Mark 16
16
İisus diriler
1Açan geçti cumertesi, Mariya Magdalina, Mariya, İakovun anası, hem Salome satın aldılar kokuluk, ki gitsinnär da yaalasınnar İisusun güüdesini.
2Çin sabaalän, haftanın ilk günü#16:2 Haftanın ilk günü – pazar günü., açan gün duuardı, onnar geldilär mezara.
3Biri-birinnän lafedärdilär: «Kim acaba aktaracek bizä mezarın aazından taşı?»
4Açan kaldırdılar bakışlarını, gördülär, ani taş aktarılı bir tarafa. O pek büük taştı.
5Açan girdilär mezar içinä, gördülär bir genç olanı, angısı otururdu saa tarafta, giiyimni biyaz rubaylan. Karılar korkudan daptur geldilär.
6O dedi onnara: «Korkmayın! Siz aarêêrsınız Nazaretli İisusu, Angısını stavroza gerdilär. O dirildi da yok burada. Tä eri, neredä koyuluydu.
7Gidin da söleyin Onun üürenicilerinä hem Petriyä, ani O gider sizdän öncä Galileyaya. Orada göreceniz Onu, nicä sölediydi sizä».
8Karılar, mezardan çıkıp, kaçtılar, zerä titirärdilär hem şaşmaklan doluydular, da korkudan kimseyä bişey sölämedilär.
İisuslan buluşmak
/ 9İisus, dirildiktän sora, haftanın ilk günü sabaalän, ilkin gösterildi Mariya Magdalinaya, angısından çıkardıydı edi fena duh.
10Mariya gitti da söledi onnara, kim Onunnan barabardı, angıları aalardılar hem sızlardılar.
11Ama onnar, açan işittilär, ani İisus dirildi, da Mariya Onu gördü, inanmadılar.
12Bundan sora İisus onnardan başka ikisinä gösterildi başka türlü, açan gidärdilär bir küüyä dooru.
13Onnar döndülär geeri da söledilär kalanına, ama onnarı da inanmadılar.
14Sonda, açan sofrada iyärdilär, İisus onbir üürenicisinä gösterildi. Onnarı inansızlık hem inatlık beterinä azarladı, zerä inanmadılar onnarı, kim gördü Onu dirilmesindän sora.
İisusun son sımarlaması hem gökä kalkması
15İisus onnara dedi: «Gidin bütün dünneyä da nasaat edin İi Haberi hepsi insana.
16Kim inanacek da vaatiz olacek, o kurtulacek, ama kim inanmayacek, kabaatlı kalacek.
17Butürlü nışannar inancıları geçirecek: fena duhları Benim adımnan uuradaceklar, eni dillerdä lafedeceklär,
18yılan ellerinä alaceklar. Zihirli bişey içärseydilär, onnara zarar olmayacek. Koyaceklar ellerini hastaların üstünä, da hastalar saa olaceklar».
19Bunnarı sölediktän sora Saabi İisus gökä alındı da Allahın saa tarafında oturdu.
20Ama onnar gittilär da hererdä nasaat ettilär. Saabi onnara yardım edärdi hem laflarını kaavilärdi nışannarlan, ani sora yapılardı. Amin./
Currently Selected:
Mark 16: GagNTL
Highlight
Share
Copy
Want to have your highlights saved across all your devices? Sign up or sign in
© Bіblіyayı çevіrän İnstіtut, Moskva, 2006
