Matfey 8
8
Lepralı hasta paklanêr
1Açan İisus indi bayır üstündän, Onun ardına gitti çok insan.
2Bir lepralı hasta yaklaştı Ona, baş iiltti da dedi: «Saabi, eer istärseydin, var nasıl beni paklayasın».
3İisus uzattı elini, diidi ona da dedi: «İsteerim, paklan!» Hemen hasta lepradan paklandı.
4Sora İisus dedi ona: «Bak, sölämeyäsin kimseyä, ama git da gösteril popaza. Getir baaşış, ne Moisey sıraladı, ki şaatlık olsun insana».
İisus alıştırêr üzbaşının izmetkerini
5Açan İisus girdi Kapernaum kasabasına, yaklaştı Ona asker üzbaşı, angısı yalvardı:
6«Saabi, benim izmetkerim yatêr içerdä kötürüm#8:6 Kötürüm – paralizovannıy. da pek çok zeetlener».
7İisus dedi: «Gidecäm alıştırayım onu».
8«Saabi, bän etmeerim, ki Sän giräsin benim evimä. Sade de bir laf, da benim izmetkerim alışacek, – dedi asker üzbaşı. –
9Zerä bän dä zaabitlik altındayım, benim dä elim altında var askerlär. Açan birisinä deerim: „Git“, o gider. Başkasına deerim: „Gel“, o geler. Çıraama deerim: „Yap bu işi“, o yapêr».
10Açan İisus işitti bu lafları, şaştı da dedi onnara, kim gelärdi Onun ardına: «Dooru söleerim sizä, ani bütün İzrail içindä bulmadım bölä büük inan.
11Söleerim sizä, ani geleceklär çoyu günduusundan hem günbatısından da oturaceklar sofraya Avraamnan, İsaaklan hem İakovlan Gök Padişahlıında.
12Ama Padişahlıın oolları uuradılmış olaceklar dışarı, karannaa, neredä olacek aalamak hem diş gıcırdatması».
13Sora dedi asker üzbaşına: «Git, da olsun senin inanına görä». Asker üzbaşın izmetkeri osaat alıştı.
İisus alıştırêr Petrinin kaynanasını
14Sora İisus geldi Petrinin evinä, onun kaynanasını patta hasta buldu, sıtmadan tutulmuş.
15Diidi onun elinä, da sıtma karıyı braktı. Karı kalktı da başladı izmet etmää İisusa.
16Avşamnen getirdilär Ona çok insan, fena duhtan zeetlenmiş. O sade bir sözünnän onnardan fena duhları çıkarardı hem hepsi hastaları alıştırardı,
17ki tamannansın, ne sölendi prorok İsayadan: «O aldı bizim yufkalıklarımızı Kendi üstünä hem taşıdı bizim dertlerimizi».
İisusun izleyicileri
18Açan İisus gördü çok insan Kendi dolayında, sımarladı üürenicilerinä, kayıklan gölün öbür tarafına geçsinnär.
19Ozaman Ona yaklaştı birisi bilgiçlerdän da dedi: «Üüredici, gidecäm Senin ardına, nereyi da Sän gitsän».
20İisus cuvap etti: «Tilkilerin inneri, kuşların yuvaları var, ama Adam Oolu yok nereyi başını koysun».
21Başka birisi üürenicilerin arasından dedi: «Saabi, brak, ilkin gideyim, bobamı gömeyim».
22«Gel Benim ardıma, brak, ölülär ölülerini gömsün», – dedi İisus.
İisus boranı uslandırêr
23İisus girdi kayık içinä, üürenicileri dä girdilär Onun ardına.
24Birdän göldä çeketti bir büük boran, ölä pek sert, ani dalgalar kayıı gömärdi, ama İisus uyuyardı.
25Üürenicilär yaklaştılar, uyandırdılar Onu da dedilär: «Saabi! Kurtar bizi, kaybeleriz!»
26İisus dedi onnara: «Neçin korkêrsınız, az inancılar?» Sora kalktı, azarladı lüzgeri hem dalgaları, da birdän bir büük usluluk oldu.
27İnsannar şaştılar da dedilär: «Kimdir Bu, Angısını lüzgerlär dä, deniz dä sesleerlär?»
İisus koolêêr fena duhları Gadarada
28Açan İisus etişti gölün öbür tarafına, Gadara erlerinä, karşıladı Onu iki adam, fena duhtan tutulu, angıları mezar laamnarından çıktılar. Onnar ölä titsiydilär, ani kimsey geçämärdi o yoldan.
29Onnar başladılar baarmaa: «Neyin var bizimnän, /İisus,/ Allahın Oolu? Geldin burayı vakıtsız zeetlemää mi bizi?»
30Onnardan uzak büük bir sürü domuz otlardı.
31Fena duhlar yalvardılar İisusa: «Eer uuradarsaydın bizi, yolla, girelim domuz sürüsü içinä».
32«Gidin», – dedi İisus. Onnar çıktılar da girdilär domuzlar içinä. Birdän bütün sürü hızlandı dik yamaçtan, atladı göl içinä da buuldu su içindä.
33Domuzçular kaçtılar, da kasabaya gelip, söledilär hepsinä, ne oldu fena duhtan tutulu adamnarlan.
34Bütün kasabadan insan çıktı karşı İisusa. Görüp Onu, yalvardılar, gitsin onnarın erlerindän.
Currently Selected:
Matfey 8: GagNTL
Highlight
Share
Copy
Want to have your highlights saved across all your devices? Sign up or sign in
© Bіblіyayı çevіrän İnstіtut, Moskva, 2006
