Luka 17
17
Günaha düşürmeyin başkasını
1İisus dedi üürenicilerinä: «Yok nicä günaha sokan denemeklär gelmesin, ama vay ona, kimdän geler!
2Taa ii olur, onun boynusuna bir dermen taşı assınnar da onu deniz içinä atsınnar, nekadar birisini bu en küçüklerdän günaha soksun.
3Esap alın kendi-kendinizä! Eer senin kardaşın sana karşı günah yaparsaydı, git da azarla onu. Eer pişman olarsaydı, afet onu.
4Eer o günaha girärseydi sana karşı edi sıra gündä da edi sıra gelärseydi, deyip: „Pişman olêrım“, afedäsin onu».
5Ozaman apostollar dedilär Saabiyä: «Zeedelä bizim inanımızı!»
6Saabi dedi: «Eer sizdä olursa inan bir hardal toomu gibi, da deyärseydiniz bu dut fidanına: „Buradan çık köklän da deniz içinä diiş!“ – o sesleyecek.
7Kim sizdän, çıraa kırdan geldii zaman sürmektän yada koyunnarı otlatmaktan, deer ona: „Hızlı gel, otur sofraya!“
8Demeer misiniz taa tez: „Hazırla imää, kuşan da izmet et bana, bän iyincä hem içincä, sora sän dä iyecän hem içecän“.
9Şükür edersin mi sän çıraana, ani yaptı, ne sımarladın ona? /İnanmêêrım!/
10Hep ölä siz dä, açan yapacenız hepsini, ne sımarlanmış, deyiniz: „Biz yaramaz çıraklar, yaptık, ne lääzımdı yapalım“».
On lepralı hasta saa oldular
11Gidärkän İerusalimä, İisus geçti Samariyadan hem Galileyadan.
12Girärkän bir küü içinä, Ona karşı çıktılar on lepralı#17:12 Lepra – titsi deri hastalıı. adam. Onnar uzakta durdular.
13Sora büük seslän baardılar: «İisus, Üüredici, acı bizi!»
14Açan İisus gördü onnarı, dedi: «Gidin, gösterilin popazlara!» Onnar, yolda gidärkän, paklandılar.
15Onnardan birisi, açan gördü saa olmuş kendini, büük seslän Allahı metinneyeräk, geeri döndü.
16O düştü üzükoynu İisusun ayaklarına da şükür etti. O bir samariyalıydı.
17İisus dedi: «Paklanmadı mı on kişi? Neredä dokuzu?
18Bulunmadı mı kimsey, bu yabancıdan kaarä, geeri dönsün da Allahı metinnesin?»
19Sora dedi bu adama: «Kalk da git, senin inanın seni kurtardı».
Allahın Padişahlıı içinizdä
20Fariseylär sordular İisusa: «Nezaman gelecek Allahın Padişahlıı?» İisus cuvap etti onnara: «Allahın Padişahlıı gelmeyecek ölä, ani gözä ursun.
21Demeyeceklär sizä: „Tä orada!“ yada: „Tä burada!“. Zerä Allahın Padişahlıı sizdä».
İisusun ikinci gelmesi
22Sora dedi üürenicilerinä: «Gelecek vakıt, açan pek isteyeceniz göräsiniz Adam Oolunun günnerindän birini, ama görämeyeceniz.
23Deyeceklär sizä: „Tä orada, tä burada!“ Yola çıkmayın, onnarın ardına gitmeyin.
24Zerä, nicä çimçirik çakêr da aydınnadêr gökü bir kenarından öbür kenarınadan, ölä olacek Adam Oolu da Kendi günündä.
25Ama bundan öncä lääzım çok zeet çeksin hem kabul olmasın bu boy insandan.
26Nicä oldu Noyun günnerindä, hep ölä olacek Adam Oolunun günnerindä dä.
27İyärdilär, içärdilär, evlenärdilär o günä kadar, nezaman Noy girdi gemi içinä. Geldi potop da kaybetti hepsini.
28Enidän olacek, nicä oldu Lotun günnerindä, nezaman insan iyärdi, içärdi, satın alardı, satardı, ekärdi hem ev yapardı.
29Ama o günü, açan çıktı Lot Sodomdan, göktän ateş hem kükürt yaadı da hepsini kaybetti.
30Hep ölä olacek o günü dä, nezaman Adam Oolu peydalanacek.
31Kim o gündä bulunacek ev üstündä, inmesin almaa ev işlerini içyandan. Kim olacek kırda, dönmesin geeri evä.
32Aklınıza getirin Lotun karısını.
33Kim çalışacek kurtarsın yaşamasını, kaybedecek onu, ama kim kaybedecek yaşamasını, yaşamak edenecek.
34Söleerim, o gecä iki kişi barabar bir patta olacek. Birisi alınacek, öbürü kalacek.
35İki karı barabar un üüdeceklär. Birisi alınacek, öbürü kalacek.
/ 36İki adam olacek kırda. Birisi alınacek, öbürü kalacek./»
37Üürenicilär sordular: «Neredä, Saabi?» O cuvap etti: «Neredä leş olacek, orayı leş kartalları toplanacek».
Currently Selected:
Luka 17: GagNTL
Highlight
Share
Copy
Want to have your highlights saved across all your devices? Sign up or sign in
© Bіblіyayı çevіrän İnstіtut, Moskva, 2006
