Israelfɔ Ɩlʋ 143
143
Bulu, Fʋsʋ Mɩ Ansɩ Dɩn
Dawid kanfʋ-ɩlʋ.
1Oo Nana Bulu, nu mɩ kokoli.
Ɔnɔkwalɩpʋ fʋgyi. Mʋ́ sʋ yaa asʋ afʋnu mɩ ɩpabwii.
Fʋ yilebwɛ sʋ sɔ mɩ ɔnɔ.
2Fʋ osumbi ngyi, mágyi mɩ asʋn,
tsufɛ nyankpʋsa ɔkʋkʋ mégyi yile ɔbwɛpʋ fʋ ansɩtɔ.
3Tsufɛ mɩ olupʋ amʋ dɩn mɩsʋ,
alayia mɩ manta ɔsʋlʋtɔ.
Alaha ntsie okluntɔ, fɛ ɔha ánɩ́ olowu dodoodo.
4Ɩnɩ sʋ ɩlakpɔn mɩ ɔkla,
mɩ klʋn lakpawie mɩ ɩwɩtɔ.
5Nakaɩn bɩmbɩsʋ.
Nagywɩɩn fʋ bwɛhɛ fɛ́ɛ́,
pʋ́ fʋ ɩbɩ ɔnɔ gyumagyihɛ ɩwɩ.
6Natsu ɩbɩ fʋa sɩsɩ fʋ,
tsufɛ fʋ ɩwɩ ɔmɛwʋlɩ dɛ mɩ ɔkla,
fɛ ɔsʋlʋ dɛ ntsu dunka lɩlɩtɔ. Ɩya.
7Kokoli Nana Bulu, wa ɔsa sɔ mɩ ɔnɔ.
Tɔtɔ bwɛ ma mɩ ɩnʋ.
Mádamli ɔma ha mɩ,
nɩ megyi alɩ nɔ́bwɛ fɛ aha ánɩ́ bʋda afulitɔ.
8Ha mɩ anwun fʋ ɔdwɛá ɩma ɔka nyankɩgyinyankɩ,
tsufɛ fʋsʋ mɩ ansɩ dɩn.
Suna mɩ ɔtɩnɛá ntsʋn,
tsufɛ fʋ ɩbɩtɔ napʋ mɩ ɔkla wa.
9Oo Nana Bulu, kokoli lɛ mɩ mɩ alupʋ ɩbɩtɔ,
fʋ nasrɩ tanʋ.
10Fʋgyi mɩ Bulu,
suna mɩ fʋ ɔdwɛla.
Fʋ Ɔŋɛ wanklaan ɔkpa mɩ tsʋn ɔkpa tswiihɛsʋ.
11Oo Nana Bulu, fʋ ɩda sʋ laha mɩ nkpa.
Fʋ yilebwɛ sʋ lɛ mɩ tsu ɩkplantɔ.
12Fʋ ɔdwɛá ɩma ɔka sʋ lɛ mɩ alupʋ ɩnʋ,
afʋmɔ aha ánɩ́ bʋdɩn mɩsʋ,
tsufɛ fʋ osumbi ngyi.
Currently Selected:
Israelfɔ Ɩlʋ 143: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation
