Israelfɔ Ɩlʋ 49
49
Nyankpʋsa Onya Atɔ Alɩágyialɩá Oméetsia Nkpa Yɔ
Kora abi kanfʋ-ɩlʋ ha ɩlʋ osunapʋ.
1Mlɩ ɔmá fɛ́ɛ́, mlɩnu asʋn anfɩ!
Ɔyɩtɔ atsiapʋ fɛ́ɛ́, mlɩyaa asʋ.
2Nyebi-ahandɛ,
ɩwɩ anyapʋ pʋ́ ahianfɔ fɛ́ɛ́!
3Tsufɛ nɛba bɛblɩ nyansala,
mɩ nwuntɔ asʋn ɩbɛ́ha asʋn-asɩnu.
4Nɛ́yaa asʋ nu ayebi.
Nɔ́pʋ ɔsankuo lɛ ɔtɛ kutuklu asɩ.
5Nɩ nowie ɩkplantɔ,
mɩ amlɛpʋ bɛkafia mɩ a,
ntogyi sʋ nénya ifu?
6Ɩwɩ anyapʋ anfɩ bapʋ ansɩ dɩnka amʋ́ ɩnyasʋ,
bʋdɛpʋ amʋ́ atɔ tsɔtsɔɔtsɔ tsu ɩwɩ.
7Ɔhaa mɛ́ɛtalɩ ka lɛ mʋ pio.
Ɔhaa mɛ́ɛtalɩ ka Bulu ɩkɔ, pʋhɔ mʋ pio nkpa.
8Tsufɛ ɔha ka lɛ ibia mɛda asɩ.
Mátepi bwɛ mʋ́ ɩwɩ agywɩɩn,
9fɛɛ, ilehian ánɩ́ ɔha obétsia nkpa brɛ fɛ́ɛ́,
ɔmɔ́ɔyɔ fuli-ɔbɔtɔ ɛkɛkɛɛkɛ.
10Ɔhagyiɔha towun ánɩ́ anyansapʋ bʋtowu.
Aha mimlahɛ pʋ́ aha gyɩmɩhɛ ɛ bʋtowu,
si amʋ́ atɔ ha aha bamba.
11Ɩbʋ mʋ́tɔá bʋtɔpʋ amʋ́ ada dɩnka amʋ́ ɔsʋlʋsʋ,
tamɛ ntsantɔ gyi amʋ́ otsiakpa brɛ fɛ́ɛ́.
12Nyankpʋsa ɔhɩhɩɛ ɩwɩ alɩágyialɩá a, oméetsia nkpa yɔ.
Ogyi fɛ ɔbwɩ, ɔtɔkɔsɩ wu.
13Alɩ ɩtɛba ha aha mimlahɛ anfɩ,
pʋ́ aha ánɩ́ bʋtegyi amʋ́ asʋnsʋ nɩ. Ɩya.
14Bʋgyi fɛ akufa. Amʋ́ ɔyɔkpa gyi afulitɔ.
Lowu ɔbɔ́bwɛ amʋ́ ɔkpapʋ.
Aha ánɩ́ amʋ́ asʋn da ɔkpa bégyi amʋ́sʋ nyankɩ.
Amʋ́ ɔyʋlʋ bɔ́plɔ fɛ́ɛ́, ɩmɛ́ɛtra dɩ amʋ́ ɔsʋlʋsʋ.
Afulitɔ ɔbɔ́bwɛ amʋ́ woyi.
15Tamɛ mɩ mʋ́ a, Bulu ɔbɛ́ka lɛ mɩ afulitɔ,
tsufɛ ɔbɔ́hɔ mɩ. Ɩya.
16Nɩ ɔkʋ atonyahɛ imoni,
numnyam ɩba mʋ woyisʋ alɩágyialɩá a,
ɩmáhan fʋ.
17Tsufɛ nɩ owu a, omóotsu kʋkʋ natɩ.
Mʋ numnyam ɛ ɩmɛ́ɛkpa mʋ ya.
18Nɩ ɔtɛkɩá mʋbʋ ansigyitɔ ɔyɩ anfɩtɔ,
aha bʋtɛkanfʋ mʋ ánɩ́ oyin mʋ ɩwɩsʋ kɩ kʋraa a,
19obówu yɔ mʋ asɩtɔ.
Ɔmɛ́ɛtra wun wankɩ ɛkɛkɛɛkɛ.
20Nyankpʋsa ɔhɩhɩɛ ɩwɩ alɩágyialɩá a, oméetsia nkpa yɔ.
Ogyi fɛ ɔbwɩ, ɔtɔkɔsɩ wu.
Currently Selected:
Israelfɔ Ɩlʋ 49: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation
