Rom Tɩŋŋaa 1

1Mɩ-na Pɔɔl sɩ ŋaa Yesu Kirisito tɩntɩnna, mɩ nɛ ŋmʋnsɛ teniŋ deeŋ a pɩpɩ ma Rom tɩŋŋaa. Wɩa nɛ yɩrɛmɛ mɩ ŋaa ʋ nanzɔɔ. Ʋ lɩɩsɛmɛ dɩ mɩ bʋl ʋ wʋzɔmɔ-la a pɩ nɩaa nɛ. 2Wɩa to ʋ wʋlaabʋllaa lɛ nɛ faafaa kala a bʋla pɩba arɩ ʋ jaŋ leŋ dɩ ba bʋl ʋ wʋzɔmɔ-la a pɩ nɩaa. Ba ŋmʋnsɛ ŋɩɩ nɛ Wɩa teniŋ tʋɔŋ. 3Wʋzɔŋŋɔɔ deemba tɩgɛ La Tɩɩna Yesu Kirisito lɛ nɛ. Ʋ ŋaa Wɩa Bii nɛ a ŋaa nuhuobiiŋ ma. Ʋ ŋaa la naabalɩma kuoro Devit nihii nɛ. 4Ama Wɩa chɩsʋ sʋʋŋ lɛ nɛ, ŋɩɩ dagɛ arɩ ʋ ŋaa Wɩa Bii nɛ, a kɛŋ doluŋ a kɛŋ Wɩa Dɩŋ-zɔmʋŋ sɩ kɛŋ tʋɔpʋla ma. 5Ʋ lahɔrɩmɔ lɛ Wɩa leŋe mɩ ŋaa ʋ nanzɔɔ nɛ a bʋl ʋ wʋzɔmɔ-la wɩaa a pɩ dʋnɩa nɩaa kala, dɩ ba laa dii a to Yesu niiŋ a wuo zil ʋ yɩrɩŋ.

6Ma ma Rom tɩŋŋaa hɛ nɩaa deemba tʋɔŋ nɛ. Wɩa lɩɩsɛma nɛ dɩ Yesu Kirisito tɩɩma. 7Ŋɩɩ wɩaa mɩ ŋmʋnsɛ teniŋ deeŋ pɩpɩ ma nɩalɩŋ kala sɩ hɛ Rom tinteeŋ lɛ, ma nɩalɩŋ Wɩa sɩ cho a lɩɩsɛma dɩ ma ŋaa tʋɔpʋl tɩŋŋaa. La Nyɩmma Wɩa arɩ La Tɩɩna Yesu lahɔrɩmɔ lɛ, ba jaŋ pɛ ma lɛ dɩ ma hɔŋ arɩ fɩɛlɩŋ.

Pɔɔl sʋl Wɩa, Rom tɩŋŋaa wɩaa

8Wɩɩ-la mɩ sɩ kɛnɛ dɩ mɩ laa sɩpaaŋ bʋl nɛ ŋ-la: Mɩ to Yesu Kirisito lɛ aa lɔllɛ Wɩa ma kala wɩaa, bɛɛ wɩaa dʋnɩa nʋʋkala nɩɩ ŋɩɩ ma sɩ laa Wɩa dii nɛ. 9Wɩa mɩ sɩ tɩmaa pa arɩ mɩ tʋɔ-bala aa bʋl ʋ Bie wʋzɔmɔ-la, ʋ nɛ ŋaa mɩ pɛ-naara bʋa na-kala lɛ dɩ mɩ nɩɩ chʋɔlʋ, mɩ yie liliisi ma wɩaa nɛ. 10Mɩ yie sʋlʋ a chɩchɛ wombiiŋ dɩ mɩ kʋ nama. Dɩ ʋ nɛ sɛyɛ, mɩ jaŋ kʋ nama lɛɛlɛ. 11Mɩ cho dɩ mɩ kʋ nama nɛ arɩ sɩɩfɩɛsɩŋ, a pɛ ma lɛ arɩ kɩalɩŋ Wɩa Dɩŋ-zɔmʋŋ sɩɩ chɛ dɩ ʋ joŋo pɩma dɩ ma dol. 12Wɩɩ-la mɩ sɩɩ bʋl nɛ ŋ-la: La jaŋ pɩpɛ dɔŋɔ lɛ. Mɩ sɩ laa Wɩa dii ŋɩɩ jaŋ leŋ dɩ ma nyuŋ nyaasɛ. Ma ma sɩ laa Wɩa dii ŋɩɩ jaŋ leŋ dɩ mɩ ma nyuŋ nyaasɛ.

13Mɩ naambiiriŋ, mɩ cho dɩ ma jɩŋ arɩ mɩ walɩma walɩma dɩ mɩ kʋ nama nɛ, ama wɩɩ nɛ yie tɩɩ mɩ bɩ kɔ. Mɩ cho dɩ mɩ ŋaa dɩ nɩaa lɩɩ ma tʋɔŋ nɛ a kʋ to Wɩa, arɩ mɩ sɩ ŋaa ŋɩɩ nɩalɩŋ dɔnsʋŋ sɩ bɩ Juu tɩŋŋaa ŋaa lɛ. 14Ʋ maga dɩ mɩ tɩŋ Wɩa tɩntɩŋŋaa nɩaa tʋɔŋ nɛ. Giriik tɩŋŋaa arɩ nɩalɩŋ kala sɩ bɩ Giriik tɩŋŋaa ŋaa, wʋjɩnnaa arɩ nɩalɩŋ sɩ bɩ wɩaa jɩŋ, ba kala tʋɔŋ nɛ ʋ maga dɩ mɩ tɩŋ Wɩa tɩntɩŋŋaa. 15Ŋɩɩ nɛ tɩɩ mɩ faasa cho dɩ mɩ bʋl Wɩa wʋzɔmɔ-la a pɩ ma nɩalɩŋ sɩ hɛ Rom tinteeŋ lɛ.

Wɩa wʋzɔmɔ-la kɛŋ doluŋ

16Mɩ bɩ hɩɩsɩŋ ka fá dɩ mɩ bʋl Wɩa wʋzɔmɔ-la, bɛɛ wɩaa ʋ nɛ ŋaa Wɩa doluŋ. Nɩalɩŋ sɩ laaba dii, Juu tɩŋŋaa arɩ nɩalɩŋ sɩ bɩ Juu tɩŋŋaa ŋaa kala, Wɩa jaŋ laaba ta. 17Wɩa wʋzɔmɔ-la dagɛ ŋɩɩ Wɩa sɩ ŋaa nɩaa wuo kɛŋ tʋɔpʋla ʋ sɩpaaŋ. Ʋ daga arɩ nɩalɩŋ sɩ laa Wɩa dii, ba kɛŋ tʋɔpʋla ʋ sɩpaaŋ, dɩ ba wuo chɩŋ ba laa diine-la naaŋ lɛ a mʋ dɛrɛ. Ba ŋmʋnsɛ ŋɩɩ nɛ Wɩa teniŋ tʋɔŋ a bʋl,

“Nɩɩ-la kala sɩ laa Wɩa dii, ʋ ŋaa tʋɔpʋl tɩɩna nɛ Wɩa sɩpaaŋ,

ʋ jaŋ kɛŋ mɩɩsɩŋ.”

Wɩa baanɩŋ sii nɩbɔŋŋɔɔ nyuŋ

18Wɩa baanɩŋ sii nɩbɔŋŋɔɔ arɩ nɩalɩŋ sɩ bɩ ʋ niiŋ wɩaa ka to nyuŋ nɛ, bɛɛ wɩaa ba wʋŋaalaa nyagɛ wʋtɩtɩɩ-la bil nɛ. 19Wɩalɩŋ nɩaa sɩ maga dɩ ba jɩŋ a tɩgɛ Wɩa lɛ, ba wombiiŋ chaasa pɩŋ nɛ. Wɩa nɛ dagɛba. 20La bɩ Wɩa nagɩsɩŋ wuo jɩŋ. Ama la wuo chaasa na ŋɩɩ ʋ sɩ kɛŋ doluŋ sɩ bɩ dɛrɛ. Ʋ bɩ nuhuobiine naga. Ʋ dagɛla wɩaa deemba, a suomi bʋa-la lɛ ʋ sɩ ŋaa dʋnɩa a kaa kʋkɔ jɩnɩŋ. Kɩalɩŋ kala ʋ sɩ ŋaa nɛ dagɛla ŋɩɩ. Ŋɩɩ wɩaa nɩbɔŋŋɔɔ deemba bɩ jaŋ wuo bʋl arɩ ba bɩ jɩŋ. 21Ba jɩma Wɩa hɛ nɩmɛ nɛ, ama ba bɩ ʋ ka zil arɩ ʋ ŋaa Wɩa. Ba bɩ ʋ ka lɔllɛ. Ba tʋɔbɩɩnaa kala bɩrɩma nɛ ba ŋɩŋaa wʋlɩɩlɩŋ. Ba tʋɔbɩɩŋ lɔrʋnʋ-la kɛmba kaa mʋ hɛ birimiŋ tʋɔŋ. 22Ba bɩɩna ba kɛŋ wʋjɩmɩŋ nɛ, ama ba yaara nɛ. 23Ʋ fa maga dɩ ba chʋchʋɔlɛ Wɩa sɩ kɛŋ yɩrɩŋ aŋ bɩ sʋʋ. Ka ba vɩa aŋ mɩɩra mɛ kɩaa sɩ nagɛ nuhuobiinee a sʋsʋʋ, a bɩra mɛ kɩalɩŋ sɩ nagɛ diibiisiŋ arɩ pʋsʋŋ arɩ kɩalɩŋ sɩɩ tuuri tinteeŋ, a chʋchʋɔlɛ.

24Ŋɩɩ wɩaa Wɩa jomba ta ba tuto ba tɩtɩa tʋɔbɩɩŋ lɔrʋnʋ-la ba sɩ cho, a ŋɩŋaa wʋlɩɩlɩŋ dɔŋɔ lɛ. 25Wʋtɩtɩɩ-la ba sɩ jɩma a tɩgɛ Wɩa lɛ, ba joŋu lenni wʋnyɩɛrɩŋ, a mɩɩra chʋchʋɔlɛ kɩalɩŋ ʋ sɩ ŋaa, aŋ vɩa dɩ ba chʋchʋɔlɛ Nɩɩ-la sɩ ŋaaba. Ʋ maga dɩ la dɛnnʋ a kaa mʋ wuu. Amɩɩ.

26A tɩŋ ŋɩɩ wɩaa, Wɩa jomba ta nɛ dɩ baa ŋaa wʋlɩɩlɩŋ a hɩhɩɩsɛ ba tɩtɩa. Haalaa vɩa dɩ ba dɩ ba balaba pɩpɛ bɔsɔ, aŋ ka ba dɩ ba hadɔsʋŋ mɩɩra pɩpɛ bɔsɔ. 27Ŋɩɩ tɩtɩa nɛ baalaa ma vɩa dɩ ba jaa haalaa arɩ Wɩa sɩ sɩ baa ŋaa ŋɩɩ, aŋ mɩɩra kɛŋ ba badɔsʋŋ pɩpɩŋ a hɩhɩɛnɛ dɔŋɔ, a ŋɩŋaa hɩɩsɛ wɩaa dɔŋɔ lɛ. Ba sɩɩ ŋaa ŋɩɩ, baa dɔgɩsɛ ba tɩtɩa nɛ ŋɩɩ. Dɔgɩsɩna-la jaŋ magɛ ba yaraa lɛ.

28Nɩaa deemba bɩ chɛ dɩ ba jɩŋ Wɩa. Ŋɩɩ nɛ tɩɩ Wɩa lemba ta ba tuto ba tʋɔbɩɩŋ bɔmɔ-la harɩŋ a ŋɩŋaa wɩalɩŋ sɩ bɩ maga dɩ baa ŋaa. 29Baa ŋaa wʋbɔŋ dosunuŋ kala nɛ. Ba kɛŋ nɩaa kɩaa lɩlaa, a ŋɩŋaa wʋlɔrʋnʋŋ, a kɛŋ yarɩ-bieriŋ, a kpʋkpʋ nɩaa, a yuyuo yuosuŋ, a gɩgɩrɩmɛ nɩaa, a ŋaa wɩaa jʋjʋʋ nɩaa lɛ, a bʋbʋl nɩaa wɩaa. 30Ba ŋaa yɩrɩ-cheeree ma nɛ, a bɛrɛ Wɩa, a ŋaa nii-jɩgɩ tɩmma. Baa dagɛ ba tɩtɩa a bibigisi ba tɩtɩa lɛ. Ba yie chɩchɛ wombii-la ba sɩ jaŋ to a ŋaa wʋbɔŋŋɔɔ. Ba bɩ ba nyɩmmaba arɩ ba naamba niiŋ ka to. 31Ba bɩ wʋjɩmɩŋ kɛnɛ, a bɩ wʋtɩtɩɩ ma kɛnɛ. Ba bɩ nɩaa cho, a bɩ dɔŋɔ ma nenige ka fá.

32Ba jɩŋ wɩalɩŋ Wɩa sɩ bʋla a tɩgɛ wʋdosunuŋ deemba lɛ nɛ. Ʋ bʋla arɩ nɩalɩŋ sɩɩ ŋaa wɩaa deemba, ba maga dɩ ba sʋʋ nɛ, aŋ ka ba vɩa aŋ ŋɩŋaaba. Ŋɩɩ ma dʋndʋŋa dee. Ba paala bɩbɛsɛ nɩalɩŋ ma sɩɩ ŋaa wɩalɩŋ lɛ nɛ.

Currently Selected:

Rom Tɩŋŋaa 1: SIS

Highlight

Copy