Galatiafɔ 3
3
Mbla Amʋsʋ Gyi Ntɛ Kristo Hogyi
1Oo Galatiafɔ aha mimlahɛ! Ma lalɛ mlɩ ansɩ alɩ? Megyi mlɩ onuto ansɩtɔ bɛhɩɛ lɛ suna mlɩ alɩá bɛda Yesu Kristo manta oyikpalihɛsʋ, mɔ mʋ? 2Nfɩtɛ mlɩ asʋn kuakʋlɛ. Mose Mbla amʋsʋ gyi lɛha mlɩlenya Ɔŋɛ Wankɩhɛ amʋ loo, ntɛ asʋn wanklaan amʋʋ mlɩlonu, mlɩdɛ mʋ́ hogyi amʋ sʋ? 3Aha mimlahɛ mlɩlɔkʋkʋ mlɩgyi alɩ a? Ɩnɩá mlɩlɔpʋ Ɔŋɛ Wankɩhɛ amʋ tsua mlɩ Kristotɔtsia asɩ mɛ, mlɩ onuto tumi mlɩaa, mlɔ́pʋmɔ mʋ́ ɔnɔ ngya? 4Kpaalɩ sʋ mlɩlowun ipian amʋ fɛ́ɛ́ asʋn wanklaan amʋ sʋ? Megyi kpaalɩ sʋ! 5Ntra fɩtɛ mlɩ. Mlɩ Mose mbla amʋsʋ gyi sʋ Bulu lapʋ Ɔŋɛ Wankɩhɛ amʋ ha mlɩ, ɔdɛ ofula ɛ bwɛ mlɩtɔ? Ɛkɛkɛɛkɛ! Alɩá mlɩlonu asʋn wanklaan amʋ, hɔ mʋ́sʋ gyi sʋ ɔlɔpʋha mlɩ.
6Mlɩpʋkɩ anɩ nain Abraham. Ɩbʋ Bulu asʋn wanlɩnhɛ amʋtɔ ánɩ́, “Abraham lɔhɔ Bulu gyi. Mʋ́ sʋ Bulu lotsu mʋá mʋ asʋn da ɔkpa.” 7Mʋ́ sʋ ilehian ánɩ́ mlɛ́bɩá aha amʋʋ bɔhɔ Bulu gyi amʋ gyi Abraham abi onuto nɩ. 8Bulu asʋn wanlɩnhɛ amʋ lɛblɩ yaɩ ánɩ́ Bulu ɔbɔ́tsʋn aha amʋʋ bʋmegyi Yudafɔ amʋ hogyisʋ, tsu amʋ́á amʋ́ asʋn da ɔkpa. Ɩnɩ sʋ Bulu lɛbla Abraham asʋn wanklaan amʋ dodoodo ɔbɛɛ, “Fʋsʋ nɔ́tsʋn yula ɔsʋlʋsʋ aha fɛ́ɛ́.” 9Abraham lɔhɔ Bulu gyi. Mʋ́ sʋ Bulu loyula mʋ. Mʋ́ sʋ sei anfɩ a, Bulu ɔbɔ́pʋ oyula amʋʋ ɔlɔpʋyula Abraham amʋ yula aha ánɩ́ bahɔ Kristo gyi.
10Tamɛ ɩlwɩɩ dɩn aha ánɩ́ amʋ́ ansɩ dɩn Mose mbla amʋsʋ gyisʋ. Tsufɛ bɔwanlɩn wa Bulu asʋn amʋtɔ bɛɛ, “Bulu lalwɩɩ ɔhagyiɔha ánɩ́ omegyi mbla amʋʋ bɔwanlɩn wa Bulu mbla ɔwʋlʋtɔ amʋ fɛ́ɛ́sʋ.” 11Sei a, ɩlawankɩ ánɩ́ ɔhaa má ɩnʋá mʋ mbla amʋsʋ gyi sʋ Bulu obótsu mʋ ánɩ́ mʋ asʋn da ɔkpa. Tsufɛ Bulu asʋn wanlɩnhɛ amʋ lɛblɩ ɔbɛɛ, “Ɔha ánɩ́ mʋ hogyi sʋ Bulu latsu mʋ ánɩ́ mʋ asʋn da ɔkpa obénya nkpa.” 12Mbla amʋsʋ gyi mɛna hogyisʋ, tamɛ Bulu asʋn wanlɩnhɛ amʋ lɛblɩ ɔbɛɛ, “Ɔhagyiɔha ánɩ́ otegyi mbla amʋsʋ ɔbɔ́tsʋn mʋ́sʋ nya nkpa.”
13Tamɛ anɩ sʋ Kristo lemli ɔha lwɩɩhɛ brɛá bɛda mʋ manta oyikpalihɛ amʋsʋ. Mʋ́ sʋ ɔlɛlɛ anɩ tsu ɩlwɩɩ amʋʋ mbla amʋ lɛtɩ ha anɩ amʋ asɩ. Tsufɛ Bulu asʋn wanlɩnhɛ amʋ lɛblɩ ɔbɛɛ, “Ɩlwɩɩ dɩn ɔhagyiɔha ánɩ́ bɛda manta oyisʋ.” 14Kristo lowu, mɛnɩ Bulu ɔbɔ́pʋ oyula amʋʋ ɔlɛhɩɛ ha Abraham amʋ kɛn yula aha ánɩ́ bʋmegyi Yudafɔ, mɛnɩ abɔ́tsʋn anɩ Kristo Yesu hogyisʋ nya Ɔŋɛ Wankɩhɛ amʋʋ ɔlɛhɩɛ amʋ.
Mbla Amʋ Pʋ́ Bulu Nhɩhɩɛ
15Mɩ apio, mpʋ ndɛ tsiatɔ asʋn kʋ flo asʋn anfɩ ha mlɩ. Alɩ amʋʋ ɔha ɔdɩnka ibwi mʋ asʋnsʋ ɔbɛɛ, ɔkʋ ogyi mʋ atɔ, ɔhaa má ɔkpa tsɛ mʋ́, ntɛ lɛ ɩkʋ mʋ́tɔ amʋ a, alɩ igyi ntam amʋʋ Bulu lɛka ha Abraham amʋ ɛ nɩ. 16Anɩ nain Abraham mʋa mʋ nanyɔ Bulu lɛka ntam ha. Alɩ asʋn anfɩ imosuna ánɩ́ mʋ aná tsɔtsɔɔtsɔ, mboun mʋ na ɔkʋlɛ pɛ. Mʋ na amʋ gyi Kristo a. 17Asʋn ánɩ́ ndɛblɩ gyi, Bulu lɛka ntam ha anɩ nain Abraham. Ɔlɛdɩnka ibwi mʋ́sʋ pʋsuna ánɩ́ obégyi mʋ́sʋ. Mbla amʋʋ ɔlɔwa ha Mose nfi lafana adʋasa (430) ɔma amʋ ɩmɛ́ɛtalɩ ka ntam amʋʋ ɔlɛdɩnka ibwi mʋ́sʋ amʋtɔ, ntɛ tsɛ mʋ́ ɛkɛkɛɛkɛ. 18Tsufɛ nɩ mbla amʋsʋ gyi sʋ ɔha ɩbɩ bɛ́da agyapadɩɛ amʋʋ Bulu lɛhɩɛ yaɩ amʋ a, mʋmʋ megyi hɩɛ Bulu lɛhɩɛ mʋ́ yaɩ Abraham. Tamɛ ɔnɔkwalɩ amʋ gyi, kie ɔlɔpʋkie mʋ.
19Mʋmʋ labi mɔmʋ mbla amʋ bʋ? Bulu lɔpʋ mʋ́ ɛ manta mʋ́sʋ, mɛnɩ ibósuna aha tɔá lakpan gyi. Tamɛ ɔlɔwa mbla amʋ ánɩ́ ibétsia alɩɩ yɔfʋn brɛá Abraham mʋ na amʋ ɔbɛ́ba. Mʋgyi mʋ atɔ ogyipʋ nɩ. Ɔlɔpʋ mbla amʋ ha mʋ abɔpʋ bɔpʋ bɔwa Mose ɩbɩtɔ. Mʋlɔbwɛ Bulu mʋa Israelfɔ nsɩnɛ ɔlapʋ nɩ. 20Nsɩnɛ ɔlapʋ tamalɩɩ ha ɔbakʋlɛ, tamɛ ɔbakʋlɛ Bulu gyi.
Labiá Mbla Amʋ Ɩbʋ
21Bulu mbla amʋ ɩlɔkʋsʋ lɩɩ mʋ nhɩhɩɛ amʋʋ ɔlɛhɩɛ yaɩ amʋsʋ? Ɛkɛkɛɛkɛ! Nɩ mbla kʋ ɩbɛ́talɩ ha anɩ nkpa ánɩ́ ɩtamata a, tɛkɩ abɛ́talɩ gyi asʋ Bulu ansɩtɔ, nɩ anɩlegyi mʋ́sʋ. 22Tamɛ Bulu asʋn wanlɩnhɛ amʋ ɩlɛblɩá lakpan lagyi ɔyɩtɔ aha fɛ́ɛ́sʋ plɩplɩplɩplɩ. Mʋ́ sʋ atɔ amʋʋ Bulu lɛhɩɛ yaɩ amʋ igyi Kristo ahogyipʋ klɛ.
23Tamɛ asa Yesu Kristo hogyi lɛba ɔyɩtɔ a, mbla amʋ ɩlɛklɩ anɩ fɛ obu adɩpʋ. Ɔhaa menya mʋ ɩwɩ, bɔfʋn brɛá Bulu lɛbɛlɛ Kristo hogyi ɔwan. 24Mʋ́ sʋ mbla amʋ lɔbwɛ anɩsʋ ɔkɩpʋ bɔfʋn brɛá Kristo lɛba, mɛnɩ Bulu obótsu anɩ ánɩ́ anɩ asʋn da ɔkpa mʋ ansɩtɔ, tsʋn anɩ Kristo hogyisʋ. 25Ɩnɩá Kristo hogyi laba sʋ a, imehian ánɩ́ mbla amʋ ɔbɛ́tra bwɛ anɩsʋ ɔkɩpʋ.
26Tsufɛ mlɩ Kristo Yesu hogyi sʋ mlɩ fɛ́ɛ́ mlɩlabwɛ Bulu abi. 27Mlɩ aha ánɩ́ mlɩa Yesu Kristo mlɩlabwɛ kʋlɛ tsʋn asubɔsʋ mlɩlatsu mʋ tsiatɔ fɛ́ɛ́. 28Mʋ́ sʋ Yudayin ntɛ Grikiyin tra ɔma ɩnʋ. Ɔkpábi ntɛ ɔdɩhɩɛ, ɔtsɩ ntɛ oyin tra ɔma ɩnʋ. Tsufɛ mlɩ fɛ́ɛ́ mlɩlabwɛ kʋlɛ mlɩa Kristo Yesunyɔ ɩkʋlɛbwɛtɔ. 29Ɩnɩá mlɩlabwɛ Kristo klɛ sʋ a, mlɩlabwɛ Abraham abi-aná onuto, pʋ́ mʋ atɔ agyipʋ. Ɩnɩ sʋ ɩtɔ amʋʋ Bulu lɛhɩɛ yaɩ Abraham amʋ igyi mlɩ klɛ.
Currently Selected:
Galatiafɔ 3: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation
