Galatiafɔ 2
2
Paulo Mʋa Sumbi Ayɔpʋ Atrahɛ Amʋ
1Nfi duana ɔma a, mɩa Barnaba anɩlɛkpa Tito buo ɩwɩ, yinki yɔ Yerusalem. 2Bulu lɛlɛ suna mɩ ánɩ́ nyɔ ɩnʋ, sʋ nɔyɔ. Alɩá mɩ agyʋma mɔ́ɔbwɛ kpaalɩ sʋ a, negyankpa lɛ asʋntɔ suna ɔpasua ahandɛ amʋ nkʋlɛ ɩtsɛtɔ. Nɛbla amʋ́ asʋn wanklaan amʋʋ nna ndɛ mʋ́ ɔkan da aha ánɩ́ bʋmegyi Yudafɔtɔ amʋ. Botsula dɩnka mʋ́sʋ. 3Ɩbʋ mʋ́tɔá Grikiyin Tito amʋʋ anɩlɛkpa buo ɩwɩ amʋ gyi, tamɛ bʋmɛhɩɛ mʋ bɛɛ, ɔtɩn kete. 4Ɩbʋ mʋ́tɔá Akristofɔ afunupʋ akʋá bɛkɩ ansɩ bowie anɩtɔ bekleá ɔtɩn kete. Tsufɛ bodunka ánɩ́ béyinta ɩwɩsʋtsia amʋʋ Kristo Yesu laha anɩ amʋ; abʋbwɛ anɩ amli nkpábi ha Yudafɔ mbla amʋ. 5Tamɛ anɩmesi ɩwɩ ha amʋ́ kpalobi kʋraa, mɛnɩ ɔnɔkwalɩá ɩbʋ asʋn wanklaan amʋtɔ ɩmɛ́ɛtsɛ ha mlɩ.
6Ɔpasua ahandɛ amʋʋ bʋbʋ ɩnʋ amʋ bʋmɛbla mɩ asʋansʋ bɛɛ, mpʋtsɩa asʋn wanklaan amʋʋ ndɛblɩ amʋtɔ. (Ɩnɩá ndɛ amʋ́ tɩ ahandɛ kʋraa a, megyi bɛɛ, amʋ́ handɛ amʋ ɩbʋ mɩ labi, tsufɛ Bulu mʋ́ tamakɩ ɔhaa ansɩtɔ.) 7Tamɛ ahandɛ amʋ bowun ánɩ́ Bulu lɔpʋ asʋn wanklaan amʋ ha mɩ ɔbɛɛ, nda mʋ́ ɔkan aha ánɩ́ bʋmegyi Yudafɔtɔ,#2:7 Aha ánɩ́ bʋmegyi Yudafɔ tamatɩn kete. Yudafɔ gyi kete atɩnpʋ. fɛ alɩá ɔlɔpʋha Petro ɛ ɔbɛɛ, ɔda mʋ́ ɔkan Yudafɔtɔ. 8Tsufɛ Bulu lɛha Kefa ánɩ́ bʋtɛtra tɩ mʋ Petro tumi, ogyi mʋ sumbi ɔyɔpʋ Yudafɔtɔ. Mʋ kɛn laha mɩ tumi, ngyi mʋ sumbi ɔyɔpʋ aha ánɩ́ bʋmegyi Yudafɔtɔ ɛ nɩ. 9Ɩnʋ a, ɩlɔwankɩ Yakobo mʋa Petro pʋ́ Yohane amʋʋ bʋhɩɛ bʋgyi ɔpasua amʋ ɔtan amʋ́á Bulu lapʋ alɩ agyʋma anfɩ kie mɩ. Mʋ́ sʋ bɔwa mɩa Barnaba ɩbɩ, pʋsuna ánɩ́ anɩlabwɛ kʋlɛ. Botsula ánɩ́ mɩa Barnaba ayɔ agyʋma aha ánɩ́ bʋmegyi Yudafɔtɔ, amʋ́ ɛ abʋyɔ agyʋma Yudafɔtɔ. 10Mʋ́á bodunka tsu anɩ wa gyi, akaɩn amʋ́tɔ aha ánɩ́ bʋma tɔtɔsʋ. Mʋ́ kɛn gyi tɔá ndekleá nɔ́bwɛ ɛ nɩ.
Paulo Ɩyɩnwa Wa Petro
11Tamɛ brɛá Petro lɛba Antiokia wulutɔ a, nɔwa ɩyɩn wa mʋ aha ansɩtɔ, tsufɛ tɔá ɔlɔbwɛ itepi ma alɛ. 12Brɛá ɔlɛba a, mʋa ahogyipʋá bʋmegyi Yudafɔ bʋtɔwa ɩbɩ gyi atɔ, tamɛ Yudafɔ akʋ benya tsu Yakobo wa ba pɛ, ɔlɛbɩtɩ ɩwɩ lɛ aha amʋtɔ, tsufɛ ɔdɛ ahogyipʋ amʋʋ bɛɛ bʋtɩn kete amʋ ifu nya. 13Ɩnɩá ndɛblɩ a, Yudafɔ atrahɛ amʋ ɛ bʋbuo Petro apinabwɛbi anfɩ. Barnaba o leyinki yɔ obuo amʋ́. 14Nowun ánɩ́ amʋ́ bwɛhɛ amʋ ɩmɛkana ɔnɔkwalɩá ɩbʋ asʋn wanklaan amʋtɔ. Mʋ́ sʋ nɛbla Petro aha amʋ fɛ́ɛ́ ansɩtɔ mbɛɛ, “Petro, Yudayin fʋgyi, tamɛ fʋmɛdɛ Yudafɔ amandɩɛsʋ gyi. Ɔmátɔfɔ amandɩɛsʋ fʋdegyi. Ntogyi sʋ fʋdɛ aha amʋʋ bʋmegyi Yudafɔ amʋ hɩɛ fɛɛ, bʋbwɛ Yudafɔ amandɩɛá fakina?”
Hogyisʋ Bulu Tɔtsʋn Hɔ Yudafɔ Pʋ́ Ɔmá Bambasʋfɔ Nkpa
15Yudafɔ lɔkwɩɩ mɩa fʋnyɔ. Megyi aha amʋʋ bʋmegyi Yudafɔ, bʋmeyin Bulu mbla amʋtɔ atsu. 16Tamɛ anɩ Yudafɔ Akristofɔ amʋ mʋ́ anɩyin ánɩ́ megyi Mose mbla amʋsʋ gyi sʋ Bulu totsu ɔha ánɩ́ mʋ asʋn da ɔkpa mʋ ansɩtɔ, nkɛtɩ Yesu Kristo hogyi. Mʋ́ sʋ anɩlahɔ mʋ gyi, mɛnɩ Bulu ɔbɔ́tsʋn mʋ hogyi amʋsʋ ha anɩ asʋ nɩ. Tsufɛ nɩ mbla amʋsʋ gyi sʋ mʋ́ a, tɛkɩ ɔhaa méegyi asʋ Bulu ansɩtɔ. 17Anɩdedunka ánɩ́ Bulu ɔtsʋn anɩ Kristo hogyisʋ, otsu anɩá anɩ asʋn da ɔkpa mʋ ansɩtɔ. Tamɛ nɩ Yudafɔ akʋ bʋdɛ anɩ mboun kɩ lakpan abwɛpʋ a, mʋmʋ imosuna ánɩ́ asʋkpan Kristo dɛ anɩ suna a? Ɛkɛkɛɛkɛ! 18Nɩ nakina Mose mbla amʋ, layɔ ndɛ mʋ́sʋ gyi a, mʋmʋ ilosuna ánɩ́ ɩtɔ lalahɛ nɔyɔ ndɛbwɛ a. 19Tsufɛ Mose mbla amʋ ilosuna ánɩ́ nawu. Ɩlɛha negyi ɩwɩ, mɛnɩ nétsia nkpa pɔpwɛ ha Bulu. Mɩa Kristonyɔ bɛda manta oyikpalihɛsʋ ɔŋɛtɔ. 20Mʋ́ sʋ ntsie nkpa sei, tamɛ megyi mɩ onuto tsie nkpa ɔsʋlʋ anfɩsʋ. Kristo, ogyi Bulu mʋ Bi amʋ tsie mɩtɔ. Mʋlɔdwɛ mɩ, bowu ha mɩ. Mʋ hogyi sʋ ntsie nkpa. 21Mʋ́ sʋ mmɛdɛ Bulu awɩtɔlɛ amʋ kina. Tsufɛ nɩ Mose mbla amʋ sʋ ɔha obégyi asʋ Bulu ansɩtɔ a, mʋmʋ kpaalɩ Kristo lowu!
Currently Selected:
Galatiafɔ 2: nko
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation