Luka 3
3
Asu Ɔbɔpʋ Yohane Bulu Asʋn Ɔkanda
(Mateo 3:1-12; Marko 1:1-8; Yohane 1:19-28)
1-2Roma owie dɛhɛn Tiberio iwiegyi ofi duanusɩtɔ a, Bulu lɛbla mʋ igyi ɔhapʋ Sakaria mʋ bi Yohane ɔsʋlʋkpansʋ ɔbɛɛ, ɔda mʋ asʋn ɔkan. (Alɩ brɛ amʋtɔ a, Pontio Pilato dɛ Yudea ɔmásʋ gyi. Herode dɛ Galilea ɔmásʋ gyi. Herode mʋ dɛhɛn Filipo ɛ dɛ Iturea pʋ́ Trakoniti ɔmásʋ gyi. Lisania ɛ dɛ Abilene ɔmásʋ gyi. Bulu igyi ahapʋ dɛhɛn ánɩ́ bʋbʋ ɩnʋ alɩ brɛ amʋtɔ ɛ gyi Hana mʋa Kaiafa.) 3Mʋ́ sʋ Yohane leki Yordan bʋnkpa ɔnɔ, ɔdɛ ɔkan da blɩ ɔbɛɛ, “Mlɩdamli klʋntɔ, amlɩsi lakpan bwɛ. Bulu osikie mlɩ, ambɔ mlɩ asu.”
4 Bulu ɔnɔsʋ ɔtɔɩpʋ Yesaia lɔwanlɩn Yohane ɩwɩ asʋn wa mʋ ɔwʋlʋtɔ ɔbɛɛ,
“Ɔkʋ dɛkplʋn ɔsʋlʋkpansʋ ɔbɛɛ,
‘Mlɩla anɩ Wie ɔkpa.
Mlɩtswii ɩkpa ha mʋ!
5Mlɩtin bʋnkpa kugyikʋ,
amlɩbwiebwie abʋ mʋ́a nkuku fɛ́ɛ́.
Mlɩtswii ɩkpa,
amlɩla mʋ́sʋ wanklaan.
6Aha fɛ́ɛ́ bówun Bulu nkpahɔ.> ”
7Ɔdɔm bɛba Yohane wa bɛɛ, ɔbɔ amʋ́ asu. Ɔlɛfɩtɛ amʋ ɔbɛɛ, “Abɛ abi-aná, ntɔ gya mlɩ, mlɩsrɩ Bulu ɩsʋbɩtɩ amʋʋ ɩba amʋ? 8Mʋmʋ mlɩswie abi oduá ibósuna ánɩ́ lɛlɛ mlɩladamli klʋntɔ. Mlɩmákɩ mlɩaa, mlɩ nain gyi Abraham. Ndɛ mlɩ bla mbɛɛ, Bulu ɔbɛ́talɩ ha abwi anfɩ ɩbɛ́damli Abraham abi-aná. 9Sei a, Bulu lapʋ ɛfɛ yi nyi-atsitsitɔ. Oyigyioyiá imoswie abi wanklaan a, bókun mʋ́ da, wa mʋ́ fɛ́ɛ́ ogya.”
10Ɔdɔm amʋ bɛfɩtɛ Yohane bɛɛ, “Ntɔ mɛɛ abwɛ?”
11Yohane lɛbla amʋ́ ɔbɛɛ, “Fʋa fʋbʋ atadɩɛ anyɔ a, pʋ ɩkʋlɛ ha ɔha ánɩ́ ɔma kʋkʋ. Fʋa fʋbʋ atogyihɛ ɛ bwɛ mʋ́ alɩ.”
12 Lampoo ahɔpʋ akʋ ɛ bɛba asu ɔbɔkpa. Bɛfɩtɛ Yohane bɛɛ, “Osunapʋ, ntɔ ilehian ánɩ́ abɔ́bwɛ?”
13Yohane lɛbla amʋ́ ɔbɛɛ, “Mlɩmátswɩ dɩnka aha. Mlɩhɔ tɔá bɛɛ mlɩhɔ.”
14Ɩsa akɔpʋ akʋ ɛ bɛfɩtɛ Yohane bɛɛ, “Anɩ ɛ mɛ, ntɔ abwɛ?”
Yohane lɛbla amʋ́ ɔbɛɛ, “Mlɩmápʋ ɔwʋnlɩn swɩɩ ɔhaa kɔba, ntɛ wa afunu dɩnka ɔhaasʋ. Mlɩ ɩkɔka igyi mlɩ ansɩ.”
15Ɩnɩá amʋ́ ansɩ dɩn Kristo amʋsʋ, bʋdɛ mʋ ɔkpa kɩ sʋ a, ɩmɔwankɩ amʋ́ nɩ Yohane gyi Kristo amʋ. 16Mʋ́ sʋ Yohane lɛbla amʋ́ ɔbɛɛ, “Ɔkʋá ɔdʋn mɩ bʋ ɔma ɔba. Mmɔfʋn ánɩ́ nɛ́sankɩ mʋ ntʋkʋta ɔfɛ kʋraa. Mɩ mʋ́ a, ntsu ndɛpʋbɔ mlɩ asu. Mʋ ɔbɔ́pʋ Ɔŋɛ Wankɩhɛ pʋ́ ogya bɔ mlɩ asu nɩ. 17Ɔdɛ mʋ ɩlɩn, ɔbɔ́pʋfuni ntɛtɛ lɛ ayo amʋtɔ. Ɔbɛ́kpa ayo amʋ wa mʋ odudutɔ. Tamɛ ɔbɛ́fɛɩ ofunikpa ɩnʋ wanklaan, kpa ntɛtɛ amʋ wa ogya ánɩ́ ɩtamaduntɔ.” 18Yohane lɛda asʋn wanklaan amʋ ɔkan, bla aha amʋ asʋn tsɔtsɔɔtsɔ ɔbɛɛ, bʋdamli klʋntɔ.
19Alɩ brɛ amʋtɔ a, ɩsʋ ogyipʋ Herode laswɩɩ mʋ dɛhɛn Filipo mʋ ka Herodia tsia, tra bwɛ lalahɛ tsɔtsɔɔtsɔ tsɩa mʋ́tɔ. Mʋ́ sʋ Yohane lekina ha mʋ. 20Mʋ́á ɩdʋn kʋraa gyi, Herode lɛha bɛkɩta Yohane wa obu.
Yesu Asubɔ
(Mateo 3:13-17; Marko 1:9-11)
21Brɛá Yohane dɛ aha amʋ asu bɔ a, Yesu ɛ lɛba, Yohane lɔbɔ mʋ asu. Brɛá Yesu dɛ mpaɩ bɔ a, nwʋlʋta lefinki, 22Ɔŋɛ Wankɩhɛ lɛdamli fɛ lɔpɔ, kplɩ bogyonka mʋsʋ. Ɔmɛ kʋ lotsu ɔsʋsʋ ɔbɛɛ, “Fʋgyi mɩ biá ntɔdwɛ, mɩ ansɩ tɛhɩɛ gyi fʋ ɩwɩ nɩ.”
Yesu Anain Otuntufla
(Mateo 1:1-17)
23Brɛá Yesu lɔhɔ fɛ nfi adʋasa a, olefi Bulu asʋn ɔkanda asɩ. Aha mʋ́ bʋyin ánɩ́ Yosef mʋ bi nɩ. Yosef mʋ sɩ gyi Eli. 24Eli mʋ sɩ gyi Martat. Martat mʋ sɩ gyi Lewi. Lewi mʋ sɩ gyi Melki. Melki mʋ sɩ gyi Yanai. Yanai mʋ sɩ gyi Yosef. 25Yosef mʋ sɩ gyi Martatia. Martatia mʋ sɩ gyi Amos. Amos mʋ sɩ gyi Nahum. Nahum mʋ sɩ gyi Hesli. Hesli mʋ sɩ gyi Nagai. 26Nagai mʋ sɩ gyi Mahat. Mahat mʋ sɩ gyi Martatia. Martatia mʋ sɩ gyi Semein. Semein mʋ sɩ gyi Yosek. Yosek mʋ sɩ gyi Yoda. 27Yoda mʋ sɩ gyi Yohanan. Yohanan mʋ sɩ gyi Resa. Resa mʋ sɩ gyi Serubabel. Serubabel mʋ sɩ gyi Sealtiel. Sealtiel mʋ sɩ gyi Neri. 28Neri mʋ sɩ gyi Melki. Melki mʋ sɩ gyi Adi. Adi mʋ sɩ gyi Kosam. Kosam mʋ sɩ gyi Elmadam. Elmadam mʋ sɩ gyi Er. 29Er mʋ sɩ gyi Yosua. Yosua mʋ sɩ gyi Elieser. Elieser mʋ sɩ gyi Yorim. Yorim mʋ sɩ gyi Martat. Martat mʋ sɩ gyi Lewi. 30Lewi mʋ sɩ gyi Simeon. Simeon mʋ sɩ gyi Yuda. Yuda mʋ sɩ gyi Yosef. Yosef mʋ sɩ gyi Yonam. Yonam mʋ sɩ gyi Eliakim. 31Eliakim mʋ sɩ gyi Melea. Melea mʋ sɩ gyi Mena. Mena mʋ sɩ gyi Matata. Matata mʋ sɩ gyi Natan. Natan mʋ sɩ gyi Owie Dawid. 32Owie Dawid mʋ sɩ gyi Yisai. Yisai mʋ sɩ gyi Obed. Obed mʋ sɩ gyi Boas. Boas mʋ sɩ gyi Salmon. Salmon mʋ sɩ gyi Nahson. 33Nahson mʋ sɩ gyi Aminadab. Aminadab mʋ sɩ gyi Admin. Admin mʋ sɩ gyi Arni. Arni mʋ sɩ gyi Hesron. Hesron mʋ sɩ gyi Peres. Peres mʋ sɩ gyi Yuda. 34Yuda mʋ sɩ gyi Yakob. Yakob mʋ sɩ gyi Isakɩ. Isakɩ mʋ sɩ gyi Abraham. Abraham mʋ sɩ gyi Tera. Tera mʋ sɩ gyi Nahor. 35Nahor mʋ sɩ gyi Serug. Serug mʋ sɩ gyi Reu. Reu mʋ sɩ gyi Peleg. Peleg mʋ sɩ gyi Eber. Eber mʋ sɩ gyi Sela. 36Sela mʋ sɩ gyi Kainan. Kainan mʋ sɩ gyi Arfaksad. Arfaksad mʋ sɩ gyi Sem. Sem mʋ sɩ gyi Noa, Noa ɛ mʋ sɩ gyi Lamek. 37Lamek mʋ sɩ gyi Metusala. Metusala mʋ sɩ gyi Enok. Enok mʋ sɩ gyi Yared. Yared mʋ sɩ gyi Mehalaleel. Mehalaleel mʋ sɩ gyi Kenan. 38Kenan mʋ sɩ gyi Enos. Enos mʋ sɩ gyi Set. Set mʋ sɩ gyi Adam. Adam ɛ mʋ sɩ gyi Bulu.
Currently Selected:
Luka 3: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation
