Luka 5
5
Yesu Akasɩpʋ Gyankpapʋ Tɩ
(Mateo 4:18-22; Marko 1:16-20)
1Ɛkɛ ɔkʋ Yesu lɩɩ Genesaret ɔpʋ#5:1 Genesaret ɔpʋ: Mʋ́ kɛn gyi Galilea ɔpʋ nɩ. ɔnɔ, aha tsɔtsɔɔtsɔ bɛba boputa mʋ ánɩ́ bónu Bulu asʋn. 2Olowun nklʋn anyɔ ɔpʋ amʋ ɔnɔ. Aye alɛpʋ amʋ bakplɩ yɔ bʋdɛ amʋ́ asawutɔ da. 3Yesu lɔdʋ wie ɩkʋlɛá igyi Simon klɛtɔ. Mʋʋ ɔlɛbla Simon ɔbɛɛ, osun mʋ́ kpalobi dɩnka ntsusʋ. Ɩnʋ oletsia mʋ́tɔ suna aha amʋ atɔ.
4Brɛá ɔlɔtɔɩ ta a, ɔlɛbla Simon ɔbɛɛ, “Mlɩpla ɔklʋn amʋ ya okluklukpa, amlɩyɔtswɩ asawu lɛ aye.”
5Mʋʋ Simon lɛbla mʋ ɔbɛɛ, “Owie, anɩlɔbwɛ kasian igye onye fɛ́ɛ́, anɩmenya tɔtɔ. Tamɛ ɩnɩá fɛɛ ayɔ, sʋ nɔ́yɔtswɩ asawu amʋ.” 6Brɛá bɔyɔtswɩ asawu amʋ a, bɛlɛ aye tsɔtsɔɔtsɔ. Mʋ́ sʋ asawu amʋ lɔwa tɩtɩ bɩ. 7Ɩnʋ bɔbwɛ ɩbɩ tɩ amʋ́ agyʋma ayɔba amʋʋ bʋbʋ ɔklʋn nyɔsɩ amʋtɔ bɛɛ bʋbɛtsa amʋ́. Bɛba bɛtsa amʋ́, bɛlɛ aye amʋ bʋla nklʋn anyɔ amʋ dɛdɛɛdɛ, idekle ɩmɛ. 8Brɛá Simon Petro lowun mʋ́ alɩ a, ɔlɛda akpawunu Yesu ayabitɔ, bla mʋ ɔbɛɛ, “Mɩ Wie, mákpʋkpɛ manta mɩ! Lakpan ɔbwɛpʋ ngyi.”
9Tsufɛ aye amʋʋ balɛ amʋ lɔwa mʋa mʋ aba amʋ wanwan. 10Alɩ kɛn ɩlɔwa Sebedeo abi Yakobo mʋa Yohane, bʋgyi Simon agyʋma ayɔba amʋ ɛ wanwan nɩ.
Mʋʋ Yesu lɛbla Simon ɔbɛɛ, “Mánya ifu! Tsu ndɛ pʋya a, anyankpʋsa fɛ́lɛ.” 11Simon mʋa mʋ aba amʋ benya pla nklʋn amʋ besi otsubunɔ alɩ, besi togyitɔ tswɩ, kpla buo Yesu.
Ɩlɔ Pɛpɛ Ɔlɔpʋ Ɔkʋ Tsa
(Mateo 8:1-4; Marko 1:40-45)
12Ɛkɛ ɔkʋ Yesu bʋ wulu kʋsʋ, ɩlɔ pɛpɛ ɔlɔpʋ ɔkʋ lowun mʋ. Ɩnʋ ɔlɛbɛda akpawunu, pʋ ɔsʋkpɩ yi ɔsʋlʋtɔ, kokoli mʋ ɔbɛɛ, “Owie, nɩ fótsula a, fɛ́talɩ ha mɩ ɩwɩ ɩbɛ́plɩ.”
13Yesu lɛtɩnkɩ ɩbɩ da mʋ, bla mʋ ɔbɛɛ, “Natsula, fʋ ɩwɩ ɩplɩ.” Ɩnʋnʋ ɩlɔ amʋ lɛŋa lɛ mʋ ɩwɩ. 14Ɩnʋ Yesu lɛda mʋ ɔla ɔbɛɛ, “Mábla ɔhaa. Natɩ laa afʋpʋ fʋ ɩwɩ yesuna Bulu igyi ɔhapʋ, afʋha mʋ ɩwɩgyʋratɔ amʋʋ Mose mbla losuna tsu ɩlɔ pɛpɛtsa ɩwɩ amʋ. Igyi adansɩɛ suna aha ánɩ́ fʋ ɩwɩ laplɩ.”
15Tamɛ Yesu ɩwɩ asʋn lɛtra klɛɩ yɔ ntɩnɛ dɩnka mʋ́sʋ. Ɔdɔm bɛba mʋ atosunahɛ onukpa, ɔtsa amʋ́tɔ alɔpʋ ɛ ɩlɔ. 16Tamɛ oletsia dalɩ amʋ́tɔ brɛ kʋ yɔ ɔsʋlʋkpansʋ ɔtɩnɛkʋ mʋ nkʋlɛ yɔbɔ mpaɩ.
Tsukʋlɛ Osinpʋ Tsa
(Mateo 9:1-8; Marko 2:1-12)
17Ɛkɛ ɔkʋ Yesu dɛ atɔ suna. Farisifɔ, Mose mbla asunapʋ akʋá botsu Galilea pʋ́ Yudea ɔmátɔ pʋ́ Yerusalem bɛba betsia asɩ ɩnʋ. Bulu tumi bʋ Yesutɔ ha ɩlɔtsa. 18Ɩnʋ a, ayin akʋ bɔsʋra tsukʋlɛ osinpʋ akpasʋ ba. Bekleá bɔ́pʋ mʋ wie woyitɔ, pʋ mʋ tswɩ Yesu ansɩtɔ. 19Ɔdɔm amʋ sʋ bʋmenya ɔkpa. Ɩnɩ sʋ bɔyɔdʋ obu amʋ awunsʋ, da mʋ́ ɔtɩnɛkʋ tii, bɛkplɩa akpa amʋ tswɩ aha amʋtɔ Yesu ansɩtɔ ɩnʋ. 20Brɛá Yesu lowun ánɩ́ bahɔ mʋ gyi a, ɔlɛbla tsukʋlɛ osinpʋ amʋ ɔbɛɛ, “Opio, nasi fʋ lakpan kie fʋ.”
21Mose mbla asunapʋ pʋ́ Farisifɔ amʋ bɛblɩ wa nwuntɔ bɛɛ, “Ma gyi oyin anfɩ ɔdɛ abususʋ blɩ anfɩ? Ma ɔbɛ́talɩ si lakpan kie aha dʋn Bulu nkʋlɛ?”
22Yesu lɛbɩ amʋ́ agywɩɩn. Mʋ́ sʋ ɔlɛfɩtɛ amʋ́ ɔbɛɛ, “Ntogyi sʋ mlɩdɛ ɩnɩ odu gywɩɩn? 23Mɔmʋ lɔpɔn ha blɩ? ‘Nasi fʋ lakpan kie fʋ.> loo, ntɛ ‘Kʋsʋ tsu fʋ akpa afʋnatɩ?> 24Tamɛ ndekleá mlɩbɩ ánɩ́ mɩ, Nyankpʋsa-Mʋ-Bi anfɩ mbʋ tumi ɔyɩ anfɩtɔ si aha lakpan kie amʋ́.” Ɩnʋ ɔlɛbla tsukʋlɛ osinpʋ amʋ ɔbɛɛ, “Ndɛ fʋ bla mbɛɛ, kʋsʋ. Tsu fʋ akpa afʋnatɩ yɔ woyi!”
25Ɩnʋnʋʋnʋ tsukʋlɛ osinpʋ amʋ lɔkʋsʋ lɩɩ amʋ́ fɛ́ɛ́ ansɩtɔ, tsu mʋ akpa. Ɔlɔpʋ ɔkpa ɔyɔ woyi ɔdɛ Bulu kanfʋ. 26Ɔnɔ lobwie aha amʋ fɛ́ɛ́. Ifu lowie amʋ́ fɛ́ɛ́tɔ, bɛkanfʋ Bulu bɛɛ, “Ndɛ anɩlawun ofula!”
Lewi Tɩ
(Mateo 9:9-13; Marko 2:13-17)
27Mʋ́ ɔma brɛá Yesu lɛdalɩ ɩnʋ a, olowun lampoo ɔhɔpʋ ɔkʋá bʋtɛtɩ mʋ Lewi, tsie mʋ lampoo ɔhɔkpa. Yesu lɛbla mʋ ɔbɛɛ, “Bobuo mɩ.” 28Ɩnʋ Lewi lɔkʋsʋ, si mʋ togyitɔ ɔmagya, yobuo mʋ.
29Mʋ́ ɔma a, Lewi lɔtswɩ ɔpʋnʋ mʋ woyitɔ ha Yesu. Lampoo ahɔpʋ tsɔtsɔɔtsɔ pʋ́ aha bamba ɛ bɛba atɔ amʋ ogyikpa. 30Farisifɔ pʋ́ Mose mbla asunapʋá bʋbʋ Farisifɔ amʋtɔ bɛfɩtɛ Yesu akasɩpʋ amʋ bɛɛ, “Ntogyi sʋ mlɩa lampoo ahɔpʋ pʋ́ lakpan abwɛpʋ mlɩdɛ ɩbɩ wa gyi atɔ, mlɩdɛ nta nun?”
31Yesu lɛlɛ mʋ́ ɔnɔ ɔbɛɛ, “Alɔpʋ lehian ɩlɔ ɔtsapʋ, megyi aha ánɩ́ ɩwɩ bʋ amʋ́ ɔnlɩn. 32Mmɛba aha wanklaan ɔtɩkpa. Mboun lakpan abwɛpʋ ɔtɩkpa nɛba, mɛnɩ bɛ́damli klʋntɔ.”
Ɔnɔklɩ Ɩwɩ Asʋn Fɩtɛhɛ
(Mateo 9:14-17; Marko 2:18-22)
33Aha akʋ bɛbla Yesu bɛɛ, “Asu Ɔbɔpʋ Yohane akasɩpʋ bʋtetsia klɩ ɔnɔ bɔ mpaɩ. Farisifɔ akasɩpʋ ɛ bʋtɔbwɛ alɩ, tamɛ fʋ akasɩpʋ mʋ́ bʋdegyi, bʋdenun.”
34Yesu lɛfɩtɛ amʋ́ ɔbɛɛ, “Ɔtsɩ ɔkpaɩnpʋ anyawie bɛ́klɩ ɔnɔ brɛá ɔbʋ amʋ́ wa? Ɛkɛkɛɛkɛ! 35Tamɛ ɛkɛ ɔkʋ ɩbɛ́ba ánɩ́ bɛ́kpa mʋ natɩ si amʋ́. Alɩ nkɛ amʋtɔ bɛ́klɩ ɔnɔ nɩ.”
36Ɩnʋ ɔlɛha amʋ́ yebi ɔbɛɛ, “Ɔhaa tamapʋ tati pɔpwɛ tan tati dada. Nɩ ɔbwɛ mʋ́ alɩ a, alayinta pɔpwɛ amʋ. Pɔpwɛ amʋ pʋ́ dada amʋ ansɩ ɛ ɩmɛ́ɛkana aba. 37Alɩ kɛn bʋtamapʋ nta pɔpwɛ wa ɔwʋlʋ-kpakpa kɛntɛ wuhɛtɔ nɩ. Nta pɔpwɛ amʋ ibófu fa kɛntɛ amʋ tsitsa, yinta kɛntɛ amʋ ɛ. 38Ɩnɩ sʋ ɔwʋlʋ-kpakpa kɛntɛ pɔpwɛtɔ bʋtɔpʋ nta pɔpwɛ wa. 39Ɔhaa tamafɩtɛ nta pɔpwɛsʋ brɛá alanun danhɛ. Tsufɛ ɔtɛblɩ ɔbɛɛ, ‘Ɩdanhɛ amʋ bʋ alɛ dʋn.> ”
Currently Selected:
Luka 5: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation
