Luka 4
4
Yesu Ɩsɔkɩ
(Mateo 4:1-11; Marko 1:12-13)
1Brɛá Yesu leyinki tsu Yordan ntsu ɔnɔ a, Ɔŋɛ Wankɩhɛ lɔbʋla mʋtɔ, ɩlɛkpa mʋ ya ɔsʋlʋkpansʋ. 2Brɛá ɔbʋ ɩnʋ a, Ɔbʋnsam letsia bɔsɔ mʋ kɩ nkɛ adʋana kɛkɛ. Yesu megyi tɔtɔ nkɛ amʋtɔ fɛ́ɛ́. Mʋ́ sʋ brɛá nkɛ amʋ ɩlɔmɔ ɔnɔ a, akʋn hɩɛ dɛ mʋ.
3Ɩnʋ Ɔbʋnsam lɛbla mʋ ɔbɛɛ, “Nɩ Bulu mʋ Bi fʋgyi a, mʋmʋ ha ibwi anfɩ ɩdamli bodobodo.”
4Yesu lɛlɛ mʋ́ ɔnɔ ɔbɛɛ, “Bɔwanlɩn wa Bulu asʋn amʋtɔ bɛɛ, ‘Megyi atogyihɛ wʋlɛ nyankpʋsa ogyi tsia nkpa.> ”
5Ɔbʋnsam lɔpʋ mʋ ya ɩbʋ fʋahɛ kʋsʋ. Olosuna mʋ ɔyɩtɔ iwie ogyikpa fɛ́ɛ́ ɔtsawʋlɛ pɛ. 6Mʋʋ ɔlɛbla mʋ ɔbɛɛ, “Nɔ́pʋ ɔmá anfɩ fɛ́ɛ́ tumi pʋ́ amʋ́ numnyam ha fʋ, tsufɛ mɩ ɩbɩtɔ bapʋwa. Ɔha ánɩ́ ndekle a, mʋ nɔ́pʋha. 7Mʋ́ sʋ nɩ fósum mɩ a, nɔ́pʋ mʋ́ fɛ́ɛ́ ha fʋ.”
8Yesu lɛbla mʋ ɔbɛɛ, “Bɔwanlɩn wa Bulu asʋn amʋtɔ bɛɛ, ‘Da akpawunu ha fʋ Wie Bulu. Mʋ nkʋlɛ fʋ sum.> ”
9Ɔbʋnsam lɛkpa mʋ ya Yerusalem, ɔlɔpʋ mʋ yɛlɩɩ Bulu ɔtswɛkpa obu amʋ ɔtantra. Ɩnʋ ɔlɛbla Yesu ɔbɛɛ, “Nɩ Bulu mʋ Bi fʋgyi lɛlɛ a, tu kpayi. 10Tsufɛ bɔwanlɩn wa Bulu asʋn amʋtɔ bɛɛ, ‘Bulu ɔbɛ́ha mʋ abɔpʋ bɛ́kɩ fʋsʋ. 11Bɛ́kpata fʋ ɩbɩtɔ, mɛnɩ fʋ yabi mɛ́ɛda ibwi kʋkʋsʋ.> ”
12Yesu lɛlɛ mʋ́ ɔnɔ ɔbɛɛ, “Bɛtra wanlɩn bɛɛ, ‘Mákapʋ fʋ Wie Bulu kɩ.> ”
13Brɛá Ɔbʋnsam lɔmɔ ɩsɔkɩ anfɩ fɛ́ɛ́ ɔnɔ a, ɔlɔkʋ natɩ si mʋ asa.
Yesu Gyumagyihɛ Asɩtsua Galilea Ɔmátɔ
(Mateo 4:12-17; Marko 1:14-15)
14Ɔŋɛ Wankɩhɛ tumi lɛkpa Yesu, oleyinki yɔ Galilea ɔmátɔ. Mʋ ɩwɩ asʋn lɛklɛɩ wa ɔmá amʋ fɛ́ɛ́tɔ. 15Oletsia suna atɔ Yudafɔ ofiakpa, aha amʋ fɛ́ɛ́ bɛkanfʋ mʋ.
Bʋmɔhɔ Yesu Mʋ Wulutɔ
(Mateo 13:53-58; Marko 6:1-6)
16Ɩnʋ Yesu leyinki ba Nasaret, ɔtɩnɛá oletsia dan. Fɛ alɩá otetsia bwɛ a, ɔlɔyɔ Yudafɔ ofiakpa ɔkpʋnʋ ɔdakɛ. Brɛá ɔlɔkʋsʋ yɛlɩɩ amʋ́ ansɩtɔ ɔbɛ́kla Bulu asʋn a, 17botsu Bulu ɔnɔsʋ ɔtɔɩpʋ Yesaia ɔwʋlʋ ha mʋ. Ɔlɛsankɩ mʋ́ a, olowun ɔtɩnɛkʋá bɔwanlɩn wa bɛɛ,
18“Anɩ Wie Bulu lada mɩ ofuli.
Ɩnɩ sʋ mʋ Ɔŋɛ bʋ mɩsʋ.
Alalɛ mɩ ɔbɛɛ, nda asʋn wanklaan amʋ ɔkan suna aha ánɩ́ bʋma tɔtɔ.
Ɔbɛɛ, mbɛbla nkpábi mbɛɛ, masi amʋ́ ɩwɩ ha amʋ́.
Mɩ ambla ansibi abwiepʋ mbɛɛ, mabwii amʋ́ ansibi.
Ɔbɛɛ, mbɛbla aha ánɩ́ bʋdɛ amʋ́ ipiantɔ wa ɛ mbɛɛ, malɛ amʋ́ ipiantɔ.
19Fówun mɩ amblɩ mbɛɛ,
anɩ Wie aha nwewunbɩ lafʋn.”
20Ɩnʋ olokunta ɔwʋlʋ amʋ, yinkia ha mʋ́sʋ ɔkɩpʋ, ɔlɔwɔɩ tɩa asɩ. Aha amʋʋ bʋbʋ ofiakpa ɩnʋ amʋ fɛ́ɛ́ besi bʋdɛ mʋ kɩ diin. 21Ɩnʋ Yesu lɛbla amʋ́ ɔbɛɛ, “Ndɛ, Bulu asʋn wanlɩnhɛ anfɩ laba mʋ́tɔ. Mʋ́ mlɩlanu a.”
22Aha amʋ fɛ́ɛ́ bonu asʋn wanklaan amʋʋ ɩlɛdalɩ mʋ ɔnɔ amʋ. Ɔnɔ lobwie amʋ́, bɛfɩtɛ bɛɛ, “Megyi Yosef mʋ bi amʋ nɩ?”
23Yesu lɛbla amʋ́ ɔbɛɛ, “Nyin ánɩ́ mlɛ́ha mɩ yebi anfɩ mlɩaa, ‘Ɩlɔ ɔtsapʋ, tsa fʋ ɩwɩ!> Mlɛ́labla mɩ mlɩaa, ‘Bwɛ atɔ amʋʋ anɩlanuá fʋdɛbwɛ Kapernaum amʋ fʋ wulutɔ nfɩ ɛ.> ” 24Ɩnʋ oleyinki bla amʋ́ ɔbɛɛ, “Ɔnɔkwalɩ ndɛ mlɩ bla. Bʋtamahɔ Bulu ɔnɔsʋ ɔtɔɩpʋ ɔkʋkʋ asʋn mʋ wulutɔ.
25“Mlɩnu, Bulu ɔnɔsʋ ɔtɔɩpʋ Elia bɩsʋ a, nyankpʋ motswie nfinsa mʋ́a ɩfʋn kɛkɛ. Akʋn lɛhɩɛ ba Israel ɔmátɔ fɛ́ɛ́. Ɩbʋ mʋ́tɔá asʋrapʋ tsɔtsɔɔtsɔ betsia Israel ɔmátɔ alɩ brɛ amʋtɔ, 26tamɛ Bulu mɛha Elia ɔyɔ amʋ́tɔ ɔkʋkʋ wa. Ɔsʋrapʋ ɔkʋá ɔbʋ Sarefat wulutɔ, Sidon ɔmátɔ nkʋlɛ wa ɔlɛha mʋ ɔlɔyɔ. 27Ɩlɔ pɛpɛ alɔpʋ tsɔtsɔɔtsɔ ɛ betsia Israel ɔmátɔ Bulu ɔnɔsʋ ɔtɔɩpʋ Elisa bɩsʋ. Tamɛ ɔmɛha ɔkʋkʋ ɩwɩ mɛplɩ, dʋn Naaman ánɩ́ otsu Siria nkʋlɛ.”
28Ɔblɔ lɛhɩɛ kɩta aha amʋʋ bʋbʋ ofiakpa ɩnʋ amʋ, brɛá bonu Yesu asʋn blɩhɛ anfɩ. 29Bɔkʋsʋ gya mʋ dalɩ amʋ́ wulutɔ. Wulu amʋ ɩdɩn bʋsʋ. Begya mʋ alɩɩ yowie wulu amʋ ɔnɔ, bɛɛ abʋwuta mʋ wa tsonkolitɔ. 30Yesu lɛnatɩ tsʋn amʋ́tɔ yɔ ɔtɩnɛá ɔyɔ.
Yesu Ɔŋɛ Lalahɛ Gya
(Marko 1:21-28)
31Ɩnʋ Yesu lɛkplɩ yɔ Kapernaum, Galilea wulu kʋtɔ. Olosuna amʋ́ atɔ amʋ́ ofiakpa ɔkpʋnʋ ɔdakɛ. 32Mʋ atosunahɛ lobwie amʋ́ ɔnɔ, tsufɛ olosuna amʋ́ atɔ tumisʋ. 33Oyin ɔkʋ bʋ ofiakpa ɩnʋ, ɔŋɛ lalahɛ bʋ mʋsʋ. Ɔlɔkplʋn blɩ ɔbɛɛ, 34“Kɩ mɩ! Yesu Nasaretyin, amansʋ bʋ anɩa fʋnyɔ nsɩnɛ? Ntɛ anɩ ɔhɩkpa fɛba loo? Nyin ɔha oduá fʋgyi. Fʋgyi Bulu Ɔha Wankɩhɛ amʋ nɩ!”
35Yesu lɔkplʋn wa ɔŋɛ amʋ ɔbɛɛ, “Kpa ɔnɔ bun, afʋdalɩ mʋtɔ.” Ɩnʋ ɔŋɛ lalahɛ amʋ lɛfɩn oyin amʋ da aha amʋtɔ ɩnʋ, dalɩ mʋtɔ; tɔtɔ mɔbwɛ mʋ.
36Ɔnɔ lobwie amʋ́ fɛ́ɛ́, bɛfɩtɛ aba bɛɛ, “Amansʋ nɩ? Oyin anfɩ bʋ tumi, ɔdɛkplʋn wa ɔŋɛ lalahɛ, ɩdɛ mʋ bu, dalɩ ahatɔ?” 37Mʋ ɩwɩ asʋn lɛklɛɩ wa ɔmá amʋ fɛ́ɛ́tɔ.
Alɔpʋ Tsɔtsɔɔtsɔ Tsa
(Mateo 8:14-17; Marko 1:29-34)
38Yesu lɛdalɩ Yudafɔ ofiakpa ɩnʋ yɔ Simon woyitɔ. Ɔlɔyɔ a, owisʋ lakɩta Simon mʋ sia tsɩhɛ, ɔda kinkiinkin. Bɛbla Yesu bɛɛ, ogyi mʋ bʋalɛ. 39Yesu lɔkpʋkpɛ tʋ ɔtsɩ amʋ, ɔlɔkplʋn wa owisʋ amʋ ɔbɛɛ, ɩkʋsʋ mʋsʋ. Ɩnʋnʋ ɩlɔkʋsʋ mʋsʋ, ɔtsɩ amʋ lɔkʋsʋ bwɛ amʋ́ afɔɔtɔ.
40Brɛá owi dɛta a, aha bɔsʋra amʋ́ aha ánɩ́ bʋdɛ ɩlɔ ɔtsan-ɔtsan lɔ ba, Yesu lɔpʋ ɩbɩ dɩnka amʋ́sʋ tsa amʋ́tɔ okugyiɔkʋ ɩlɔ. 41Ɔŋɛ lalahɛ bʋ amʋ́ akʋtɔ. Yesu lɔkplʋn wa ɔŋɛ lalahɛ amʋ. Bɛdalɩ, bʋdɛ okitikiti bɛɛ, “Fʋgyi Bulu mʋ Bi amʋ nɩ.”
Tamɛ Yesu lɔwa mbla wa ɔŋɛ lalahɛ amʋ ánɩ́ bʋmátɔɩ, tsufɛ bʋyin ánɩ́ mʋgyi Kristo, (ɔha amʋʋ Bulu lada mʋ ofuli amʋ) nɩ.
Bulu Asʋn Ɔkanda Yudafɔ Ofiakpa
(Marko 1:35-39)
42Mʋ́ ɔyɩkɛhɛ bakɛ a, Yesu lɛdalɩ wulu amʋtɔ yɔ ɩtsɛtɔ ɔtɩnɛkʋ. Aha bodunka mʋ alɩɩ yɔtʋ mʋ, bokokoli mʋ bɛɛ ɔmánatɩ si amʋ́. 43Tamɛ ɔlɛbla amʋ́ ɔbɛɛ, “Ilehian ánɩ́ nɛ́da Bulu iwiegyi ɩwɩ asʋn wanklaan amʋ ɔkan awulu atrahɛ amʋ ɛsʋ. Tsufɛ mʋ́ ɔbwɛkpa Bulu lɔwa mɩ nɩ.”
44Ɩnɩ sʋ oleki Yudea ɔmátɔ fɛ́ɛ́, da Bulu asʋn wanklaan amʋ ɔkan amʋ́ ofiakpa.
Currently Selected:
Luka 4: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation
