Tɩntɩŋŋaa 3

Ba vaarɛ gbɛrɩgɛ

1Tapʋlɩɩ kʋbala Pɩɩta arɩ Jɔɔŋ sii a mʋmʋ Wɩa dɩɩ-bal-la. Ba mʋ nɩmɛ kerifi batori wɩɩhɛyɛ, bʋa-la lɛ ba sɩ yie chʋɔlɛ Wɩa. 2Dɩ baal kʋbala hɛ nɩmɛ, ʋ naaŋ lʋlʋ dɩ ʋ gbɛrɩgɛ nɛ. Ba yie chʋŋʋ tapʋlɩɩ-na kala a kaa mʋ Wɩa dɩɩ-bal-la boiŋ niiŋ kʋbala baa yɩrɛ Boi-zɔmʋŋ. Ʋʋ sʋl kɩaa nɩalɩŋ sɩɩ jʋʋ Wɩa dɩɩ-bal-la teeŋ. 3Ʋ sɩ na Pɩɩta arɩ Jɔɔŋ dɩ ba kʋ jʋʋ Wɩa dɩɩ-bal-la, ʋ sʋl kɩaa ba teeŋ. 4Ba beŋ ʋ sɩaa lɛ fii, ka Pɩɩta bʋla pʋ, “Bibenla.” 5Ŋɩɩ nɛ ʋ bibemba aŋ gbɩgbɛrɛ kʋ-la ba sɩ jaŋ joŋo pʋ. 6Ŋɩɩ nɛ Pɩɩta bʋla pʋ, “Mɩ bɩ moribii kala kɛnɛ mɩ sɩ jaŋ joŋo pɩŋ, ama mɩ jaŋ joŋ kʋ-la mɩ sɩ kɛnɛ a pɩŋ. Yesu Kirisito sɩ lɩɩ Nazarɛt yɩrɩŋ lɛ, sii a vɛŋ.” 7Ʋ sɩ bʋl ŋɩɩ, ʋ kɛŋ ʋ nadiiŋ nɩsɩŋ lɛ a kɛnʋ chʋʋlɛ, ʋ sii. Ʋ naasɩŋ arɩ ʋ naachɩgɩsɩŋ kala guu polli. 8Ʋ sii fɩla chɩŋ ʋ naasɩŋ nyuŋ a suomo vɛŋ, ba jʋʋ Wɩa dɩɩ-bal-la. Ʋ vɛŋ aŋ pɛ fɩfɩl, a dɩdɛnnɛ Wɩa. 9Nɩalɩŋ kala sɩ naʋ dɩ ʋʋ vɛŋ aŋ dɩdɛnnɛ Wɩa, 10ba wuo jɩŋ arɩ ʋ nɛ nɩɩ-la fa sɩ yie hɔŋ Wɩa dɩa-la boiŋ niiŋ ba sɩɩ yɩrɛ Boi-zɔmʋŋ aa sʋl kɩaa. Ba hirigi. Wɩɩ-la sɩ ŋaa, ŋaaba wʋkpuŋkpere.

Pɩɩta bʋl Wɩa wɩaa Wɩa dɩɩ-balɩŋ tʋɔŋ

11Ŋɩɩ nɛ Pɩɩta arɩ Jɔɔŋ arɩ gbɛrɩgʋ-la jʋʋ zawʋra kʋbala baa yɩrɛ Solomoŋ zawʋra. Gbɛrɩgʋ-la kɛŋ Pɩɩta arɩ Jɔɔŋ nɩsaa lɛ, ʋ ŋaa nɩalɩŋ kala wʋkpuŋkpere, ba kire to ba harɩŋ. 12Pɩɩta sɩ na nɩalɩŋ dɩ baa ŋaa ŋɩɩ, ʋ bʋla pɩba, “Mɩ naambiiriŋ Iziral tɩmma, ɛɛ nɛ wɩɩŋ deeŋ ŋaa wʋkpuŋkpere ma teeŋ, ma paala faasa chaarɛ sɩaa a bibenla ŋ-la? Ma bɩɩna arɩ la tɩtɩa doluŋ lɛ nɛ koo la sɩɩ to Wɩa woruŋ nɛ wuo ŋaa baala deeŋ sii vɩvɛŋ? 13Wɩa-la sɩ ŋaa la naabalɩmaba Abɩraham arɩ Aɩzɩk arɩ Jekɔb Wɩa, ʋ nɛ joŋ yɩrɩ-balɩŋ a pɩ ʋ Bie Yesu. Ʋ nɛ ma kaa pa ba dii ʋ sarɩya, aŋ bʋl ma bɩ ʋ jɩŋ Paalɩt sarɩya diire-la sɩpaaŋ. Ʋ faa bɩɩnɛ dɩ ʋ joŋu ta, ka ma bɩ sɛyɛ. 14Ma vɩa tʋɔpʋl Tɩɩna sɩ bɩ disiniŋ kɛnɛ nɛ, aŋ sʋl dɩ ba joŋ nɩkpʋʋra ta, 15aŋ leŋ ba kpʋ nɩɩ-la sɩɩ pɩ nɩaa mɩɩsɩŋ. Ama Wɩa chɩsʋ sʋʋŋ lɛ nɛ. La ŋaa wɩɩŋ deeŋ pɛ-naaraa nɛ. 16Yesu yɩrɩŋ lɛ nɛ baala deeŋ ma sɩ na a jɩmʋ duori. La sɩ laa Yesu wɩaa dii nɛ wuo ŋaa baala deeŋ na yarɩfɩɛlaa woruŋ ma kala sɩɩŋ lɛ ŋɩɩ.

17Mɩ naambiiriŋ, mɩ jɩma ma dɩ ma kʋhɩasɩŋ sɩ kpʋ Yesu ŋɩɩ, ma bɩ jɩŋ tʋɔŋ lɛ nɛ. 18Wɩa leŋe ʋ Wɩa wʋlaabʋllaa bʋl faafaa kala arɩ Kirisito-la jaŋ na hɛɛŋ. Ʋ sɛnɛ kʋ ŋaa wʋtɩtɩɩ ŋ-la. 19Má bɩrɩma lɩɩ ma wʋbɔŋŋɔɔ lɛ aŋ to Wɩa, dɩ ʋ joŋ ma wʋbɔŋŋɔɔ chɛma, dɩ La Tɩɩna leŋ dɩ ma dɩnsɩŋ na wiese. 20Wɩa jaŋ leŋ dɩ Kirisito bɩra kʋ hɛ ma tʋɔŋ lɛ, nɩɩ-la ʋ sɩ lɩɩsa pɩma. 21Ʋ maga dɩ ʋ hɛ Wɩa-jaŋ lɛ, see bʋa-la yie, dɩ Wɩa leŋ dɩ wɩɩkala sɩ hɛ dʋnɩa lɛ bɩrɩmɛ wʋfalɩɩ. Wɩa leŋe ʋ wʋlaabʋllaa bʋl wɩɩŋ deeŋ faafaa kala nɛ. 22Mosis fa sɩ, ‘La Tɩɩna Wɩa jaŋ lɩɩsɛ nʋʋ ma tʋɔŋ a pɩma dɩ ʋ ŋaa ʋ wʋlaabʋllʋ a nagɛ mɩ-na Mosis. Ʋ maga dɩ ma jegile nɩɩ wɩɩ-la kala ʋ sɩ bʋla pɩma. 23Nɩɩ-la kala sɩ bɩ ʋ niiŋ to, Wɩa jaŋ leŋ dɩ ba lɩɩsʋ Wɩa nɩaa tʋɔŋ a ta dɩ ʋ sʋʋ.’

24Wɩa wʋlaabʋllaa kala, a chɩŋ Samʋɛl lɛ a mʋmʋ nɩalɩŋ kala sɩ to ʋ harɩŋ, ba kala fa bʋl wɩaa deemba ma sɩɩ na nɛ jɩnɩŋ. 25Wɩalɩŋ Wɩa fa sɩ to ʋ wʋlaabʋllaa lɛ a bʋla pɩ ma naabalɩmaba, ma ma pɛ ba lɛ nɛ. Ʋ fa bil niiŋ nɛ ʋ dɩ ma naabalɩma Abɩraham pɛgɛ:

‘Ŋ doho nɩaa lɛ nɛ mɩ jaŋ to

a pɛ dʋnɩa nɩaa kala lɛ.’

26Ŋɩɩ nɛ Wɩa lɩɩsɛ ʋ tɩntɩnna Yesu, dɩ ʋ laa sɩpaaŋ kɔ ma teeŋ a pɛ ma lɛ, dɩ ma kala bɩrɩma lɩɩ ma wʋbɔŋŋɔɔ ŋaanɩŋ lɛ.”

Currently Selected:

Tɩntɩŋŋaa 3: SIS

Highlight

Copy