APOSTOLO MAGA 13

1Go profeta seara go tea vasapiseiki seara eu doko Antiokia, tea ni ekalesia kakana, Barnaba, go Simeon waina e pei tea sosoana ki Nicer, go Lukio ni Kurene, go Manaen waina e pei tea vakaleana sikoti Herod tetrarke, go Saul. 2Go ragi waina eu magi Yehovah suasua, po pali, Naatana Tapu e naga, Kuga maginau mari masale ki Barnaba go Saul raki nawosiana waina a soso ra paki asa. 3Ragi wanogoe, ragi waina eu pali po dapasavasa sua po pusake sua nam̃elearuda ara, eu dip̃aki lua ra.

4Dapala nogoe nara, waina ero pei tea tip̃akiluaana pae Naatana Tapu, ero siwo paki Seleukia pano; go ero porau pae tokora wanogoe paki Kupero pano. 5Go ragi waina ero doko Salami, ero dogorogo ki navasaana ki Sup̃e ekopu ni nasum̃a ni nasaisaiana maga ki tea ni Yudea: go ero peani Yoane e pei tasiga adeada. 6Go ragi waina ero surata duaduru sua naure mamau paki Pafo pano, ero pap̃ai naatam̃oli sikai waina e pei munuai, profeta sorosoro sikai, tea ni Yudea, nagisana Bar‐Yesu; 7waina e sikoti tea maramara doko, Sercio Paulo, naatam̃oli midoaki atae sikai. Nae e soso Barnaba go Saul ero umai punusi a, po masauna naga ega rogo navasaana ki Sup̃e. 8Ma Elima munuai wanogoe (nalakena nagisana e pei tea vasadoaana dapala nogoe) e lawo dugoro ra, e laaga naga ega vua doa tea maramara pa dua ki nasaralomauana. 9Ma Saul, waina ma e pei Paulo, e pei tea vakavuroana ki Naatana Tapu, po leo soki a, 10po naga, Tea vura ki sara nasorosoroana go sara nasigisigileoana, natu ni diabolo, tea kokona ki sara namarinaleoleanaana, p̃a wo da makoto ki navuadoaana ni napua leana maga ki Yehovah kite? 11Go p̃a leo, ragi waia nam̃elearu ni Yehovah e doko ako, go p̃a wo kesa, p̃a wo da punusi elo mau pa pa paki te ragi. Go namavu sikai go namaligo sikai ero dowo asa m̃araverave; go e surata daliepu, e laaga te seara waina euga vuati nam̃elearuna pano. 12Ragi wanogoe tea maramara, ragi waina e punusi tea waina e pei tea mariana, e saralomau, go e saram̃akoto navasapiseikiana ki Yehovah.

13Go Paulo go tea maga waina eu sikoti a doko eu porau pae Pafo po umai paki Perca ni Pamfilia: go Yoane e m̃elu dua ki da pano, po liliu umai paki Yerusalem. 14Ma nara, eu surata duaduru pae Perca, po umai paki Antiokia ni Pisidia; go ero paki ekopu ni nasum̃a ni nasaisaiana naaleatia ni sabbath, po do natano. 15Go edaku ki naveveana ni nawotaeana go profeta maga tea maraki maga ni nasum̃a ni nasaisaiana eu dip̃aki lua pa punusi ra, po naga, Taigami maga, koro pe veani te navasaana ni navasaparatikiana paki narei, koroga noa e. 16Go Paulo e duleana, po alosoki ki nam̃elearuna po naga.

Naatam̃oli ni Israel maga, go tea maga waina ku matauki Sup̃e, kuga takidorogo. 17Sup̃e ki narei ni Israel waia, e matadoa tamagida maga, po sike narei eu pakilagi ragi waina eu m̃enaki‐atatoko navanua ni Ityipt, go e piragi lua ra ki aru sikeana sikai m̃elu dua ki nia pano. 18Go e dapetape pakale ra ragi ni natau eu alagoro pei rualima pati masop̃alo. 19Go ragi waina e mari matua ki sua nalauna larua navanua ni Kanaan, e dua ra navanua adeada naga euga veani a, e alagoro pei natau p̃onotia pati rualima takuna lima: 20go edaku ki tea maga wanogoe e dua ra tea vasap̃otae maga pa pa paki Samuel profeta. 21Go eu edaku datago nawota sikai, go Sup̃e e dua ra Saul natu ni Kish, naatam̃oli sikai ni naworawora ni Benyamin, natau rualima pati. 22Go ragi waina e dape lua sua e, e mari David e pakilina naga ega vei nawota adeada; waina e maneana noa sokisoki, po naga, A pap̃ai David natu ni Yesse, naatam̃oli sikai waina e pataka nap̃op̃ogu, waina ega wo mari namasauana aginau mamau puti. 23Naatam̃oli wanogoe naworaworana Sup̃e e piragi sikai kakada pae nasaiana e magi Israel pei Tea Maumau pauri, Yesu; 24ragi waina e ko da umai mau Yoane e pea dogorogo ki nabapetisoana ni namidoakidoaana paki narei ni Israel mamau. 25Go ragi waina Yoane e do pakavuro nasavaana ni namalopa aneana, e naga, Ku midoa ki nia naga kinau a pei sei? Kinau a da pei nae mau. Ma kuga leo, tea sikai e umai edaku ki nau, waina a da p̃ia mau naga aga veresi nam̃elevasiana ni nam̃elena maga. 26Taigu maga, naworawora ni Abraham natuda maga, go tea maga waina eu sari mu waina eu matauki Sup̃e, navasaana ni namautipauriana waia e manigida pei tea tip̃akiluaana umai. 27Nalakena tea maga waina eu doko Yerusalem doko, go tea maraki adeada maga, nalakena eu da atae a mau, eu dip̃akotovi a, po mari nadaleo ni profeta maga waina eu pei tea veveana sara sabbath eu lolomana. 28Go eu da pap̃ai te nalakena ni namateana asa mau, ma eu datagovi Pilato naga ega vei tea maripunueana. 29Go ragi waina eu mari sua tea maga mamau puti waina eu pei tea midiriana nalo kakana, eu dape a e siwo m̃elu dua ki nakau, po doropusi a e one matigo sikai. 30Ma Sup̃e e sike a e duleana m̃elu dua ki tea mate maga: 31go e pakilina naaleatia laapa ki tea maga waina eu sake sikoti a pae Calilea umai paki Yerusalem, waina eu pei tea noa sokisoki aneana maga paki narei ragi waia. 32Go kinami aro dogorogo paki mu ki narogorogoana wia ni nasaiana waina e pei tea mariana paki tamagida maga, 33naga Sup̃e e magi natugida maga mari a e lolomana, e sike Yesu e duleana; dakiusi waina e pei tea midiriana Salamo kerua, Nigo ku pei Natugu, kinau a pesi ko masoso. 34Go nalo ni waina e sike a e duleana m̃elu dua ki tea mate, naga ega wo da moro liliu paki namesoana mau, e noa dapala waia, e naga, Aga wo dua mu tea tautau maga go tea lomau maga ki David. 35Nalakena e moro noa doko Salamo p̃ota sikai, P̃a wo da pitua ki Tea Tautau anigo naga ega vunusi namesoana mau. 36Nalakena David, ragi waina e magi tagona aneana suasua sua pae namidoakip̃otaeana ki Sup̃e, e maturu, po pei tea toropusiana sikoti tamana maga, po punusi namesoana: 37ma tea waina Sup̃e e sike a e duleana e da punusi namesoana mau. 38Nalakena tea wanogoe, taigu maga ega vei tea ataeana paki mu, naga namidoakikorokoroana ni namarinaleosaana maga pae naatam̃oli wanogoe e pei tea rogorogokiana paki mu: 39go sara naata waina eu saralomau eu pei tea marileanakiana pae asa m̃elu dua ki naleo maga mamau puti, waina ku mari sa pei tea marileanakiana m̃elu dua ki da pae nawotaeana ki Moses. 40Nalakena tea wanogoe kuga vunusi, naga tea waina e pei tea noaana tusi ki profeta maga, ega ta pakilina ki mu mau;

41Kuga leo, tea midoakip̃alo maga, go kuga maga, po puoli;

Nalakena kinau a p̃osiwosi ki nawosiana sikai naaleatia animu maga,

Nawosiana sikai waina te naata e pe rogorogo ki nia paki mu, ku pe ta saralomau asa mau.

42Go ragi waina ero do dave pano, eu pavara naga navasaana maga wanogoe ega vei tea vasaana paki da sabbath m̃ogi larua. 43Go ragi waina nasaisaiana e peravera, tea ni Yudea maga go proseluto lotu p̃ia maga tea laapa kakada eu dausi Paulo go Barnaba: waina ero do pasa ki da, po pasa die ra naga euga toko nasaup̃iaana ki Sup̃e doko.

44Go sabbath waina e dausi a m̃aladigi natokoana wanogoe mamau eu pei tea saisaikiana naga euga rogo navasaana ki Sup̃e. 45Ma ragi waina tea ni Yudea eu punusi taua maga ni naatam̃oli, eu pei tea vakavuroana ki naroitoiana, po pasa dugoro tea maga waina eu pei tea vasaana pae Paulo, po pasa sa ki. 46Go Paulo go Barnaba ero pasa piviari, po naga, E one asa one naga navasaana ki Sup̃e ega vei tea vasaana pea paki mu. Ma nalakena ku dip̃a doa e, po dum̃amu pasa p̃otae mu naga ku da p̃ia ki namauriana waina e du mau du mau, kuga leo, au maradoa paki tea ni nalauna p̃ota maga. 47Nalakena Yehovah e dip̃a ki gami dapala nogoe, e naga,

A lawo ki‐go naga p̃a vei namarama agi tea ni nalauna p̃ota maga,

Naga p̃a vei namautipauriana pa pa paki namatap̃ago ni maramana.

48Go ragi waina tea ni nalauna p̃ota maga eu dogo tea wanogoe, eu laelaea, po pasa samasamani navasaana ki Sup̃e: go tea maga waina eu pei tea tawonakiana paki namauriana waina e du mau du eu saralomau. 49Go navasaana ki Nawota e sokapule usuraki navanua wanogoe mamau. 50Ma tea ni Yudea eu pasa die nagoroi lotu p̃ia tea dodomadaganiana maga, go naanoai vea maga ni natokoana po sike nakopaleleana sikai dip̃a Paulo go Barnaba, po nadi ki da ero m̃elu dua ki navanua adeada pano. 51Ma ero meseura ki nam̃otam̃ota ni nam̃eleda dip̃a ra po umai paki Ikonio. 52Go tea vasapiseikiana maga eu pei tea vakavuroana ki nalaelaeaana go ki Naatana Tapu.

Currently Selected:

APOSTOLO MAGA 13: NTB

Highlight

Copy