APOSTOLO MAGA 12
12
1Go ragi wanogoe Herod nawota e sai ki nam̃elearuna maga naga ega mari sa ki seara ni ekalesia maga. 2Go e mari punue Yakobo tai ni Yoane ki lova. 3Go ragi waina e punusi naga e p̃ia namata ni tea ni Yudea, e sokari a po pua soki Petero. Go e pei naaleatia maga ni bred waina leven e dika asa. 4Go ragi waina e pua soki a, e doropusi a e doko nasum̃a ni navavaiana, po pitua ki nia paki tea ni navakalo eu pati paka vati naga euga vavaigoro e; e midoaki nia naga ragi waina navakalauana ega nopu ega wo piragi a sake punusi narei. 5Nalakena tea wanogoe Petero e pei tea vavaigoroana ekopu ni nasum̃a ni navavaiana: ma ekalesia eu do maneana dapasavasa kasua paki Sup̃e. 6Go ragi waina Herod e naga ega viragi a dave, nap̃ogiana wanogoe Petero e do maturu namawota ni tea ni navakalo edua, e pei tea soliana ki namori ni vatu edua: go tea vavai maga narae ni namata ero do pavaigoro nasum̃a ni navavaiana. 7Go kuga leo, agelo sikai ki Yehovah e lawodu pisari a, go namarama sikai e maramalaga em̃ago: go e p̃oka navidi ni Petero, po pulevule a, po naga, P̃a tuleana m̃araverave. Go namori ni vatu kakana maga ero dowo marua ki nam̃elearuna maga. 8Go agelo wanogoe e noa ki nia, P̃a tum̃am̃a dasoki ko, po oti soki nam̃elevasiana anigo maga. Go e mari dapala nogoe. Go e noa ki nia, P̃a sawa ki sugoro anigo ega talivirigoro ko, go p̃a rausi au. 9Go e dave, po dausi a; go e da atae naga tea waina e pei tea mariana pae agelo wanogoe e pei lomau mau, ma e midoa ki nia naga e punusi navunusiana sikai. 10Go ragi waina ero surata duaduru sua tea vavai vea go kerua, ero umai paki namata‐pua ni vatu waina e piragi paki natokoana; waina e madeada dum̃ana p̃olagati a: go ero dave pano, po surata pae napua sikai; go agelo wanogoe e m̃elu dua ki nia pano m̃araverave. 11Go ragi waina Petero e midodoa p̃ia, e naga, Ragi waia a po atae lomau, naga Nawota e dip̃aki lua agelo aneana umai po pua lua au m̃elu dua ki nam̃elearu ni Herod, go ki naleogoroana mamau ki narei ni naka ni Yudea. 12Go ragi waina e midoaki sua e, e umai paki nasum̃a ki Maria p̃ila ni Yoane waina e pei tea sosoana ki Marko; tokora waina tea laapa eu pei tea saisaikiana asa po do dapasavasa. 13Go ragi waina e p̃okawoka namata ni namata‐pua, nagoroi atara sikai e umai naga ega takidorogo, nagisana Roda. 14Go ragi waina e dogo atae nadaleo ni Petero, e da p̃olagati namata‐pua mau nalakena nalaelaeana, ma e sava paki ekopu, po dogorogo naga Petero e lawodu narae ni namata‐pua. 15Go eu noa ki nia, Ku daratara. Ma e noa sokisoki kasua naga e dapala nogoe. Go eu naga, E pei agelo aneana. 16Ma Petero e do p̃okawoka: go ragi waina eu p̃olagati sua, eu punusi a, po saram̃akoto. 17Ma e alosoki paki da ki nam̃elearuna naga euga vunuta, go e dogorogo paki da ki dapala waina Nawota e piragi a dave m̃elu dua ki nasum̃a ni navavaiana. Go e naga, Kuga rogorogo ki tea maga wanogoe paki Yakobo, go paki taigida maga. Go e dave pano po paki tokora p̃ota pano. 18Go ragi waina e pei aleati, nam̃anaunauana e da kiki mau e doko m̃aleoputo ni tea ni navakalo maga, eu naga Petero wai? 19Go ragi waina Herod e pusuusu ki nia, po da pap̃ai a mau, e puausi tea vavai maga, po pitip̃aki naga euga vei tea viragiluaana paki namateana pano. Go e pae Yudea siwo paki Kaisarea pano, po doko asa doko.
20Go e maeto p̃arua ki naka ni Tair go Sidon: go eu rumai punusi a nap̃op̃oda e sikai maau asa, go eu pituadua Blasto, tea suasua ni em̃ago ni namaturuana ki nawota, po datago natam̃ateana, nalakena navanua adeada e pei tea vaganiana pae navanua ki nawota. 21Go naaleatia tatutakiana sikai Herod e suni sugoro ki nawota, po dasake malo tasake ni elagi, po pasa paki da. 22Go narei eu pioso, po naga, Nadaleo ni sup̃e sikai, e da pei nadaleo ni naatam̃oli sikai mau. 23Go agelo sikai ki Yehovah e atugi a m̃araverave, nalakena e da dua Sup̃e nasamasamaana mau: go e pei tea kaniana ki ula maga, po maro dua ki namerona.
24Ma navasaana ki Sup̃e e do disu po p̃arua po laapa.
25Go Barnaba go Saul ero liliu pae Yerusalem, ragi waina ero mari sua nasuasuaana adeada, po piragi Yoane sikoti ra waina e pei tea sosoana ki Marko.
Currently Selected:
APOSTOLO MAGA 12: NTB
Highlight
Share
Copy
Want to have your highlights saved across all your devices? Sign up or sign in
Bible Society of the South Pacific
