Luka 6
6
Ɔkpʋnʋ Ɔdakɛ Mʋ Wie
(Mateo 12:1-8; Marko 2:23-28)
1Yesu mʋa mʋ akasɩpʋ bɔtsʋn ayo ndɔ kʋtɔ ɔkpʋnʋ ɔdakɛ. Akasɩpʋ amʋ bɔprʋn atɔ-abi amʋ kʋ, bɔpʋsa mʋ́ wɩ. 2Farisifɔ amʋ akʋ bɛfɩtɛ amʋ́ bɛɛ, “Ntogyi sʋ mlɩdɛ tɔá anɩ mbla mɛha ɔkpa ánɩ́ bʋbwɛ ɔkpʋnʋ ɔdakɛ bwɛ?”
3Yesu lɛfɩtɛ amʋ́ ɔbɛɛ, “Mlɩmɔkʋkla nu tɔá Owie Dawid lɔbwɛ brɛá akʋn dɛ mʋa mʋ abuopʋ kɩ? 4Olebitiwie Bulu osumkpa yetsu bodobodoá bapʋha Bulu igyi ba, mʋa mʋ abuopʋ amʋ begyi. Bulu igyi ahapʋ nkʋlɛ bɛlɛ ɔkpa bʋtegyi alɩ bodobodo amʋ.”
5Mʋʋ Yesu lɔmɔ mʋ asʋn ɔnɔ ɔbɛɛ, “Mɩ, Nyankpʋsa-Mʋ-Bi anfɩ gyi ɔkpʋnʋ ɔdakɛ mʋ wie.”
Ɩlɔtsa Ɔkpʋnʋ Ɔdakɛ
(Mateo 12:9-14; Marko 3:1-6)
6Yesu lɔyɔ atɔ osunakpa Yudafɔ ofiakpa ɔkpʋnʋ ɔdakɛ bamba. Oyin ɔkʋá mʋ gyɔpɩ ɩbɩ lawu bʋ ɩnʋ. 7Mose mbla asunapʋ pʋ́ Farisifɔ akʋ bɛtɛ Yesu kɩ bɛɛ, ɔbɛ́tsa ɩlɔ ɔkpʋnʋ ɔdakɛ, mɛnɩ bénya mʋ ɩwɩ asʋn, pʋyɛnatɩ mʋsʋ suna ahandɛ. 8Yesu yin amʋ́ nwuntɔ asʋn. Mʋ́ sʋ ɔlɛbla oyin amʋʋ mʋ ɩbɩ kʋlɛ lawu amʋ ɔbɛɛ, “Kʋsʋ bɛlɩɩ amʋ́ ansɩtɔ nfɩ.” Ɩnʋ oyin amʋ lɔkʋsʋ bɛlɩɩ amʋ́ ansɩtɔ. 9Mʋʋ Yesu lɛbla amʋ́ ɔbɛɛ, “Ndɛ mlɩ fɩtɛ, ntɔ mbla amʋ lɛha ɔkpa ánɩ́ abwɛ ɔkpʋnʋ ɔdakɛ? Yile loo, ntɛ lalahɛ? Ahɔ ɔha nkpa loo, ntɛ amɔ mʋ?” 10Ɩnʋ ɔlɛdamli kɩ amʋ́ fɛ́ɛ́ fia. Mʋʋ ɔlɛbla oyin amʋ ɔbɛɛ, “Tɩnkɩ fʋ ɩbɩ amʋ.” Olenya tɩnkɩ ɩbɩ amʋ alɩ pɛ, ɔŋɛ lowie mʋ́tɔ.
11Ɔblɔ lɛkɩta amʋ́, bɛfɩtɛ aba bɛɛ, “Ntɔ koun abɛ́hɩɛ bwɛ Yesu anfɩ?”
Akasɩpʋ Amʋ Ada
(Mateo 10:1-4; Marko 3:13-19)
12Ɛkɛ ɔkʋ Yesu lɔdʋ yɔ ɩbʋsʋ yɔbɔ mpaɩ ha Bulu tsu onye yɛha ɔyɩkɛhɛ. 13Mʋ́ ɔyɩkɛhɛ a, ɔlɛtɩ mʋ akasɩpʋ, ɔlɛlɛ amʋ́tɔ duanyɔ, ɔlɛtɩ amʋ́ mʋ sumbi ayɔpʋ. 14Amʋ́gyi; Simon ánɩ́ ɔlɛdɩnka mʋ Petro mʋa mʋ pio Andrea; Yakobo mʋa Yohane; Filipo, Bartolomeo, 15Mateo, Toma, Alfeo mʋ bi Yakobo, Simon ánɩ́ ogyi ɩwɩsʋtsia adunkapʋ ɔpasuatɔ ɔha, 16Yakobo ɔkʋ mʋ bi Yuda pʋ́ Yuda Iskariot ánɩ́ ɔlɛbɛlɛ Yesu ha.
Yesu Atosuna Mʋ́a Ɩlɔtsa
(Mateo 4:23-25)
17Yesu mʋa sumbi ayɔpʋ amʋ bɛkplɩ tsu ɩbʋ amʋsʋ ba ɔsʋlʋ tantasʋ. Mʋ abuopʋ tsɔtsɔɔtsɔ pʋ́ ɔdɔm kpɔnkpɔɔnkpɔntɩá botsu Yudea ɔmátɔ, Yerusalem pʋ́ ɔpʋ ɔnɔ awulu Tiro mʋ́a Sidonsʋ bɛba ɩnʋ. 18Bɛba bɛɛ bɛba bonu mʋ asʋn blɩhɛ, ɔtsa amʋ́ ɩlɔ. Aha ánɩ́ ɔŋɛ lalahɛ dɛ amʋ́ han ɛ bɛba, olegya ɔŋɛ lalahɛ lɛ amʋ́tɔ. 19Amʋ́ fɛ́ɛ́ bekleá bɔ́pʋ ɩbɩ da mʋ, tsufɛ ɔŋɛ dɛdalɩ mʋtɔ tsa amʋ́ fɛ́ɛ́ ɩlɔ.
Oyula Asʋn
(Mateo 5:1-12)
20Yesu lotsu ansɩ kɩ mʋ akasɩpʋ, ɔlɛbla amʋ́ ɔbɛɛ,
“Bulu layula mlɩá mlɩmá tɔtɔ,
tsufɛ mlɩbʋ mʋ iwiegyi amʋ nɩ.
21Bulu layula mlɩá akʋn dɛ mlɩ sei,
tsufɛ mlɛ́ba begyi mwɛ.
Bulu layula mlɩá mlɩdesu sei,
tsufɛ mlɛ́ba bɔmɔsɩ.
22“Bulu layula mlɩa bʋdɛ mlɩ lu, bʋdɛ mlɩ gya lɛ amʋ́tɔ, sia mlɩ, tɩ mlɩ ɩda lalahɛ mɩ, Nyankpʋsa-Mʋ-Bi anfɩ sʋ. 23Ansɩ igyi mlɩ ɛkɛ amʋ, amlɩfuli kpayi ansigyisʋ, tsufɛ mlɩ ɩkɔka tsɔ ɔsʋsʋ. Alɩ amʋ́ anain bɔbwɛ Bulu ɔnɔsʋ atɔɩpʋ amʋ nɩ.
24Tamɛ mlɩ ánɩ́ mlɩlanya ɩwɩ sei, mlɩgyɔwɩ nɩ.
Tsufɛ mlɩ ansigyi fɛ́ɛ́ mlɩlanya a.
25Mlɩá mlɩlamwɛ sei, mlɩgyɔwɩ nɩ.
Tsufɛ akʋn bɛ́ba bɛkɩta mlɩ.
Mlɩá mlɩdɛmɔsɩ sei, mlɩgyɔwɩ nɩ.
Tsufɛ mlɛ́ba begyi awɩrɛhɔ, su.
26“Mlɩá aha fɛ́ɛ́ bʋdɛ mlɩ kanfʋ, mlɩgyɔwɩ. Tsufɛ alɩ mlɩ anain bɛkanfʋ Bulu ɔnɔsʋ atɔɩpʋ afunupʋ amʋ ɛ nɩ.
Alupʋdwɛ
(Mateo 5:38-48; 7:12a)
27“Tamɛ ndɛ mlɩá mlonu bla mbɛɛ, mlɩdwɛ mlɩ alupʋ, amlɩbwɛ yile ha amʋ́. 28Mlɩyula aha ánɩ́ bʋtɔlwɩɩ mlɩ, amlɩbɔ mpaɩ ha aha ánɩ́ bʋtesia mlɩ. 29Nɩ ɔha ɔda fʋ ɩsʋtɔ a, damli nyɔsɩ ɛ ha mʋ ɔda. Nɩ ɔkʋ ɔswɩ fʋ tati a, wɔɩ fʋ atadɩɛ ɛ ha mʋ. 30Nɩ ɔkʋ ɔkʋlɩ fʋ atɔ a, ha mʋ. Nɩ ɔkʋ ɛ otsu fʋ atɔ a, máyɛhɔ mʋ́. 31Bwɛ ha aha alɩá fʋdekle fɛ́ɛ́ bʋbwɛ ha fʋ.
32“Nɩ fʋ adwɛpʋ nkʋlɛ fʋtɔdwɛ a, ɩpan mɔmʋ fénya? Lakpan abwɛpʋ kʋraa bʋtɔdwɛ amʋ́ adwɛpʋ. 33Nɩ ɔha ánɩ́ ɔtɔbwɛ yile ha fʋ nkʋlɛ fʋtɔbwɛ yile ha a, ntogyi sʋ Bulu ɔda fʋ ɩpan? Lakpan abwɛpʋ ɛ bʋtɔbwɛ alɩ. 34Nɩ ɔha ánɩ́ fʋyin ánɩ́ obénya ha fʋ nkʋlɛ fʋtɛha ɩpan a, ntogyi sʋ Bulu ɔda fʋ ɩpan? Lakpan abwɛpʋ oo bʋtɔpʋ atɔ pan amʋ́ aba, yinki hɔ mʋ́ alɩ. 35Mʋ́ sʋ mlɩdwɛ mlɩ alupʋ, mlɩbwɛ yile ha amʋ́, mlɩpan amʋ́ atɔ, mlɩmátɩ amʋ́ akɔ, mɛnɩ Bulu ɔbɛ́ka mlɩ ɩkɔ tsɔtsɔɔtsɔ. Fówun mlɩlabwɛ Ɔsʋsʋʋsʋ mʋ Wie amʋ abi. Tsufɛ ɔbʋ awɩtɔlɛ ha aha ánɩ́ atɔ tamagyi amʋ́ ansɩ pʋ́ aha lalahɛ fɛ́ɛ́. 36Mlɩbwɛ nwɛ awunpʋ fɛ alɩá mlɩ Sɩ Bulu gyi nwɛ owunpʋ.
Ɩlalɛ
(Mateo 7:1-5)
37“Mlɩmálɛ aha ɩla, mɛnɩ Bulu mɛ́ɛlɛ mlɩ ɩla. Mlɩmáha ɔhaa ɩpɔn, mɛnɩ Bulu ɛ ɔmɛ́ɛha mlɩ ɩpɔn. Mlɩsi mlɩ aba ɩla kie amʋ́, Bulu osi mlɩ klɛ kie mlɩ. 38Mlɩha aha tɔá dɛ amʋ́ hian, Bulu ɔbɛ́laha mlɩ. Ɔbɔ́pʋ atɔ susuhɛ wanklaan wa mʋ́, wʋsʋ mʋ́, sila mʋ́, ɩbɔ́bʋla tsitsa ha mlɩ. Tsufɛ tɔá fɔpʋsusu ha fʋ ba a, mʋ́ kɛn Bulu ɔbɔ́pʋsusu ha fʋ nɩ.”
39Yesu lɛtra ha amʋ́ yebi ɔbɛɛ, “Nsibi obwiepʋ ɔbɛ́talɩ kpa nsibi obwiepʋ? Amʋ́ fɛ́ɛ́ bʋmɛ́ɛkpa wie ɔbɔtɔ? 40Ɔkasɩpʋ tamadʋn mʋ wie, tamɛ ɔkasɩpʋ ɔkasɩ bɩ a, ɔtɔbwɛ fɛ mʋ wie.
41“Ntogyi sʋ fʋdɛ ipi tukuriibi wun fʋ ba nsibisʋ, tamɛ fʋmɛdɛ ogyakpatin ánɩ́ ɩdɩn fʋ klɛsʋ mʋ́ wun? 42Ntɛ ntogyi sʋ fʋdɛ fʋ ba bla fɛɛ, ‘Mɩ pio, ha mɩ andɩnkɩ ipi fʋ nsibisʋ>, tamɛ fʋmɛdɛ ogyakpatin ánɩ́ ɩdɩn fʋ klɛsʋ mʋ́ wun? Apinabwɛbi ɔbwɛpʋ, gyankpa dɩnkɩ ogyakpatin amʋ fʋ nsibisʋ, mɛnɩ fówun atɔ wanklaan, talɩ dɩnkɩ ipi amʋ fʋ ba klɛsʋ.
Oyi Pʋ́ Mʋ́ Abi Swiehɛ
(Mateo 7:6-20; 12:33-35)
43“Oyi wanklaan mɛ́ɛtalɩ swie abi lalahɛ. Alɩ kɛn oyi lalahɛ ɛ mɛ́ɛtalɩ swie abi wanklaan nɩ. 44Tsufɛ oyi-ibi bʋtɔpʋbɩ mʋ́. Bʋtamakpɔtɩ kankaba okploto oyisʋ, bʋtamakpɔtɩ tsɔkpʋn ɛ tʋnkpa ɩflasʋ. 45Ɔha wanklaan tɛlɛ tsiatɔ wanklaan ɔwan tsu mʋ klʋntɔ, ɔha lalahɛ ɛ tɛlɛ tsiatɔ lalahɛ ɔwan tsu mʋ klʋntɔ. Tsufɛ tɔá ɩdʋn ɔha klʋn a, mʋ́tɛdalɩ tsu mʋ ɔnɔ.
Bʋtasʋ Pʋ́ Osublutɔ Obuyi
(Mateo 7:24-27)
46“Ntogyi sʋ mlɩdɛ mɩ tɩ mlɩaa, ‘Mɩ Wie! Mɩ Wie!> tamɛ mlɩtamagyi mɩ asʋn blɩhɛsʋ? 47Nósuna mlɩ alɩá ɔha ánɩ́ ɔlɛba mɩ wa bonu mɩ asʋn, gyi dɩnka mʋ́sʋ gyi. 48Ogyi fɛ ɔha ánɩ́ ɔba beyi obu, olegyankpa kwi mʋ́ ntswɩasɩ ɔbɔ yɔtʋ bʋta, ɔlɔwa ntswɩasɩ amʋ dɩnka mʋ́sʋ. Brɛá ntsu lɔbʋla kɩta mʋ́ a, ɩmɛtalɩ kpɩnkɩ obu amʋ, tsufɛ oleyi mʋ́ wanklaan. 49Tamɛ ɔhagyiɔha ánɩ́ olonu mɩ asʋn blɩhɛ, omegyi mʋ́sʋ gyi fɛ ɔha ánɩ́ oleyi mʋ obu ɔsʋlʋsʋ kɛkɛ, ɔmɔwa mʋ́ ntswɩasɩ. Brɛá ntsu lɔbʋla wa mʋ́ a, ilobwie da gbloo ɩnʋnʋ, yinta fɛ́ɛ́!”
Currently Selected:
Luka 6: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation
