AMOS 1
1
1Navasaana maga ki Amos, naatam̃oli sikai ni Tekoa, tea leoparatiki shiip maga sikai kakada, waina eu rumai paki nia doko navunusiana nalo ni Israel, doko naaleatia maga ki Ussiah nawota ni Yudah, go doko naaleatia maga ki Yeroboam natu ni Yoash nawota ni Israel, natau dua pea ki naruru.
2Go e naga, Yehovah ega uru m̃elu Sion, po pitua ki nadaleona m̃elu Yerusalem; go napega maga ki tea leoparatiki shiip euga wo susue, go nap̃au ni tava Karmel ega wo kokolo.
3Yehovah e noa dapala nea, e naga, Nalakena natapiriana dolu ni Damaseko, go nalakena epati, aga wo da mari navaratiana kakana ega liliu pano mau; nalakena eu p̃okalesue Cilead ki tea wokalesue maga ni airon: 4Ma aga wo dip̃aki lua nakapu sikai paki nasum̃a ki Hasael, go ega wo gani dinomi nasum̃a kasua p̃aakagoroana maga ki Ben‐hadad. 5Go aga wo mari p̃orae tea walagoto ni Damaseko, po daelua naatatoko maga m̃elu dua ki nap̃aloa ni Aven, go tea waina e dape soki tiko ni namarakiana m̃elu dua ki nasum̃a ni Eden: go naka ni Siria euga wo pei tea viragi‐lua‐pavakotoana pano paki Kir, Yehovah e noa e.
6Yehovah e noa dapala nea, e naga, Nalakena natapiriana dolu ni Casa, go nalakena epati, aga wo da mari navaratiana kakana ega liliu pano mau; nalakena eu piragi lua pavakoto narei mamau puti naga euga vitua ki da paki Edom: 7Ma aga wo dip̃aki lua nakapu sikai paki p̃aaka ni Casa, go ega wo gani dinomi nasum̃a kasua p̃aakagoroana kakana maga: 8Go aga wo daelua naatatoko maga m̃elu dua ki Ashdod, go tea waina e dape soki tiko ni namarakiana m̃elu dua ki Ashkelon; go aga wo doa nam̃elearugu ega tip̃a Ekron, go namagovai ni Filistine maga waina eu doko, euga wo mate puoli, Yehovah Sup̃e e noa e.
9Yehovah e noa dapala nea, e naga, Nalakena natapiriana dolu ni Tair, go nalakena epati, aga wo da mari navaratiana kakana ega liliu pano mau; nalakena eu pitua ki narei mamau puti paki Edom, po da midoa ki navasasokiana ki tamataida maga mau: 10Ma aga wo dip̃aki lua nakapu sikai paki p̃aaka ni Tair, go ega wo gani dinomi nasum̃a kasua p̃aakagoroana kakana maga.
11Yehovah e noa dapala nea, e naga, Nalakena natapiriana dolu ni Edom, go nalakena epati, aga wo da mari navaratiana kakana ega liliu pano mau; nalakena e kopasi taina ki lova, go e da mari malemale a mau, go namaetoana aneana e kati p̃oraworae pitip̃atip̃a, go e mauti namaritausuana aneana pa pa po du mau du. 12Ma aga wo dip̃aki lua nakapu sikai paki Teman, go ega wo gani dinomi nasum̃a kasua p̃aakagoroana kakana maga ni Bosrah.
13Yehovah e noa dapala nea, e naga, Nalakena natapiriana dolu ki Ammon natuna maga, go nalakena epati, aga wo da mari navaratiana kakana ega liliu pano mau; nalakena eu pua p̃orae nagoroi diena maga ni Cilead, naga euga tum̃ada mari kokoi adeada ega wo p̃arua: 14Ma aga wo dokoni nakapu sikai p̃aaka ni Rabbah, go ega wo gani dinomi nasum̃a kasua p̃aakagoroana kakana maga, ega vilake nararasaana naaleatia ni navakalo, ega vilake nalagi atu sikai naaleatia ni suitaviro. 15Go nawota adeada ega wo pei tea viragilua‐pavakotoana pano, nara ma tea maraki aneana maga euga mamau, Yehovah e noa e.
Currently Selected:
AMOS 1: NTB
Highlight
Share
Copy
Want to have your highlights saved across all your devices? Sign up or sign in
Bible Society of the South Pacific
