Mark 15
15
İisus kullanıcı Pilatın önündä
1Çin-sabaalän büük popazlar, aksakallar, bilgiçlär hem bütün Sinedrion toplanıp-annaştılar, baalayıp İisusu, götürdülär da verdilär Pilata.
2Pilat sordu Ona: «Sänsin mi İudeylerin Padişahı?» İisus cuvap etti: «Ölä, nicä söleersin».
3Büük popazlar çok türlü kabaatlardılar Onu.
4Pilat enidän sordu: «Neçin cuvap etmeersin? Bak, nekadar çok kabaatlandırêrlar Seni».
5Ama İisus artık hiç cuvap etmedi, bu beterä Pilat pek şaştı.
İisus hem Varavva
6Her Paskellä yortusunda Pilat kolverärdi bir kapancıyı kapandan, kimi insan istärdi.
7Ozaman kapanda birisi kapalıydı, adı Varavva, öbür kalkıntıcılarlan, ani barabar kalkıntıda adam öldürdüydülär.
8İnsan kalktı da başladı yalvarmaa Pilata, yapsın, nicä herzaman yapardı Paskellä yortusunda.
9Pilat sordu onnara: «İsteersiniz mi, kolvereyim sizä İudeylerin Padişahını?»
10Zerä bilärdi, ani büük popazlar Onu haseetliktän daavaya verdiydilär.
11Ama büük popazlar debeştirärdilär insanı, istesinnär, ki kolversin Varavvayı, ama diil İisusu.
12Pilat enidän sordu onnara: «Öleysä, ne yapayım Onunnan, Kimä deersiniz İudeylerin Padişahı?»
13Onnar enidän baardılar: «Ger Onu stavroza!»
14«E ne kötülük yaptı?» – sordu Pilat. Ama onnar çekettilär taa pek baarmaa: «Ger Onu stavroza!»
15Pilat, bakarak beendirsin kendini insana, kolverdi Varavvayı, ama İisusu kamçılayıp, verdi, stavroza gersinnär.
Askerlär gülmää alêrlar İisusu
16Askerlär götürdülär İisusu kullanıcının binasına, başka laflan, Pretoriuma#15:16 Pretorium – kullanıcının rezidenţiyası., da orayı topladılar bütün polku.
17Giidirdilär Onu ergivan rubaylan, ördülär tikenni çalıdan bir feneţ da koydular Onun başına.
18Sora başladılar selämnemää Onu da demää: «Seläm Sana, İudeylerin Padişahı!»
19Düüdülär sopaylan başına, tükürdülär da, diz çöküp, baş iildärdilär Ona.
20Gülmää aldıktan sora, soyundurdular ergivan rubayı, giidirdilär Kendi rubalarını da götürdülär Onu, stavroza gersinnär.
İisusu gererlär stavroza
21Oradan geçän birisini, adı Kirineli Simon, Aleksandrunun hem Rufun bobası, angısı gelärdi kırdan, zorladılar, götürsün İisusun stavrozunu.
22Götürdülär İisusu o erä, ani adı Golgofa, annaması «baş kemii eri».
23Verdilär, içsin şarap, karışık smirnaylan, ama O istämedi.
24Sora Onu stavroza gerdilär da payettilär rubalarını, atıp çetelä, ki bilsinnär, kimä ne düşecek.
25Açan gerdilär Onu, dokuzuncu saattı#15:25 Dokuzuncu saat – saat 15..
26Başı üstündä yazılıydı Onun kabaatı: «İudeylerin Padişahı».
27Onunnan barabar stavroza gerdilär iki haydut: birisini saa, öbürünü sol tarafına.
/ 28Butakım tamannandı Ayoz Yazı, ani deer: «Koydular Onu zakonsuzların sayısına»./
29Oradan geçennär kötülärdilär Onu da, başlarını sallayarak, deyärdilär: «Sän, ani yıkêrsın Ayoz binayı da üç gündä enidän yapêrsın,
30kurtar Kendini, in erä stavrozdan!»
31Hep ölä büük popazlar hem bilgiçlär gülmää alardılar Onu, deyip biri-birinä: «O başkalarını kurtardı, ama Kendini kurtaramêêr!
32Hristos, İzrailin Padişahı, insin erä stavrozdan, görelim da inanalım». İisuslan stavroza gerili olannar da kötülärdilär Onu.
İisus öler
33Bütün memlekettä altıncı saattan dokuzuncu saada#15:33 Saat 12-15. kadar oldu karannık.
34Dokuzuncu saatta İisus büük seslän baardı: «Elohi! Elohi! Lema şevaktani?» Annaması: «Allahım! Allahım! Neçin Beni braktın?»
35Kimisi orada olannardan, işidip bu lafları, dedilär: «Tä, O İliyayı çaarêr».
36Birisi gitti kaçarak, bandırdı bir sünker iişi şaraba da, takıp bir sopaya, verdi içsin, deyip: «Durun, bakalım, gelecek mi İliya, indirsin Onu».
37İisus pek baardı da verdi duhunu.
38Ayoz binanın içindä perdä yırtıldı iki parçaya, yukardan aşaa kadar.
39Asker üzbaşı, angısı İisusun önündä durardı, açan gördü, ani bölä /baarıp/ duhunu verdi, dedi: «Hakına, bu Adam Allahın Ooluydu!»
40Onnardan başka orada vardı karılar, ani uzaktan-uzaa siiredärdilär: Mariya Magdalina, Mariya, küçük İakovun hem İosifin anası, hem Salome,
41angıları gidärdilär İisusun ardına, açan Galileyadaydı, da izmet edärdilär Ona, hem çok başka karılar da, angıları geldiydilär Onunnan barabar İerusalimä.
İisusu gömerlär
42O gün cumaa günüydü, açan lääzımdı hazırlansınnar cumertesi için. Artık avşam olurdu.
43Onuştan geldi İosif, Arimafeya kasabasından, Sinedrionun geçimni bir eki, angısı beklärdi Allahın Padişahlıını. O kıyışıp gitti Pilata da istedi İisusun güüdesini.
44Pilat şaştı, ani İisus bukadar tez öldü. O çaardı asker üzbaşını da sordu: «Çoktan mı öldü?»
45Açan annadı üzbaşından işin aslısını, izin etti, İosif alsın İisusun güüdesini.
46İosif satın aldı ketendän bir çarşaf, indirdi erä güüdeyi, sardı keten çarşaflan da koydu mezar içinä, ani oyuluydu kanarada, sora yuvarladı bir taş mezarın aazına.
47Mariya Magdalina hem Mariya, İosifin anası, gördülär, nereyi güüdä koyuldu.
Currently Selected:
Mark 15: GagNTL
Highlight
Share
Copy
Want to have your highlights saved across all your devices? Sign up or sign in
© Bіblіyayı çevіrän İnstіtut, Moskva, 2006
