Луԛа 3

Даннасинийа Йуһʼәннайе ньхӧмдар

(Мәтта 3:1-12; Марԛос 1:1-8; Йуһʼәнна 1:19-28)

1Панздәһ салийа пʼадшатийа Тибәрйойе Ԛәйсәрда, Пилатойе Понтийо ԝәлийе Щьһустане бу, Һеродәс сәрԝере Щәлиле бу, Филипойе бьре ԝи сәрԝере ԛәза Итурйайе у Трахонидайе бу у Лусанйас сәрԝере Авелинйайе бу, 2Һәнан у Ԛәйафа жи сәрәккʼаһин бун. Һьнге хәбәра Хԝәде бәрʼийеда Йуһʼәннайе кӧрʼе Зәкәрийарʼа һат 3у Йуһʼәнна һатә һʼәму дор-бәред чʼәме Урдӧне даннасин дькьр, кӧ щьмәʼт жь гӧнәкьрьне вәгәрʼә у бь аве бе ньхӧмандьне, ԝәки Хԝәде ԝан бьбахшинә. 4Чаԝа кʼьтеба Ишайа пʼехәмбәрда ньвисар ә кӧ дьбежә:

«Дәнге бәрʼийеда дькә гази:

‹Рʼийа Хӧдан һазьр бькьн

у шьвәрʼийед Ԝи рʼаст бькьн.

5Һʼәму гәли бьра тʼьжи бьн,

чʼийа-бани ньмьз бьн,

рʼийед харо-маро рʼаст бьн

у чʼәʼл-чʼул дуз бьн.

6У һәр кәсе азайийа Хԝәде бьбинә›»#3:6 Ишайа 40:3-5. .

7Гәләк дьһатьнә щәм Йуһʼәнна, кӧ жь ԝи бенә ньхӧмандьне. Әԝи ԝанрʼа дьгот: «Чʼежькед мәʼра! Кʼе ԝәрʼа гот, кӧ һун жь хәзәба те бьрʼәвьн? 8Дә бь кьред ԛәнщ бьдьнә кʼьфше, кӧ һун жь гӧнәкьрьне вәгәрʼийанә. У рʼанәбьн нәбежьн: ‹Бьраһим баве мә йә›. Әз ԝәрʼа дьбежьм, кӧ Хԝәде жь ван кәвьра жи дькарә зарʼа Бьраһимрʼа дәрхә. 9Ва йә бьвьр ль сәр рʼаԝе даре йә. Һәр дара кӧ бәре ԛәнщ нәйнә, ԝе бе бьрʼине у авитьне нава егьр». 10Әʼлаләте жь ԝи пьрси у гот: «Ле әм чь бькьн?» 11Әԝи ль ԝан вәгәрʼанд у гот: «Дӧ дәст кʼьнще кʼе һәнә, бьра йәки бьдә ԝи, йе кʼе кӧ тʼӧнә у хӧрәке кʼе һәйә, бьра диса ӧса бькә». 12Хәрщгьр жи һатьн кӧ бенә ньхӧмандьне у ԝирʼа готьн: «Дәрсдар, әм чь бькьн?» 13Әԝи ԝанрʼа гот: «Чьԛас жь ԝә те хԝәстьне жь ԝи зедәтьр нәстиньн». 14Әскәра жи жь ԝи пьрси: «Ле әм чь бькьн?» Әԝи ԝанрʼа гот: «Кәсәки нәшелиньн, бебәхтийе ль хәлԛе нәкьн у бь һәԛе хԝә рʼази бьн».

15Һʼәму һивийе бун у бона Йуһʼәнна дьле хԝәда дьготьн: «Гәло әв ә Мәсиһ?» 16Йуһʼәнна ль һʼәмуйа вәгәрʼанд у гот: «Әз ԝә бь аве дьньхӧминьм, ле Йәки жь мьн ԛәԝаттьр ԝе бе. Әз нә һежа мә бәне чарьхед Ԝи жи вәкьм. Әԝе ԝә пе Рʼӧһʼе Пироз у егьр бьньхӧминә. 17Мәлһʼәба Ԝи дәсте Ԝида йә. Әԝе бедәра Хԝә паԛьж кә, гәньм бькә әʼмбара Хԝә, ле кайе ԝе бь агьре кӧ натәмьрә бьшәԝьтинә».

18Аԝа Йуһʼәнна бь гәләк тьштед дьн жи хәлԛ ширәт дькьр у Мьзгини дьда. 19Ле гава Йуһʼәнна ль Һеродәсе сәрԝер жи һьлат бона Һеродийа жьна бьре ԝи у һʼәму хьрабийед кӧ ԝи дькьрьн, 20һьнге Һеродәс сәр ван кьрьнада әв нәһәԛи жи кьр, кӧ Йуһʼәнна авитә кәле.

Иса те ньхӧмандьне

(Мәтта 3:13-17; Марԛос 1:9-11)

21Гава һʼәму щьмәʼт дьһатә ньхӧмандьне, Иса жи һатә ньхӧмандьне. Ԝе дәме кӧ дӧа дькьр, әʼзман вәбу 22у Рʼӧһʼе Пироз бь бәдәни мина кәвоткәке сәр Ԝи дани у дәнгәк жь әʼзмен һат у гот: «Тӧ кӧрʼе Мьни дәлал и, кӧ Әз жь Тә рʼази мә».

Рʼькʼьнйата Иса

(Мәтта 1:1-17)

23Иса незики си сали бу, гава Әԝи дәст бь кʼаре Хԝә кьр у ԝан тʼьре Әԝ кӧрʼе Усьв бу, Усьве Әли, 24Әлийе Мәтат, Мәтате Леԝи, Леԝийе Мәлкʼе, Мәлкʼейе Йаннай, Йаннайе Усьв, 25Усьве Мәтитийа, Мәтитийайе Амос, Амосе Нәһум, Нәһуме Һәсли, Һәслийе Нәщай, 26Нәщайе Мәһат, Мәһате Мәтитийа, Мәтитийайе Шемәйин, Шемәйине Йусех, Йусехе Йода, 27Йодайе Йуһәнан, Йуһәнане Рʼеша, Рʼешайе Зәрубабәл, Зәрубабәле Шалтийел, Шалтийеле Нәри, 28Нәрийе Мәлкʼе, Мәлкʼейе Еди, Едийе Ԛосам, Ԛосаме Елмәдам, Елмәдаме Әр, 29Әре Йешу, Йешуйе Елийазер, Елийазере Йорим, Йориме Мәтат, Мәтате Леԝи, 30Леԝийе Шьмһʼун, Шьмһʼуне Щьһуда, Щьһудайе Усьв, Усьве Йонам, Йонаме Елйаԛим, 31Елйаԛиме Мәлйо, Мәлйойе Мәна, Мәнайе Мәтитийа, Мәтитийайе Натʼан, Натʼане Даԝьд, 32Даԝьде Йеша, Йешайе Овед, Оведе Боԝаз, Боԝазе Сәлмон, Сәлмоне Нәһшон, 33Нәһшоне Аминадав, Аминадаве Админ, Админе Арам, Араме Һәсрун, Һәсруне Перес, Пересе Щьһуда, 34Щьһудайе Аԛуб, Аԛубе Исһаԛ, Исһаԛе Бьраһим, Бьраһиме Тераһ, Тераһе Нәһор, 35Нәһоре Сәрух, Сәрухе Рʼеԝо, Рʼеԝойе Пелег, Пелеге Әбәр, Әбәре Шәлаһ, 36Шәлаһе Ԛенан, Ԛенане Арпәхшад, Арпәхшаде Сам, Саме Нӧһ, Нӧһе Ламәх, 37Ламәхе Мәтушәла, Мәтушәлайе Һәнох, Һәнохе Йаред, Йареде Маһалалел, Маһалалеле Ԛенан, 38Ԛенане Әнош, Әноше Сетʼ, Сетʼе Адәм у Адәме Хԝәде.

Currently Selected:

Луԛа 3: KmrNTC

Highlight

Copy