YOANE 8

1Go e moro umai ragi ni namakotokotoana paki roara ni nasum̃a tapu, go narei mamau eu rumai punusi a; 2go e dasake, po pasa pisei ki da. 3Go tea midiri maga go Farisi maga eu piragi nagoroi sikai umai waina e pei tea vuasokiana nalakena namaripeleana; go eu lawo ki nia m̃aleoputo, po noa ki nia, eu naga, 4Tea vasapiseiki, nagoroi waia e pei tea vuasokiana ragi waina e maripele, ragi kakana. 5Go Moses e dip̃aki gami nawotaeana naga auga nadi tea tapala nogoe maga ki vatu: ma nigo ku noa nasava nalo kakana? 6Go eu noa tea wanogoe, eu mari dogo e, naga euga veani tea waina euga vasa dip̃a e asa. Ma Yesu e kolo pakitano, po midiri natano ki nakinina. 7Ma ragi waina eu do pusuusu paki nia, e dara sake po noa ki da, e naga, Tea waina e dika namarinaleosaana m̃aleoputo kakamu ega vea nadi a ki vatu sikai. 8Go e moro kolo pakitano, po midiri natano ki nakinina. 9Go ragi waina eu dogo e, eu sikasikai dave pano, eu atulake pae tea matua maga pa pa paki tea edaku maga: go Yesu e pei tea toropusiana e sikina doko, go nagoroi wanogoe e do lawodu m̃aleoputo. 10Go Yesu e dara sake, po noa ki nia, e naga, Koroi, nara wai? Te naata e da dip̃akotovi ko mau kite? Go e naga, Ee, Nawota. 11Go Yesu e noa ki nia, e naga, Go kinau ma a da dip̃akotovi ko mau: p̃a vano, go p̃a ta moro mari naleo sa mau pae ragi waia pa pa.

12Nalakena tea wanogoe Yesu e moro pasa ki da, e naga, Kinau a pei namarama ni maramana: tea waina e do dausi au ega wo da surata namaligo mau, ma ega wo peani namarama ni namauriana. 13Nalakena tea wanogoe Farisi maga eu noa ki nia, eu naga, Nigo ku dum̃am̃a noasokisoki nalo kakam̃a; nanoasokisokiana anigo e da pei lomau mau. 14Yesu e pasa dara po noa ki da, e naga, Kinau a pe tum̃agu noasokisoki nalo kakagu, ma nanoasokisokiana aginau e pe vei lomau; nalakena a atae tokora waina a pae asa umai, go tokora waina aga vaki asa pano; ma nimu ku da atae tokora waina a pae asa umai mau, kite tokora waina aga vaki asa pano. 15Nimu ku do pasa potae pae nap̃okasi; kinau a da pasa p̃otae te naata sikai mau. 16Go kinau a pe vasap̃otae, navasap̃otaeana aginau e pe vei lomau; nalakena a da sikigu doko mau, ma kinau go Tamagu waina e dip̃aki lua au umai. 17Go e pei tea midiriana nawotaeana animu, naga nanoasokisokiana ki naatam̃oli dua e pei lomau. 18Kinau a pei tea waina a do dum̃agu noasokisoki nalo kakagu, go Tamagu waina e dip̃aki lua au umai e do noasokisoki nalo kakagu. 19Nalakena tea wanogoe eu noa ki nia, eu naga, Tamam̃a e doko esava? Yesu e pasa dara, e naga, Ku da atae au mau, go ku da atae Tamagu mau: ku pe atae au, ku pe moro atae Tamagu. 20E pasa navasaana maga wanogoe em̃ago ni m̃ane tauakiana, ragi waina e do pasa piseiki roara ni nasum̃a tapu: go te naata sikai e da pua soki a mau; nalakena aura aneana e ko da umai mau.

21Nalakena tea wanogoe e moro noa ki da, e naga, Kinau aga vano, go kuga wo laaga au, go kuga wo mate namarinaleosaana animu: tokora waina kinau aga vaki asa pano, nimu ku da mari atae umai paki asa mau. 22Nalakena tea wanogoe navarapule maga ni Yudea eu naga, Ega wo dum̃ana mari punue a kite, nalakena e naga, Tokora waina kinau aga vaki asa pano, nimu ku da mari atae umai paki asa mau? 23Go e noa ki da, e naga, Nimu ku pei tea ni etano; kinau a pei tea ni elagi: nimu ku pei tea ni maramana waia; kinau a da pei tea ni maramana waia mau. 24Nalakena tea wanogoe a noa ki mu, naga kuga wo mate namarinaleosaana animu maga: nalakena ku pe ta saralomau mau naga kinau a pei nae, kuga wo mate namarinaleosaana animu maga. 25Nalakena tea wanogoe eu noa ki nia, eu naga, Nigo ku pei sei? Yesu e noa ki da, e naga, Tea sikai maau waina a do noa ki mu asa. 26A peani naleo laapa waina aga vasa ara po pasa p̃otae ara nalo kakamu: ma tea waina e dip̃aki lua au umai e pei lomau: go naleo maga waina kinau a dogo ra kiana, naleo maga wanogoe a do pasa ara paki maramana. 27Eu da midoaki atae mau naga e do noa ki da Tamana. 28Nalakena tea wanogoe Yesu e noa ki da, e naga, Ragi waina kuga wo sike sua naatam̃oli Natuna ega vakilagi, ragi wanogoe kuga wo atae naga kinau a pei nae, go naga a da dum̃agu mari te navatuna mau, ma dapala waina Tamagu e pasapiseiki nau, a do pasa naleo maga wanogoe. 29Go tea waina e dip̃aki lua au umai e sikoti au doko; e da doropusi au a sikigu doko mau; nalakena kinau a do mari sara ragi tea maga waina nae e do midoaki m̃ata ki da. 30Ragi waina e do pasa tea maga wanogoe tea laapa eu saralomau asa.

31Nalakena tea wanogoe Yesu e noa ki navarapule maga ni Yudea waina eu saralomau navasaana aneana, e naga, Nimu ku pe toko navasaana aginau doko, ku pe vei tea vasapiseikiana aginau maga lomau; 32go kuga wo atae nalomauana, go nalomauana ega wo peresi mu kuga tum̃amu doko. 33Eu pasa dara paki nia, eu naga, Au pei nawora ni Abraham, go au ko da pei naviti maga ki te naata sikai te ragi sikai mau: ekasana nigo ku naga, Kuga wo pei tea mariana kuga vei tea veresiana kuga tum̃amu doko? 34Yesu e pasadara ra, e naga, Lomau, lomau, a noa ki mu, naga Sara naata waina eu do mari naleo sa eu pei naviti ni namarinaleosaana. 35Go naviti e da doko nasum̃a doko pa pa e du mau du mau: natuna e doko asa doko pa pa e du mau du. 36Nalakena tea wanogoe Natuna e pe veresi mu ku pe tum̃amu doko, ku pe vei tea veresiana ku pe tum̃amu doko lomau. 37A atae naga ku pei nawora ni Abraham; ma ku do laaga naga kuga mari punue au, nalakena navasaana aginau e da disu nap̃alau mu mau. 38Kinau a do pasa tea maga waina a punusi a sikoti Tamagu: go nimu ku do mari tea maga waina ku dogo e ki tamamu. 39Eu pasa dara po noa ki nia, eu naga, Tamagami e pei Abraham. Yesu e noa ki da, e naga, Ku pe vei Abraham natuna maga, ku pe mari nawosiana maga ki Abraham. 40Ma ragi waia ku laaga naga kuga mari punue au, naatam̃oli sikai waina a po pasa ki mu nalomauana, waina a dogo e ki Sup̃e: Abraham e da mari tea wanogoe mau. 41Nimu ku do mari nawosiana maga ki tamamu. Eu noa ki nia, eu naga, Kinami au da pakilina m̃elu namaripeleana mau; au peani tamagami sikai maau, Sup̃e. 42Yesu e noa ki da, e naga, Sup̃e e pe vei tamamu, ku pe dodomi au: nalakena kinau a m̃elu Sup̃e po umai; nalakena a da dum̃agu umai mau, ma nae e dip̃aki lua au umai. 43Ekasana ku da midoaki atae navasaana aginau mau? Nalakena ku da mari atae dogo navasaana aginau mau. 44Nimu ku pei tea ni tamamu diabolo, go namasauana sa maga ki tamamu ku masauna naga kuga mari a. Nae e pei tea mari punue pae naatulakeana pa pa, go e da lawodu nalomauana mau, nalakena nalomauana e da doko asa mau. Ragi waina e pasa nasorosoroana, e pasa tea ni tea aneana maga: nalakena e pei tea sorosoro, go tamada. 45Ma nalakena kinau a do noa nalomauana ku da saralomau navasaana aginau mau. 46Sei kakamu e pasap̃ai au nalo ni namarinaleosaana? A pe noa nalomauana ekasana nimu ku da saralomau navasaana aginau mau? 47Tea waina e pei tea ni Sup̃e e do dogo navasaana maga ki Sup̃e: nalakena tea wanogoe nimu ku da dogo e mau, nalakena ku da pei tea ni Sup̃e mau. 48Navarapule maga ni Yudea eu pasa dara po noa ki nia, eu naga, Kinami au da noa p̃ia naga nigo ku pei naatam̃oli ni Samaria sikai, po peani dimon sikai kite? 49Yesu e pasa dara, e naga, Kinau a da peani dimon sikai mau; ma a do dodomadagani Tamagu, go nimu ku do dododao au. 50Ma kinau a da laaga nasamasamaana aginau mau: sikai e doko waina e do laaga po do pasa p̃otae. 51Lomau, lomau, a noa ki mu, naga Te naata sikai e pe rogo paratiki navasaana aginau, ega wo da punusi namateana mau pa pa ega tu mau du. 52Navarapule maga ni Yudea eu noa ki nia, eu naga, Ragi waia au po atae naga ku peani dimon sikai. Abraham e mate, go profeta maga; go nigo ku naga, Te naata sikai e pe rogo paratiki navasaana aginau, e pe wo da kati dogo namateana mau pa pa e pe tu mau du. 53Nigo ku p̃arua liu tamagami Abraham, waina e mate kite? Go profeta maga eu mate: ku dum̃am̃a mari ko ku pei sei? 54Yesu e pasa dara, e naga, Kinau a pe tum̃agu samasamani au, nasamasamaana aginau e pe ta pei te navatuna mau: Tamagu e pei tea waina e do samasamani au; waina nimu ku noa naga e pei Sup̃e animu; 55go ku da atae a mau: ma kinau a atae a; go a pe noa naga a da atae a mau, a pe wo pei tea sorosoro sikai dakiusi mu: ma a atae a, go a do dogo parati ki navasaana aneana. 56Tamamu Abraham e sokamidi naga ega vunusi naaleatia aginau; go e punusi a po laelaea. 57Nalakena tea wanogoe navarapule maga ni Yudea eu noa ki nia, eu naga, Ku ko da peani natau rualima lima mau, go ku punusi Abraham kite? 58Yesu e noa ki da, e naga, Lomau, lomau, a noa ki mu, naga Ragi waina Abraham e ko da pakilina mau, kinau a doko. 59Nalakena tea wanogoe eu dape dakati vatu maga naga euga nadi a asa: ma Yesu e dum̃ana dasuru ki nia, po dave m̃elu dua ki nasum̃a tapu pano.

Currently Selected:

YOANE 8: NTB

Highlight

Copy