Mark 8
8
Dört bin adam doyurulêr
1Bir günü, açan genä toplandı çok insan, da yoktu ne isinnär, İisus çaardı üürenicileri da dedi onnara:
2«Canım acıyêr bu insana, zerä üç gün durêrlar yanımda, da yok ne isinnär.
3Eer brakarsam, aaç gitsinnär evä, yolda bayılaceklar, zerä kimileri uzaktan geldi».
4Üürenicileri Ona cuvap ettilär: «Neredän var nicä almaa bu çol erdä okadar ekmek, ki doyurmaa onnarı?»
5«Kaç ekmeeniz var?» – sordu İisus. «Edi», – cuvap etti onnar.
6Ozaman İisus sımarladı insana, otursunnar erä. Aldı edi ekmää, şükür etti Allaha da, kırıp, verdi üürenicilerinä, payetsinnär. Onnar payettilär insana.
7Vardı onnarda birkaç balıcak da. İisus, iisözleyip, sımarladı, payetsinnär onnarı da insana.
8İdilär da doyundular. Sora topladılar edi sepet, dolu imäk parçasınnan.
9Vardı yakın dört bin kişi. Bundan sora İisus onnarı braktı gitsinnär.
10İisus girdi üürenicilerinnän barabar kayık içinä da gitti Dalmanufa erlerinä.
Nışan isteerlär
11Hemen geldi fariseylär da başladılar çekişmää İisusa, ki denesinnär Onu. İstärdilär Ondan bir nışan göktän.
12İisus derindän soludu da dedi onnara: «Neçin bu boy insan isteer bir nışan? Dooru söleerim sizä, ani bu insana nışan verilmeyecek».
13Sora braktı onnarı da enidän girdi kayık içinä, geçsin deyni gölün öbür tarafına.
Fariseylerin hem İrodun mayası
14Ozaman üürenicilär ekmek almaa unutmuştular. Kayık içindä onnarda vardı sade bir ekmek.
15İisus haberledi onnarı, deyip: «Bakın, korunun fariseylerin hem İrodun mayasından!»
16Üürenicilär biri-birinnän lafedärdilär: «Onuştan deer, zerä yok ekmeemiz».
17İisus, bunu bileräk, dedi onnara: «Neçin lafedersiniz, ani yok ekmeeniz? Hep taa aklınız ermeer mi, annamêêrsınız mı? Hep taa uyvaşık ürekleriniz?
18Var gözleriniz, da görmeersiniz mi? Var kulaklarınız, da işitmeersiniz mi? Ne, hiç mi aklınıza getirmeersiniz,
19açan beş ekmää payettim beş bin kişiyä, kaç sepet, dolu imäk parçasınnan, topladınız?» «Oniki», – cuvap etti onnar.
20«Hem açan payettim edi ekmää dört bin kişiyä, kaç sepet, dolu imäk parçasınnan, topladınız?» «Edi», – cuvap etti onnar.
21Sora sordu onnara: «Hep taa annamêêrsınız mı?»
Vifsaida kasabasından hasta
22Açan geldilär Vifsaida kasabasına, getirdilär İisusa bir köör, da yalvardılar diisin ona.
23İisus aldı köör adamı elindän da çıkardı onu onnarın küüyündän bir tarafa. Sora tükürdü onun gözlerinä, koydu ellerini onun üstünä da sordu: «Görersin mi bişey?»
24O baktı yukarı da dedi: «Görerim insanı gezeräk, onnar görüner aaçlar gibi».
25İisus enidän koydu ellerini onun gözlerinä. Adam gözlerini açtı da baktı. Gözleri alışmıştı, hepsini açık görärdi.
26Sora İisus yolladı onu evä da dedi: «Girmä küü içinä /hem kimseyä bişey sölämä küüdä/».
Petrinin şaatlıı İisus için
27İisus gitti üürenicilerinnän barabar Filip Kesariyasının küülerinä. Yolda İisus koydu onnara bir soruş: «Ne deer insan, Kimim Bän?»
28Onnar cuvap ettilär: «Kimisi deer, ani Sän – İoan Vaatizedici, başkası – prorok İliya, taa başkası – proroklardan birisi».
29«Ama siz ne deersiniz, kimim Bän?» – sordu İisus. «Sänsin Hristos», – cuvap etti Petri.
30İisus sıkıdan sımarladı, Onun için kimseyä sölämesinnär.
İisus haberleer ölümünü hem dirilmesini
31Sora başladı onnara sölemää, ani Adam Oolu lääzım çok zeetlensin, sıbıdılmış olsun aksakallardan, büük popazlardan, bilgiçlerdän, öldürülsün da üç gündän sora dirilsin.
32Bunnarı açık söledi. Petri aldı Onu bir tarafa da başladı takazalamaa.
33İisus döndü, bakarak üürenicilerinä, azarladı Petriyi da dedi: «Uzaklan Bendän, şeytan! Zerä senin neetlerin diil Allahtan, ama adamdan».
Nesoy izleyelim İisusu?
34Sora İisus topladı insanı hem üürenicilerini da dedi: «Kim isteer gelsin Benim ardıma, atılsın kendi-kendindän, alsın stavrozunu da Beni izlesin.
35Zerä kim isteer kurtarmaa kendi yaşamasını, kaybedecek onu. Ama kim kaybedecek yaşamasını Benim için hem İi Haber için, o yaşamasını kurtaracek.
36Zerä ne fayda olacek adama, kazansın bütün dünneyi, ama kendi yaşamasını kaybetsin?
37Neylän var nasıl adam diiştirsin kendi yaşamasını?
38Eer birkimsey utanarsa Bendän hem Benim sözlerimdän bu orospu hem günahker boy insanın önündä, ondan utanacek Adam Oolu da, açan gelecek Bobasının metinniindä ayoz angillerinnän barabar».
Currently Selected:
Mark 8: GagNTL
Highlight
Share
Copy
Want to have your highlights saved across all your devices? Sign up or sign in
© Bіblіyayı çevіrän İnstіtut, Moskva, 2006
