Israelfɔ Ɩlʋ 48
48
Bulu Otsiakpa Sion
Kora abi kanfʋ-ɩlʋ.
1Nana Bulu lomoni.
Ɩlɛkana ánɩ́ bɛ́hɩɛ kanfʋ mʋ.
Bɛ́kanfʋ mʋ mʋ wulutɔ,
igyi wuluá ɩdɩn mʋ onuto ɩbʋ amʋsʋ.
2Sion ɩbʋ lɔfʋa, ɩhɩɛ bʋ akɩlɛ.
Ɩbʋ ɔyɩtɔ aha fɛ́ɛ́ ansigyi.
Sion ɩbʋ igyi Bulu otsiakpa.
Igyi owie otumipʋ kpɔnkpɔntɩ wulu.
3Bulu onuto bʋ awie amʋ woyitɔ.
Alalɛ ɩwɩ ɔwan ánɩ́ mʋgyi ɔtanʋkpa kinkin ha mʋ́.
4Kɩ, awie bɛtɩ aba fia,
kʋsʋ yɔ wulu anfɩ ɔkɔkpa.
5Tamɛ brɛá bowun mʋ́ a, opuni letsii amʋ́.
Begyigya, yinki srɩ.
6Bɛkpɩnkɩ kpakpakpakpa,
fɛ ɩkwɩɩ dɛ ɔtsɩ dwiin.
7Fɛ alɩá atsufu totsu owi ɔdalɩkpa bobwiebwie
Tarsisfɔ ɔpʋsʋ-ayɛn.
8Asʋn amʋʋ anɩlonu amʋ anɩlawun a.
Ɩsa Ɔnɔ Ɔlɩɩpʋ Nana Bulu wulu nɩ.
Anɩ Bulu amʋ wulu nɩ.
Ɔbɛ́ha ɩbɛ́lɩɩ kinkin brɛ fɛ́ɛ́. Ɩya.
9Oo Bulu, anɩdɛ fʋ ɔdwɛá ɩma ɔka ɩwɩ gywɩɩn
fʋ ɔtswɛkpa ɩnʋ.
10Oo Bulu, alɩ amʋʋ fʋ ɩda bʋ ɔtɩnɛgyiɔtɩnɛ amʋ a,
alɩ kɛn bʋtɛkanfʋ fʋ yɛtʋ ɔyɩ ɔka nɩ.
Yilebwɛ labʋla fʋ gyɔpɩ.
11Ha ansɩ igyi Sionbʋsʋ atsiapʋ,
ansɩ igyi Yuda awulu,
tsufɛ fʋtobua asʋn ɔnɔkwalɩsʋ.
12Mlɩnatɩ tsʋntsʋn Sion.
Mlɩki bomli mʋ́ fɛ́ɛ́,
amlɩkla mʋ́tɔ mbu fʋahɛ.
13Mlɩlɛ ansɩ kɩ mʋ́ abunti wanklaan.
Mlɩkɩ awie-woyi amʋ wanklaan.
Fówun mlɔ́pʋbla mlɩ abi-aná mlɩaa,
14“Alɩ Bulu gyi nɩ.
Mʋgyi anɩ Bulu brɛ fɛ́ɛ́.
Ɔbɛ́kpa anɩ yɛfʋn anɩ owukɛ.”
Currently Selected:
Israelfɔ Ɩlʋ 48: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation
