Israelfɔ Ɩlʋ 34
34
Kɩ Fʋ Ɔnɔ, Ɩmáwa Afunu
Dawid ɩlʋá ɔlɔwa brɛá ɔlɔbwɛ ɩwɩ gbede ɔlɔpʋ Abimelek wa, olegya mʋ.
1Nɛ́kanfʋ Nana Bulu brɛ fɛ́ɛ́.
Mʋ kanfʋ mɛ́ɛta mɩ ɔnɔ ɛkɛkɛɛkɛ.
2Mʋ mɩ ɔkla tɔpʋtsu ɩwɩ.
Ipian awunpʋ fɛ́ɛ́ bʋnu, abʋnya ansigyi.
3Mlɩtsa mɩ awa Nana Bulu numnyam.
Mlɩba abwɛ ɩkʋlɛ, atsu mʋ ɩda fʋa.
4Nosu kpoli Nana Bulu, ɔlɔsɔ mɩ ɔnɔ.
Ɔlɛlɛ mɩ tsu ifu kugyikʋtɔ.
5Aha ánɩ́ bʋtodunka mʋ ansɩtɔ tɛtɩn.
Pɛlɩ mɛ́ɛkɩta amʋ́ ɛkɛkɛɛkɛ.
6Ɔwʋlaba anfɩ losu kpoli mʋ, olonu mʋ ɔmɛ,
lɛ mʋ tsu mʋ ɩkplan fɛ́ɛ́tɔ.
7Nana Bulu-ɔbɔpʋ togyo aha ánɩ́ bʋtenya mʋ ifu ɩwɩ,
lɛ amʋ́ lɛ ɩkplantɔ.
8Da mʋ ɔnɔ kɩ, afʋbɩ alɩá ɔbʋ ɔdwɛ.
Ansɩ igyi ɔha ánɩ́ ɔtɛtanʋ mʋ.
9Bulu aha, mlɩbu mʋ.
Tsufɛ tɔtɔɔtɔ tamahian aha ánɩ́ bʋtenya mʋ ifu.
10Ɩwɩ tɛklɩ gyata kʋraa, akʋn tɛkɩta mʋ.
Tamɛ itoyile kʋkʋ tamahian ɔha ánɩ́ otodunka Nana Bulu.
11Mɩ abi, mlɩba.
Mlɩyaa asʋ, mɩ ansuna mlɩ alɩá bʋtenya Nana Bulu ifu.
12Mlɩtɔ ma dɛ nkpa kle?
Ma nkpa tɩntɩn tsia tɛpɛ ansɩ,
odekleá obégyi ɔdwɛ mʋ nkpatɔ?
13Mʋmʋ kɩ fʋ ɔdandʋ, ɩmáblɩ asʋn lalahɛ.
Kɩ fʋ ɔnɔ, ɩmáwa afunu.
14Si lakpan bwɛ, afʋbwɛ tɔá ɩbʋ alɛ.
Dunka iwilwii, afʋgya mʋ́ ɔkpa.
15Nana Bulu ansɩ dɩn yile abwɛpʋsʋ,
otonu amʋ́ isu.
16Tamɛ ɔtɔkʋsʋ lɩɩ lalahɛ abwɛpʋsʋ.
Ɔbɔ́mɔ amʋ́ lɛ ɔsʋlʋsʋ.
Ɔhaa mɛ́ɛtra kaɩn amʋ́sʋ.
17Yile abwɛpʋ bosu kpoli Nana Bulu a, otonu.
Ɔtɛlɛ amʋ́ tsu amʋ́ ɩkplantɔ.
18Ɔma ɩfɔ aha ánɩ́ ɩlakpɔn amʋ́ wa.
Ɔtɔhɔ aha ánɩ́ ɔkla lasrɩ amʋ́.
19Yile ɔbwɛpʋ asʋn wunhɛ ɩtsɔ,
tamɛ Nana Bulu tɛlɛ mʋ lɛ mʋ́ fɛ́ɛ́tɔ.
20Ɔtɛkɩ mʋsʋ,
mʋ iwu kʋlɛ kʋraa tamabia.
21Lalahɛ ɔbɔ́mɔ lalahɛ ɔbwɛpʋ.
Bulu ɔbɛ́ha ɔha ánɩ́ otolu yile ɔbwɛpʋ ɩpɔn.
22Nana Bulu tɔhɔ mʋ aha nkpa.
Ɔtamaha aha ánɩ́ bʋtɛsrɩ tanʋ mʋ ɩpɔn.
Currently Selected:
Israelfɔ Ɩlʋ 34: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation
