YOANE 2

1Go naaleatia ketolu navitawiriana sikai e pei tea mariana Kana ni Calilea; go Yesu p̃ilana e doko tokora wanogoe; 2go Yesu ma e pei tea vitautauana, go tea vasapiseikiana aneana maga, paki navitawiriana wanogoe. 3Go ragi waina waine e nopu, Yesu p̃ilana e noa ki nia, e naga, Eu da peani waine mau. 4Go Yesu e noa ki nia, e naga, Aga kasa ki‐go, koroi? Aura aginau e ko da umai mau. 5P̃ilana e noa ki tea suasua maga, e naga, Tea waina e pe noa ki mu asa kuga mari a. 6Go noai ni vatu latesa eu pei tea lawokiana tokora wanogoe pae namaridautauana ki naka ni Yudea, eu dape noai ni bakita latelatesa kite loveloveti sarasara ra. 7Yesu e noa ki da, e naga, Kuga vakavuro noai ni vatu maga ki noai. Go eu pakavuro ra eu pura matoto. 8Go e noa ki da, e naga, Kuga vautu ragi waia, po dape a pano dua tea maraki nakaniana asa. Go eu dape e pano. 9Go ragi waina tea maraki nakaniana e munu dogo noai waina e pei tea mariana e pei waine, go e da atae a naga e pae esava (ma tea suasua maga waina eu pautui noai eu atae a), tea maraki nakaniana e soso tea vitawiri, po noa ki nia, 10e naga, Sara naatam̃oli eu pea doropusi waine wia; go ragi waina naatam̃oli maga eu munu sua p̃arua, eu edaku doropusi tea sa marara: nigo ku mauti waine wia pa pa paki ragi waia. 11Naatulakeana wanogoe ni navaivaiana maga Yesu e mari a Kana ni Calilea, po mari nasamasamaana aneana e doko lina asa; go tea vasapiseikiana aneana maga eu saralomau asa.

12Edaku ki tea wanogoe e siwo paki Kapernaum pano, nae, go p̃ilana, go taina maga, go tea vasapiseikiana aneana maga, eu mamau: go eu doko tokora wanogoe doko naaleatia maga eu da laapa mau.

13Go navakalauana ki naka ni Yudea e pei m̃aladigi, go Yesu e sake paki Yerusalem pano. 14Go e pap̃ai nasum̃a tapu tea maga waina eu do sori oks maga go shiip maga go tokopea maga, go tea surupioli ki m̃ane maga eu dasake: 15go e mari tea varati sikai ni namea kiki maga, po kopasi puti ra paki etaku ni roara ni nasum̃a tapu, shiip maga go oks maga; go e da ki m̃ane ki tea surupioli ki m̃ane maga, po dapera ki wede adeada maga; 16go e noa ki tea maga waina eu sori tokopea maga, e naga, Kuga tape lua tea maga waia euga m̃elu dua ki tokora waia pano; kuga ta mari nasum̃a ki Tamagu ega vei nasum̃a ni navakokotoana mau. 17Tea vasapiseikiana aneana maga eu midoa ki nia naga e pei tea midiriana, Nasuisuiana ega wo magi nasum̃a anigo gani dinomi au. 18Nalakena tea wanogoe navarapule maga ni Yudea eu pasa dara po noa ki nia, eu naga, Seve navaivaiana ku piseiki gami asa, waina ku mari tea maga waia? 19Yesu e pasa dara po noa ki da, e naga, Kuga rakai nasum̃a tapu waia, go aga wo sike a ega tuleana naaleatia dolu. 20Nalakena tea wanogoe navarapule ni Yudea eu naga, Natau rualima pati tamate latesa nasum̃a tapu waia e do pei tea tavagiana ara, go nigo p̃a wo sike a ega tuleana naaleatia dolu kite? 21Ma nae e noa e nalo ni nasum̃a tapu ni nap̃atokona. 22Nalakena tea wanogoe ragi waina e pei tea sikeana duleana m̃elu dua ki tea mate maga, tea vasapiseikiana maga eu midoa ki nia naga e noa tea wanogoe; go eu saralomau navasaana midiriana wanogoe, go navasaana waina Yesu e noa e.

23Go ragi waina e doko Yerusalem ragi ni navakalauana, ragi ni nasaisaiana kakana, tea laapa eu saralomau nagisana, eu do leo punusi navaivaiana aneana maga waina e mari ra. 24Ma Yesu e da dum̃ana pavatu ara asa mau, nalakena nae e atae tea maga mamau puti, 25go nalakena e da pei sap̃o mau naga te naata sikai ega noasokisoki nalo ni naatam̃oli: nalakena nae e dum̃ana atae tea waina e doko nap̃alau ni naatam̃oli.

Currently Selected:

YOANE 2: NTB

Highlight

Copy