Tɩntɩŋŋaa 5

Ananɩas arɩ Safɩɩra

1Ba tʋɔŋ baal kʋbala ma nɛ fa hɛ nɩmɛ, baa yɩrɛ Ananɩas. Ʋ haala ma yɩrɩŋ nɛ fa Safɩɩra. Ʋ ma joŋ ʋ dʋa a yallɛ 2a lɩɩsɛ moribie-la dɔnsʋŋ faa, ʋ haala jɩŋ, aŋ kɛŋ kʋkaana-la kaa mʋ Yesu nanzɔɔba-la teeŋ.

3Pɩɩta pɩɛsʋ, “Ananɩas, bɛɛ nɛ tɩɩ ŋ leŋ Sɩtaanɩ nyɩsɩŋ, ŋ joŋ tintee-la ŋ sɩ yalla moribie-la dɔnsʋŋ faa, aŋ nyɩɛ wɩaa pɩ Wɩa Dɩŋ-zɔmʋŋ? 4Ka ŋ-na joŋ kʋ-la yallɛ, ŋ dee bɩ ʋ tɩɩ? Moribie-la maa ŋ sɩ yalla, ŋ dee bɩba tɩɩ? Bɛɛ nɛ saa tɩɩ ŋ bɩɩnɛ ŋ tʋɔŋ lɛ aŋ ŋaa wɩɩŋ deeŋ? Nuhuobiinee dʋndʋŋa dee ŋ nyɩɛ wɩaa pa, ŋ nyɩɛ wɩaa pɩ Wɩa ma nɛ.” 5Ananɩas sɩ nɩɩ wɩɩŋ deeŋ, ʋ tele sʋʋ. Fawʋllʋŋ chaasa kɛŋ nɩalɩŋ ma kala sɩ nɩɩ wɩɩ-la sɩ ŋaa. 6Ŋɩɩ nɛ bapʋɔsaa kʋ joŋ gɛrɩŋ bɛʋ a joŋu kaa lɩɩ a kaa mʋ hugi.

7Ʋ yi hawa batori dɩ ʋ haala kʋ jʋʋ. Ʋ fa bɩ jɩŋ wɩɩ-la kala sɩ ŋaa. 8Pɩɩta pɩɛsʋ ma, “Moribie-la ŋ bala sɩ kaa kɔ, magɛ ŋɩɩ nɛ ma joŋ ma tintee-la yallɛɛ?” Ŋɩɩ nɛ haal-la bʋl, “Ba niiŋ nɛ ŋɩɩ.”

9Ŋɩɩ nɛ Pɩɩta bɩra pɩɛsʋ, “Bɛɛ nɛ tɩɩ ŋ dɩ ŋ bala vʋʋrɛ dɩ ma magɩsɛ Wɩa Dɩŋ-zɔmʋŋ? Bee na, nɩalɩŋ sɩ joŋ ŋ bala mʋ hugi, ba nɛ chɩŋ boiŋ niiŋ ŋɩɩ. Ba saa jaŋ joŋuŋ ma lɩɩ.”

10Ʋ ma guu tel ʋ sɩpaaŋ a sʋʋ. Bapʋɔsɩa-la sɩ joŋ ʋ bala kaa mʋ hugi, ba kʋ jʋʋ dɩ ʋ sʋba. Ŋɩɩ nɛ ba joŋu kaa lɩɩ, a hugu kpɛrɛ ʋ bala. 11Nɩalɩŋ kala sɩ laa Yesu wɩaa dii aa hilimi arɩ nɩalɩŋ dɔnsʋŋ ma sɩ nɩɩ wɩɩ-la, fawʋllʋŋ kɛmba woruŋ.

Wʋkpuŋkperisiŋ arɩ wʋmagɩlaa

12Yesu nanzɔɔba-la ŋaa wʋmagɩlaa arɩ wʋkpuŋkperisiŋ yʋgɛ nɩaa tʋɔŋ. Nɩalɩŋ kala sɩ laa Yesu wɩaa dii, ba kala yie hihilimi zawʋra-la ba sɩ kaa yɩrɛ Solomoŋ zawʋra lɛ. 13Nʋʋkala sɩ bɩ Yesu wɩaa laa dii bɩ nyuduoŋ kɛnɛ dɩ ʋ guoli ba tʋɔŋ, arɩ nɩaa sɩɩ bɛsɛ ba lɛ ma kala. 14Nɩalɩŋ sɩ laa Yesu wɩaa dii a kʋ pɛ nɩalɩŋ lɛ, ba kɩɩ nɩalɩŋ kala Wɩa fa sɩ vɛnɛ kaa kʋʋ pɛ, baalaa arɩ haalaa. 15A tɩŋ wɩalɩŋ kala sɩɩ ŋaa wɩaa, ba paala paa puwuoloo kaa lɩɩ wombiiŋ niiŋ, a bilba godoba lɛ arɩ bɔsʋnʋŋ lɛ. Ba ŋaa ŋɩɩ dɩ Pɩɩta nɛ kʋʋ bal, dɩ ʋ daaliimiŋ wuo hɛ ba dɔnsʋŋ lɛ dɩ ba duori. 16Nɩaa ma yʋga a lɩɩ tabiisi-la sɩ kpagɛ Jerusalɛm, a kɛŋ puwuoloo arɩ nɩalɩŋ jɩŋ-bɔŋŋɔɔ sɩ kɛnɛ a kaa kɔ ʋ teeŋ, ba kala duori.

Ba to naasɩŋ dɔgɩsɛ Yesu nanzɔɔba

17Ŋɩɩ nɛ Wɩɩsʋllɩ sɩpaalaaraa kʋhɩaŋ arɩ ʋ harɩŋ nɩaa sii. Ʋ harɩŋ nɩalɩŋ kala hɛ Saduusi tɩŋŋaa paatɩɩ-la tʋɔŋ nɛ Jerusalɛm lɛ. Ba yaraa faasa bibieri. 18Ba kɛsɛ Yesu nanzɔɔba-la kaa mʋ tɔ dɩa, lee-la ba sɩɩ tɔ ba nɩaa. 19Ama tɩtaŋ-la tɩtɩa Wɩa tɩndaara kʋbala kʋ kɛŋ dɩa-la boiŋ-niiree suri, a leŋ Yesu nanzɔɔba-la lɩɩ. Ka ʋ bʋla pɩba, 20“Má mʋ jʋʋ chɩŋ Wɩa dɩɩ-bal-la lɛ a chaasa bʋl wombii-falɩŋ deeŋ wɩaa pɩ nɩaa.”

21Yesu nanzɔɔba-la sɛɩ. Sɩɩpʋʋraa ba jʋʋ Wɩa dɩɩ-bal-la a suomo dɩdagɛ nɩaa.

Ŋɩɩ nɛ Wɩɩsʋllɩ sɩpaalaaraa kʋhɩaŋ arɩ ʋ harɩŋ nɩaa kɔ, a yɩrɛ Juu tɩŋŋaa kʋhɩasɩŋ arɩ nɩalɩŋ sɩ yie hilime vʋvʋʋrɛ wɩaa, ba kala kʋ hilimi aŋ tɩŋ dɩ ba mʋ dɩa-la lɛ ba sɩ tɔ Yesu nanzɔɔba-la a chaarɛba kaa kɔ. 22Tɩntɩnnɩ hɩasɩ-la sɩ mʋa, ba bɩ ba na nɩtɔɔrɩ dɩa-la lɛ. Ba mɩɩra kʋ bʋl, 23“La sɩ mʋ dɩa-la lɛ ba sɩ tɔba, la na dɩ ba yaga, nʋʋkala bɩ suro, ka nɩalɩŋ sɩɩ beŋ dɩa-la, ba ma chɩŋ boiŋ niiŋ. Ama la mʋ suri, la bɩ Yesu nanzɔɔba-la na.” 24Nɩalɩŋ sɩɩ pɔ Wɩa dɩɩ-bal-la nɩhɩaŋ arɩ Wɩɩsʋllɩ sɩpaalaaraa kʋhɩasɩŋ sɩ nɩɩ wɩɩŋ deeŋ, ʋ kperiba kɩŋkɛŋ, ba bɩ jɩŋ wɩɩ-la kala ba sɩ jaŋ ŋaa.

25Ŋɩɩ nɛ baal kʋbala kʋ jʋʋ a bʋla pɩba, “Má bee na, nɩalɩŋ ma sɩ kaa tɔ dɩa, ba nɛ chɩŋ Wɩa dɩɩ-balɩŋ tʋɔŋ a dɩdagɛ nɩaa.” 26Ŋɩɩ nɛ nɩalɩŋ sɩɩ pɔ Wɩa dɩɩ-bal-la nɩhɩaŋ arɩ ʋ nɩaa mʋ kɛsɛ Yesu nanzɔɔba-la kaa kɔ. Ba bɩ ba fʋga, bɛɛ wɩaa fawʋllʋŋ fa kɛmba nɛ arɩ nɩalɩŋ fa sɩ hɛ Wɩa dɩɩ-bal-la tʋɔŋ jaŋ paa tabɩaa yagɛba.

27Ba kɛŋ Yesu nanzɔɔba-la kʋ jʋʋ, a leŋ ba chɩŋ nɩalɩŋ sɩ yie hilime vʋvʋʋrɛ wɩaa sɩpaaŋ. Ŋɩɩ nɛ Wɩɩsʋllɩ sɩpaalaaraa kʋhɩaŋ bʋla pɩba, 28“La bʋla pɩma arɩ sɩɩfɩɛsɩŋ: Má bɩra sɩ́ wɩɩkala dagʋ Yesu yɩrɩŋ lɛ. Ama ma bee na, ma kɛŋ wɩɩ-la kaa gaara cheŋ Jerusalɛm kala aa chɛ ma joŋ cheeriŋ pɩla a tɩŋ baala deeŋ sʋʋŋ wɩaa.”

29Pɩɩta arɩ Yesu nanzɔɔba-la dɔnsʋŋ mɩɩra bʋla pɩba, “Ʋ maga dɩ la to Wɩa niiŋ nɛ a kɩɩ nuhuobiine niiŋ. 30La naabalɩmaba faa to Wɩa nɛ, ʋ nɛ chɩsɛ Yesu sʋʋŋ lɛ, nɩɩ-la ma fa sɩ kaa kpaasɛ daagɛsɛ nyuŋ ʋ sʋʋ. 31Wɩa chɩsʋ ʋ sii jɩla hɔŋ Wɩa nadiiŋ, nɩduoŋ dɩhɔnʋŋ, dɩ ʋ ŋaa ba Sɩpaalaara arɩ ba Laataara, a leŋ dɩ Iziral tɩŋŋaa bɩrɩma lɩɩ ba wʋbɔŋŋɔɔ lɛ, ka dɩ ʋ joŋ ba wʋbɔŋŋɔɔ chɛba. 32La pɛ na wɩaa deemba nɛ. Wɩa Dɩŋ-zɔmʋŋ ma, Wɩa sɩ joŋo hɛ nɩalɩŋ sɩɩ to ʋ niiŋ ma ŋaa pɛ-naaraa.”

33Nɩalɩŋ sɩ nɩɩ wɩɩŋ deeŋ, ba faasa na baanɩŋ a chɩchɛ dɩ ba kpʋba. 34Farisii tɩɩna kʋbala ma nɛ fa hɛ nɩalɩŋ sɩ yie hilime vʋvʋʋrɛ wɩaa tʋɔŋ baa yɩrɛ Gamalɩɛl. Ʋ nɛ faa dagɛ wɩalɩŋ Mosis fa sɩ ŋmʋnsa bil dɩ nɩaa tuto. Nʋʋkala zizilu. Ʋ sii chɩŋ a bʋl dɩ ba leŋ dɩ Yesu nanzɔɔba-la lɩɩ dɩ-jalɩŋ mʋapɩlɩɩ. 35Ŋɩɩ nɛ ka ʋ bʋla pɩba, “Ma Iziral tɩmma, má fɩɛlɛ ma sɩaa arɩ wɩɩ-la ma sɩɩ bɩɩnɛ dɩ ma ŋaa nɩaa deemba lɛ. 36Bʋa kʋbala lɛ, baal kʋbala nɛ fa hɛ nɩmɛ, baa yɩrɛ Tuudas. Ʋ bʋla arɩ ʋ ŋaa nɩbal nɛ, nɩaa yi zɔɔ-banɛsɛ aa to ʋ harɩŋ. Ba kpʋʋ, ka ʋ harɩ-tooro-la kala pɩsɛ, ʋ yɩrɩ-la kala dɩsɛ. 37Ŋɩɩ harɩŋ lɛ nɛ, baal kʋbala ma lɩɩ, bʋa-la lɛ ba sɩɩ dɩɩsɛ nɩaa, baa yɩrɛ Judas, a lɩɩ Galilii. Ʋ fa kɛsɛ nɩ-daŋ nɛ a kaa to ʋ harɩŋ, ba kpʋʋ ma, nɩ-daŋ-la ma sɩɩ to ʋ harɩŋ, ba ma pɩsɛ. 38Ka lɛɛlɛ wɩɩŋ deeŋ, mɩ jaŋ bʋla pɩma arɩ ma sɩ́ wɩɩkala ŋaa nɩaa deemba lɛ. Má lemba. Dɩ tɩntɩmɩŋ deeŋ lɩɩ nuhuobiine doluŋ lɛ nɛ, ʋ jaŋ lɛl. 39Ama dɩ Wɩa tɩntɩmɩɩ nɛ, ma bɩ jaŋ wuo cheyu. Dɩ ma nɩɩ chɛ dɩ ma cheyu, ma jaŋ na dɩ Wɩa nɛ ma paala yuyuo ŋɩɩ.”

40Ŋɩɩ nɛ ba jegile nɩɩ ʋ niiŋ. Ba yɩrɛ Yesu nanzɔɔba-la ba kʋ jʋʋ, a ŋaa ba vɩɩrɛba, aŋ bʋla pɩba dɩ ba bɩra sɩ́ wɩaa bʋl Yesu yɩrɩŋ lɛ, aŋ leŋ ba viiri. 41Ŋɩɩ nɛ ba lɩɩ nɩalɩŋ fa sɩ hilime teeŋ. Ba tʋɔŋ tɔrɛ arɩ ba sɩ dɔgɩsɛba a tɩŋ Yesu wɩaa. 42Tapʋlɩɩ-na kala ba yie jʋʋ Wɩa dɩɩ-bal-la a pɛɛ mʋ nɩaa dɩɩsɩŋ, a ha bʋbʋl Wɩa wʋzɔmɔ-la a mʋ tɩgɛ Yesu Kirisito lɛ.

Currently Selected:

Tɩntɩŋŋaa 5: SIS

Highlight

Copy