Romafɔ 3
3
1Mʋmʋ labi mɔmʋ Yudafɔ bʋbʋ dʋn aha ánɩ́ bʋmegyi Yudafɔ? Ntɛ labi mɔmʋ ketetɩn bʋ? 2Ɩbʋ mʋ́tɔá labi amʋ ɩhɩɛ ɩtsɔ! Gyankpapʋ gyi, Bulu lɔpʋ mʋ ɩklʋnsʋ asʋn wa Yudafɔ ɩbɩtɔ. 3Ɩbʋ mʋ́tɔá amʋ́tɔ akʋ bʋmɔhɔ Bulu asʋn amʋsʋ gyi. Tamɛ amʋ́ tsiatɔ anfɩ odu ɩbɛ́talɩ ha Bulu obési tɔá ɔlɛhɩɛá ɔbɔ́bwɛ loo? 4Ɛkɛkɛɛkɛ! Megyi alɩ igyi! Nɩ afunupʋ aha fɛ́ɛ́ bʋgyi o a, Bulu mʋ́ a, ɔnɔkwalɩpʋ ogyi. Igyi fɛ alɩá Owie Dawid lɛbla Bulu ɔbɛɛ,
“Nɩ fɔtɔɩ a, aha bʋblɩ bɛɛ, fʋ asʋn igyi ɔnɔkwalɩ.
Nɩ begyi fʋ asʋn ɛ a, bʋblɩ bɛɛ, fʋ asʋn da ɔkpa.”
5Nɩ anɩ tsiatɔ lalahɛ lalɛ Bulu tsiatɔ wanklaan suna a, mʋmʋ nɩ ɔdɛ anɩ ɩsʋ bɩtɩ anɩ tsiatɔ lalahɛ sʋ a, nkalɩ abɛ́blɩ? Abɛ́blɩ anɩaa, Bulu má ɔkpa bɩtɩ anɩ ɩsʋ? (Nyankpʋsa asʋn blɩhɛ ndɛblɩ a.) 6Ɛkɛkɛɛkɛ! Ɩma mʋ́tɔ alɩ. Nɩ Bulu asʋn mɛda ɔkpa a, nkalɩ obégyi ɔyɩtɔ aha fɛ́ɛ́ asʋn?
7Ɔkʋ ɔbɛ́fɩtɛ ɔbɛɛ, nɩ mɩ ɔnɔkwalɩmáwa lalɛ suna ánɩ́ Bulu bʋ ɔnɔkwalɩ, ɩlatsu mʋ ɩda fʋa a, mʋmʋ ntɔ sʋ Bulu ɔbɛ́tra ha mɩ pɔn ɔbɛɛ, lalahɛ ɔbwɛpʋ ngyi? 8Nɩ igyi alɩ a, mʋmʋ ntɔ sʋ anɩmɛ́ɛblɩ anɩaa, “Mlɩha abwɛ lakpan, fówun Bulu tsiatɔ wanklaan ɩlɩn ɔwan?” Fɛ alɩ amʋʋ akʋ bʋdɛ mɩ ɔnɔ tɩn bɛɛ, nna ndɛblɩ amʋ. Bulu ɔbɛ́ha amʋ́ ɩpɔn alɩá ɩlɛkana.
Ɔhaa Megyi Yile Ɔbwɛpʋ
9Nkalɩ mɛɛ abɛ́blɩ pʋmɔ mʋ́ ɔnɔ? Mʋ́ sʋ anɩ Yudafɔ anɩdʋn aha amʋʋ bʋmegyi Yudafɔ amʋ loo? Ɛkɛkɛɛkɛ! Anɩmɔdʋn amʋ́ ɔkpagyiɔkpasʋ. Nablɩ bɔtsʋn mbɛɛ, ɩkʋlɛ Yudafɔ pʋ́ aha amʋʋ bʋmegyi Yudafɔ amʋ fɛ́ɛ́ bʋgyi. Tsufɛ lakpan lagyi amʋ́ fɛ́ɛ́sʋ. 10Bulu asʋn lɛblɩ ɔbɛɛ,
“Ɔhaa asʋn mɛda ɔkpa Bulu ansɩtɔ. Ɔbakʋlɛ kʋraa mɛdalɩ mʋ́tɔ.
11Ɔhaa tamanu Bulu asʋn asɩ,
ɔhaa tamadunka Bulu ɔkpa.
12Amʋ́ fɛ́ɛ́ badamli ɔma ha Bulu,
amʋ́ fɛ́ɛ́ bafwɩ.
Yile ɔbwɛpʋ ɔkʋkʋ má ɩnʋ.
Ɔbakʋlɛ kʋraa mɛdalɩ mʋ́tɔ.”
13Bulu asʋn amʋ lɛtra blɩ ɔbɛɛ,
“Bʋtekle asʋkpan blɩ.
Bʋtɔpʋ amʋ́ ɔnɔ mlɛ aha.
Amʋ́ ɔnɔtɔ asʋn blɩhɛ tɔmɔ fɛ ɩwɔ elin.”
14Bulu asʋn amʋ lɛtra blɩ ɔbɛɛ,
“Ɩlwɩɩ pʋ́ asʋn-sɩnsɩn blɩ bʋtegyi dɩ.”
15Ɔlɛtra blɩ ɔbɛɛ,
“Ahamɔ ma amʋ́ ɔpá.
16Ɔtɩnɛgyiɔtɩnɛá bʋna a, bʋdɛ aha yinta, bʋdɛ aha ipiantɔ wa.
17Bʋmeyin ɔkpa ánɩ́ ɩtɔpʋ iwilwii ba.”
18Bulu asʋn amʋ kʋ ɛ lɛblɩ ɔbɛɛ,
“Bʋtamanya Bulu ifu.”
19Sei a, anɩyin ánɩ́ asʋngyiasʋn ánɩ́ Mose Mbla amʋ losuna a, ɩda ha Yudafɔ amʋʋ bɔpʋ mbla amʋ ha amʋ. Mʋ́ sʋ ɔkʋkʋ méenya ɔkpa lɛ asʋansʋ ɔnɔ brɛá Bulu dɛ aha fɛ́ɛ́ asʋn gyi. 20Tsufɛ Mose Mbla amʋsʋgyi mɛ́ɛtalɩ ha ɔha ogyi asʋ Bulu ansɩtɔ. Ha mbla amʋ ɩtɛha anɩtɛbɩá lakpan abwɛpʋ anɩgyi.
Alɩá Ɔha Tegyi Asʋ Bulu Ansɩtɔ
21Sei a, Bulu lasuna ɔkpa ánɩ́ ɔtɔtsʋn mʋ́sʋ ha ɔha asʋ. Ɩmɛna Mose Mbla amʋsʋgyisʋ. Tamɛ Mose Mbla amʋ pʋ́ Bulu ɔnɔsʋ atɔɩpʋ amʋ asʋn wanlɩnhɛ lɛblɩ ɔkpa amʋ ɩwɩ asʋn yaɩ. 22Ɔkpa amʋ gyi ɔkpa ánɩ́ Bulu tɔtsʋn ha ɔha asʋ mʋ ansɩtɔ nɩ. Yesu Kristo hogyisʋ Bulu tɔtsʋn hɔ ɔhagyiɔha. Ma fʋgyi o, ma fʋmegyi o, nkʋnʋ fotsu o, nkʋnʋ fʋmotsu o, ɔhaa mɔtsʋn ɔtsan Bulu ansɩtɔ. 23Tsufɛ aha fɛ́ɛ́ babwɛ lakpan. Mʋ́ sʋ bahʋlɩ Bulu numnyam. 24Awɩtɔlɛ Bulu lawa ha anɩ. Mʋ́ sʋ nyankpʋsa obégyi asʋ mʋ ansɩtɔ nɩ. Awɩtɔlɛ anfɩ ɩna Kristo Yesusʋ. Mʋlɛka nyankpʋsa nwunsʋ ɩkɔ. 25-26Anyankpʋsa bʋdɛ lakpan bwɛ tsu brɛ ɔpá, tamɛ Bulu lenya klʋn ha amʋ́, ɔmɛbɩtɩ amʋ́ ɩsʋ. Sei a, Bulu labɔpʋ Yesu bɔ afɔdɩɛ, pʋ mʋ obugya lɛ anɩ ɩwɩ mbusuo, mɛnɩ abɔ́tsʋn mʋ hogyisʋ nya lakpansikie. Bulu lɔbwɛ mʋ́ alɩ pʋsuna ánɩ́ mʋ asʋn da ɔkpa, mɛnɩ ibósuna nkɛ anfɩtɔ ánɩ́ yile ɔbwɛpʋ ogyi. Ototsu aha ánɩ́ bɔhɔ Yesu gyi ánɩ́ amʋ́ asʋn da ɔkpa mʋ ansɩtɔ.
27Sei mɛ, tɔkʋ bʋ ɩnʋá abótsu ɩwɩ mʋ́sʋ? Tɔtɔ má ɩnʋ. Ntogyi sʋ anɩmɛ́ɛtalɩ tsu ɩwɩ? Mose Mbla amʋ sʋ loo? O-o! Anɩ hogyi sʋ anɩmɛ́ɛtalɩ tsu ɩwɩ. 28Megyi atɔ wanklaan amʋʋ Mose Mbla losuna anɩ bwɛ amʋ sʋ anɩtegyi asʋ Bulu ansɩtɔ. Ɩna Kristo hogyisʋ abégyi asʋ Bulu ansɩtɔ. 29Yudafɔ nkʋlɛ Bulu ogyi? Megyi aha ánɩ́ bʋmegyi Yudafɔ mʋ́ Bulu ogyi? Ee! Amʋ́ ɛ amʋ́ Bulu nɩ. 30Bulu ɔkʋlɛ pɛ bʋ ɩnʋ. Mʋ́ sʋ ɩna hogyisʋ olotsula ánɩ́ Yudafɔ asʋn da ɔkpa. Ɩna hogyi kɛnsʋ ɔlɔhɔ aha amʋʋ bʋmegyi Yudafɔ amʋ ɛ ánɩ́ amʋ́ asʋn da ɔkpa. 31Mʋ́ sʋ ilehian ánɩ́ abɔ́hɔ Yesu gyi, si Mose Mbla amʋsʋ hogyi loo? Ɛkɛkɛɛkɛ! Megyi alɩ igyi. Yesu hogyi tɛha anɩtɛkɩta mbla amʋtɔ kinkiinkin.
Currently Selected:
Romafɔ 3: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation
