Israelfɔ Ɩlʋ 144
144
Bulu Tɛha Awie Ɩsʋgyi
Dawid ɩlʋ.
1Bʋkanfʋ Nana Bulu, mʋgyi mɩ bʋta.
Mʋtosuna mɩ ɩsa kɔ.
2Mʋgyi mɩ ɔdwɛá ɩma ɔka pʋ́ mɩ oŋainkpa kpikpli,
mɩ okpikplikpa pʋ́ mɩ ɔlɛpʋ.
Mʋgyi mɩ ɩban ánɩ́ nteŋain mʋtɔ,
ɔtɛba ɔmá-ɔmá asɩ wa mɩ asɩ.
3Oo Nana Bulu, ntɔ ɔha gyi, mʋ asʋn tehian fʋ alɩ?
Ntɛ ntɔ nyankpʋsa gyi, sʋ fʋtɔgywɩɩn mʋ ɩwɩ alɩ?
4Nyankpʋsa gyi fɛ afu,
mʋ nkpa igyi fɛ yiyiá ɩdɛka tsʋn.
5Oo Nana Bulu, nɛ fʋ ɔsʋsʋ ba ayasɩ, afʋkplɩ ba.
Pʋ ɩbɩ da abʋ, ogyasi ɩdalɩ tsu mʋ́tɔ.
6Ha nsaɩntɔ ɩkpa ogya, fʋ alupʋ abʋdasaɩn.
Tswɩ fʋ mbɩn wɔ amʋ́, abʋgyigya.
7Tswɩ ɩbɩ tsu ɔsʋsʋ,
bɩtɩa mɩ lɛ ntsu kluklutɔ,
afʋhɔ mɩ lɛ afɔɔ ɩbɩ.
8Amʋ́ ɔnɔ tamablɩ ɔnɔkwalɩ.
Bɛka ntam, bʋtamagyi mʋ́sʋ.
9Oo Bulu, nɔ́wa ɩlʋ pɔpwɛ ha fʋ,
da ɩfɛ idu ɔsankuo kanfʋ fʋ.
10Fʋtɛha awie bʋtegyi ɩsʋ,
fʋtɛlɛ fʋ osumbi Dawid ɔdayi ɔnɔ.
11Lɛ mɩ, afʋhɔ mɩ lɛ afɔɔ anfɩ,
amʋ́ ɔnɔ tamablɩ ɔnɔkwalɩ,
bɛka ntam, bʋtamagyi mʋ́sʋ anfɩ ɩbɩtɔ.
12Ha anɩ abi yinhɛ yasʋtɔ ɩbwɛ fɛ iyi danhɛá ɩbʋ alɛ.
Anɩ abi tsɩhɛ abʋwa akɩlɛ fɛ owie-woyi okonkisʋ-ɔkpabi.
13Atɔ-abi ɔtsantsan ɩbʋla anɩ ɩdan,
anɩ akufa mʋ́a akpala abʋklɛɩ yɛɛ,
bwɛ mpɩmdu-lafa anɩ mbwɩ ogyikpa.
14Anɩ nnantswie bʋklɛɩ yɛɛ.
Ɔmɛtsitsa mʋ́ ɩyɔ tsutsuutsu, ɔkʋkʋ mákina kwɩɩ.
Bʋmatra nu bubu anɩ abrɔnʋsʋ.
15Ansɩ igyi ɔmá ánɩ́ bénya oyula anfɩ odu.
Ansɩ igyi aha ánɩ́ Nana Bulu gyi amʋ́ Bulu.
Currently Selected:
Israelfɔ Ɩlʋ 144: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation
