SEKARIAH 4
4
1Go agelo waina e pasa ki nau, e moro umai po pulevule au, dapala naatam̃oli waina e pei tea vulevuleana m̃elu dua ki namaturuana aneana. 2Go e noa ki nau, e naga, Ku punusi nasava? Go a naga, A po leo punusi, go p̃a leo, nakau ni nasulu sikai ni kold, go siloa kakana e doko nam̃asua kakana, go nasulu larua kakana eu doko asa; ara larua eu paki nasulu maga sikasikai waina eu doko nam̃asua kakana maga: 3Go nakau oliva dua pisari a, sikai e doko taleva ni matua ni siloa, go kerua e doko taleva ni mawiri kakana. 4Go a pasadara po noa ki agelo waina e pasa ki nau, a naga, Nawota aginau, tea maga waia eu pei nasava? 5Go agelo waina e pasa ki nau e pasadara po noa ki nau, e naga, Nigo ku da atae tea maga waia eu pei nasava kite? Go a naga, Ee, nawota aginau. 6Go e pasadara po noa ki nau, e naga, Tea waia e pei navasaana ki Yehovah paki Serubabel, e naga, Ega ta pae namarimatuaana mau, kite pae nakasuaana, ma ega vae naatagu, Yehovah ki taua maga e noa e. 7Nigo ku pei sei, tava warua O? Narae ni Serubabel p̃a wo pei malo matemate sikai: go ega wo piragi lua vatu ni nap̃auna umai pilake nararasaana, po naga, Nasaup̃iaana, nasaup̃iaana. 8Go navasaana ki Yehovah e moro umai paki nau, e naga, 9Nam̃elearu maga ni Serubabel eu lawo ki laketano ni nasum̃a waia; go nam̃elearuna maga eroga wo moro mari sua e; go p̃a wo atae naga Yehovah ki taua maga e dip̃aki lua au umai punusi ko. 10Nalakena sei e midoaki p̃alo ki naaleatia ni naleo kiki maga? Nara euga wo laelaea, po punusi natali totowo doko nam̃elearu ni Serubabel, tea larua wanogoe, waina eu pei namata maga ki Yehovah; eu do sava papiliu usuraki maramana mamau. 11Go kinau a pasadara, po noa ki nia, a naga, Nakau oliva dua waia ero pei nasava, waina ero doko taleva ni matua ni nakau ni nasulu go taleva ni mawiri kakana? 12Go a pasadara sala kerua, po noa ki nia, po naga, Ara ni nakau oliva dua waia ero pei nasava waina ero doko nap̃irikia ni nagole dua ni kold, waina naroro ni kold e do dum̃ana sara pae ara pano? 13Go e pasadara au, po naga, Nigo ku da atae tea maga waia eu pei nasava kite? Go a naga, Ee, nawota aginau. 14Go e naga, Tea maga waia ero pei tea vuvuraikiana dua waina ero lawodu pisari Yehovah ni maramana mamau.
Currently Selected:
SEKARIAH 4: NTB
Highlight
Share
Copy
Want to have your highlights saved across all your devices? Sign up or sign in
Bible Society of the South Pacific
