WƖAA DƖ-SUOMUŊ 35

Jekɔb mɩɩra mʋ Bɛtɛl

1Ŋɩɩ nɛ Wɩa bʋla pɩ Jekɔb, “Sii mʋ Bɛtɛl a hɔŋ nɩmɛ a saa Wɩɩsʋllɩ koruŋ a pɩ Wɩa-la sɩ kɛŋ ʋ tɩtɩa kʋ dagɩŋ bʋa-la lɛ ŋ sɩ fáa lɛl ŋ naambie Ɛsɔ nɩsɩŋ lɛ.”

2Ŋɩɩ nɛ Jekɔb bʋla pɩ ʋ dɩa nɩaa arɩ nɩalɩŋ kala sɩ hɛ ʋ teeŋ, “Má paa ma tɔŋŋɔɔ kala ta aŋ pɩɩsɛ ma disiniŋ ta aŋ wuri ma gɛnnɩŋ aŋ laalɛ gɛrɩ-falaa 3aŋ ka dɩ la mʋ Bɛtɛl. Nɩmɛ nɛ mɩ jaŋ saa Wɩɩsʋllɩ koruŋ a pɩ Wɩa, Wɩa-la sɩ laa mɩ sʋla bʋa-la lɛ wɩaa sɩ jʋʋmɛ. Ʋ chɩŋ mɩ harɩŋ nɛ lee na-kala mɩ sɩ mʋa.” 4Ŋɩɩ nɛ ba paa ba tɔmɔ-la arɩ ba dɩgɩlɩŋ-kpɛnsɩŋ kala a pɩ Jekɔb, ʋ joŋo hugi piine bʋbʋɔŋ a kpagɛ Sɛkɛm. 5Ba sɩ sie a mʋmʋ, Wɩa leŋ fawʋllʋŋ jʋʋ tasɩ-la kala fa sɩ golli lee-la chu nɩaa, ba kʋŋkala bɩ ba harɩŋ kire.

6Jekɔb arɩ ʋ nɩaa kala kɔ Lus (Bɛtɛl nɛ ŋɩɩ) a hɛ Kɛnaŋ tinteeŋ. 7Nɩmɛ nɛ ʋ saa Wɩɩsʋllɩ koruŋ a hɛ ʋ yɩrɩŋ Ɛl Bɛtɛl, bɛɛ wɩaa lee-la nɛ Wɩa kɛŋ ʋ tɩtɩa dagʋ bʋa-la lɛ ʋ fa sɩ fáa lɛl ʋ naambie nɩsɩŋ lɛ.

8Ŋɩɩ nɛ Debora, nɩɩ-la sɩɩ beŋ Rɩbɛka, sʋʋ. Ba joŋu hugi piine-la sɩ hɛ Bɛtɛl lɛ bʋbʋɔŋ. Ŋɩɩ nɛ ba hɛ lee-la yɩrɩŋ Alɔŋ Bakuf.

9Jekɔb sɩ lɩɩ Mesopotemia tinteeŋ lɛ, ʋ harɩŋ Wɩa bɩra kɛŋ ʋ tɩtɩa kʋ dagʋ a pɛ ʋ lɛ. 10Wɩa bʋla pʋ, “Ŋ yɩrɩŋ nɛ Jekɔb, ama lɛɛlɛ ba bɩra bɩ jaŋ yɩyɩrɩŋ Jekɔb, ba jaŋ yɩyɩrɩŋ Iziral,” aŋ hɛ ʋ yɩrɩŋ Iziral.

11Wɩa bɩra bʋla pʋ, “Mɩ nɛ ŋaa Wɩa doluŋ kala Tɩɩna, kɛŋ doho a pʋŋa yʋgɛ, ŋ jaŋ ŋaa tintee, dɩ tintee daŋ lɩɩ ŋ lɛ, dɩ kuoroo ma lɩɩ ŋ doho nɩaa tʋɔŋ. 12Tintee-la mɩ sɩ joŋo pɩ Abɩraham arɩ Aɩzɩk, mɩ jaŋ joŋ ʋ tɩtɩa a pɩ ŋ dɩ ŋ doho nɩaa.” 13Ŋɩɩ nɛ Wɩa leŋu lee-la ba fa sɩɩ bʋl wɩaa, aŋ viiri.

14Jekɔb joŋ tabɩɩŋ pɛ ʋ nagɛ jebiiŋ lee-la ʋ dɩ Wɩa sɩ bʋl wɩaa a joŋ kʋnyʋalaa Wɩɩsʋlʋŋ kɩaa arɩ nʋʋŋ bɩsa wurisi. 15Jekɔb hɛ lee-la ʋ dɩ Wɩa sɩ bʋl wɩaa yɩrɩŋ Bɛtɛl.

Rakɛl arɩ Aɩzɩk sʋba

16Ŋɩɩ nɛ ba lɩɩ Bɛtɛl lɛ a mʋmʋ a ka mʋa, ka dɩ ba yi Ɛfɩraf, Rakɛl chɩchɛ dɩ ʋ lʋl. Ʋ luoruŋ faasa wʋwɩɩ ʋ chaasa na hɛɛŋ. 17Bʋa-la lɛ ʋ sɩɩ na hɛɛŋ ŋɩɩ, hachagɩra bʋla pʋ, “Sɩ́ leŋe dɩ fawʋllʋŋ kɛnɩŋ, ŋ jaŋ bɩra lʋl hambolibie.” 18Ŋɩɩ nɛ ʋ lʋl bile a hɛ ʋ yɩrɩŋ Bɛŋ-Oni aŋ wiesi ʋ wiesi katɩɩ aŋ sʋʋ. Ka ʋ nyɩmma ma hɛ bile yɩrɩŋ Bɛnjamɩŋ.

19Rakɛl sɩ sʋba, ba joŋu hugi Ɛfɩraf wombiiŋ (Bɛtɩlɛhɛm nɛ ŋɩɩ). 20Jekɔb saa jebiiŋ Rakɛl vaamɩŋ nyuŋ. Ʋ ŋaa magɩl a hɛ nɩmɛ arɩ jɩnɩŋ kala. 21Ŋɩɩ nɛ Jekɔb ba sɩ kaa yɩyɩrɛ Iziral bɩra sii a kieli Mɩgɩdal Ɛda a mʋ hɛ ʋ lɛbɩŋ. 22Bʋa-la lɛ Iziral sɩ hɔŋ tintee-la lɛ, Rubiŋ jʋʋ kɛŋ ʋ nyɩmma haal-la ʋ sɩ bile aŋ bɩ jaa baa yɩrɛ Biliha a pɩŋ. Ŋɩɩ nɛ Iziral nɩɩ wɩɩ-la.

Jekɔb fa kɛŋ hambolibiisiŋ fii arɩ balɩa nɛ.

23Liya hambolibiisiŋ nɛ ŋ-la:

Rubiŋ nɛ Jekɔb bii-hɩaŋ, Simioŋ, Levi, Juda, Ɩsaka arɩ Zebuluŋ.

24Rakɛl hambolibiisiŋ nɛ ŋ-la:

Josɛf arɩ Bɛnjamɩŋ.

25Rakɛl ketiiŋ Biliha hambolibiisiŋ nɛ ŋ-la:

Daŋ arɩ Nafɩtalɩ.

26Liya ketiiŋ Zilipa hambolibiisiŋ nɛ ŋ-la:

Gad arɩ Asa.

Hambolibiisiŋ deemba nɛ Jekɔb lʋl Mesopotemia tinteeŋ lɛ.

27Ŋɩɩ nɛ Jekɔb mɩɩra kɔ dɩa ʋ nyɩmma Aɩzɩk teeŋ Mamɩrɛ lɛ, a kpagɛ Kɩrɩaf Aba (Hɛbʋrɔŋ nɛ ŋɩɩ). Lee-la nɛ Abɩraham arɩ Aɩzɩk fa hɔŋ. 28Aɩzɩk fa hɛ ʋ mɩɩsɩŋ lɛ jɩsɩŋ zɔlɔ arɩ mahɩŋ banɛsɛ nɛ. 29Ŋɩɩ nɛ ʋ wiesi ʋ wiesi katɩɩ aŋ sʋʋ. Ʋ fa hɩɛsa nɛ woruŋ. Ba joŋu hugi ʋ nɩaa tʋɔŋ. Ʋ biiriŋ Jekɔb arɩ Ɛsɔ nɛ joŋu hugi.

Currently Selected:

WƖAA DƖ-SUOMUŊ 35: SIS

Highlight

Copy