Tɩntɩŋŋaa 6

Nɩaa balɩpɛ kʋ pɛ Yesu nanzɔɔba-la lɛ

1Bʋa-la lɛ Yesu harɩ-tooro-la kʋ pʋŋa yʋgɛ. Ŋɩɩ nɛ ba tʋɔŋ Giriik tɩŋŋaa suomo nyɩnyaŋ Hiburu tɩŋŋaa. Ba bʋla arɩ ba sɩ yie joŋ moribie-la a pɩpɩ yo-haalaa tapʋlɩɩ kala, ba yie bee kikieli ba-na yo-haalaa nɛ. 2Ŋɩɩ nɛ Yesu harɩ-tooro-la fii arɩ balɩa yɩrɛ nɩalɩŋ kala sɩ laa Yesu wɩaa dii a hilimi, a bʋla pɩba, “Ʋ bɩ maga dɩ la bibeŋ moribiee wɩaa aŋ ka Wɩa wɩaa ta. 3Mɩ naambiiriŋ, má lɩɩsɛ ma tʋɔŋ nɩaa balɩpɛ ma sɩ jɩma dɩ nɩaa ka zilba, ka Wɩa Dɩŋ-zɔmʋŋ hɛ ba lɛ aŋ kɛŋ wʋjɩmɩŋ ma, dɩ la joŋ wɩɩŋ deeŋ hɛ ba nɩsɩŋ lɛ. 4Ka dɩ la-na joŋ la nyuŋ kala hɛ aa chʋɔlɛ Wɩa aŋ pɛ bʋbʋl Wɩa niiŋ wɩaa.” 5Ŋɩɩ nɛ nɩalɩŋ kala sɩ hɛ nɩmɛ tʋɔŋ tɔrɛ arɩ wɩalɩŋ Yesu harɩ-tooro-la sɩ bʋla. Ba lɩɩsɛ baal kʋbala baa yɩrɛ Sɩtɩɩvɩŋ. Ʋ fa ŋaa baal-la sɩ laa Wɩa dii nɛ woruŋ. Wɩa Dɩŋ-zɔmʋŋ ma hɛ ʋ lɛ. Ba bɩra lɩɩsɛ Fɩlɩp arɩ Pʋrɔkɔrʋs arɩ Nɩkanɔ arɩ Tɩmɔŋ arɩ Paamɩnas arɩ Nɩkɔlas. Nɩkɔlas lɩɩ Antɩɔk nɛ. Ʋ fa bɩ Juu tɩɩna ŋaa aŋ tuto Juu tɩŋŋaa Wɩɩchʋɔlɛ wombiiŋ. 6Ŋɩɩ nɛ ba kɛŋ nɩalɩŋ balɩpɛ-la ba sɩ lɩɩsa a kaa mʋ Yesu nanzɔɔba-la sɩpaaŋ. Ba chʋɔlɛ Wɩa pɩba aŋ joŋ ba nɩsaa daŋ ba lɛ.

Ba kɛŋ Sɩtɩɩvɩŋ

7Wɩa niiŋ wɩaa ha gaara su lee-la kala. Nɩalɩŋ sɩ laa Yesu wɩaa dii pʋŋ woruŋ Jerusalɛm lɛ. Nɩalɩŋ ma sɩ ŋaa Wɩɩsʋllɩ sɩpaalaaraa yʋga a ma sɛɩ Wɩa niiŋ wɩalɩŋ.

8Wɩa lahɔrɩmɔ lɛ Sɩtɩɩvɩŋ kɛŋ doluŋ woruŋ, a wuo ŋɩŋaa wʋkpuŋkperisiŋ arɩ wʋmagɩlaa nɩalɩŋ tʋɔŋ. 9Nɩaa dɔnsʋŋ fa hɛ nɩmɛ, a ŋaa Juu tɩŋŋaa a lɩɩ Siriini, arɩ Alɛkɩzandɩrɩa. Ba fa lɩɩ Wɩɩchʋɔlɛ dɩa-la ba fa sɩɩ yɩrɛ ‘yosuŋ ba sɩ joŋo ta’. Dɔnsʋŋ ma fa ŋaa Juu tɩŋŋaa a ma lɩɩ Siliisia arɩ Esia. Ba lɩɩ Sɩtɩɩvɩŋ harɩŋ a kɛŋ wɩaa lɩlɛrɛ. 10Ama Wɩa Dɩŋ-zɔmʋŋ fa pɩ Sɩtɩɩvɩŋ wʋjɩmɩŋ nɛ woruŋ nɩalɩŋ bɩ ʋ wuo pagɩsɛ. 11Ŋɩɩ nɛ ba lʋara hɛ nɩaa, ba bʋl, “La nɩa dɩ ʋʋ chei Mosis arɩ Wɩa yɩrɩŋ nɛ.” 12Ba bʋl ŋɩɩ a nyɩsɛ nɩalɩŋ arɩ nɩhɩasɩ-la arɩ Wɩa teniŋ kerichiba hɛ. Ba baanɩŋ sii Sɩtɩɩvɩŋ nyuŋ. Ba kɛnʋ kaa mʋ nɩhɩasɩ-la sɩ yie hilime vʋvʋʋrɛ wɩaa teeŋ. 13Ba kɛŋ nɩaa kaa kɔ dɩ ba kʋ nyɩɛ wɩaa pʋ a bʋl, “Baala deeŋ yie vɛnɛɛ bʋl wɩaa aa chei Wɩa dɩɩ-bal-la ba sɩ joŋo hɛ Wɩa nɩsɩŋ lɛ, arɩ wɩalɩŋ Mosis sɩ ŋmʋnsa bil dɩ la tuto nɛ. 14La nɩa dɩ ʋ sɩ dɩ Yesu deeŋ sɩ lɩɩ Nazarɛt jaŋ yigi Wɩa dɩa-la lo, aŋ kɛŋ wɩalɩŋ Mosis fa sɩ dagɛ la naabalɩmaba dɩ ba tuto a kaa bɩrɩmɛ.” 15Nɩalɩŋ kala fa sɩ hilimi lee-la chaarɛ sɩaa a pɛ Sɩtɩɩvɩŋ lɛ. Ba na dɩ ʋ sɩaa nagɛ Wɩa tɩndaara sɩaa.

Currently Selected:

Tɩntɩŋŋaa 6: SIS

Highlight

Copy