Israelfɔ Ɩlʋ 145
145
Nana Bulu Tegyi Mʋ Asʋn Fɛ́ɛ́sʋ
Dawid kanfʋ-ɩlʋ.
1Mɩ Bulu pʋ́ mɩ Wie, nótsu fʋ fʋa,
kanfʋ fʋ ɩda brɛ fɛ́ɛ́.
2Nɛ́kanfʋ fʋ ekekegyiɛkɛ,
wa fʋ ɩda numnyam brɛ fɛ́ɛ́.
3Nana Bulu, fomoni,
ɩkanfʋ letsia fʋ.
Ɔhaa mɛ́ɛtalɩ bɩ alɩá fomoni.
4Otuntufla kugyikʋ bɛ́lɛ fʋ gyumagyihɛ bla amʋ́ abi-aná.
Bɛ́lɛ fʋ gyumagyihɛ akpɔnkpɔntɩ ɔwan.
5Nétsia gywɩɩn fʋ numnyam kpɔnkpɔntɩ
pʋ́ fʋ ofula akpɔnkpɔntɩ ɩwɩ.
6Ɔhagyiɔha ɔbɛ́da fʋ ofula akpɔnkpɔntɩ ɔkan.
Mɩ ɛ nɛ́blɩ alɩá fɔkʋkʋ moni.
7Bɛ́lɛ fʋ awɩtɔlɛ tsɔtsɔɔtsɔ amʋ blɩ;
kplʋn wa ɩlʋ ansigyisʋ kanfʋ fʋ yilebwɛ.
8Awɩtɔlɛpʋ mʋ́a nwɛ owunpʋ Nana Bulu gyi.
Ɔtamakɔsɩ nya ɔblɔ, mʋ ɔdwɛá ɩma ɔka ɩhɩɛ tsɔ.
9Nana Bulu bʋ alɛ ha ɔhagyiɔha.
Mʋ nwewun ɩdɩn mʋ atɔ bwɛhɛ fɛ́ɛ́sʋ.
10Oo Nana Bulu, fʋ atɔ bwɛhɛ fɛ́ɛ́ bɛ́da fʋ ɩpan.
Aha ánɩ́ bʋtamakpa fʋ ɔma ɛ bɛ́kanfʋ fʋ.
11Bɛ́blɩ fʋ iwie ogyikpa numnyam
pʋ́ fʋ tumi ɩwɩ asʋn.
12Ɩbɛ́ha ɔhagyiɔha ɔbɛ́lɛ fʋ gyumagyihɛ akpɔnkpɔntɩ blɩ,
fʋ iwie ogyikpa numnyam pʋ́ obúá ɩbʋ mʋ́sʋ.
13Fʋ iwie ogyikpa bʋ ɩnʋ brɛ fɛ́ɛ́.
Abi-aná bɛ́ba bɔtʋ fʋ iwiegyi.
Nana Bulu tegyi mʋ asʋn fɛ́ɛ́sʋ
ɔbʋ awɩtɔlɛ mʋ gyumagyihɛ kugyikʋtɔ.
14Ɔtɔwa aha ánɩ́ bʋdɛdɩda ɔwʋnlɩn,
tswii aha ánɩ́ baklowa lɩɩ.
15Aha fɛ́ɛ́ bʋkɩ fʋ ansɩtɔá
fɛ́ha amʋ́ atogyihɛ mʋ́ brɛtɔ.
16Fʋtɛsankɩ ɩbɩtɔ ha akɩankpapʋ fɛ́ɛ́,
pʋ́ tɔá bʋdekle bʋla amʋ́.
17Nana Bulu bwɛhɛ fɛ́ɛ́ ɩda ɔkpa.
Ɔbʋ awɩtɔlɛ mʋ gyumagyihɛ kugyikʋtɔ.
18Ɔma ɩfɔ aha ánɩ́ bʋtokpoli mʋ wa,
aha ánɩ́ bʋtokpoli mʋ ɔnɔkwalɩsʋ.
19Ɔtɔbwɛ mʋ ifu anyapʋ atɔá bʋdekle ha amʋ́.
Otonu amʋ́ isu, hɔ amʋ́ nkpa.
20Nana Bulu tɛkɩ ɔhagyiɔha ánɩ́ ɔtɔdwɛ mʋsʋ,
tamɛ ɔbɔ́mɔ lalahɛ abwɛpʋ fɛ́ɛ́.
21Nóbwii ɔnɔ kanfʋ Nana Bulu.
Ɔhagyiɔha ɔbɛ́kanfʋ mʋ ɩda wankɩhɛ amʋ brɛ fɛ́ɛ́.
Currently Selected:
Israelfɔ Ɩlʋ 145: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation
