AMOS 2
2
1Yehovah e noa dapala nea, e naga, Nalakena natapiriana dolu ni Moab, go nalakena epati, aga wo da mari navaratiana kakana ega liliu pano mau; nalakena e dap̃ara ki navatu maga ni nawota ni Edom eu pei laime: 2Ma aga wo dip̃aki lua nakapu sikai paki Moab, go ega wo gani dinomi nasum̃a kasua p̃aakagoroana maga ni Kerioth; go Moab ega wo mate ega vilake namarip̃araiana, go nararasaana, go nadaleo ni paiga: 3Go aga wo daelua tea vasap̃otae m̃elu dua ki m̃aleoputo kakana, po mari punue tea maraki kakana maga mamau puti euga sikoti a, Yehovah e noa e.
4Yehovah e noa dapala nea, e naga, Nalakena natapiriana dolu ni Yudah, go nalakena epati, aga wo da mari navaratiana kakana ega liliu pano mau; nalakena eu dip̃adoa nawotaeana ki Yehovah, go eu da pavaigoro natawonakiana aneana maga mau, go nasorosoroana adeada maga eu mari ra eu surata sasap̃o, dakiusi waina tamada maga eu pea mari a: 5Ma aga wo dip̃aki lua nakapu sikai paki Yudah, go ega wo gani dinomi nasum̃a kasua p̃aakagoroana maga ni Yerusalem.
6Yehovah e noa dapala nea, e naga, Nalakena natapiriana dolu ni Israel, go nalakena epati, aga wo da mari navaratiana kakana ega liliu pano mau; nalakena eu sori tea waina sogi e dika asa raki silver, go tea tika raki nam̃elevasiana dua: 7Eu pasi puludoa nap̃au ni tea rogokitesa nam̃otam̃ota ni natano, po doa daki napua ki tea maga waina eu matemate: go naatam̃oli sikai go tamana ero dua pa punusi nagoroi atara sikai maau, po mari nagisagu waina e dapu e pei tea m̃oli: 8Go eu one natano nadigi ni wede ni naviriana visarasara maga, eu maturu one sugoro maga waina eu dape ra eu pei nanadisokiana maga, go doko ekopu ni nasum̃a ki Sup̃e adeada, eu munu waine ki tea varatiana maga. 9Ma kinau a mari sa ki naworawora ni Amor pa dua ki naraeda; waina navaraupakilagi‐ana kakana e dakiusi navaraupakilagi‐ana ni sidar maga, go waina e kasua dakiusi oak maga; ma kinau a mari sa ki nawana elagi, go nakoana etano. 10Go a piragi lua mu m̃elu dua ki navanua ni Ityipt sake umai, po maraki mu masop̃alo natau rualima pati, naga kuga veani navanua ki naworawora ni Amor. 11Go a sike natumu naanoai maga seara kakada eu duleana naga euga vei profeta maga, go natureai animu maga seara kakada naga euga vei Nasarite maga. E da dapala nogoe, Israel natuna maga O, kite? Yehovah e noa e. 12Ma nimu ku dua Nasarite maga waine naga euga munu; po dip̃aki profeta maga, doko do naga, Kuga ta peanoasai mau. 13Kuga leo, kinau aga wo dosoki mu pakitano tokora waina ku doko asa, dapala waina kart sikai waina e pura ki napu maga e pei tea tosokiana pakitano. 14Go nasavasiliana ega wo puoli ki tea sava m̃araverave, go nakasuaana ki naatam̃oli kasua ega wo da maneana pei nasilaeana mau, go tea marimatua ega wo da dum̃ana mauti namauriana aneana mau: 15Go tea waina e pua naasu, ega wo da lawodugoro mau; go tea waina nam̃elena e sava kasua ega wo da dum̃ana pualua e mau: go tea waina e sakesaake horse ega wo da dum̃ana mauti namauriana aneana mau: 16Go tea waina e piviari p̃arua m̃aleoputo ni tea marimatua maga, ega wo sava naaleatia wanogoe, ega wo m̃alam̃ala pano, Yehovah e noa e.
Currently Selected:
AMOS 2: NTB
Highlight
Share
Copy
Want to have your highlights saved across all your devices? Sign up or sign in
Bible Society of the South Pacific
