Israelfɔ Ɩlʋ 33
33
Nana Bulu Asʋn Da Ɔkpa
1Yile abwɛpʋ, mlɩwa ɩlʋ ansigyisʋ ha Nana Bulu.
Ɩbʋ alɛá aha ánɩ́ amʋ́ asʋn ɩda ɔkpa bɛ́kanfʋ mʋ.
2Mlɩpʋ nsankuo kanfʋ mʋ.
Mlɩda ɩfɛ idu ɔsankuo,
amlɩwa ɩlʋ dɛdɛ ha mʋ.
3Mlɩwa ɩlʋ pɔpwɛ ha mʋ.
Mlɩda ɔsankuo amʋ wanklaan,
amlɩkplʋn ansigyisʋ ha mʋ.
4Tsufɛ Nana Bulu asʋn da ɔkpa.
Mʋ bwɛhɛ fɛ́ɛ́ igyi ɔnɔkwalɩ.
5Otekle yilebwɛ pʋ́ asʋngyi ɔnɔkwalɩsʋ.
Mʋ ɔdwɛá ɩma ɔka labʋla ɔyɩ.
6Mʋ asʋn blɩhɛ ɔlɔpʋbwɛ ɔsʋsʋ,
Ɔnɔ kɛkɛ ɔlɛlɛ, ntsrakpabi fɛ́ɛ́ bɛdalɩ.
7Ɔlɛkpla ntsu fɛ́ɛ́ wa tsukʋlɛ bwɛ ɔpʋ.
Oletin mʋ́ wa tsukʋlɛ ha mʋ ɩwɩ.
8Ɔsʋlʋsʋ atsiapʋ fɛ́ɛ́, bʋnya Nana Bulu ifu.
Ɔyɩtɔ atsiapʋ fɛ́ɛ́, bʋbu mʋ.
9Tsufɛ ɔlɛblɩ, ɩlɛba mʋ́tɔ.
Ɔlɛlɛ ɔnɔ, ɩlɛlɩɩ kinkiinkin.
10Nana Bulu tɛha ɔmá-ɔmá asʋn tesin amʋ́ ɔnɔ,
oteyinta amʋ́ nhɩhɩɛtɔ.
11Nana Bulu asʋn mʋ́ ɩda brɛ fɛ́ɛ́.
Mʋ nhɩhɩɛ ɛ bʋ ɩnʋ yɛtʋ ɔha abi-aná fɛ́ɛ́.
12Ansɩ igyi ɔmá oduá Nana Bulu gyi amʋ́ Bulu.
Aha ánɩ́ ɔlɛlɛ pʋ́ amʋ́ bwɛ mʋ ogyikpa.
13Otowun atɔ tsu ɔsʋsʋ kein,
ɔdɛ anyankpʋsa fɛ́ɛ́ wun.
14Otsie mʋ obiasʋ ɔsʋsʋ,
ɔdɛ ɔsʋlʋsʋ atsiapʋ fɛ́ɛ́ wun.
15Mʋlɔbwɛ okugyiɔkʋ ɩklʋn.
Mʋ́ sʋ otonu amʋ́ bwɛhɛ asɩ.
16Megyi ɩsa akɔpʋ ɔdʋdʋɔ tɛha owie tegyi ɩsʋ.
Megyi ɩsa ɔkɔpʋ onuto ɔwʋnlɩn tɛha mʋ ɔtɔyɔ ɩsa ba.
17Ɔpɔnkɔ megyi tɔtɔ ɩsa ɔkɔkɛ.
Mʋ ɔwʋnlɩn kpɔnkpɔntɩ amʋ ɩmɛ́ɛtalɩ hɔ ɩsa ɔkɔpʋ nkpa.
18Kɩ, Nana Bulu ansɩ dɩn aha ánɩ́ bʋtobu mʋsʋ.
Amʋ́gyi aha ánɩ́ amʋ́ ansɩ dɩn mʋ ɔdwɛá ɩma ɔkasʋ.
19Ɔbɛ́lɛ amʋ́ tsu lowutɔ,
hɔ amʋ́ nkpa akʋnbɩ.
20Anɩdɛ Nana Bulu ɔkpa kɩ.
Mʋgyi anɩ bʋalɛ ogyipʋ pʋ́ anɩ ɩwɩ ɩban.
21Mʋ sʋ ansɩ dɛ anɩ gyi,
anɩ ansɩ dɩn mʋ ɩda wankɩhɛ amʋsʋ.
22Nana Bulu, ha fʋ ɔdwɛá ɩma ɔka ibuo anɩ,
fɛ alɩá anɩ ansɩ dɩn fʋsʋ.
Currently Selected:
Israelfɔ Ɩlʋ 33: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation
