Марԛос 11

Иса бь рʼумәт дькʼәвә Оршәлиме

(Мәтта 21:1-11; Луԛа 19:28-40; Йуһʼәнна 12:12-19)

1Гава әԝ незики Оршәлиме бун у гьһиштьнә чʼийайе Зәйтʼуне у гӧндед Бәйтфаще у Бәйтанйайе, һьнге Иса дӧ шагьртед Хԝә шандьн 2у ԝанрʼа гот: «Һәрʼьнә ԝи гӧнде пешбәри хԝә. Һәма чаԝа кӧ һун бькʼәвьне, һуне щәʼшькәкә гьредайи бьбиньн кӧ һе кәсәк ле сийар нәбуйә. Әԝе вәкьн у биньн. 3У һәгәр йәк жь ԝә бьпьрсә у бежә: ‹Һун чьма ве йәке дькьн?› бежьне: ‹Хӧданрʼа лазьм ә у ԝе дәстхԝәда бьшинә вьр›». 4Әԝ шагьрт чун у ль бәр дәри ль кʼуче, щәʼшькәкә гьредайи дитьн. Гава вәдькьрьн, 5һьнәкед ԝьр сәкьни пьрсин: «Һун чь дькьн? Чьма ԝе щәʼшьке вәдькьн?» 6Шагьрта щаба ԝан ӧса да, чаԝа кӧ Иса ԝанрʼа готьбу. У әԝ һьштьн. 7Щәʼшьк Исарʼа анин, кʼьнщед хԝә авитьнә сәр ԝе у Әԝ ль ԝе сийар бу. 8Гәләка кʼьнщед хԝә сәр рʼе рʼадьхьстьн, һьнәка жи жь кʼәԝшен чʼьԛьлед дара дьбьрʼин, сәр рʼе рʼадьхьстьн. 9Йед ль пешийа Ԝи у пәй Ԝи кӧ дьчун дькьрьнә ԛирʼин: «Һосанна! Бьмбарәк ә Әԝе кӧ бь наве Хӧдан те!#11:9-10 Зәбур 118:25-26; Луԛа 1:32-33. 10Бьмбарәк ә әԝ Пʼадшатийа баве мә Даԝьдә кӧ те. Һосанна Йе Һәри Жорьнрʼа!#11:10 Бь йунани хәбәр бь хәбәр аһа йә: «Һосанна бьльндайийеда». «Бьльндайи» бәʼса щийе Хԝәде дькә. »

11Иса кʼәтә Оршәлиме, чу пʼарьстгәһе. Чʼәʼве Хԝә ль һәр тьшти гәрʼанд, ле чьмки иди евар бу, тʼәви һәр донздәһа чу Бәйтанйайе.

Дара һежирейә һʼьшкбуйи

(Мәтта 21:18-19)

12Рʼожа дьне, гава әԝ жь Бәйтанйайе дәрдькʼәтьн, Иса бьрʼчи бу. 13Дурва дарәкә һежирейә бәлгдайи дит, бәрбь ԝе чу, кʼа тьштәке сәр һәбә. Гава гьһиштә даре, пештьри бәлга тьштәк нәдит, чьмки һе нә ԝәхте һежира бу. 14Һьнге Әԝи ԝе дарерʼа гот: «Бьра иди тʼӧ кәс тʼӧ щар бәре тә нәхԝә». Шагьртед Ԝи әв готьн бьһистьн.

Иса пʼарьстгәһе паԛьж дькә

(Мәтта 21:12-17; Луԛа 19:45-48; Йуһʼәнна 2:13-22)

15У әԝ һатьнә Оршәлиме. Иса кʼәтә пʼарьстгәһе у дәстпекьр әԝед кӧ пʼарьстгәһеда дькʼьрʼин у дьфьротьн дәрхьстьнә дәрва. Тʼәхтед пʼәрәгӧһерʼа у кʼӧрсийед кәвоткфьроша ԝәлгәрʼандьн 16у нәһьшт, кӧ тʼӧ кәс тьштәки пʼарьстгәһерʼа дәрбаз кә. 17Әԝ һин кьрьн у гот: «Чьма нә ньвисар ә: ‹Мала Мьн ԝе бона һʼәму мьләта мала дӧа бе һʼәсабе›#11:17 Ишайа 56:7. ? Ле ԝә әԝ кьрийә ‹шкәфта ԛачаха›#11:17 Йерәмийа 7:11. ». 18Сәрәкед кʼаһина у ԛанунзана әв йәк кӧ бьһистьн, дәстпекьрьн кӧ чаԝа бькьн Ԝи бькьнә фәсале бькӧжьн. Әԝана жь Ԝи дьтьрсийан, чьмки тʼәмамийа әʼлаләте сәр һинкьрьна Ԝи зәндәгьрти мабу. 19Гава кӧ рʼо чу ава, Әԝ жь бажер дәркʼәтьн.

Дәрса дара һежире

(Мәтта 21:20-22)

20Сәре сьбәһе, гава әԝана бәр дарерʼа дәрбаз бун, дитьн кӧ әԝ дара һежире рʼаԝе хԝәва һʼьшк буйә. 21Кʼәтә бира Пәтрус у әԝи Исарʼа гот: «Дәрсдар, дина Хԝә бьде, әԝ дара һежирейә кӧ Тә ньфьрʼ ле кьр һʼьшк буйә». 22Иса ԝанрʼа гот: «Баԝәрийа ԝә бьра сәр Хԝәде һәбә. 23Әз рʼаст ԝәрʼа дьбежьм, кʼи кӧ ви чʼийайирʼа бежә: ‹Рʼабә хԝә бавежә бәʼре› у дӧдьли нәбә, ле баԝәр бькә кӧ готьна ԝи ԝе бьԛәԝьмә, ӧса жи ԝе бьбә. 24Бона ве йәке Әз ԝәрʼа дьбежьм, һун чь кӧ нава дӧада бьхԝазьн, баԝәр бькьн кӧ ԝә иди стандийә у хԝәстьна ԝә ԝе бе сери. 25У гава кӧ һун дьсәкьньн у дӧа дькьн, бьбахшиньн, һәгәр тьштәки ԝә һьндава кәсәкида һәбә, ԝәки Баве ԝәйи әʼзмана жи нәһәԛийед ԝә бьбахшинә ԝә. 26#11:26 Нав дәстньвисаред ԛәнщда рʼеза 26-а тʼӧнә. Ле һәгәр һун нәбахшиньн, Баве ԝәйи әʼзмана жи нәһәԛийед ԝә набахшинә ԝә».

Пьрса дәрһәԛа һʼӧкӧме Исада

(Мәтта 21:23-27; Луԛа 20:1-8)

27У әԝ диса һатьнә Оршәлиме. Дәма кӧ Иса пʼарьстгәһеда дьгәрʼийа, сәрәкед кʼаһина, ԛанунзан у рʼуспи һатьнә щәм Ԝи 28у же пьрсин: «Тӧ бь чь һʼӧкӧми ван кьра дьки? Кʼе әв һʼӧкӧм дайә Тә, кӧ Тӧ ван кьра бьки?» 29Иса ԝанрʼа гот: «Әзе жи тьштәки жь ԝә бьпьрсьм. Һәгәр ԝә щаба Мьн да, Әзе жи ԝәрʼа бежьм, кӧ Әз бь чь һʼӧкӧми ван кьра дькьм: 30Һʼӧкӧме ньхӧмандьна Йуһʼәнна жь әʼзмен бу йан жь мәрьва? Щаба Мьн бьдьн!» 31Әԝана нав һәвда шеԝьрин у готьн: «Һәгәр әм бежьн: ‹Жь әʼзмен бу›, Әԝе бежә: ‹Ле ԝә чьма әԝ баԝәр нәкьр?› 32Ле һәгәр әм бежьн: ‹Жь мәрьва бу?..›» Әԝ жь әʼлаләте дьтьрсийан, чьмки һʼәмуйа ԛәбул кьрьбу кӧ Йуһʼәнна рʼаст пʼехәмбәр бу. 33Щаба Иса дан у готьн: «Әм ньзаньн». Иса ԝанрʼа гот: «Әз жи ԝәрʼа набежьм кӧ Әз бь чь һʼӧкӧми ван кьра дькьм».

Currently Selected:

Марԛос 11: KmrNTC

Highlight

Copy