Luka 18
18
Dul karı hem inansız daavacı
1İisus söledi üürenicilerinä bir örnek, ki göstersin, ani lääzım herzaman dua etmää da hiç brakılmamaa:
2«Bir kasabada vardı bir daavacı, angısı Allahtan korkmardı, insandan da utanmardı.
3O kasabada vardı bir dul karı, angısı sık gelärdi ona da yalvarardı: „Yap dooruluk bana benim karşı duranımnan“.
4O uzun vakıt istämedi dooruluk yapmaa, ama sonda kendi-kendinä dedi: „Allahtan korkmêêrım, insandan utanmêêrım.
5Ama, çünkü bu dul karı beni raada brakmêêr, ona dooruluk yapacam, ki, dayma gelip, kafamı düümesin“».
6Sora Saabi ekledi: «İşidersiniz mi, ne deer diil dooru daavacı?
7Acaba Allah yapmayacek mı dooruluk seçilmişlerinä, kim Ona yalvarêr gecä-gündüz? Çok mu onnarı bekledecek?
8Söleerim sizä, tezdä yapacek dooruluk onnara. Ama Adam Oolu gelmesindä, erdä inan bulacek mı?»
Harççı hem farisey
9Söledi taa bir örnek onnara, kim kendinä umutlanêr hem kendini dooru sayêr, da başkasını aşaalandırêr.
10«İki kişi gittilär Ayoz binaya dua etmää: birisi farisey, öbürü harççı.
11Farisey ayakça durardı da bölä dua edärdi kendi-kendinä: „Allahım, şükür ederim sana, ani diilim kalan insan gibi: hırsız, kelepirci, orospu, eki nicä bu harççı.
12Bän iki sıra haftada oruç tutêrım, vererim onuncu payını bütün gelirimdän“.
13Ama harççı durardı uzakta, kıyışmardı baarlem gözlerini gökä kaldırsın. O düüyärdi güüsünä da deyärdi: „Acı Beni, günahkeri, Allahım!“
14Dooru söleerim sizä, bu harççı Allahın gözündä taa dooru gitti evä, nekadar farisey. Zerä kim kendini üüseklendirer, o aşaalandırılacek, kim kendini aşaalandırêr, o üüseklendirilecek».
İisus iisözleer uşakları
15Getirärdilär İisusa uşakları, ki diisin onnara, ama üürenicilär, görüp bunu, azarlardılar onnarı.
16İisus çaardı uşakları Kendinä da dedi: «Brakın uşakları gelsinnär Bana da durgutmayın onnarı, zerä Allahın Padişahlıı onnarın gibileri için.
17Dooru söleerim sizä: kim kabletmeyecek Allahın Padişahlıını bir uşak gibi, o orayı hiç girmeyecek».
Zenginnik hem diveç yaşamak
18Bir önderci sordu İisusa: «İi Üüredici, ne lääzım yapayım, ki diveç yaşamak edeneyim?»
19«Neçin deersin Bana ii? Kimsey diil ii yalnız Allahtan kaarä, – cuvap etti İisus. –
20Bilersin mi sımarlamakları? Orospuluk yapmayasın, öldürmeyäsin, çalmayasın, yalancı şaat olmayasın, bobanı hem ananı ikramnayasın».
21«Hepsi bunnarı tamannadım taa gençliimdän», – cuvap etti bu adam.
22İisus, işidip bu lafları, dedi: «Sana salt bir iş etişmeer: sat varlıını, payet fukaaralara, da olacek haznan göktä. Sora gel da izlä Beni».
23O, işidip bu lafları, pek gücendi, zerä büük varlıı vardı.
24İisus, görüp, ani pek gücendi, dedi: «Ne zor girsin Allahın Padişahlıına zengin olannar!
25Taa ilin bir devä iinenin kulaandan geçsin, nekadar bir zengin adam Allahın Padişahlıına girsin».
26Onnar, angıları seslärdilär, dedilär: «Kim acaba kurtulabilir?»
27İisus cuvap etti: «Ne insana olmaz, Allaha olur».
28Ozaman Petri dedi: «Bak, biz braktık hepsini da geldik Senin ardına».
29İisus ona dedi: «Doorusunu söleerim sizä, hepsi, kim braktı evini, karısını, kardaşlarını, anasını, bobasını eki uşaklarını Allahın Padişahlıı için,
30kabledecek çok taa zeedä bu ömürdä hem gelär ömürdä diveç yaşamak».
İisus üçüncü sıra haberleer ölümünü hem dirilmesini
31İisus, alıp bir tarafa oniki üürenicisini, dedi onnara: «Tä, biz gideriz İerusalimä. Hepsi, ne yazılı proroklardan Adam Oolu için, tamannanacek.
32Zerä Adam Oolu verilecek yabancıların ellerinä. Onu gülmää alaceklar, süüyeceklär hem tüküreceklär üzünä.
33Onu kamçıylan düüyeceklär da öldüreceklär, ama O üçüncü günü dirilecek».
34Onnar annamadılar bişey bu laflardan, zerä bu laflar onnar için kapalıydı. Onnar annayamadılar, ne O söledi.
Bir köör İerihon kasabasında
35Açan yaklaşardı İisus İerihon kasabasına, bir köör oturardı yol boyunda, dileneräk.
36İşidip, ani yoldan insan geçer, sordu: «Ne olêr?»
37Ona söledilär: «Nazaretli İisus geçer».
38Ozaman o baardı: «İisus, Davidin Oolu, acı beni!»
39Onnar, kim gidärdi öndä, azarlardılar onu, sussun, ama o taa pek baarardı: «Davidin Oolu, acı beni!»
40İisus durgundu, sımarladı getirsinnär köör adamı. Açan o yaklaştı, İisus sordu:
41«Ne isteersin sana yapayım?» O cuvap etti: «Saabi! Görmäk edeneyim».
42İisus dedi: «Gör, senin inanın seni kurtardı».
43Köör adam çabuk görmää başladı da gitti İisusun ardına, Allahı metederäk. Hepsi insan, göreräk, ne oldu, metinnedilär Allahı.
Currently Selected:
Luka 18: GagNTL
Highlight
Share
Copy
Want to have your highlights saved across all your devices? Sign up or sign in
© Bіblіyayı çevіrän İnstіtut, Moskva, 2006
