Rom Tɩŋŋaa 2

Wɩa sarɩya chɛ-diiliŋ

1Ma bɩ woruŋ ka ŋaa ma sɩ joŋ cheeriŋ pɩpɩ ma dɔnsʋŋ tɩŋŋaa, ma nɩalɩŋ sɩɩ bʋl nɩaa teeŋ a bʋl dɩ ba cheye nɛ, aŋ ŋɩŋaa wʋbɔmɔ-la tɩtɩa. Nɩɩ-la-na kala ma sɩ ŋaa, dɩ ma nɩɩ ŋaa wʋbɔmɔ-la, ma bɩra bɩ wɩɩkala kɛnɛ dɩ ma bʋl. Ma sɩɩ ŋaa ŋɩɩ, ma tɩtɩa laa cheeriŋ nɛ ŋɩɩ lɛ. 2Wɩa sɩ joŋ cheeriŋ pɩ ma nɩalɩŋ sɩɩ ŋaa wʋbɔŋŋɔɔ deemba, la jɩma arɩ ʋ kɛŋ wʋtɩtɩɩ nɛ. 3Ama ma-na sɩ joŋ cheeriŋ pɩ nɩaa aŋ ŋɩŋaa wʋbɔŋŋɔɔ deemba ma tɩtɩa lɛ, ma bɩɩna arɩ ma jaŋ wuo fá lɛl Wɩa nɩsɩŋ lɛ dɩ ʋ sɩ́ ma sarɩya dii koo? 4Wɩa sɩ kɛŋ zile kɩŋkɛŋ a kɛŋ kenyiri ŋɩɩ, a nyalɩma pɩma maa ŋaa wɩaa, ma bene arɩ ʋ bɩ kʋŋ ŋaa? Ma bɩ jɩŋ arɩ Wɩa sɩ kɛŋ zile ŋɩɩ, ʋʋ chɛ dɩ ma bɩrɩma lɩɩ ma wʋbɔŋŋɔɔ lɛ nɛɛ? 5Ma tʋɔŋ dolie. Ma vɩa dɩ ma bɩrɩma lɩɩ ma wʋbɔŋŋɔɔ lɛ nɛ. Ma wasa ŋaa Wɩa baanɩŋ faasa sisii nɛ. Tapʋlɩɩ-la ʋ sɩ jaŋ dii dʋnɩa nɩaa sarɩya, ʋ jaŋ dii sarɩya arɩ wʋtɩtɩɩ dɩ nɩaa na. 6Ʋ jaŋ tiŋ nʋʋkala a magɛ ŋɩɩ ʋ sɩ tɩma magɛ. 7Nɩalɩŋ sɩ kɛŋ kenyiri a ŋɩŋaa wʋzɔŋŋɔɔ, a ŋaa ŋɩɩ a chɩchɛ dɩ ba laa yɩrɩŋ Wɩa sɩpaaŋ, a chɩchɛ mɩɩsɩ-la sɩ bɩ dɛrɛ, Wɩa jaŋ joŋo pɩba. 8Ama nɩalɩŋ sɩɩ to ba tɩtɩa tʋɔtɔrʋŋ lɛ aŋ vɩa wʋtɩtɩɩ-la, aŋ tuto wʋbɔŋŋɔɔ ŋaanɩŋ lɛ, Wɩa jaŋ na baanɩŋ ba nyuŋ kɩŋkɛŋ dɩ ba na hɛɛŋ. 9Nʋʋ na-kala sɩɩ ŋaa wʋbɔŋŋɔɔ, hɛɛŋ jaŋ jʋʋ. Hɛɛ-la jaŋ laa sɩpaaŋ kɛŋ Juu tɩŋŋaa nɛ, aŋ-na kʋ kɛŋ nɩalɩŋ sɩ bɩ Juu tɩŋŋaa ŋaa ma. 10Ama nʋʋ na-kala sɩɩ ŋaa wʋzɔŋŋɔɔ, ʋ jaŋ na pʋlʋmʋŋ Wɩa sɩpaaŋ, a laa yɩrɩŋ, a hɔŋ arɩ fɩɛlɩŋ, Juu tɩŋŋaa nɛ jaŋ laa sɩpaaŋ, aŋ ka nɩalɩŋ sɩ bɩ Juu tɩŋŋaa ŋaa tuto, 11bɛɛ wɩaa Wɩa bɩ nɩaa kaa pɔrɛ.

12Wɩalɩŋ Mosis fa sɩ ŋmʋnsa bil dɩ nɩaa tuto, nɩalɩŋ sɩ bɩ ba jɩŋ aŋ ŋɩŋaa wʋbɔŋŋɔɔ, ba jaŋ sʋʋ. Dɩ ba nɛ sʋba, wɩalɩŋ dee Wɩa jaŋ kaa dii ba sarɩya. Nɩalɩŋ ma sɩ jɩŋ wɩalɩŋ Mosis sɩ ŋmʋnsa bil dɩ nɩaa tuto aŋ ŋɩŋaa wʋbɔŋŋɔɔ, dɩ ba ma nɛ sʋba, Wɩa jaŋ to wɩalɩŋ lɛ nɛ a dii ba sarɩya. 13Nɩalɩŋ sɩ nɩɩ wɩalɩŋ Mosis sɩ ŋmʋnsa bil dɩ nɩaa tuto, ʋ ŋɩɩ bɩ jaŋ ŋaa dɩ ba kɛŋ tʋɔpʋla Wɩa teeŋ. Ama nɩalɩŋ sɩɩ to wɩalɩŋ Mosis sɩ ŋmʋnsa bil dɩ nɩaa tuto, ba nɛ jaŋ kɛŋ tʋɔpʋla Wɩa sɩpaaŋ. 14Nɩalɩŋ sɩ bɩ Juu tɩŋŋaa ŋaa, ba bɩ wɩalɩŋ Mosis sɩ ŋmʋnsa bil dɩ nɩaa tuto jɩŋ. Ama dɩ ba tʋɔbɩɩnaa nɛ daga dɩ ba ŋaa wɩalɩŋ tɩtɩa Mosis fa sɩ daga dɩ nɩaa tuto, ba bil niiŋ nɛ ŋɩɩ ba tɩtɩa lɛ, arɩ ba sɩ bɩ wɩalɩŋ Mosis sɩ ŋmʋnsa bil dɩ nɩaa tuto jɩŋ kala. 15Ŋɩɩ daga arɩ wɩalɩŋ Mosis fa sɩ ŋmʋnsa bil dɩ nɩaa tuto, hɛ ba tʋɔbɩɩnaa lɛ nɛ. Dɩ ba nɛ cheye, ba tʋɔbɩɩnaa yie dagɛba nɛ. Dɩ ba nɛ bɩra bɩ cheye ma, ba tʋɔbɩɩnaa bɩra yie dagɛba nɛ. 16Ŋɩɩ wɩaa Wɩa wʋzɔmɔ-la mɩ sɩ bʋla pɩma daga arɩ ŋ-la nɛ ʋ jaŋ nagɛ tapʋlɩɩ-la Wɩa sɩ jaŋ kɛŋ nɩaa wʋfalaa kaa kʋ lɩɩ pʋlʋmʋŋ, a to Yesu Kirisito lɛ a dii ba sarɩya.

Juu tɩŋŋaa nɛ jɩŋ wɩalɩŋ Mosis fa sɩ ŋmʋnsa bil dɩ nɩaa tuto

17Ka ŋ-na nɩɩ-la sɩ kɛŋ ŋ tɩtɩa yɩyɩrɛ Juu tɩɩna a joŋ ŋ yɩɛlaa hɛ wɩalɩŋ Mosis fa sɩ ŋmʋnsa bil dɩ nɩaa tuto, a bibigisi ŋ tɩtɩa lɛ arɩ ŋ jɩŋ Wɩa nɛ, 18ŋ jɩŋ wɩɩ-la Wɩa sɩɩ chɛ dɩ ŋ ŋɩŋaa nɛ. Ba dagɩŋ wɩalɩŋ Mosis sɩ ŋmʋnsa bil dɩ ba tuto nɛ, ŋɩɩ nɛ tɩɩ ŋ jaŋ wuo jɩŋ wɩɩ-la sɩ zɔmɔ. 19Ŋ jɩma arɩ ŋ nɛ ŋaa nyʋlɩmaa daa-kɛnnɛ a ŋaa nɩalɩŋ ma sɩ hɛ birimiŋ tʋɔŋ pʋlʋmʋŋ. 20Ŋ nɛ ŋaa nɩɩ-la sɩɩ dagɛ nɩalɩŋ sɩ bɩ wɩaa jɩŋ, aa dagɛ hambiisiŋ maa. Wɩalɩŋ Mosis sɩ ŋmʋnsa bil dɩ nɩaa tuto ŋaa ŋ kɛŋ wʋjɩmɩŋ nɛ a jɩŋ wʋtɩtɩɩ.

21Ŋ-na nɩɩ-la sɩɩ dagɛ nɩaa, ŋ bɩ ŋ tɩtɩa ka dagɛɛ? Ŋŋ dagɛ nɩaa dɩ ba sɩ́ gaa, aŋ tɩtɩa gɩgaa. 22Ŋ-na nɩɩ-la sɩ sɩ dɩ nɩaa sɩ́ ba dɔnsʋŋ haalaa chɛ, aŋ tɩtɩa chɩchɛ nɩaa haalaa. Ŋ sɩ ŋ bɛrɛ vʋɩyaa nɛ, aŋ mʋ gɩgaa kɩaa vʋɩyaa dɩɩsɩŋ lɛ. 23Ŋ-na ka bigisi ŋ tɩtɩa lɛ nɛ arɩ ŋ jɩŋ wɩalɩŋ Mosis sɩ ŋmʋnsa bil dɩ nɩaa tuto nɛ, aŋ chichei wɩalɩŋ a hɩhɩɩsɛ Wɩa. 24Wɩa teniŋ tʋɔŋ ba ŋmʋnsɛ ŋɩɩ nɛ a bʋl, “A tɩŋ ma Juu tɩŋŋaa wɩaa, nɩalɩŋ sɩ bɩ Juu tɩŋŋaa ŋaa tʋʋsɛ Wɩa joŋŋoo nɛ.”

25Dɩ ma nɩɩ keri ma penee aŋ tuto wɩalɩŋ kala Mosis sɩ ŋmʋnsa bil dɩ nɩaa tuto, ma penee keriŋ kɛŋ bʋbʋɔŋ nɛ, ama dɩ ma nɩɩ chei wɩalɩŋ Mosis sɩ bile, ʋ naga arɩ ma bɩ ma penee kere. 26Dɩ nɩɩ-la sɩ bɩ ʋ peniŋ kere nɩɩ to wɩalɩŋ Mosis sɩ ŋmʋnsa bil dɩ nɩaa tuto, ma bɩ jɩŋ arɩ Wɩa jaŋ benu arɩ ʋ keri ʋ peniŋ nɛɛ? 27Ŋɩɩ wɩaa nɩalɩŋ sɩ bɩ ba penee keri aŋ tuto wɩalɩŋ Mosis sɩ ŋmʋnsa bil dɩ nɩaa tuto, ba jaŋ joŋ cheeriŋ pɩma. Ma nɩaa deemba jɩŋ wɩalɩŋ Mosis sɩ ŋmʋnsa bil nɛ a kikeri ma penee maa, aŋ ka ma chichei wɩalɩŋ. 28Ŋ yaraa wʋŋaalaa dee bɩ ŋaa ŋ ŋaa Juu tɩɩna. Ŋ sɩ keri ŋ nammɩa ma ta dee bɩ tɩɩ. 29Ama nɩɩ-la sɩ ŋaa Juu-tɩtɩɩ, ʋ tʋɔŋ wʋŋaalaa lɛ nɛ tɩɩ ʋ ŋaa Juu tɩɩna. Nɩɩ-la sɩ kɛŋ tʋɔpʋla, ʋ nɛ nɩɩ-la sɩ keri ʋ peniŋ. Wɩa Dɩŋ-zɔmʋŋ nɛ jaŋ wuo ŋaa ŋɩɩ pɩŋ, ŋ sɩ keri ŋ yaraa nammɩa ta dee. Wɩa nɛ jaŋ bɛsɛ ʋ tɩɩna lɛ, nuhuobiiŋ dee bɩ jaŋ bɛsɛ ʋ lɛ.

Currently Selected:

Rom Tɩŋŋaa 2: SIS

Highlight

Copy