinau ne tu koroau?” #Bol 10.47 37I Viliv mo viti lakwae kwara, “Diko ku hauhuri lui Jisas kina domimu savia, i nigo kona lai bavtaes.” Aia mo viti kwara, “Nu hauhuri kwara i Jisas Kraes* i Natu i God.” #8.37: Lo Buku Kokona tuaki hinea a tangaloi rau ulira tuai lo leo na ngwera Gris, a leo lo ves 37 rau tikei luga.

38A tangaloi hi mo kwiribibi na bulana kat mo tu butu, i rarua vunu mai Viliv, raru mo hivo tegetano tilolo kwai hi, i Viliv mo bavtaesia. 39Lolona raru mo galo hake tina kwai a Tanungwe Kokona nona Hugwe* mo lavi Viliv tiua. A tangaloi hi he tagai Viliv te taliku, aia mo mule lo halana u havutia haburu. #1 King 18.12 40I Viliv mote taga hika, aia lo gwatuivanua Astot. Vunu mo tinakaki mo vano mo toko heretuvaki na Roro Karea noi Jisas lo gwatuivanua savira tarisaki hi mo maravuti lo gwatuivanua lakua Sisaria. #Bol 21.8

Currently Selected:

A Bolokiana 8: HWT

Highlight

Copy