Луԛа 1
1
Пешготьна Луԛа Тʼейофилорʼа
1Тʼейофилойе хԝәйиԛәдьр, ньһа гәләка дәстпекьрийә сәрһатийа ԝан тьштед нава мәда буйи ӧса рʼез кьн, 2чаԝа әԝед кӧ пешийе бь чʼәʼве хԝә дитьбун у әв Мьзгини бәла дькьрьн, мәрʼа готьн. 3Әз жи чаԝа йәки һе зува рʼаст пәй ԝан һʼәму тьшта дьчум, мьн рʼе терʼа дит кӧ бь һур-гьли тәрʼа бьньвисьм, 4ԝәки тӧ рʼастийа ԝан тьштед кӧ һин буйи, бьзаньби.
Мьзгинийа мьлйакʼәт бона буйина Йуһʼәннайе ньхӧмдар
5Чахе Һеродәс пʼадшайе Щьһустане бу, кʼаһинәк жь бәрәка Әбийа һәбу, наве ԝи Зәкәрийа бу. Жьна ԝи жи жь әʼсьле Һарун бу, наве ԝе Елизабет. 6Әвана һәр дӧ жи ль бәр Хԝәде рʼаст бун у нав һʼәму тʼәми у ԛанунед Хӧданда беԛӧсур дьчун. 7Ле зарʼед ԝан тʼӧнәбун, чьмки Елизабете зарʼ нәданин у һәр дӧйа жи әʼмьре хԝә дәрбаз кьрьбун.
8Аԝа чахе Зәкәрийа дора бәрәка хԝәда хьзмәткʼарийа кʼаһинтийе ль бәр Хԝәде дькьр, 9бь әʼдәте кʼаһинтийеда пʼәшк ԝирʼа кʼәт, кӧ һәрʼә пʼарьстгәһа Хӧдан, бьхуре бьшәԝьтинә. 10У дәма шәԝьтандьна бьхуре, тʼәмамийа щьмәʼте дәрва дӧа дькьр. 11Һьнге мьлйакʼәте Хӧдан ԝива хӧйа бу у алийе рʼастева кʼеләка горигәһа бьхуре сәкьни. 12Чахе Зәкәрийа дит, тʼәвиһәв бу у саԝ кʼәтә сәр ԝи. 13Ле мьлйакʼәт ԝирʼа гот: «Зәкәрийа, нәтьрсә! Дӧа тә һатә бьһистьне, кʼӧлфәта тә Елизабете тәрʼа кӧрʼәки бинә у те наве ԝи Йуһʼәнна дайни.
14Әԝе тәрʼа бьбә әшԛ у шайи
у гәләке бь буйина ԝи ша бьн.
15Чьмки әԝе ль бәр Хӧдан мәзьн бә.
Тʼӧ щар гәрәке шәрав-араԛе вәнәхԝә#1:15 Әва зарʼа, аԝа готи Йуһʼәннайе ньхӧмдар йәки «нәзир» дьһатә һʼәсабе. Бона щурʼә-щурʼә ԛәйдә-ԛанунед нәзир Жьмар 6:1-21-да бьхуньн. .
У һе зьке дийа хԝәда, ԝе бь Рʼӧһʼе Пироз тʼьжи бә.
16Ԝе жь зарʼед Исраеле гәләка бәрбь Хӧдан Хԝәдейе ԝан вәгәрʼинә.
17Әԝе бь рʼӧһʼ у ԛәԝата Елйас пʼехәмбәр пешийа Хӧданва һәрʼә#1:17 Малахи 4:5-6. ,
ԝе дьле бава сәр зарʼада у нәельма бәрбь фәʼмдарийа рʼаста вәгәрʼинә,
ԝәки щьмәʼтәке бона Хӧдан һазьр кә».
18Зәкәрийа мьлйакʼәтрʼа гот: «Әзе ве йәке чаԝа бьзаньбьм? Әз кал ьм у кʼӧлфәта мьн жи әʼмьре хԝә иди дәрбаз кьрийә»#1:18 Дәстпебун 18:11. .
19Мьлйакʼәт ле вәгәрʼанд у готе:
«Әз Щьбрайил ьм, кӧ ль бәр Хԝәде дьсәкьньм.
У әз һатьмә шандьне,
кӧ тәрʼа бежьм у ве мьзгинийе бьдьмә тә#1:19 Данийел 8:16; 9:21. .
20Ва те лал би у нькарьби хәбәр ди,
һʼәта ԝе рʼожа кӧ әв тьшт бенә сери,
чьмки тә әԝ готьнед мьн баԝәр нәкьрьн,
кӧ ԝе ԝәхте хԝәда бенә сери».
21Һʼәта һьнге щьмәʼт һивийа Зәкәрийа бу у әʼщебмайи дьман, кӧ әԝ пʼарьстгәһеда дәрәнги дькʼәт. 22У чахе әԝ дәркʼәтә дәрва, иди нькарьбу ԝанарʼа хәбәр да. Ԝана шьк бьр, кӧ пʼарьстгәһеда тьшт һатийә ль бәр чʼәʼва. У әԝи бь нишана ԝанарʼа хәбәр дьда у лал ма. 23Гава рʼожед хьзмәткьрьна ԝи хьлаз бун, чу мала хԝә. 24Пәй ԝан рʼожарʼа, кʼӧлфәта ԝи, Елизабет һʼәмлә дәркʼәт, пенщ мәһа әԝе хԝә вәдьшарт у дьгот: 25«Әв чь йәк бу ван рʼожада Хӧдан бона мьн кьр, һʼале мьнда ньһерʼи у ԛара мьн жь нав мәрьва да һьлдане».
Мьзгинийа мьлйакʼәт бона буйина Иса
26Мәһа шәшада Хԝәде мьлйакʼәт Щьбрайил шандә бажарәки Щәлиле кӧ наве ԝи Ньсрәт бу, 27щәм ԛизәкә бькʼьр, йа кӧ мәрьвәки бь наве Усьве мала Даԝьдрʼа нишанкьри бу. Наве ԛизьке Мәрйәм бу. 28Мьлйакʼәт ԝева хӧйа бу у готе: «Сьлав ль тә ԛизька кʼәрәм ле буйийе, Хӧдан тʼәви тә йә#1:28 Нав һьнәк дәстньвисарада аһа йә: «Тӧ нав кʼӧлфәтада бьмбарәк и». ». 29Әԝа сәр готьна ԝи тʼәвиһәв бу у фькьри: «Гәло әв чь сьлав ә?» 30У мьлйакʼәт жерʼа гот: «Мәрйәм, нәтьрсә! Чьмки тә кʼәрәм жь Хԝәде станд. 31Ва те һʼәмлә дәрейи Кӧрʼәки бини у наве Ԝи Иса дайни.
32Әԝе мәзьн бә у Кӧрʼе Йе Һәри Жорьн ԝе бе готьне.
У Хӧдан Хԝәде ԝе тʼәхте баве Ԝи Даԝьд бьдә Ԝи.
33Әԝе һʼәта-һʼәтайе пʼадшатийе сәр мала Аԛуб бькә
у хьлазийа Пʼадшатийа Ԝи ԝе тʼӧнәбә».
34Мәрйәме мьлйакʼәтрʼа гот: «Әв йәке чаԝа бьбә, чьмки әз һәла һе ԛиз ьм?» 35Мьлйакʼәт ле вәгәрʼанд у гот: «Рʼӧһʼе Пироз ԝе бе сәр тә у ԛәԝата Йе Һәри Жорьн ԝе сәр тә бькә си. Бона ве йәке әԝ Пирозе кӧ ԝе жь тә бьбә, әԝ Кӧрʼе Хԝәде ԝе бе готьне. 36Ва йә омьда тә Елизабет жи, йа кӧ безӧрʼәт дьһатә готьне, ԝе мәзьнайийа хԝәда әва мәһа шәша йә кӧрʼәкида һʼәмлә йә. 37Чьмки щәм Хԝәде тьштәки нәбуйине тʼӧнә». 38Ԝи чахи Мәрйәме гот: «Әз щарийа Хӧдан ьм. Бьра анәгори готьна тә бона мьн бьбә». У мьлйакʼәт жь щәм ԝе чу.
Мәрйәм сәрики Елизабете дьхә
39Ԝан рʼожада Мәрйәм рʼабу ләз чу алийе чʼийа, бажарәки Щьһуда. 40Әԝ кʼәтә мала Зәкәрийа у сьлав да Елизабете. 41Гава Елизабете сьлава Мәрйәме бьһист, зарʼок зьке ԝеда львийа. Елизабет Рʼӧһʼе Пирозва тʼьжи бу 42у бь дәнгәки бьльнд кьрә гази гот: «Тӧ нав кʼӧлфәтада бьмбарәк и у бәре зьке тәда жи бьмбарәк ә. 43Әв чь бәхтәԝарик ә кӧ дийа Хӧдане мьн сәр мьнда һат? 44Гава дәнге сьлава тә кʼәтә гӧһе мьн, зарʼок зьке мьнда жь шабуна лист. 45Хԝәзи ль ԝе, кӧ готьна Хӧдан баԝәр дькә, кӧ чь жерʼа һатийә готьне, ԝе бе сери». 46Мәрйәме гот#1:46-55 Пʼадшати I, 2:1-10. :
«Нәфса мьн пәсьне Хӧдан дьдә
47у рʼӧһʼе мьн бь Хԝәде Хьлазкьре мьн ша дьбә,
48чьмки Әԝи бәре Хԝә мьлуктийа щарийа Хԝәда кьр.
Ва жь вьр шунда һʼәму ньсьле хԝәзийа хԝә ль мьн биньн,
49чьмки Хԝәдейе Зор бона мьн тьштед пʼьрʼ мәзьн кьрьн.
Наве Ԝи пироз ә.
50Рʼәʼма Ԝи ԛьрʼнә-ԛьрʼнә ль сәр ԝан ә,
йед кӧ жь Ԝи дьтьрсьн.
51Ԛәԝата дәсте Хԝә Әԝи да кʼьфше
у йед кӧ дьле хԝәда кʼӧбар-бабах ьн бәла-бәлайи кьрьн.
52Йед ԛәԝат жь кʼӧрсийа анин хԝаре
у йед мьлук бьльнд кьрьн#1:52 Ибо 5:11; 12:19. .
53Йед бьрʼчи бь тьштед ԛәнщ тʼер кьрьн
у йед дәԝләти дәствала вәрʼекьрьн.
54Рʼәʼма Хԝә ани бира Хԝә,
али хӧламе Хԝә, Исраел кьр,
55чаԝа кал-бавед мә, Бьраһим у зӧрʼәта ԝирʼа бона һʼәта-һʼәтайе созе Хԝә дабу»#1:55 Миха 7:20; Дәстпебун 17:7. .
56Мәрйәм ԝәкә се мәһа щәм Елизабете ма, паше вәгәрʼийа мала хԝә.
Буйина Йуһʼәннайе ньхӧмдар
57Аԝа дәма ԝәльдандьна Елизабете перʼа гьһишт, кӧрʼәк жерʼа бу. 58Һәвал-һогьред ԝе бьһистьн кӧ Хӧдан рʼәʼма хԝәйә мәзьн бона ԝе кьрийә, тʼәви ԝе ша дьбун.
59Рʼожа һʼәйштада һатьн кӧ кӧрʼьк сьнәт кьн у наве баве ԝи Зәкәрийа ле кьн. 60Ле дийа ԝи гот: «На, наве ԝи гәрәке Йуһʼәнна бә». 61Ԝерʼа готьн: «Нава мәрьвед тәда бь ԝи нави кәсәк тʼӧнә». 62Һьнге ԝана бь нишана жь баве ԝи пьрсин кӧ чь нави дьхԝазә ԝи кә. 63Әԝи жи тʼәхтәк хԝәст у ль сәр ньвиси: «Наве ԝи Йуһʼәнна йә». Һʼәму әʼщебмайи ман. 64Дәстхԝәда зар-зьмане ԝи вәбу, хәбәр да, шькьри да Хԝәде. 65Тьрсе һʼәму щинаред ԝан гьрт у тʼәмамийа чʼийайед Щьһустанеда бона ве йәке дьһатә готьне. 66Һʼәмуйед кӧ дьбьһистьн, бира хԝәда хԝәй дькьрьн, дьготьн: «Гәло әв кӧрʼьке бьбә чь?» Чьмки дәсте Хӧдан перʼа бу.
Пʼехәмбәртийа Зәкәрийа
67Баве ԝи Зәкәрийа бь Рʼӧһʼе Пироз тʼьжи бу, пʼехәмбәрти кьр у гот:
68«Шькьр жь Хӧдан Хԝәдейе Исраелерʼа
кӧ сәрик да щьмәʼта Хԝә у азайи жерʼа ани#1:68 Зәбур 41:13; 111:9. .
69Жь мала хӧламе Хԝә Даԝьд
бона мә Хьлазкьрәки зор#1:69 Бь йунани хәбәр бь хәбәр аһа йә: «Стьруки хьлазкьрьне». Стьру гәләк щара чаԝа нишана ԛәԝате йә. рʼакьр,
70чаԝа Әԝи һе бәреда бь дәве пʼехәмбәред Хԝәйә пироз готийә,
71кӧ әм жь дьжмьнед хԝә
у дәсте һʼәму хернәхԝаза хьлаз бьн#1:71 Зәбур 106:10. ,
72рʼәʼме кал-бавед мә бькә,
пәймана Хԝәйә пироз
73у ԝе сонда кӧ баве мә Бьраһимрʼа хԝар бир бинә#1:73 Зәбур 106:45-46; Зәбур 105:8-9; Дәстпебун 17:7. ,
74ԝәки жь дәсте дьжмьна азабуйи,
әм бькарьбьн бе тьрс у хоф,
75һʼәму рʼожед әʼмьре хԝәда,
рʼаст у һʼәлал Ԝи бьһʼәбиньн.
76Тӧ, ло кӧрʼько, те пʼехәмбәре Йе Һәри Жорьн бейи готьне,
те пешийа Хӧданва һәрʼи, ԝәки рʼийа Ԝи һазьр ки#1:76 Ишайа 40:3; Малахи 3:1.
77у занәбуна азайийе бьди щьмәʼта Ԝи
бь бахшандьна гӧнед ԝан.
78Жь рʼәʼм у һʼӧба Хԝәдейе мә
чаԝа жорда рʼо кӧ дәрте, ӧса ԝе сәрики бьдә мә,
79ԝәки йед кӧ тәʼристанийе у бьн сийа мьрьнеда дьминьн рʼонайи кә
у ньгед мә дайнә сәр рʼийа әʼдьлайийе»#1:79 Малахи 4:2; Ишайа 9:2; 58:8; 60:1-2. .
80Кӧрʼьк мәзьн дьбу у бь рʼӧһʼ ԛәԝат дьгьрт у һʼәта рʼожа Исраелева хӧйа бу жи ль бәрʼийе дьма.
Currently Selected:
Луԛа 1: KmrNTC
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2000, 2011
