YOANE 9

1Go ragi waina e do liu pano, e punusi naatam̃oli kesa sikai waina e kesa pakilina. 2Go tea vasapiseikiana aneana maga eu pusuusu paki nia, eu naga, Rabbi, sei e mari naleo sa, naatam̃oli waia, kite tamana go p̃ilana, naga e kesa pakilina? 3Yesu e pasa dara, e naga, Naatam̃oli waia e da mari naleo sa mau, go tamana go p̃ilana ero da mari naleo sa mau: ma e dapalana naga nawosiana maga ki Sup̃e euga vei tea mariana euga toko lina asa. 4E one gida one naga tuga wosiwosi ki nawosiana maga ki tea waina e dip̃aki lua au umai, ragi waina e ko pei aleati: p̃ogi e do umai, waina te naata sikai e da mari atae p̃osiwosi asa mau. 5Ragi waina a doko maramana, a pei namarama ni maramana. 6Ragi waina e noa sua tea wanogoe, e daniu natano, po mari nalepa ki nataniuana, po puluti namatana maga ki nalepa, 7po noa ki nia, e naga, P̃a vano, p̃a sarue namatam̃a lukunoai‐ava ni Siloam (waina e pei tea vasadoaana e pei, Tea Tip̃akiluaana). Nalakena tea wanogoe e pano, po sarue namatana po leosai umai. 8Nalakena tea wanogoe tea ni m̃aladigi maga, go tea maga waina eu punusi a sala vea, naga e pei tea tatago sikai, eu naga, Naatam̃oli waia e da pei tea waina e do natano po datago kite? 9Tea p̃ota seara eu naga, E pei nae: tea p̃ota seara eu naga, Ee, ma e dakiusi a. 10Nae e naga, Kinau a pei nae. Nalakena tea wanogoe eu noa ki nia, eu naga, Namatam̃a maga ero pei tea wolagatiana dapale sava? 11Nae e pasa dara, e naga, Naatam̃oli waina e pei tea sosoana ki Yesu a mari nalepa, po puluti namatagu maga, po noa ki nau, e naga, P̃a vaki Siloam pano, po sarue namatam̃a: nalakena tea wanogoe a pano po sarue namatagu, go a leosai. 12Go eu noa ki nia, eu naga, Nae e doko esava.? E naga, A da atae a mau.

13Eu piragi tea waina e kesa sala vea umai punusi Farisi maga. 14Go e pei sabbath naaleatia waina Yesu e mari nalepa asa, po p̃olagati namatana maga. 15Nalakena tea wanogoe Farisi maga ma eu moro pusuusu paki nia ki e leosai dapale sava? Go e noa ki da, e naga, E doropusi nalepa doko namatagu maga, go a sarue namatagu, go a leosai. 16Nalakena tea wanogoe Farisi maga seara kakada eu naga, Naatam̃oli waia e da m̃elu Sup̃e umai mau, nalakena e da dapugoro sabbath mau. Ma tea p̃ota seara eu naga, Naatam̃oli waina e pei tea mari naleo sa e mari atae mari navaivaiana maga dapalana dapale sava? Go natap̃otaeana sikai e doko m̃aleoputo kakada. 17Nalakena tea wanogoe eu noa ki tea kesa eu naga, Nigo ku noa nasava nalo kakana, waina e p̃olagati namatam̃a maga? Go e naga, E pei profeta sikai. 18Nalakena tea wanogoe navarapule maga ni Yudea eu da saralomau nalo kakana mau, naga e pei tea kesa, po leo sai, pa pa eu soso tama ni go p̃ila ni tea waina e po leo sai, po pusuusu paki da, 19po naga, Tea waia e pei natumu, waina nimu koro noa naga e kesa pakilina kite? Go e leo sai ragi waia dapale sava? 20Tamana go p̃ilana ero pasa dara po naga, Aro atae naga tea waia e pei natugami, go naga e kesa pakilina: 21ma dapale sava e leo sai ragi waia, aro da atae a mau: kite sei e p̃olagati namatana maga, kinami aro da atae a mau: kuga vusuusu paki nia; e pei tea matua; nae ega wo dum̃ana pasa nalo kakana. 22Tamana go p̃ilana ero noa dapala nogoe, nalakena ero matau ki navarapule maga ni Yudea: nalakena navarapule maga ni Yudea eu saisai ki sua navasaana, naga te naata sikai e pe noa sai naga nae e pei Kristo, ega vei tea mariana ega toko etaku ni nasum̃a ni nasaisaiana. 23Nalakena tea wanogoe tamana go p̃ilana ero naga, E pei tea matua; kuga vusuusu paki nia. 24Nalakena tea wanogoe, eu soso sala kerua naatam̃oli waina e pei tea kesa, po noa ki nia, eu naga, P̃a tua Sup̃e nasamasamaana: kinami au atae naga naatam̃oli waia e pei tea mari naleo sa. 25Nalakena tea wanogoe nae e pasa dara, e naga, E pe vei tea mari naleo sa, a da atae a mau: a atae tea sikai maau, naga a pei tea kesa, po leosai ragi waia. 26Nalakena tea wanogoe eu noa ki nia, eu naga, E manigo mari nasava? E p̃olagati namatam̃a maga dapale sava? 27E pasa dara ra, e naga, A noa ki sua mu asa, go ku da dogo mau: ekasana ku masauna naga kuga moro dogo e? Nimu ma ku masauna naga kuga vei tea vasapiseikiana aneana maga kite? 28Go eu suori a, po naga, Nigo ku pei tea vasapiseikiana aneana: ma kinami au pei tea vasapiseikiana maga ki Moses. 29Kinami au atae naga Sup̃e e pasa ki Moses: ma naatam̃oli waia au da atae tokora waina e pae asa umai mau. 30Naatam̃oli wanogoe e pasa dara po noa ki da, e naga, Tea waia e pei tea ni namagaana, naga nimu ku da atae tokora waina e pae asa umai mau, go e p̃olagati namatagu maga. 31Tu atae naga Sup̃e e da dogo tea mari naleo sa maga mau: ma te naata sikai e pe vei tea lotu ki Sup̃e, po do mari namasauana aneana, e pe rogo naata wanogoe. 32Pae ragi vea ni maramana pa pa e da pei tea rogoana mau naga te naata sikai e p̃olagati namata maga ni tea waina e kesa pakilina. 33Naatam̃oli waia e pe ta m̃elu Sup̃e umai mau, e pe ta mari atae mari te navatuna mau. 34Eu pasa dara po noa ki nia, eu naga, Nigo ku pei tea mari naleo sa usuraki pakilina, go nigo ku pasa piseiki gami kite? Go eu nadi ki nia paki etaku.

35Yesu e dogo naga eu nadi ki nia paki etaku; go e pap̃ai a, po noa ki nia, e naga, Nigo ku saralomau Sup̃e Natuna kite? 36Nae e pasa dara po naga, Go e pei sei, Nawota, naga aga saralomau asa? 37Yesu e noa ki nia, e naga, Ku po punusi a, go tea waina e do pasa sikoti ko e pei nae. 38Go e naga, A saralomau, Nawota. 39Go e lotu ki nia. Go Yesu e naga, Kinau a umai paki maramana waia raki navasap̃otaeana, naga tea maga waina eu da leo sai mau euga leo sai; go naga tea maga waina eu leo sai euga vei tea mariana euga kesa. 40Farisi maga seara kakada waina eu sikoti a doko, eu dogo tea maga wanogoe, go eu noa ki nia, eu naga, Kinami ma au kesa kite? 41Yesu e noa ki da, e naga, Ku pe kesa, ku pe ta peani namarinaleosaana mau: ma ragi waia ku naga, Au leo sai: namarinaleosaana animu e doko.

Currently Selected:

YOANE 9: NTB

Highlight

Copy