Mark 3
3
Kuru ellän bir adam
1İisus enidän girdi sinagoga içinä. Orada vardı bir adam kuru ellän.
2Fariseylär gözledärdilär İisusun ardına, görsünnär deyni, alıştıracek mı bu adamı cumertesi günü, ki sora kabaatlandırsınnar Onu.
3İisus dedi kuru ellän adama: «Kalk da çık karşıya».
4Sora sordu onnara: «Ne düşer cumertesi günü yapmaa: iilik mi osa kötülük mü? Yaşamayı kurtarmaa mı osa öldürmää mi?» Onnar susardılar.
5Üfkeli baktı dolayında olannara, güçleneräk onnarın üreklerin uyvaşıklıı beterinä, sora dedi o adama: «Uzat elini!» O uzattı, da eli alıştı, enidän saa oldu, nicä öbür eli.
6Fariseylär çıktılar dışarı da çabuk İrodun adamnarınnan annaştılar, nesoy öldüräbilsinnär İisusu.
İisus göl yanında alıştırêr hastaları
7İisus üürenicilerinnän barabar yollandı göl boyuna. Onun ardına gitti çok insan Galileyadan, İudeyadan,
8İerusalimdän, İdumeyadan hem İordanın öbür tarafından. İnsannar Tir hem Sidon kasabaların tarafından, işidip, ne O yapêr, sürü-sürü gelärdilär Ona.
9İisus sımarladı üürenicilerinä hazırlasınnar Ona bir kayık, ki insan sıkıştırmasın Onu.
10Çünkü çok insan alıştırdıydı, onuştan hastalar itirişirdilär, baarlem diisinnär Ona.
11Fena duhlar, açan görärdilär Onu, düşärdilär erä Onun önündä da baarardılar: «Sän Allahın Ooluysun!»
12Ama O sert sımarlardı onnara, açıklamasınnar Onu başkalarına.
İisus ayırêr oniki apostol
13Sora İisus pindi bayır üstünä da çaardı, kimi istedi. Onnar toplandılar Ona.
14Onnarın içindän ayırdı onikisini, angılarına apostol dedi, ki olsunnar Onunnan, da yollasın onnarı nasaat etmää,
15hem kuvetleri olsun /alıştırmaa hastaları hem/ koolamaa fena duhları.
16Bunnar, kimi İisus ayırdı, oniki kişi: Simon, angısının adını koydu Petri;
17İakov hem İoan, Zevedeyin oolları, angıların adlarını koydu Voanerges, annaması «Gök gürültü oolları»;
18Andrey; Filip; Varfolomey; Matfey; Foma; İakov, Alfeyin oolu; Faddey; Simon Kananit
19hem İuda İskariot, angısı İisusu sattı.
Ayoz Duha karşı günah
20İisus bundan sora evä gitti. Enidän toplandı insan ölä çokluk, ani İisuslan üürenicilerin yoktu kolayı ekmek isinnär.
21Hısımnarı işittilär bunu da geldilär, alsınnar Onu, zerä onnar deyärdilär, ani O akıldan çıktı.
22Bilgiçlär, ani geldilär İerusalimdän, deyärdilär, ani O Veelzevuldan#3:22 Veelzevul – şeytan. tutulu, hem ani fena duhları çıkarêr fena duhların öndercisinin kuvedinnän.
23İisus topladı onnarı da lafetti örneklärlän: «Nesoy şeytan var nasıl şeytanı çıkarsın?
24Herbir padişahlık, neredä bölünmäk olêr, yok nasıl ayakça dursun.
25Herbir ev, neredä bölünmäk olêr, yok nasıl ayakça dursun.
26Hep ölä şeytan da, kendi-kendinä karşı gidärsä hem bölünmäk yaparsa, duramaz ayakça, ama bitkisi gelir.
27Kimsey yok nasıl girsin kaavi olanın evinä, ki çalsın onun varlıını, eer ilkin baalamarsaydı onu. Salt ondan sora var nasıl soysun onun evini.
28Dooru söleerim sizä, her günah, ani insan yapêr, hem her kötü laf, ani söleer, baaşlanêr.
29Ama kim kötüleer Ayoz Duhu, hiç bir sıra bilä baaşlanmayacek. O kabaatlı bir günahlan, ani divecinä kalacek».
30Bunu söledi, zerä onnar deyärdilär: «Onda var fena duh».
İisusun anası hem kardaşları
31O vakıt geldilär İisusun anası hem kardaşları da, durup dışarda, yolladılar çaarsınnar Onu.
32Çokluk oturardı Onun dolayında, açan Ona söledilär: «Bak, Senin anan hem kardaşların dışarda, seni aarêêrlar».
33«Kim Benim anam hem kim Benim kardaşlarım?» – cuvap etti O.
34Sora baktı Onun dolayında oturannara da dedi: «Tä, Benim anam hem kardaşlarım!
35Kim tamannêêr Allahın istediini, onnar Bana kardaş, kızkardaş hem ana».
Currently Selected:
Mark 3: GagNTL
Highlight
Share
Copy
Want to have your highlights saved across all your devices? Sign up or sign in
© Bіblіyayı çevіrän İnstіtut, Moskva, 2006
