WƖAA DƖ-SUOMUŊ 27
27
Aɩzɩk sʋl Wɩa pɩ Jekɔb
1Aɩzɩk sɩ hɩɛsa, ʋ sɩɩ-poloo yʋɔrɛ, ʋ bɩra bɩ na. Ŋɩɩ nɛ ʋ yɩrɛ ʋ nanʋa-hɩaŋ Ɛsɔ dɩ ʋ kɔ.
Ɛsɔ kɔ a bʋla pɩ ʋ nyɩmma, “Namɛ.”
2Ŋɩɩ nɛ Aɩzɩk bʋl, “Mɩ lɛɛlɛ hɩɛsa nɛ. Mɩ saa bɩ jɩŋ tapʋlɩɩ-la mɩ sɩ jaŋ sʋʋ. 3Joŋ ŋ toŋ arɩ huoŋ a mʋ gɩrɩŋ a kpʋ nammɩa a kaa kɔ 4a ŋaa kʋdiile-la mɩ sɩ cho pɩmɛ mɩ dii, aŋ sʋl Wɩa pɩŋ aŋ-na sʋʋ.”
5Aɩzɩk sɩ bʋl wɩɩŋ deeŋ pɩpɩ ʋ bie Ɛsɔ dɩ Rɩbɛka ka jegilu. Ɛsɔ lɩɩ mʋ nambagɩlɩŋ dɩ ʋ kpʋ nammɩa kaa kɔ. 6Ŋɩɩ nɛ Rɩbɛka bʋla pɩ ʋ bie Jekɔb a bʋl, “Mɩ nɩa arɩ ŋ nyɩmma bʋla pɩpɩ ŋ malɩma Ɛsɔ 7dɩ ʋ mʋ kpʋ bagɩla a kaa kʋ ŋaa kʋdiile-la ʋ sɩ cho pʋ dɩ ʋ dii aŋ sʋl Wɩa pʋ, aŋ-na sʋʋ. 8Mɩ bii, jegile nɩɩ mɩ teeŋ woruŋ a ŋaa wɩɩ-la mɩ sɩɩ chɛ dɩ mɩ bʋla pɩŋ. 9Jʋʋ bʋ-dɩa a kɛsɛ bʋ-bii-zɔŋŋɔɔ balɩa a kaa kɔ dɩ mɩ kpʋ a ŋaa kʋdiile-la ŋɩɩ ŋ nyɩmma sɩ cho, 10dɩ ŋ kaa jʋʋ pʋ, ʋ jaŋ dii aŋ sʋl Wɩa pɩŋ aŋ-na sʋʋ.”
11Ŋɩɩ nɛ Jekɔb bʋla pɩ ʋ naaŋ Rɩbɛka a bʋl, “Mɩ naambie Ɛsɔ kɛŋ pʋnaa nɛ, ka mɩ bɩ pʋnaa kɛnɛ. 12Dɩ mɩ nyɩmma nɛ digimi, ʋ jaŋ jɩŋ arɩ mɩ kɔ dɩ mɩ nyɩsʋ nɛ. Ʋ sɩ jaŋ sʋl Wɩa pɩmɛ, ʋ jaŋ mɩɩra ŋmɩɛsa hɛ mɩ lɛ.”
13Ŋɩɩ nɛ ʋ naaŋ bʋla pʋ, “Mɩ bii leŋ dɩ ŋmɩaŋ-la diimi. Ŋaa wɩɩ-la mɩ sɩ bʋla pɩŋ. Mʋ kɛsɛ bʋ-bii-zɔmɔ-la balɩa kaa kʋ pɩmɛ.”
14Ŋɩɩ nɛ ʋ kɛsɛ kaa kʋ pʋ. Ʋ kpʋ a ŋaa kʋdiile-la ʋ nyɩmma sɩ cho. 15Ŋɩɩ nɛ Rɩbɛka paa Ɛsɔ, ʋ nanʋa-hɩaŋ gɛrɩ-zɔŋŋɔɔ sɩ hɛ dɩa lɛ a laalɛ ʋ ŋaana Jekɔb 16a paa bʋ-tenniŋ a vɔɔ ʋ nɩsaa arɩ ʋ baŋŋaa sɩ ŋaa mʋla mʋla lɛ. 17Ŋɩɩ nɛ Rɩbɛka joŋ kʋdii sɩma-la arɩ boroboro ʋ sɩ ŋaa a pɩ ʋ nanʋala Jekɔb.
18Jekɔb kɛŋ kʋdiile-la mʋ ʋ nyɩmma teeŋ a bʋl, “Mɩ nyɩmma namɛ.”
Ʋ nyɩmma pɩɛsʋ, “Kʋbɛɛ nɛ?”
19Ŋɩɩ nɛ Jekɔb bʋla pɩ ʋ nyɩmma, “Mɩ-na Ɛsɔ nɛ, ŋ nanʋa-hɩaŋ, mɩ ŋaa wɩɩ-la ŋ sɩ sɩ mɩ ŋaa nɛ. Sii hɔŋ a dii kʋdiile-la ŋ sɩ cho aŋ sʋl Wɩa pɩmɛ.”
20Ŋɩɩ nɛ Aɩzɩk pɩɛsɛ ʋ nanʋala, “Ɛɛ nɛ ŋ ŋaa a naʋ lɩma ŋ-la?” Ŋɩɩ nɛ ʋ bʋl, “La TƖƖNA, ŋ Wɩa nɛ pɛ mɩ lɛ.”
21Ŋɩɩ nɛ Aɩzɩk bʋla pɩ Jekɔb, “Kʋ yimi dɩ mɩ digiŋ na ŋ nɛ ŋaa Ɛsɔ koo Ɛsɔ dee.”
22Ŋɩɩ nɛ Jekɔb mʋ yi ʋ nyɩmma Aɩzɩk ʋ digu aŋ bʋl, “Yikoro deeŋ nagɛ Jekɔb yikoro nɛ, aŋ ka nɩsaa nagɛ Ɛsɔ nɩsaa.” 23Ʋ bɩ wuo jɩŋ arɩ Jekɔb nɛ, bɛɛ wɩaa ʋ nɩsaa kɛŋ pʋnaa a nagɛ ʋ naambie Ɛsɔ nɩsaa nɛ, ŋɩɩ nɛ ʋ kɛŋ ʋ tɩtɩa hɛ dɔŋ dɩ ʋ sʋl Wɩa pʋ. 24Aŋ bɩra pɩɛsʋ, “Ŋ nɛ sɛnɛ ŋaa mɩ nanʋala Ɛsɔ?”
Ʋ bʋl, “Mɩ nɛ.”
25Ŋɩɩ nɛ Aɩzɩk bʋl, “Mɩ bii, kɛŋ nammɩa-la dɔnsʋŋ kaa kʋ yimi dɩ mɩ dii, aŋ sʋl Wɩa pɩŋ.”
Jekɔb joŋ nammɩa-la pʋ ʋ chaŋ, a joŋ tɩɩnɛnɛɛ sɩnɩŋ ma pʋ, ʋ nyʋa. 26Ŋɩɩ nɛ ʋ nyɩmma Aɩzɩk bʋla pʋ, “Kʋ yimi mɩ bii a guorimi.”
27Ʋ mʋ yiu a guoru. Aɩzɩk sɩ nɩɩ ʋ gɛnnɩŋ sʋɔra, ʋ sʋl Wɩa pʋ a bʋl,
“Mɩ nanʋala sʋɔra sɩma a nagɛ baga-la
La TƖƖNA sɩ leŋe ʋ wasɛ nɛ.
28Wɩa jaŋ leŋ dɩ wɩa-nyuŋ nyal-zɔmʋŋ nyal ŋ baga lɛ dɩ ʋ sɩŋ,
a leŋ dɩ ŋ na kʋdiilee yʋgɛ arɩ tɩɩnɛnɛɛ sɩnɩŋ.
29Wɩa jaŋ leŋ dɩ dʋnɩa sɛmɛ na-kala nɩaa
kpikpirimi ŋ sɩpaaŋ aŋ tɩmaa pɩŋ
a leŋ dɩ ŋ bibeŋ ŋ naambiiriŋ,
dɩ ba kpikpirimi ŋ sɩpaaŋ.
Dɩ nʋʋ ma nɛ ŋmɩɛsa hɛ ŋ lɛ, dɩ ŋmɩaŋ-la dii ʋ tɩɩna.
Dɩ nʋʋ ma nɛ sʋl wɩɩ-zɔmʋŋ pɩŋ,
dɩ Wɩa pɛ tɩɩna ma lɛ.”
30Aɩzɩk yie sʋl Wɩa pɩ Jekɔb dɛrɛ, ʋ ŋaa dɩ ʋ lɩɩ dɩ ʋ naambie Ɛsɔ lɩɩ nambagɩlɩŋ kʋ jʋʋ. 31Ʋ ma bɩra ŋaa kʋdiile-la ʋ nyɩmma sɩ cho a kaa jʋʋ dɩ ʋ pɩ ʋ nyɩmma, aŋ bʋl, “Mɩ nyɩmma, sii hɔŋ a dii ŋ kɩalɩŋ aŋ sʋl Wɩa pɩmɛ.”
32Ʋ nyɩmma Aɩzɩk pɩɛsʋ, “Ŋ nɛ kʋbɛɛ?”
Ɛsɔ bʋl, “Mɩ nɛ ŋ nanʋala, ŋ nanʋa-hɩaŋ Ɛsɔ.” 33Ŋɩɩ nɛ Aɩzɩk faasa chel woruŋ aŋ pɩɛsɛ, “Kʋbɛɛ nɛ fa laa sɩpaaŋ kɛŋ baga nammɩa kʋ pɩmɛ ŋɩɩ? Mɩ dii kʋdiile-la nɛ, aŋ sʋl Wɩa pʋ, ka ŋ-na kʋ jʋʋ ŋɩɩ. Tɛŋɛ, Wɩa jaŋ pɛ nɩɩ-la lɛ.”
34Ɛsɔ sɩ nɩɩ wɩɩ-la ʋ nyɩmma sɩ bʋla, ʋ chiesi a yel woruŋ, aŋ bʋla pɩ ʋ nyɩmma, “Sʋl Wɩa pɩmɛ ma, mɩ nyɩmma.”
35Ŋɩɩ nɛ ʋ bʋl, “Ŋ ŋaana kʋ nyɩsɛmɛ a laa ŋ Wɩɩsʋlʋŋ kala nɛ.” 36Ɛsɔ bʋl, “Ʋ yɩrɩŋ sɛnɛ magɛ dɩ ʋ dii Jekɔb. Bʋlɩa nɛ ŋ-la ʋ sɩ gʋrɩmɛ, ʋ laa sɩpaaŋ laa mɩ hɩɛsɩŋ aŋ bɩra laa mɩ Wɩɩsʋlʋŋ ma ŋ teeŋ.” Ŋɩɩ nɛ Ɛsɔ bɩra pɩɛsɛ, “Wɩɩsʋlɩɩ kala bɩra tuo, ŋ sɩ jaŋ sʋla pɩmɛ maa?”
37Ŋɩɩ nɛ Aɩzɩk bʋla pɩ Ɛsɔ, “Mɩ leŋe ʋ nɛ ŋaa kʋhɩaŋ ŋ lɛ, dɩ ʋ naambiiriŋ kala ŋaa ʋ tɩntɩnnaa, dɩ ʋ kɛŋ kʋdiilee arɩ tɩɩnɛnɛɛ sɩnɩŋ kala doluŋ. Mɩ bii, bɛɛ kʋŋ nɛ mɩ saa jaŋ bɩra wuo ŋaa pɩŋ?”
38Ŋɩɩ nɛ Ɛsɔ pɩɛsɛ ʋ nyɩmma, “Wɩɩ-sʋl-bala dʋndʋŋ nɛ ŋ kɛŋ? Mɩ nyɩmma, sʋl Wɩa pɩmɛ ma.” Ŋɩɩ nɛ ʋ faasa yel.
39Ʋ nyɩmma Aɩzɩk bʋla pʋ,
“Lee-la ŋ sɩ jaŋ hɔŋ, ʋ tinteeŋ bɩ jaŋ zɔŋ,
wɩa-nyuŋ fɩɛlɩŋ ma bɩ jaŋ yiŋ.
40Ŋ jaŋ yuyuo laalɩŋ bʋa na-kala lɛ
aŋ tɩma pɩpɩ ŋ naambie.
Dɩ ʋ nɛ kʋ magɛ ŋɩɩ,
ŋ jaŋ lɔl aŋ laa ŋ tɩtɩa ŋ naambie teeŋ.”
Jekɔb fá mʋ Labaŋ teeŋ
41Ɛsɔ kɛŋ tʋɔŋ arɩ Jekɔb a tɩŋ Wɩɩsʋlɩɩ-la ʋ nyɩmma sɩ sʋla pʋ wɩaa a bʋl ʋ tʋɔŋ lɛ, “Ʋ ka mʋa ka dɩ mɩ nyɩmma yoho yi, dɩ ʋ nɛ dɛrɛ, mɩ jaŋ kpʋ mɩ ŋaana Jekɔb.”
42Rɩbɛka sɩ nɩɩ Ɛsɔ ʋ bii-hɩaŋ sɩ bʋl wɩaa deemba, ʋ tɩma yɩrɛ ʋ nanʋa-bie Jekɔb a bʋla pʋ, “Ɛsɔ kɛŋ ʋ tʋɔŋ dɩ ʋ kpʋŋ nɛ dɩ ʋ baanɩŋ fɩɛlɛ. 43Ŋɩɩ wɩaa mɩ bii, nɩɩ mɩ teeŋ, sii a fá mʋ mɩ dɩbaala Labaŋ sɩ hɛ Haraŋ tinteeŋ teeŋ 44a hɔŋ nɩmɛ dɩ ŋ naambie Ɛsɔ baanɩŋ fɩɛlɛ. 45Dɩ ŋ naambie baanɩŋ nɛ fɩɛla dɩ ʋ yʋ wɩɩ-la ŋ sɩ ŋaa ʋ lɛ, mɩ jaŋ tɩma yɩrɩŋ dɩ ŋ lɩɩ lee-la kɔ. Bɛɛ nɛ jaŋ tɩɩ dɩ ma kala balɩa lɛl mɩ nɩsɩŋ lɛ tapʋl-bala?”
46Ŋɩɩ nɛ Rɩbɛka bʋla pɩ Aɩzɩk, “Mɩ mɩɩsɩŋ fɩɩ Hiti tɩŋŋaa toloo deemba Ɛsɔ sɩ jaa wʋŋaalaa lɛ nɛ. Dɩ Jekɔb nɛ jaa Hiti toloo doho sɩ hɛ la tinteeŋ deeŋ lɛ, dɩ ba nagɛ haalaa deemba, mɩ mɩɩsɩŋ bɩ bʋbʋɔ kɛnɛ.”
Currently Selected:
WƖAA DƖ-SUOMUŊ 27: SIS
Highlight
Share
Copy
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
