Луԛа 2

Буйина Иса

(Мәтта 1:18-25)

1Ԝан рʼожада жь Аԝгустойе Ԛәйсәр әʼмьр дәркʼәт, кӧ һʼәму мәрьвед Императорийа Рʼомайе бенә навньвисаре. 2Әв навньвисара пешьн һена Куренйойе ԝәлийе Сурйайеда һатә кьрьне. 3Һʼәму дьчунә бажаре хԝә, кӧ һәр кәс наве хԝә бьдә ньвисаре. 4Усьв жи жь бажаре Ньсрәта Щәлиле рʼабу һәвраз чу Щьһустане, бажаре буйина Даԝьд, кӧ жерʼа Бәйтләһʼм дьготьн, чьмки әԝ жь мал у ԛәбила Даԝьд бу. 5Әԝ чу кӧ тʼәви Мәрйәма дәргистийа хԝә бькʼәвә навньвисаре. Мәрйәм жи һʼәмлә бу. 6Чахе әԝана ль Бәйтләһʼме бун, рʼожа ԝәльдандьна ԝе перʼа гьһишт 7у кӧрʼе хԝәйи Ньхӧри ани, Әԝ пʼечʼәкеда пʼечʼа у афьрʼда дани, чьмки меванханеда бона ԝан щи тʼӧнәбу.

Мьлйакʼәт у шьван

8Ль ԝьр чоле шьван һәбун, кӧ ԝе шәве хԝәйитийа кәрийе пәзед хԝә дькьрьн. 9Мьлйакʼәте Хӧдан ԝанва хӧйа бу у рʼумәта Хӧдан дора ԝан шәԝԛ да, әԝ гәләки тьрсийан. 10Ле мьлйакʼәт ԝанарʼа гот: «Нәтьрсьн! Ва йә әз Мьзгинийа шабунәкә мәзьн дьдьмә ԝә, кӧ ԝе бона тʼәмамийа мьләт бә. 11Иро ԝәрʼа бажаре Даԝьдда Хьлазкьрәк бу, әԝ Мәсиһ Хӧдан ә. 12Әва ԝәрʼа бьбә нишан: Һуне зарʼокәке пʼечʼәкеда пʼечʼайи афьрʼда бьбиньн». 13Ньшкева тʼәви ԝи ордикә мьлйакʼәтед әʼзманайә мәзьн кʼьфш бу, пәсьне Хԝәде дьдан у дьготьн:

14«Шькьр Хԝәдейе Һәри Жорьнрʼа,

әʼдьлайи сәр дьне ԝан мәрьварʼа,

жь кʼижана Хԝәде рʼази йә#2:14 Нав һьнәк дәстньвисарада аһа йә: «Ль сәр дьне әʼдьлайи, нав мәрьвада хԝәшити». ».

15Гава мьлйакʼәт жь ԝан дур кʼәтьн һьлатьнә әʼзмен, шьвана һәврʼа гот: «Дә ԝәрьн әм һәрʼьнә Бәйтләһʼме, әв тьште буйи, кӧ Хӧдан әм пе һʼәсандьн, бьбиньн».

16У бь ләз һатьн, Мәрйәм, Усьв у Зарʼа афьрʼда рʼазайи дитьн. 17Гава Әԝ дитьн, чь кӧ бона Кӧрʼьк ԝанрʼа һатьбу әʼламкьрьне, готьн. 18Һәр кәсе кӧ жь шьвана әв тьшт дьбьһистьн, зәндәгьрти дьман. 19Ле Мәрйәме әв һʼәму тьшт дьле хԝәда хԝәй дькьрьн у ль сәр ԝан дьфькьри. 20Шьван вәгәрʼийан, бона тьштед бьһисти у дити пәсьн у шькьри дьданә Хԝәде. Әв һʼәму ӧса бун чаԝа ԝанарʼа һатьбу готьне.

Навданина Иса

21Рʼожа һʼәйшта гава кӧрʼьк сьнәт кьрьн, наве Ԝи Иса данин, чаԝа кӧ һе бәри һʼәмләбуна де, мьлйакʼәт бона ве йәке готьбу.

Иса дьбьнә пʼарьстгәһе, кӧ пʼешкʼеши Хԝәде кьн

22Чахе анәгори Ԛануна Муса рʼожед паԛьжбуна ԝан тʼәмам бун, кӧрʼьк бьрьнә Оршәлиме, кӧ Ԝи пʼешкʼеши Хӧдан кьн#2:22 Ԛануна Кʼаһинтийе 12:3, 6. , 23чаԝа кӧ Ԛануна Хӧданда ньвисар ә: «Һәр ньхӧрики нерин кӧ бәтʼьне вәдькә, нәдьре Хӧдан бә»#2:23 Дәркʼәтьн 13:2, 12, 15. 24у ль гора готьна Ԛануна Хӧдан: «Щотәк фатьмок йан жи дӧ щущукед кәвотка»#2:24 Ԛануна Кʼаһинтийе 12:8. һʼәди бе дайине.

25Һьнге мәрьвәк Оршәлимеда һәбу, наве ԝи Шьмһʼун бу. Әԝ мәрьвәки рʼаст, хԝәдехоф у ль һивийа бәрдьлийа#2:25 Бь готьнәкә дьн: «Барьстанийа Исраеле, бона хьлазкьрьн йан азабуна Исраеле». Исраеле бу. Рʼӧһʼе Пироз жи ль сәр ԝи бу 26у ԝирʼа готьбу: «Һʼәта кӧ тӧ Мәсиһе Хӧдан нәбини, намьри». 27Һьнге әԝ бь рʼебәрийа Рʼӧһʼ һатә пʼарьстгәһе. Чахе де у бавева Исайе бьчʼук анин кӧ ль гора әʼдәте Ԛануне бона Ԝи бькьн, 28Шьмһʼун Кӧрʼьк һьлда да һʼәмеза хԝә, шькьри да Хԝәде у гот:

29«Йа Хԝәйи, ньһа ль гора созе Хԝә

бь хер у сьламәт бәрдәстийе Хԝә бәрʼдә.

30Чьмки чʼәʼве мьн азакьрьна Тә дит,

31йа кӧ Тә бәр чʼәʼве һʼәму мьләта һазьр кьрийә#2:31 Ишайа 40:5; 52:10. ,

32кӧ бьбә рʼонайийа бәр чʼәʼве нәщьһуйа

у ԛәдьр-һӧрмәт щьмәʼта Тә Исраелрʼа»#2:32 Ишайа 42:6; 49:6; 52:10. .

33Де у баве Ԝи сәр тьштед кӧ Шьмһʼун бона Ԝи дьготьн, зәндәгьрти мабун. 34Шьмһʼун дӧа ԝан кьр у дийа Ԝи Мәрйәмерʼа гот: «Бьбьһен, Әва әԝи кʼьфшкьри йә, Йе кӧ ԝе Исраеледа бьбә сәбәбе кʼәтьн-рʼабуна гәләка, ӧса жи бьбә нишанәк, кӧ гәләке мьԛабьли Ԝи рʼабьн 35у бь ви аԝайи фькьред гәләк дьла ԝе әʼйан бьн. У дьле тәрʼа жи мина тирәке ԝе дәрбаз бә».

36Ль ԝьр жь рʼькʼьнйата Ашер, ԛизәкә Фаноԝелә пʼехәмбәр һәбу, наве ԝе Һана. Әԝе гәләк әʼмьр дәрбаз кьрьбу, пәй ԛизтийа хԝәрʼа һʼәфт сала щәм мере хԝә мабу. 37Әԝ жьнәбикә һʼәйште чар сали бу#2:37 Аһа те фәʼмкьрьне, йан: «Әʼмьре ԝе һʼәйште чар сали бу» йан жи: «Һʼәйштечар сала жьнәби мабу». у жь пʼарьстгәһе дур нәдькʼәт, шәв у рʼож бь дӧа у рʼожийа Хԝәде дьһʼәбанд. 38Әва жи ԝе дәме һат, шькьри да Хԝәде у тʼәви һʼәмуйед кӧ чʼәʼвньһерʼийа азабуна Оршәлиме бун, дәрһәԛа кӧрʼькда хәбәр да.

Мәрйәм, Усьв у Исайе бьчʼук вәдьгәрʼьнә Ньсрәте

39Гава Усьв у Мәрйәме һәр тьшт ль гора Ԛануна Хӧдан кьрьн, вәгәрʼийанә Щәлиле, бажаре хԝә Ньсрәте 40Кӧрʼьк мәзьн у ԛәԝат дьбу, бь сәрԝахтийе тʼьжи дьбу, кʼәрәма Хԝәде жи бь Ԝирʼа бу.

Исайе донздәһ сали пʼарьстгәһеда

41Де у баве Ԝи һәр сал Щәжьна Дәрбазбунеда дьчунә Оршәлиме. 42Чахе Әԝ бу донздәһ сали, ль гора әʼдәт әԝана һәвраз чунә щәжьне. 43Гава рʼожед щәжьне хьлаз бун у пашда вәдьгәрʼийанә мала хԝә, Исайе хьшим ль Оршәлиме ма. Ле де у баве Ԝи һаш жь Ԝи тʼӧнәбун, 44ԝана тʼьре тʼәви рʼеԝийа йә. Рʼийа рʼожәке һатьн, нав һәвал-һогьред хԝәда ль Ԝи гәрʼийан. 45Гава Әԝ нәдитьн, пашда вәгәрʼийанә Оршәлиме, ль Ԝи гәрʼийан. 46Рʼожа сьсийа ԝана Әԝ пʼарьстгәһеда дит. Әԝ тʼәви дәрсдара рʼуньштьбу, гӧһдарийа ԝан дькьр у пьрс дьданә ԝан. 47Һʼәмуйед кӧ хәбәрдана Ԝи дьбьһистьн, сәр занәбун у щабед Ԝи зәндәгьрти дьман. 48Гава де у баве Ԝи әԝ дитьн, һʼәйирин у дийа Ԝи жерʼа гот: «Лаԝо! Тә чьма ӧса сәре мә кьр? Әз у баве тә кʼәл-бин ль Тә дьгәрʼийан». 49Әԝи ԝанрʼа гот: «Һун чьма ль Мьн дьгәрʼийан? Ԝә ньзаньбу гәрәке Әз мала Баве Хԝәда бьм?» 50Ле ԝана фәʼм нәкьр Әԝи чь гот. 51Әԝ тʼәви ԝан вәгәрʼийа һатә Ньсрәте у гӧрʼа ԝанда бу. Ле дийа Ԝи әв һʼәму тьшт дьле хԝәда хԝәй дькьрьн. 52У Иса бь сәрԝахтийе у бәжьнеда пешда дьчу у ль Хԝәде у мәрьва хԝәш дьһат.

Currently Selected:

Луԛа 2: KmrNTC

Highlight

Copy